𖼠𖽜𖾐 𖼖𖽡𖾑 𖼽𖽕𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽻𖾐
17
1 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼞𖽳𖾐 𖼄𖽦 𖼀𖽑𖽙 𖼞𖽜 𖼷𖽙𖾐 𖼖𖽙𖾐 𖼻𖽶𖾑 𖼖𖽻𖾐 𖼰𖽕𖾑 𖼊𖽝 𖼖𖽙𖾐 𖼀𖽙𖾐 𖼂𖽺𖾐 𖼳𖽡𖽻𖾐．𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼺𖽙𖾐 𖼠𖽜𖾐 𖼖𖽪𖾐 𖼞𖽳𖾐 𖼻𖽶𖾑 𖼖𖽻𖾐，𖼽𖽡𖾐 𖼺𖽙𖾐 𖼠𖽜𖾐 𖼖𖽪𖾐 𖼐𖽺𖾐 𖼽𖽕𖾑 𖼳𖽡𖾐 𖼰𖽡𖽔𖾐 𖼖𖽪𖾐 𖼠𖽻𖾐 𖼊𖽑𖽺 𖼽𖽡 𖼇𖽮 𖼍𖽕𖾑 𖼄𖽡𖽺 𖼄𖽡𖾐 𖼊𖽺𖾐 𖼞𖽳𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶． 2 𖼺𖽻 𖼖𖽚 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽺𖾑 𖼷𖽙𖾐 𖼖𖽙𖾐 𖼻𖽶𖾑 𖼖𖽻𖾐，𖼽𖽡 𖼖𖽔𖾐 𖼖𖽻𖾐 𖼞𖽑𖽪 𖼞𖽳𖾐 𖼦𖽑𖽺𖾐 𖼠𖽴𖾐 𖼍𖽚 𖼈𖽶，𖼄𖽦 𖼀𖽑𖽙 𖼂𖽺𖾐 𖼳𖽡𖽻𖾐 𖼀𖽑𖽢 𖼺𖽺𖾑，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝 𖼊𖽻𖾐． 3 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖽂𖽙 𖼰𖽡𖽺𖾐 𖼦𖽑𖽺𖾑 𖼰𖽡𖽺𖾐 𖼊𖽑𖽺 𖼮𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽂𖽙 𖼰𖽡𖽺𖾐 𖼞𖽑𖽶𖾑 𖼰𖽡𖽺𖾐 𖼊𖽑𖽺 𖼮𖽻𖾐，𖼠𖽻𖾐 𖼊𖽑𖽺 𖼖𖽻𖾐 𖼞𖽑𖽪 𖼊𖽑𖽡 𖼊𖽝𖾐 𖼰𖽨𖾑 𖼍𖽳𖾐．4 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼠𖽻𖾐 𖼞𖽑𖽶𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽚𖾐 𖼖𖽻𖾐，𖼽𖽻 𖼊𖽑𖽺 𖼠𖽜𖾐 𖼖𖽡𖾑 𖼽𖽕𖾑 𖼄𖽡𖾐，𖼽𖽻 𖼦𖽑𖽺𖾑 𖼰𖽡𖽔𖾐 𖼊𖽑𖽴𖾑 𖼺𖽪𖾐 𖼷𖽑𖽻𖾐 𖼣𖽻𖾐，𖼄𖽶𖾐 𖼞𖽳𖾐 𖼮𖽑𖽡𖽚 𖼖𖽦 𖼞𖽚 𖼐𖽺𖾐 𖼊𖽑𖽡 𖼣𖽜𖾐 𖼮𖽻𖾐． 5 𖼈𖽪𖾑 𖼊𖽡𖾐 𖼮𖽡 𖼍𖽕 𖼰𖽡𖾐 𖼊𖽴，𖼞𖽶𖾐 𖼮𖽑𖽶 𖼮𖽡 𖼞𖽑𖽚𖾐 𖼀𖽑𖽡𖽻𖾐 𖼈𖽦，𖼮𖽡 𖼞𖽑𖽶𖾑 𖼣𖽙 𖼷𖽑𖽡𖾐 𖼳𖽶 𖼰𖽡𖾐 𖼮𖽻𖾐． 6 𖼽𖽻 𖼮𖽑𖽡𖾐 𖼈𖽶 𖼞𖽳𖾐 𖼮𖽑𖽡𖾐 𖼹𖽧𖾑 𖼊𖽑𖽺 𖼮𖽡 𖼻𖽜 𖼮𖽑𖽨𖾑 𖼍𖽳𖾐，𖼖𖽺𖾐 𖼞𖽕 𖼊𖽑𖽺 𖼮𖽡 𖽃𖽔𖾑 𖼊𖽑𖽙 𖼊𖽑𖽡 𖼂𖽻𖾐 𖼀𖽶． 7 𖼦𖽑𖽔𖾐 𖼖𖽺𖾑 𖼖𖽦 𖼀𖽑𖽦𖾐 𖼞𖽑𖽶𖾐 𖼂𖽨𖾐 𖼹𖽶 𖼊𖽑𖽡 𖼂𖽻𖾐 𖼈𖽺𖾐，𖼂𖽨𖾐 𖼹𖽶 𖼈𖽶 𖼞𖽶𖾑𖽑 𖼄𖽳𖾐 𖼊𖽝 𖼖𖽚𖾐 𖼂𖽚𖾐 𖼞𖽳𖾐 𖼈𖽶 𖼊𖽜 𖼖𖽺𖾐 𖼮𖽻𖾐，𖼂𖽨𖾐 𖼹𖽶 𖼈𖽪𖾑 𖼊𖽡𖾐 𖼞𖽳𖾐 𖼦𖽜𖾐 𖼞𖽑𖽶𖾑 𖼳𖽶 𖼰𖽡𖾐 𖼮𖽻𖾐．𖼦𖽑𖽔𖾐 𖼖𖽺𖾑 𖼮𖽑𖽨𖾑 𖼊𖽪𖾐 𖼈𖽺𖾐 𖼺𖽪𖾐 𖼄𖽦 𖼀𖽑𖽙 𖼊𖽑𖽡 𖼽𖽚𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼺𖽜．
