𖼽𖽱𖾐 𖼐𖽕 𖼍𖽔𖾐 𖼐𖽺𖾐 𖼍𖽕𖾑 𖼈𖽪𖽺𖾑 𖼞𖽙𖾐 𖼮𖽑𖽻 𖼹𖽳𖾐 𖼀𖽑𖽢
18
1 𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼖𖽙𖾐 𖼮𖽑𖽻𖾐 𖼊𖽑𖽜𖾐 𖼦𖽑𖽻𖾐 𖼠𖽙𖾑 𖼍𖽻𖾐，𖼽𖽱𖾐 𖼐𖽕 𖼍𖽔𖾐 𖼞𖽳𖾐 𖼐𖽑𖽧𖾐 𖼄𖽙𖾐 𖼐𖽺𖾐 𖼍𖽕𖾑 𖼈𖽪𖽺𖾑 𖼞𖽳𖾐 𖼐𖽑𖽧𖾐 𖼄𖽙𖾐 𖼣𖽝 𖼞𖽳𖾐 𖼷𖽙𖾐 𖼖𖽙𖾐 𖼺𖽶𖾑 𖼺𖽺𖾑，𖼽𖽱𖾐 𖼐𖽕 𖼍𖽔𖾐 𖼽𖽻 𖼄𖽳𖾑 𖼈𖽪𖾑 𖼠𖽻𖾐 𖼊𖽑𖽺 𖼮𖽨 𖼖𖽙𖾐 𖼺𖽶𖾑 𖼍𖽕𖾑 𖼈𖽪𖽺𖾑 𖼊𖽑𖽺 𖼮𖽨． 2 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽻𖾐 𖼍𖽪𖾐，𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼊𖽑𖽺 𖼹𖽺𖾐 𖼽𖽻 𖼀𖽙 𖼮𖽑𖽶𖾐 𖼍𖽙𖾑，𖼽𖽻 𖼞𖽜 𖼀𖽑𖽚𖾐 𖼽𖽻 𖼀𖽙 𖽃𖽔𖾑 𖼞𖽑𖽶𖾐 𖼄𖽔 𖼞𖽚 𖼽𖽡𖾐． 3 𖼽𖽱𖾐 𖼐𖽕 𖼍𖽔𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼞𖽪𖾐 𖼮𖽡𖽺𖾐 𖼽𖽱𖾐 𖼐𖽕 𖼍𖽔𖾐 𖼽𖽻 𖼄𖽳𖾑 𖼈𖽪𖾑 𖼠𖽻𖾐 𖼊𖽑𖽺 𖼐𖽙𖾑 𖼣𖽜 𖼖𖽙𖾐 𖼺𖽶𖾑 𖼍𖽕𖾑 𖼈𖽪𖽺𖾑 𖼊𖽑𖽺 𖼐𖽙𖾑 𖼣𖽜． 4 𖼽𖽱𖾐 𖼐𖽕 𖼍𖽔𖾐 𖼽𖽻 𖼞𖽳𖾐 𖼊𖽑𖽦 𖼮𖽻𖾐 𖼀𖽑𖽡𖽻𖾐 𖼮𖽻 𖼖𖽧 𖼹𖽺𖾐 𖼖𖽻𖾐 𖼈𖽺𖾐 𖼍𖽕𖾑 𖼈𖽪𖽺𖾑 𖼞𖽜 𖼈𖽦，𖼦𖽑𖽔𖾐 𖼖𖽺𖾑 𖼽𖽻 𖼞𖽳𖾐 𖼰𖽕𖾑 𖼊𖽝 𖼀𖽑𖽡𖽻𖾐、𖽃𖽔𖾑 𖼊𖽑𖽙、𖼮𖽑𖽡𖽦𖾐 𖼐𖽺𖾐 𖼮𖽡𖽪 𖼳𖽡𖽦𖾐，𖼄𖽳𖾑 𖼄𖽳 𖼈𖽺𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼞𖽜 𖼦𖽑𖽙𖾐．5 𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼊𖽑𖽺 𖼹𖽡𖾐 𖽃𖽔 𖼊𖽺𖾑 𖼠𖽻𖾐 𖼽𖽡𖾐 𖼣𖽻𖾐 𖼦𖽻，𖼽𖽻 𖼄𖽡𖽻 𖼂𖽺𖾐 𖼮𖽨𖾐 𖼀𖽻𖾐 𖼮𖽻𖾐，𖽃𖽔𖾐 𖼺𖽺𖾑 𖼺𖽻 𖼖𖽚 𖼽𖽻 𖼊𖽑𖽺 𖼺𖽺𖾐 𖼄𖽦 𖼈𖽪𖾑 𖼷𖽪𖾐 𖼂𖽺𖾐．𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼐𖽺𖾐 𖼺𖽻 𖼖𖽚 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻，𖼄𖽳𖾑 𖼄𖽳 𖼦𖽑𖽔𖾐 𖼮𖽶𖾐 𖼖𖽺𖾑．
𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼊𖽑𖽺 𖼐𖽑𖽧𖾐 𖼷𖽚𖾐