8 𖼠𖽜𖾐 𖼖𖽡𖾑 𖼽𖽕𖾑 𖼦𖽑𖽡𖽚 𖼍𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼖𖽙𖾐 𖽃𖽶𖾐 𖼮𖽸，𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼊𖽚𖾐 𖼖𖽻𖾐 𖼦𖽑𖽺𖾑 𖼠𖽻𖾐 𖼄𖽦 𖼀𖽑𖽙 𖼂𖽺𖾐 𖼳𖽡𖽻𖾐 𖼐𖽺𖾑？ 𖼣𖽙𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼄𖽔 𖼣𖽻𖾐 𖼖𖽔？ 𖼐𖽑𖽡𖾐 𖼈𖽳𖾐 𖼺𖽻 𖼖𖽚 𖼞𖽳𖾐 𖼮𖽜𖾐 𖼀𖽑𖽙 𖼄𖽔 𖼣𖽻𖾐 𖼖𖽔？ 𖼐𖽑𖽡𖾐 𖼈𖽳𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼺𖽺𖾐 𖼊𖽑𖽧 𖼖𖽻𖾐，𖼽𖽻 𖼞𖽜 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼹𖽺𖾐 𖼖𖽻𖾐 𖼄𖽺． 9 𖼽𖽻 𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦，𖼽𖽻 𖼣𖽙𖾐 𖼊𖽑𖽺 𖼺𖽦 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼈𖽳𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼀𖽑𖽚𖾐 𖼀𖽑𖽙 𖼂𖽺𖾐 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼽𖽻 𖼊𖽑𖽺 𖼊𖽝 𖽂𖽙 𖼊𖽙𖾐 𖼺𖽺𖾑，𖼽𖽻 𖼊𖽑𖽺 𖼺𖽦 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼈𖽳𖾐 𖼣𖽙𖾐 𖼈𖽳𖾐 𖼞𖽳𖾐 𖼀𖽑𖽚𖾐 𖼀𖽑𖽙 𖼂𖽺𖾐，𖼣𖽙𖾐 𖼈𖽳𖾐 𖼊𖽑𖽺 𖼠𖽙𖾐 𖼳𖽙𖾐 𖼖𖽡𖾐．” 10 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼦𖽑𖽔𖾐 𖼖𖽺𖾑 𖼀𖽦𖾐：“𖼣𖽙𖾐 𖽃𖽙𖾑 𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼊𖽑𖽺 𖼈𖽳𖾐 𖼵𖽶𖾐，𖼐𖽑𖽡𖾐 𖼈𖽳𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼺𖽺𖾐 𖼊𖽑𖽧 𖼖𖽻𖾐，𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦 𖼖𖽻𖾐 𖼄𖽺！” 11 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑，𖼺𖽻 𖼖𖽚 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽻 𖼮𖽨 𖼺𖽺𖾑，𖼄𖽳𖾑 𖼄𖽳 𖼠𖽻𖾐 𖼄𖽺，𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼞𖽴𖾐．
𖼍𖽕𖾑 𖼈𖽪𖽺𖾑 𖼰𖽕𖾑 𖼊𖽝 𖼄𖽡𖾐 𖼊𖽺𖾐 𖼮𖽑𖽡𖾐
12 𖼍𖽕𖾑 𖼈𖽪𖽺𖾑 𖼦𖽑𖽺𖾑 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼽𖽡 𖼇𖽕 𖼊𖽑𖽔𖾐 𖼮𖽑𖽡𖽦𖾐 𖼠𖽻𖾐 𖼽𖽺𖾐 𖼳𖽡𖾐 𖼞𖽳𖾐 𖼻𖽙 𖼣𖽻𖾐．𖼽𖽺𖾐 𖼳𖽡𖾐 𖼻𖽙 𖼦𖽑𖽦 𖼽𖽚𖾐 𖼮𖽻𖾐．𖼺𖽻 𖼖𖽚 𖼈𖽪𖾐 𖼍𖽦 𖼂𖽺𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼳𖽡𖾐 𖼞𖽶𖾑𖽑 𖼺𖽙𖾐 𖼐𖽦𖾐 𖼍𖽪𖾐 𖼺𖽪𖾐 𖼷𖽑𖽻𖾐 𖼄𖽻 𖼊𖽑𖽡 𖼽𖽚𖾐 𖼣𖽻𖾐． 13 𖼽𖽺𖾐 𖼳𖽡𖾐 𖼞𖽳𖾐 𖼈𖽳 𖼺𖽪𖾐 𖼻𖽙 𖼞𖽶𖾑𖽑 𖼺𖽙𖾐 𖼽𖽚𖾐 𖼺𖽻 𖼖𖽚 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝 𖼽𖽡𖾐，𖼻𖽙 𖼈𖽳 𖼽𖽡 𖼖𖽡𖾑 𖼽𖽔𖾐，𖼻𖽙 𖼖𖽦𖾐 𖼽𖽕𖾑 𖼂𖽡 𖼐𖽕 𖼍𖽕，𖼻𖽙 𖼀𖽝𖾐 𖼳𖽔𖾐 𖼄𖽔 𖼐𖽺𖾐 𖼄𖽡𖾐． 14 𖼍𖽕𖾑 𖼈𖽪𖽺𖾑 𖼦𖽑𖽺𖾑 𖼻𖽙 𖼽𖽳𖾐 𖼣𖽻𖾐，𖼈𖽳 𖼺𖽪𖾐 𖼞𖽑𖽶𖾑 𖼺𖽙𖾐 𖼽𖽚𖾐 𖼺𖽻 𖼖𖽚 𖼖𖽙𖾐 𖼮𖽑𖽻𖾐 𖼰𖽕𖾑 𖼊𖽝 𖼽𖽡𖾐 𖼦𖽑𖽙𖾐． 15 𖼍𖽕𖾑 𖼈𖽪𖽺𖾑 𖼊𖽑𖽡 𖼠𖽙𖾐 𖼺𖽻 𖼖𖽚 𖼊𖽑𖽺 𖼰𖽡𖾑 𖼦𖽑𖽙𖾐，𖼀𖽑𖽚𖾐 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼞𖽚 𖼽𖽡𖾐 𖼽𖽻 𖼀𖽙 𖼖𖽙𖾐 𖼂𖽻𖾐 𖽃𖽔𖾑 𖼮𖽑𖽸 𖼽𖽻𖾐 𖼖𖽚𖾑 𖼊𖽑𖽙 𖼮𖽻𖾐．
16 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽡 𖼐𖽑𖽡𖾑 𖼐𖽑𖽡𖾐 𖼄𖽶 𖼮𖽑𖽧 𖼄𖽶 𖼐𖽦 𖼊𖽚𖾐 𖼖𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼈𖽳𖾐 𖼵𖽶𖾐，𖼖𖽡𖾐 𖼷𖽑𖽡𖾐 𖼐𖽑𖽡𖾐 𖼖𖽚 𖼦𖽑𖽙𖾐．
17 𖼊𖽑𖽡 𖼐𖽑𖽡𖾐 𖼮𖽻𖾐，𖼽𖽺𖾐 𖼳𖽡𖾐 𖼽𖽻 𖼻𖽙 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼳𖽙𖾐 𖼐𖽜𖾐 𖼠𖽻𖾐 𖼊𖽑𖽧 𖼖𖽻𖾐 𖼺𖽪𖾐 𖼷𖽑𖽡𖾐 𖼰𖽡𖾐 𖼐𖽺𖾐 𖽃𖽔𖾑 𖼂𖽻𖾐 𖼷𖽑𖽡𖾐 𖼊𖽝𖾐 𖼈𖽺𖾐 𖼺𖽺𖾑，𖼄𖽦 𖼀𖽑𖽙 𖼦𖽑𖽺𖾐 𖼠𖽴𖾐 𖼍𖽚 𖼈𖽶 𖼞𖽳𖾐 𖼐𖽑𖽡𖾐 𖽃𖽔 𖼽𖽪𖾐 𖼺𖽙𖾐 𖼽𖽚𖾐 𖼊𖽑𖽺 𖼞𖽜 𖼽𖽡𖾐． 18 𖼹𖽦𖾑 𖼀𖽕𖾑 𖼮𖽸𖾐 𖼈𖽡𖾐 𖼂𖽺𖾐 𖼺𖽪𖾐 𖽃𖽔𖾑 𖼂𖽻𖾐 𖼷𖽑𖽡𖾐 𖼊𖽝𖾐 𖼈𖽺𖾐 𖼽𖽻 𖼈𖽳𖾐 𖼞𖽳𖾐 𖼍𖽪𖾐 𖼈𖽪𖾑 𖼷𖽪𖾐 𖼊𖽑𖽺 𖼞𖽜，𖼐𖽑𖽡𖾐 𖽃𖽔 𖼽𖽪𖾐 𖼊𖽑𖽺 𖼺𖽙𖾑 𖼺𖽙𖾐 𖼮𖽻𖾐 𖼮𖽻𖾐 𖼐𖽺𖾐 𖼊𖽻 𖼐𖽙𖾐．𖼐𖽑𖽡𖾐 𖼀𖽑𖽚𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼞𖽳𖾐 𖼊𖽻 𖼂𖽙𖾐 𖼣𖽙𖾐 𖼊𖽑𖽺 𖼞𖽜 𖼖𖽻𖾐．” 19 \pn 𖼺𖽻 𖼖𖽚 𖼈𖽪𖾐 𖼍𖽦，𖼍𖽕𖾑 𖼈𖽪𖽺𖾑 𖼞𖽳𖾐 𖽃𖽔 𖼽𖽪𖾐 𖼺𖽙𖾐 𖼽𖽚𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐，𖼽𖽻 𖼈𖽳𖾐 𖼽𖽡 𖼖𖽔𖾐 𖼖𖽻𖾐 𖼞𖽑𖽪 𖼮𖽻𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦 𖼊𖽻𖾐．