6 𖼍𖽕𖾑 𖼈𖽪𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼺𖽦 𖼳𖽶𖾐 𖼦𖽑𖽙𖾐，𖼷𖽑𖽻𖾐 𖼷𖽪𖾐 𖼖𖽙𖾐 𖼮𖽑𖽻𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽡 𖼺𖽴𖾑 𖼖𖽡𖽦𖾑 𖼄𖽡𖾐 𖼊𖽺𖾐 𖼖𖽪𖾐 𖼞𖽑𖽙𖾐 𖼣𖽻𖾐 𖼞𖽳𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼊𖽚𖾐 𖼖𖽻𖾐，𖼖𖽺𖾑 𖼖𖽺𖾑 𖼺𖽪𖾐 𖼺𖽪𖾐，𖼺𖽪𖾑 𖼮𖽻 𖼞𖽪𖾐 𖼰𖽴𖾐，𖼠𖽪𖾐 𖼊𖽝 𖼖𖽦 𖼮𖽝 𖼮𖽝，𖼖𖽻𖾐 𖼺𖽻 𖼖𖽚 𖼈𖽪𖾐 𖼍𖽦 𖼊𖽑𖽺 𖼹𖽶𖾐．
7 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽶𖾑 𖼹𖽻𖾐 𖼺𖽪𖾑 𖼮𖽻 𖼞𖽪𖾐 𖼰𖽴𖾐，𖼀𖽦𖾐：
“𖼺𖽻 𖼖𖽚 𖼍𖽪𖾐 𖼍𖽪𖾐 𖼽𖽚𖾐 𖼺𖽦 𖼳𖽶𖾐！
𖼍𖽕𖾑 𖼈𖽪𖽺𖾑 𖼄𖽺 𖼄𖽺 𖼽𖽚𖾐 𖼺𖽦 𖼳𖽶𖾐！”
8 𖼺𖽻 𖼖𖽚 𖼊𖽻 𖼂𖽪𖾑 𖼦𖽑𖽺𖾑 𖼊𖽻 𖼮𖽨 𖼦𖽑𖽻𖾐，𖼦𖽑𖽔𖾐 𖼮𖽶𖾐 𖼦𖽑𖽦 𖼞𖽑𖽴 𖼺𖽺𖾑，𖼀𖽦𖾐：“𖼽𖽻 𖼈𖽳𖾐 𖼍𖽪𖾐 𖼍𖽪𖾐 𖼍𖽺𖾑 𖼻𖽜 𖼣𖽙𖾐 𖼊𖽑𖽺 𖼞𖽑𖽪𖾐 𖼮𖽑𖽳，𖼄𖽺 𖼄𖽺 𖼻𖽜 𖼍𖽕𖾑 𖼈𖽪𖽺𖾑 𖼊𖽑𖽺 𖼞𖽑𖽪𖾐 𖼮𖽑𖽳，𖼽𖽻 𖼞𖽜 𖼈𖽪𖾐 𖼍𖽦 𖼄𖽔 𖼂𖽺𖾐 𖼍𖽺𖾑 𖼣𖽻𖾐．” 9 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽻𖾐 𖼍𖽪𖾐，𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼊𖽑𖽺 𖼷𖽜𖾐．
10 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼐𖽜𖾑 𖼠𖽻𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼳𖽨𖾐 𖼊𖽶𖾐 𖼺𖽻 𖼖𖽚𖾐 𖼊𖽑𖽺 𖼻𖽸，𖼽𖽻 𖽃𖽔𖾑 𖼞𖽑𖽶𖾐 𖼮𖽻𖾐 𖼄𖽔 𖼠𖽕𖾐 𖼊𖽻 𖼊𖽑𖽜𖾐．𖼍𖽕𖾑 𖼈𖽪𖽺𖾑 𖽃𖽙𖾑 𖼄𖽺 𖼖𖽙𖾐 𖼺𖽶𖾑 𖼮𖽑𖽧 𖼀𖽝𖾐，𖼺𖽻 𖼖𖽚 𖼖𖽦 𖼀𖽑𖽦𖾐 𖼞𖽑𖽶𖾐 𖼂𖽨𖾐 𖼹𖽶 𖼈𖽺𖾐 𖼍𖽳𖾐． 11 𖼺𖽻 𖼖𖽚 𖼂𖽨𖾐 𖼹𖽶 𖼈𖽺𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼷𖽴𖾐 𖼺𖽺𖾑，𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝：“𖼣𖽙𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼊𖽑𖽪𖾐 𖼖𖽜𖾐 𖼀𖽜𖾐 𖼖𖽙𖾐 𖼍𖽡 𖼊𖽻𖾐．” 𖼍𖽕𖾑 𖼈𖽪𖽺𖾑 𖼐𖽑𖽡 𖼂𖽦𖾑 𖼐𖽺𖾐 𖼺𖽻 𖼖𖽚 𖼊𖽑𖽺 𖼵𖽕𖾑 𖼦𖽑𖽙𖾐．