20 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐，𖼍𖽕𖾑 𖼈𖽪𖽺𖾑 𖼷𖽑𖽶𖾐 𖼐𖽦 𖼍𖽪𖾐 𖼖𖽻𖾐，𖼽𖽻𖾐 𖼷𖽪𖾐 𖼀𖽑𖽨 𖼠𖽳𖾐 𖼖𖽪𖾐 𖼊𖽑𖽡 𖼽𖽚𖾐 𖼞𖽜 𖼐𖽦𖾐 𖼳𖽪𖾐，𖼽𖽻 𖼀𖽙 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼷𖽙 𖼊𖽪𖾐 𖼈𖽺𖾐 𖼺𖽺𖾑 𖼺𖽜 𖼽𖽡𖾐 𖼦𖽑𖽙𖾐．𖼽𖽻 𖼰𖽕𖾑 𖼊𖽝 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼄𖽦 𖼀𖽑𖽙 𖼷𖽪𖾐 𖼊𖽚𖾐 𖼖𖽻𖾐 𖼊𖽝 𖼊𖽦 𖼞𖽳𖾐 𖼮𖽻𖾐 𖼍𖽳𖾐，𖽃𖽶𖾐 𖼮𖽸 𖼊𖽝 𖼊𖽦 𖼊𖽻𖾐． 21 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐，𖼊𖽑𖽡 𖼹𖽻𖾐 𖼊𖽑𖽡 𖼀𖽳 𖼮𖽻𖾐 𖼂𖽺𖾐 𖼳𖽡𖽻𖾐 𖼀𖽑𖽢 𖼊𖽝 𖼊𖽦 𖼊𖽻𖾐． 22 𖼍𖽕𖾑 𖼈𖽪𖽺𖾑 𖼄𖽡𖽻 𖼐𖽑𖽡 𖼀𖽑𖽨 𖼐𖽦𖾐 𖼳𖽪𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼍𖽙𖾑，𖼰𖽡𖽴 𖼰𖽕𖾑 𖼊𖽝 𖼞𖽳𖾐 𖼽𖽡𖾐，𖼽𖽻 𖼽𖽪𖾐 𖼺𖽙𖾐 𖼽𖽚𖾐 𖼊𖽑𖽺 𖼺𖽙𖾑 𖼺𖽙𖾐 𖼮𖽻𖾐 𖼮𖽻𖾐 𖼐𖽺𖾐 𖼊𖽻 𖼐𖽙𖾐． 23 𖼍𖽕𖾑 𖼈𖽪𖽺𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼞𖽑𖽶𖾑 𖼮𖽶𖾐，𖼞𖽑𖽻𖾑 𖽃𖽶𖾐 𖼮𖽸 𖼊𖽝 𖼊𖽦 𖼊𖽻𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼠𖽻𖾐 𖼊𖽑𖽺 𖼮𖽑𖽻𖾐 𖼊𖽚𖾐 𖼖𖽻𖾐，𖼽𖽻 𖼞𖽑𖽶𖾑 𖼰𖽡𖽔𖾐 𖼊𖽑𖽴𖾑 𖼖𖽪𖾐 𖼞𖽳𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼣𖽻𖾐，𖼠𖽜𖾐 𖼖𖽡𖾑 𖼽𖽕𖾑 𖼄𖽡𖾐．𖼽𖽻 𖽃𖽙𖾑 𖼄𖽺 𖼖𖽙𖾐 𖼺𖽶𖾑 𖼈𖽳𖾐 𖼵𖽶𖾐 𖼊𖽻 𖼊𖽑𖽜𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼮𖽑𖽢𖾑 𖼊𖽻 𖼮𖽨 𖼦𖽑𖽻𖾐．
24 𖼄𖽦 𖼀𖽑𖽙 𖼞𖽑𖽶𖾑 𖼽𖽚𖾐 𖼊𖽑𖽺 𖼞𖽑𖽙𖾐 𖼐𖽦𖾐 𖼄𖽡𖽻𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐，𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼞𖽴𖾐，𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼮𖽡𖽪 𖼀𖽑𖽻𖾐 𖼍𖽪𖾐 𖼽𖽡𖾐． 25 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐：“𖼊𖽚𖾐 𖼖𖽻𖾐 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼐𖽑𖽡𖾐 𖼈𖽳𖾐 𖼐𖽦𖾐 𖼄𖽡𖽻𖾐 𖼄𖽡𖽻𖾐？ 