12 𖼽𖽺𖾐 𖼦𖽴 𖼦𖽫 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼮𖽻𖾐，𖼺𖽻 𖼖𖽚 𖼖𖽙𖾐 𖼄𖽔 𖼮𖽑𖽻𖾐 𖼮𖽻𖾐 𖼺𖽺𖾑，𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼊𖽑𖽺 𖼮𖽡𖽮𖾐， 13 𖽃𖽔𖾐 𖼺𖽺𖾑 𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼞𖽜 𖼽𖽻 𖼀𖽙 𖼮𖽑𖽶𖾐 𖼄𖽔 𖼮𖽻𖾐，𖼽𖽻 𖼞𖽜 𖼍𖽪𖾐 𖼈𖽪𖾑 𖼷𖽪𖾐 𖼂𖽺𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼄𖽔 𖼐𖽙 𖼄𖽦 𖼀𖽑𖽙 𖼦𖽳 𖼰𖽕𖾑 𖼊𖽝 𖽂𖽙 𖼊𖽙𖾐．
14 𖼍𖽕𖾑 𖼈𖽪𖽺𖾑 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽳𖾑 𖼄𖽳 𖼮𖽨𖾐 𖼀𖽻𖾐 𖼮𖽻𖾐，𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼽𖽻 𖼖𖽙𖾐 𖼮𖽑𖽻𖾐 𖼮𖽻𖾐． 15 𖼺𖽻 𖼖𖽚 𖼐𖽦𖾐 𖼄𖽡𖽻𖾐，𖼍𖽕𖾑 𖼈𖽪𖽺𖾑 𖼞𖽑𖽙𖾐 𖼂𖽺𖾐 𖼺𖽪𖾐 𖼮𖽨𖾐 𖼀𖽻𖾐 𖼮𖽻𖾐，𖽃𖽔𖾐 𖼺𖽺𖾑 𖼠𖽳𖾐 𖼠𖽳𖾐 𖼽𖽻 𖼊𖽑𖽺 𖼮𖽡𖽮𖾐． 16 𖼦𖽑𖽻𖾐 𖼊𖽑𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼞𖽑𖽙𖾐 𖼣𖽻𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼮𖽨，𖼞𖽪𖾐 𖼮𖽡𖽺𖾐 𖼽𖽻 𖼄𖽔 𖼐𖽙 𖼄𖽦 𖼀𖽑𖽙 𖼦𖽳 𖼰𖽕𖾑 𖼊𖽝 𖽂𖽙 𖼊𖽙𖾐．
𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼊𖽑𖽺 𖼇𖽪
17 \pn 𖼺𖽻 𖼖𖽚 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝：“𖼣𖽙𖾐 𖼽𖽻 𖼄𖽳𖾑 𖼷𖽺𖾐 𖼖𖽦 𖼀𖽑𖽦𖾐 𖼻𖽜 𖼍𖽕𖾑 𖼈𖽪𖽺𖾑 𖼊𖽑𖽺 𖼦𖽹𖾑 𖼄𖽔 𖼺𖽙𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽜 𖼽𖽻 𖼊𖽑𖽺 𖼦𖽹𖾑 𖼳𖽶𖾐 𖼍𖽳𖾐．” 𖽃𖽔𖾐 𖼺𖽺𖾑 𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼣𖽙𖾐 𖼞𖽳𖾐 𖼻𖽙 𖼄𖽳 𖼈𖽳 𖼄𖽡 𖼖𖽔𖾐 𖼇𖽪𖾐 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐，𖼐𖽑𖽡𖾐 𖼣𖽙𖾐 𖼞𖽳𖾐 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼂𖽺𖾐，𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼰𖽕𖾑 𖼊𖽝 𖼍𖽺𖾑 𖼻𖽻𖾐．”
18 𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼊𖽑𖽺 𖼊𖽻 𖼞𖽑𖽚：“𖼣𖽻𖾐 𖼀𖽙 𖼞𖽳𖾐 𖼈𖽴 𖼮𖽑𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖽃𖽔 𖼊𖽺𖾑 𖼳𖽶 𖼰𖽕𖾐 𖼖𖽚 𖼐𖽺𖾑，𖼣𖽙𖾐 𖽃𖽔 𖼊𖽺𖾑 𖼳𖽶 𖼷𖽑𖽻𖾐 𖼣𖽻𖾐 𖼺𖽺𖾑，𖼈𖽪𖾐 𖼍𖽦 𖼞𖽳𖾐 𖼄𖽦𖾑 𖼈𖽪𖾐 𖼂𖽺𖾐 𖼽𖽻 𖼐𖽺𖾑？ 19 𖼺𖽻 𖼖𖽚 𖼞𖽳𖾐 𖼻𖽙 𖼄𖽳 𖼄𖽡 𖼖𖽔𖾐 𖼊𖽑𖽺 𖼇𖽪𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼞𖽜 𖼰𖽶𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼺𖽻 𖼖𖽚 𖼞𖽚 𖼀𖽑𖽚𖾐 𖼽𖽻 𖼻𖽙 𖼄𖽳 𖼊𖽑𖽺 𖼇𖽪𖾐 𖼺𖽺𖾑，𖼄𖽡 𖼦𖽴 𖼖𖽔𖾐 𖼺𖽪𖾐 𖼷𖽑𖽻𖾐 𖼽𖽕𖾑 𖼍𖽴 𖼖𖽡𖽦𖾑 𖼊𖽑𖽺 𖼞𖽜．
20 𖼠𖽙𖾑 𖼍𖽻𖾐，𖼺𖽻 𖼖𖽚 𖼞𖽳𖾐 𖼻𖽙 𖼄𖽳 𖼄𖽡 𖼰𖽡𖽕 𖼍𖽕𖾑 𖼈𖽪𖽺𖾑 𖼊𖽑𖽺 𖼐𖽦𖾐 𖼄𖽳𖾐，𖼄𖽡𖽻 𖼦𖽑𖽺𖾑 𖼮𖽨𖾐 𖼀𖽦𖾐 𖼺𖽻 𖼖𖽚 𖼊𖽑𖽺 𖼊𖽑𖽧 𖼺𖽪𖾐 𖼮𖽻𖾐，𖽃𖽔𖾐 𖼺𖽺𖾑 𖼺𖽻 𖼖𖽚 𖼦𖽑𖽶𖾐 𖼮𖽶𖾐 𖼖𖽺𖾑． 21 𖼽𖽻 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝：“𖼣𖽙𖾐 𖼄𖽡 𖼰𖽡𖽕 𖼊𖽑𖽺 𖼀𖽑𖽨 𖼍𖽕𖾑 𖼈𖽪𖽺𖾑 𖼊𖽑𖽺 𖼞𖽜 𖼺𖽺𖾑，𖼄𖽡 𖼰𖽡𖽕 𖼊𖽑𖽺 𖼻𖽜 𖼍𖽕𖾑 𖼈𖽪𖽺𖾑 𖼞𖽳𖾐 𖼈𖽪𖾐 𖼂𖽝𖾐 𖼂𖽺𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽜 𖼽𖽻 𖼊𖽑𖽺 𖼦𖽹𖾑 𖼍𖽳𖾐．” 𖽃𖽔𖾐 𖼺𖽺𖾑 𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽙𖾑 𖼐𖽑𖽡𖾐 𖼠𖽕𖾐 𖼰𖽶𖾐 𖼣𖽙𖾐 𖼞𖽳𖾐 𖼄𖽦𖾑 𖼈𖽪𖾐 𖽂𖽙𖾐 𖼂𖽺𖾐 𖼊𖽙𖾐．”
𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼊𖽑𖽺 𖼮𖽡𖽮𖾐
22 𖼺𖽻 𖼖𖽚 𖼽𖽻 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼖𖽙𖾐 𖼀𖽦𖾐 𖼄𖽪𖾑：“𖼐𖽑𖽡𖾐 𖼈𖽳𖾐 𖼞𖽑𖽶𖾐 𖼞𖽑𖽶𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：‘𖼈𖽪𖾐 𖼍𖽦 𖼐𖽑𖽡𖾐 𖼊𖽑𖽺 𖼐𖽑𖽧𖾐 𖼺𖽳，𖼽𖽻 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼖𖽺𖾑 𖼐𖽑𖽡𖾐 𖼊𖽑𖽺 𖼮𖽨，𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽪𖾐 𖼍𖽦 𖼞𖽳𖾐 𖼄𖽦𖾑 𖼈𖽪𖾐 𖼂𖽺𖾐 𖼻𖽻𖾐！’”
23 𖽃𖽔𖾐 𖼺𖽺𖾑 𖼺𖽻 𖼖𖽚 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼀𖽦𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼊𖽑𖽧，𖼍𖽕𖾑 𖼈𖽪𖽺𖾑 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽡 𖼮𖽑𖽻，𖼈𖽪𖾐 𖼍𖽦 𖼞𖽳𖾐 𖼄𖽦𖾑 𖼈𖽪𖾐 𖼂𖽺𖾐 𖼦𖽑𖽺𖾑 𖼖𖽳𖾐 𖼮𖽡𖽺 𖼞𖽳𖾐 𖼄𖽡𖽻 𖼣𖽻𖾐 𖼖𖽔𖾑？ 𖼣𖽙𖾐 𖼦𖽑𖽺𖾑 𖼷𖽑𖽻𖾐 𖼳𖽚𖾑 𖼷𖽑𖽻𖾐 𖼞𖽫 𖼊𖽑𖽡 𖼽𖽚𖾐 𖼣𖽻𖾐．”
24 𖼍𖽕𖾑 𖼈𖽪𖽺𖾑 𖼞𖽑𖽙𖾐 𖼊𖽑𖽜𖾐 𖼺𖽪𖾐 𖼊𖽻 𖼂𖽪𖾑，𖼺𖽻 𖼖𖽚 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼀𖽦𖾐 𖼺𖽻 𖼖𖽚 𖼊𖽑𖽺 𖼰𖽨𖾐 𖼦𖽑𖽙𖾐． 25 𖼺𖽻 𖼖𖽚𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼈𖽪𖾐 𖼍𖽦 𖼊𖽑𖽡 𖼳𖽶 𖼇𖽪𖾐 𖼀𖽑𖽶 𖼖𖽺𖾑 𖼄𖽔 𖼖𖽡𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼻𖽙 𖼐𖽜𖾐 𖼞𖽳𖾐 𖼳𖽪 𖼦𖽑𖽙𖾐 𖼊𖽪 𖼮𖽡𖾐 𖼊𖽑𖽡 𖼦𖽑𖽙𖾐 𖼊𖽝𖾐 𖼍𖽺𖾑 𖼖𖽡𖾐，𖼈𖽪𖾐 𖼍𖽦 𖼞𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖽂𖽙𖾐 𖼖𖽦 𖼂𖽚𖾐 𖼊𖽙𖾐．’” 𖼺𖽻 𖼖𖽚 𖼦𖽑𖽺𖾑 𖼳𖽶 𖼄𖽪𖾐 𖼊𖽪𖾐 𖼻𖽜 𖼍𖽕𖾑 𖼈𖽪𖽺𖾑 𖼞𖽜 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽦 𖼠𖽻𖾐 𖼞𖽑𖽶𖾐 𖼳𖽶𖾐 𖼦𖽑𖽙𖾐 𖼖𖽡𖾐 𖼊𖽡 𖼮𖽑𖽻 𖼺𖽪𖾐 𖼣𖽻𖾐．