𖼽𖽻 𖼊𖽚𖾐 𖼖𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼈𖽳𖾐 𖼵𖽶𖾐 𖼳𖽶 𖼣𖽻𖾐．𖽃𖽔 𖼺𖽺 𖼽𖽻 𖼊𖽑𖽺 𖼺𖽦 𖼦𖽑𖽙𖾐 𖼊𖽑𖽡𖾑 𖼣𖽻𖾐，𖼈𖽪𖾐 𖼍𖽦 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼀𖽑𖽨𖾐 𖼳𖽳𖾐 𖼄𖽨 𖼄𖽨 𖼞𖽜 𖼊𖽻𖾐，𖼦𖽑𖽔𖾐 𖼖𖽺𖾑 𖼽𖽻 𖼻𖽙 𖼄𖽳 𖼀𖽑𖽨 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼇𖽪𖾐 𖼊𖽻𖾐，𖼹𖽦𖾑 𖼽𖽻 𖼀𖽙 𖼈𖽴 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖼳𖽚𖾐 𖼳𖽕𖾐 𖼄𖽔 𖼻𖽻𖾐，𖼄𖽦 𖼊𖽚𖾐 𖼄𖽔 𖼻𖽻𖾐．”
26 𖼍𖽕𖾑 𖼈𖽪𖽺𖾑 𖼽𖽻 𖼀𖽙 𖼮𖽑𖽶𖾐 𖼦𖽑𖽡𖽚 𖼺𖽪𖾐 𖼷𖽑𖽻𖾐 𖼖𖽙𖾐 𖼊𖽻 𖼐𖽙𖾐：“𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼺𖽦 𖼦𖽑𖽙𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼳𖽡𖽦𖾑 𖼍𖽻𖾐 𖼊𖽪𖾐 𖼖𖽧𖼦𖽑𖽙𖾐 𖼊𖽑𖽡𖾑 𖼣𖽻𖾐，𖽃𖽔 𖼊𖽺𖾑 𖼳𖽶 𖼽𖽻 𖼊𖽑𖽺 𖼞𖽜 𖼊𖽻𖾐 𖼐𖽺𖾑？ 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼄𖽔 𖼂𖽺𖾐 𖼺𖽪𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼞𖽶𖾑𖽑 𖽃𖽔 𖼊𖽺𖾑 𖼳𖽶 𖼷𖽑𖽻𖾐 𖼣𖽻𖾐 𖼺𖽺𖾑，𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽦 𖼀𖽑𖽙 𖼊𖽑𖽺 𖼦𖽑𖽺𖾑 𖼻𖽻𖾐 𖼈𖽳𖾐 𖼵𖽶𖾐 𖼂𖽡𖾑？”
27 𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼞𖽕 𖼂𖽻𖾑 𖼀𖽦𖾐 𖼠𖽚 𖼺𖽪𖾐 𖼊𖽻 𖼂𖽪𖾑 𖼀𖽦𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼊𖽑𖽧：“𖼠𖽜𖾐 𖼖𖽡𖾑 𖼽𖽕𖾑 𖼊𖽑𖽺 𖼺𖽦 𖼳𖽶𖾐 𖼦𖽑𖽙𖾐 𖼺𖽪𖾐 𖼷𖽑𖽻𖾐 𖼮𖽻𖾐 𖼊𖽑𖽡𖾑 𖼣𖽻𖾐，𖼷𖽑𖽜𖾑 𖼷𖽑𖽜𖾐 𖼽𖽻 𖼊𖽑𖽺 𖼦𖽺𖾑𖽑 𖼳𖽶 𖼞𖽜 𖼊𖽻𖾐．”
28 𖼍𖽕𖾑 𖼈𖽪𖽺𖾑 𖼽𖽻 𖼞𖽕 𖼰𖽡𖽺𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼞𖽑𖽶𖾑 𖼮𖽶𖾐，𖼽𖽻 𖼍𖽕𖾑 𖼽𖽡 𖼖𖽡𖾑 𖼽𖽔𖾐 𖼊𖽻 𖼮𖽨 𖼺𖽺𖾑，𖼽𖽻 𖼊𖽑𖽺 𖼀𖽶 𖼻𖽶，𖼀𖽦𖾐：“𖼐𖽑𖽡𖾐 𖼦𖽑𖽺𖾑 𖼠𖽻𖾐 𖼹𖽺𖾐 𖼖𖽻𖾐 𖽃𖽔 𖼊𖽺𖾑 𖼂𖽺𖾐 𖼐𖽺𖾑？ 𖼄𖽡𖾐 𖼳𖽡𖽻𖾐 𖼀𖽙 𖼽𖽻𖾐 𖼞𖽑𖽶𖾑 𖼹𖽻𖾐 𖽃𖽔 𖼺𖽺 𖼐𖽑𖽡𖾐 𖼖𖽙𖾐 𖼂𖽻𖾐 𖼖𖽚𖾑 𖼐𖽺𖾑？ 𖼣𖽙𖾐 𖼺𖽝𖾑 𖼐𖽑𖽡𖾐 𖼦𖽑𖽺𖾑 𖼳𖽡𖽦 𖼈𖽳，𖼐𖽑𖽧𖾐 𖼄𖽙𖾐 𖼊𖽶𖾐 𖼮𖽑𖽪 𖼺𖽪𖾐 𖼷𖽑𖽻𖾐 𖼣𖽻𖾐．𖼐𖽑𖽡𖾐 𖼦𖽑𖽺𖾑 𖼠𖽻𖾐 𖼰𖽕𖾑 𖼊𖽝 𖼞𖽳𖾐 𖼐𖽦𖾐 𖼖𖽻𖾐 𖼖𖽔𖾑？”
29 𖼍𖽕𖾑 𖼈𖽪𖽺𖾑 𖼀𖽦𖾐：“𖼣𖽙𖾐 𖽃𖽔𖾑 𖼄𖽳𖾐 𖽃𖽔 𖼊𖽺𖾑 𖼳𖽶 𖼄𖽡𖽻 𖼂𖽺𖾐 𖼦𖽑𖽙 𖼐𖽺𖾑？ 𖼊𖽻 𖼂𖽪𖾑 𖼊𖽑𖽡 𖼮𖽑𖽡𖽺 𖼖𖽺𖾑 𖽂𖽙𖾐 𖼊𖽑𖽜𖾐 𖼄𖽔 𖼊𖽙𖾐 𖼖𖽔？” 30 𖼍𖽕𖾑 𖼈𖽪𖽺𖾑 𖼽𖽻 𖼍𖽕𖾑 𖼊𖽑𖽺 𖼰𖽡𖾑 𖼦𖽑𖽙𖾐，𖼰𖽻𖾐 𖼀𖽑𖽚𖾐 𖼠𖽳𖾐 𖼖𖽪𖾐 𖼊𖽑𖽡 𖼽𖽚𖾐 𖼊𖽑𖽺 𖽃𖽙𖾑 𖼄𖽺 𖼖𖽙𖾐 𖼺𖽶𖾑 𖼊𖽻 𖼐𖽙𖾐，𖼷𖽑𖽻𖾐 𖼄𖽳𖾑 𖼄𖽳 𖼦𖽑𖽔𖾐 𖼖𖽺𖾑 𖽃𖽙𖾑 𖼄𖽺 𖼖𖽙𖾐 𖼺𖽶𖾑 𖼽𖽻 𖼊𖽑𖽺 𖼊𖽻 𖼞𖽑𖽚． 31 𖼷𖽑𖽻𖾐 𖼊𖽑𖽡 𖼹𖽻𖾐 𖼍𖽕𖾑 𖼈𖽪𖽺𖾑 𖼞𖽑𖽙𖾐 𖼊𖽑𖽜𖾐 𖼺𖽪𖾐 𖼦𖽑𖽺𖾑 𖼊𖽻 𖼮𖽨 𖼺𖽺𖾑，𖼀𖽦𖾐 𖼺𖽻 𖼖𖽚 𖼖𖽙𖾐 𖼊𖽑𖽧．𖼺𖽻 𖼖𖽚 𖼷𖽑𖽻𖾐 𖼹𖽡𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐．
𖼍𖽕𖾑 𖼈𖽪𖽺𖾑 𖼐𖽑𖽧𖾐 𖼺𖽳 𖼊𖽚𖾐 𖼖𖽻𖾐 𖼰𖽕𖾑 𖼊𖽝
32 𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼖𖽙𖾐 𖼀𖽦𖾐：“𖽃𖽔 𖼐𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼮𖽡𖽮𖾐 𖼄𖽔 𖼻𖽻𖾐，𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼽𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦 𖼊𖽻𖾐．”
33 𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽻 𖼖𖽙𖾐 𖼮𖽑𖽻𖾐 𖼊𖽝 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼞𖽑𖽚 𖼊𖽑𖽙 𖼽𖽳𖾐 𖼺𖽺，𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼽𖽳𖾐 𖼊𖽑𖽙 𖼹𖽦𖾐 𖼰𖽕𖾑 𖼊𖽝 𖼺𖽪𖾐 𖼄𖽦 𖼀𖽑𖽙 𖼣𖽻𖾐．”
34 𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼖𖽙𖾐 𖼀𖽦𖾐：“𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼣𖽻𖾐 𖼀𖽙 𖼖𖽙𖾐 𖼀𖽙𖾐 𖼽𖽻𖾐 𖼖𖽚𖾑 𖼺𖽪𖾐 𖼣𖽻𖾐，𖼍𖽻𖾐 𖼣𖽻𖾐 𖼦𖽻，𖼈𖽜𖾐 𖼣𖽻𖾐 𖼦𖽻，𖼖𖽻𖾐 𖼽𖽻𖾐 𖼻𖽙 𖼊𖽑𖽺 𖼮𖽑𖽳 𖼂𖽡𖾐 𖼽𖽡𖾐 𖼞𖽑𖽶𖾑 𖼮𖽶𖾐， 35 𖼣𖽙𖾐 𖼽𖽡𖾐 𖼐𖽑𖽡𖾑 𖼳𖽶𖾐 𖼊𖽑𖽺 𖼞𖽕，𖼐𖽑𖽡𖾑 𖼳𖽶𖾐 𖼊𖽑𖽺 𖼊𖽝，𖼽𖽻 𖼄𖽡 𖼞𖽑𖽪𖾐 𖼞𖽑𖽶𖾐 𖼮𖽑𖽻𖾐 𖼽𖽻𖾐 𖼻𖽙 𖼊𖽑𖽺 𖼰𖽨𖾑 𖼞𖽑𖽚 𖼖𖽻𖾐；𖼐𖽑𖽡𖾑 𖼳𖽶𖾐 𖼣𖽙𖾐 𖼊𖽑𖽺 𖼞𖽑𖽴 𖼊𖽻𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼽𖽻 𖼞𖽳𖾐 𖼀𖽙 𖼀𖽺 𖼰𖽸𖾐 𖼍𖽡，𖼽𖽻 𖼊𖽑𖽺 𖼺𖽦 𖼳𖽶𖾐 𖼦𖽑𖽙𖾐． 