26 𖼺𖽻 𖼖𖽚 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼀𖽦𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼊𖽑𖽧，𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼐𖽑𖽧𖾐 𖼺𖽳 𖼈𖽪𖾐 𖼍𖽦 𖼞𖽳𖾐 𖼄𖽦𖾑 𖼈𖽪𖾐 𖼂𖽺𖾐．𖼍𖽧𖾑 𖼷𖽑𖽦𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼄𖽔 𖼮𖽑𖽡𖾐 𖼺𖽺 𖼞𖽑𖽶𖾑 𖼮𖽶𖾐， 27 𖼍𖽕𖾑 𖼈𖽪𖽺𖾑 𖼐𖽺𖾐 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼊𖽚𖾐 𖼽𖽡𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼐𖽑𖽡 𖼦𖽑𖽙𖾐 𖼽𖽚𖾐 𖼺𖽦 𖼦𖽑𖽙𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼻𖽙 𖼐𖽜𖾐 𖼞𖽳𖾐 𖼳𖽪 𖼦𖽑𖽙𖾐 𖼊𖽪 𖼮𖽡𖾐 𖼐𖽑𖽡 𖼦𖽑𖽙𖾐 𖼊𖽝𖾐 𖼈𖽺𖾐 𖼞𖽚 𖼖𖽻𖾐，𖼰𖽡𖽻𖾐 𖼈𖽪𖾐 𖼍𖽦 𖼊𖽑𖽺 𖼞𖽜，𖼈𖽪𖾐 𖼍𖽦 𖼞𖽳𖾐 𖼄𖽦𖾑 𖼈𖽪𖾐 𖼂𖽺𖾐．𖽃𖽔𖾐 𖼺𖽺𖾑，𖼺𖽻 𖼖𖽚 𖼽𖽻 𖼞𖽳𖾐 𖼻𖽙 𖼄𖽳 𖼄𖽡 𖼰𖽡𖽕 𖼊𖽑𖽺 𖼀𖽑𖽨 𖼍𖽕𖾑 𖼈𖽪𖽺𖾑 𖼖𖽙𖾐 𖼇𖽪𖾐．
28 𖼺𖽻 𖼖𖽚 𖼐𖽦𖾐 𖼄𖽡𖽻𖾐，𖼽𖽺𖾐 𖼦𖽴 𖼦𖽫 𖼍𖽕𖾑 𖼈𖽪𖽺𖾑 𖼖𖽙𖾐 𖼮𖽑𖽻𖾐 𖼮𖽻𖾐，𖼽𖽻 𖼦𖽑𖽔𖾐 𖼖𖽺𖾑 𖼺𖽝𖾑 𖼽𖽻 𖼻𖽙 𖼄𖽳 𖼄𖽡 𖼰𖽡𖽕 𖼖𖽺𖾑 𖼍𖽕𖾑 𖼈𖽪𖽺𖾑 𖼊𖽑𖽺 𖼐𖽙𖾑 𖼣𖽜， 29 𖽃𖽔𖾐 𖼺𖽺𖾑 𖼠𖽳𖾐 𖼠𖽳𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼮𖽡𖽮𖾐，𖼄𖽔 𖼐𖽙 𖼽𖽻 𖼖𖽙𖾐 𖼮𖽑𖽻𖾐 𖼮𖽡𖾐 𖼂𖽦𖾐 𖼊𖽑𖽪．
30 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽦 𖼈𖽪𖾑 𖼷𖽪𖾐 𖼄𖽔 𖼐𖽙 𖼊𖽚𖾐 𖼖𖽻𖾐 𖼰𖽕𖾑 𖼊𖽝，𖼽𖽻 𖼈𖽳𖾐 𖼰𖽕𖾑 𖼞𖽑𖽙𖾐 𖼊𖽝 𖼊𖽑𖽙 𖼞𖽑𖽶𖾑 𖼮𖽶𖾐，𖼍𖽕𖾑 𖼈𖽪𖽺𖾑 𖼄𖽡𖽻 𖼂𖽺𖾐 𖼞𖽑𖽶𖾑 𖼺𖽻 𖼖𖽚 𖽂𖽚 𖼞𖽑𖽶𖾐 𖼞𖽳𖾐 𖼠𖽳𖾐 𖼖𖽪𖾐 𖼷𖽶 𖼄𖽻 𖼦𖽶𖾑 𖼄𖽔 𖼷𖽑𖽶𖾐 𖼮𖽨𖾐 𖼀𖽻𖾐 𖼮𖽻𖾐，𖽃𖽔𖾐 𖼺𖽺𖾑 𖼽𖽻 𖼞𖽳𖾐 𖼄𖽡𖾐 𖼊𖽻 𖼠𖽳𖾐 𖼠𖽳𖾐 𖼈𖽳 𖼷𖽑𖽚．