36 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼍𖽻𖾐 𖼊𖽑𖽺 𖼍𖽺𖾑 𖼺𖽦 𖼠𖽚 𖼄𖽔 𖼣𖽻𖾐，𖼈𖽜𖾐 𖼊𖽑𖽺 𖼖𖽺𖾑 𖼺𖽦 𖼳𖽶𖾐 𖼠𖽚，𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼄𖽔 𖼠𖽚 𖼺𖽪𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼖𖽺𖾑 𖼍𖽻𖾐 𖼐𖽺𖾐 𖼈𖽜𖾐 𖼖𖽙𖾐 𖼺𖽶𖾑 𖼮𖽻𖾐 𖼊𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽦 𖼀𖽑𖽙 𖼊𖽑𖽺 𖼈𖽳𖾐 𖼵𖽶𖾐．” 37 𖼍𖽕𖾑 𖼈𖽪𖽺𖾑 𖼦𖽑𖽔𖾐 𖼖𖽺𖾑 𖼀𖽦𖾐：“𖼽𖽺𖾐 𖼦𖽴 𖼦𖽫 𖼣𖽙𖾐 𖼊𖽑𖽺 𖼍𖽻𖾐 𖼐𖽺𖾐 𖼈𖽜𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐，𖼦𖽑𖽔𖾐 𖼖𖽺𖾑 𖼷𖽑𖽜𖾑 𖼷𖽑𖽜𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼣𖽙𖾐 𖼊𖽑𖽺 𖼰𖽨𖾑 𖼊𖽻𖾐．”
𖽃𖽔𖾐 𖼺𖽺𖾑，𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽡𖾐 𖼻𖽻𖾐！𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼞𖽜．”
38 𖼺𖽻 𖼖𖽚 𖼽𖽻 𖼞𖽳𖾐 𖼰𖽕𖾑 𖼊𖽝 𖼀𖽑𖽡𖽻𖾐 𖼮𖽻 𖼈𖽺𖾐 𖼍𖽕𖾑 𖼈𖽪𖽺𖾑 𖼞𖽜 𖼈𖽦，𖼮𖽡 𖼍𖽕 𖼰𖽡𖾐 𖼈𖽺𖾐 𖼽𖽻 𖼊𖽑𖽺 𖼍𖽴𖾑，𖼹𖽦𖾑 𖼽𖽻 𖼞𖽜 𖼮𖽡 𖼞𖽑𖽚𖾐 𖼀𖽑𖽡𖽻𖾐 𖼈𖽦 𖼍𖽪𖾐． 39 𖼍𖽕𖾑 𖼈𖽪𖽺𖾑 𖽃𖽔𖾑 𖼊𖽑𖽙 𖼈𖽺𖾐 𖼰𖽕𖾑 𖼊𖽝 𖼀𖽑𖽡𖽻𖾐 𖼮𖽻 𖼊𖽑𖽺 𖼀𖽶．𖼽𖽻 𖽃𖽙𖾑 𖼄𖽺 𖼊𖽑𖽙 𖼦𖽑𖽺𖾑 𖼹𖽻𖾐 𖼊𖽴 𖼈𖽦 𖼄𖽔 𖼠𖽚 𖼺𖽺𖾑，𖼽𖽻 𖼊𖽑𖽡 𖼠𖽙𖾐 𖼺𖽜 𖼐𖽦𖾐．
𖼺𖽻 𖼖𖽚 𖼖𖽙𖾐 𖼀𖽦𖾐：“𖼣𖽙𖾐 𖽃𖽙𖾑 𖼄𖽺 𖼊𖽑𖽙 𖼦𖽑𖽺𖾑 𖼹𖽻𖾐 𖼊𖽴 𖼈𖽦 𖼄𖽔 𖼠𖽚 𖼺𖽺𖾑，𖼊𖽴 𖼈𖽦 𖼍𖽪𖾐 𖼖𖽻𖾐 𖼣𖽙𖾐 𖼮𖽨𖾐 𖼺𖽜 𖼽𖽡𖾐 𖼄𖽔 𖼠𖽸𖾑．” 𖽃𖽔𖾐 𖼺𖽺𖾑 𖼍𖽕𖾑 𖼈𖽪𖽺𖾑 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼖𖽧 𖼦𖽑𖽙𖾐． 40 𖼍𖽕𖾑 𖼈𖽪𖽺𖾑 𖼽𖽻 𖼞𖽳𖾐 𖼍𖽚𖾐 𖼖𖽜 𖼈𖽺𖾐，𖼦𖽑𖽔𖾐 𖼖𖽺𖾑 𖼖𖽻𖾐 𖼮𖽻 𖼞𖽳𖾐 𖼖𖽚𖾐 𖼻𖽙 𖼈𖽻𖾑 𖼈𖽻𖾐 𖼣𖽙 𖼊𖽝𖾐 𖼠𖽺𖾑，𖼀𖽑𖽨 𖼮𖽡𖽺 𖼖𖽚𖾑 𖼀𖽑𖽙 𖼀𖽶 𖼺𖽪𖾐 𖼰𖽧𖾑 𖼞𖽑𖽕𖾐 𖼞𖽑𖽶𖾐 𖼰𖽡𖽺𖾐，𖼖𖽦 𖼀𖽑𖽦𖾐 𖼮𖽙𖾐 𖼐𖽻𖾐 𖼈𖽺𖾐，𖼺𖽜 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼖𖽙𖾐 𖼐𖽳 𖼽𖽡𖾐．
𖼍𖽕𖾑 𖼈𖽪𖽺𖾑 𖼠𖽜𖾐 𖼖𖽡𖾑 𖼽𖽕𖾑 𖼊𖽑𖽺 𖼺𖽦 𖼦𖽑𖽙𖾐
41 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖽂𖽙𖾐 𖼺𖽜 𖽂𖽙𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼐𖽳 𖼖𖽻𖾐，𖼽𖽻 𖼖𖽙𖾐 𖼀𖽙𖾐 𖼮𖽑𖽨𖾑 𖼊𖽪𖾐 𖼈𖽺𖾐 𖼺𖽪𖾐 𖼷𖽑𖽻𖾐 𖼽𖽻 𖽃𖽙𖾑 𖼄𖽺 𖼮𖽑𖽻𖾐 𖼺𖽜． 42 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼘𖽜𖾑 𖼐𖽦𖾐，𖼍𖽕𖾑 𖼈𖽪𖽺𖾑 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼽𖽻 𖼊𖽑𖽺 𖼐𖽦𖾐 𖼄𖽔 𖼍𖽪𖾐，𖼞𖽪𖾐 𖼮𖽡𖽺𖾐 𖼽𖽻 𖼞𖽑𖽚 𖼊𖽑𖽙 𖼽𖽳𖾐 𖼺𖽺，𖼦𖽙 𖼺𖽶𖾑 𖼹𖽳𖾐 𖼷𖽑𖽚，𖼀𖽑𖽡𖽻 𖼷𖽚𖾐 𖼐𖽑𖽧𖾐 𖼐𖽜𖾑． 43 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼍𖽚𖾐 𖼖𖽜 𖼍𖽺𖾑 𖼈𖽺𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽝 𖼖𖽻𖾐，𖼣𖽙𖾐 𖽃𖽔𖾑 𖼐𖽙 𖼣𖽻𖾐 𖼖𖽔𖾑？” 𖽃𖽔𖾐 𖼺𖽺𖾑 𖼽𖽻 𖼄𖽳𖾑 𖼺𖽡𖾐 𖼖𖽙𖾐 𖼊𖽑𖽪 𖼍𖽳𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼮𖽙 𖼰𖽪𖾑． 44 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐！𖼣𖽙𖾐 𖼐𖽑𖽡𖾐 𖼞𖽳𖾐 𖼦𖽙 𖼞𖽶𖾐 𖼮𖽑𖽶 𖼀𖽑𖽨 𖼄𖽶 𖼖𖽙𖾐 𖼀𖽙 𖼀𖽨𖾐 𖼺𖽪𖾐 𖼣𖽕𖾐 𖼻𖽙 𖼞𖽜 𖼊𖽻𖾐，𖼄𖽡𖾐 𖼳𖽡𖽻𖾐 𖼀𖽙 𖼐𖽡𖾑𖽑 𖼳𖽶𖾐 𖼞𖽜 𖼷𖽙 𖼊𖽻𖾐．”
45 𖼍𖽕𖾑 𖼈𖽪𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼊𖽻 𖼞𖽑𖽚：“𖼐𖽑𖽡𖾐 𖼖𖽻𖾐 𖼣𖽙𖾐 𖼊𖽑𖽺 𖼊𖽝 𖼺𖽪𖾐，𖼞𖽑𖽶𖾑 𖽃𖽔𖾑 𖼊𖽑𖽙、𖼂𖽨𖾐 𖼹𖽶 𖼐𖽺𖾐 𖼍𖽻 𖼠𖽻 𖼖𖽙𖾐 𖼣𖽜𖾐 𖼳𖽶 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖼣𖽙𖾐 𖼖𖽻𖾐 𖼐𖽑𖽡𖾐 𖼊𖽑𖽺 𖼊𖽝 𖼺𖽪𖾐，𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼖𖽙𖾐 𖼣𖽜𖾐 𖼳𖽶 𖼣𖽻𖾐．𖼽𖽺𖾐 𖼦𖽴 𖼦𖽫 𖼞𖽑𖽶𖾑 𖼐𖽑𖽡𖾐 𖼞𖽑𖽙𖾐 𖼮𖽙 𖼦𖽑𖽳𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼄𖽦 𖼀𖽑𖽙 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐． 46 𖽃𖽙𖾑 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼰𖽡𖽻𖾐 𖼣𖽙𖾐 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼊𖽻𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼊𖽑𖽺 𖼺𖽦 𖼦𖽑𖽙𖾐，𖼐𖽑𖽡𖾐 𖼈𖽪𖾑 𖼊𖽡𖾐 𖼊𖽝𖾐 𖼹𖽺𖾐 𖼖𖽻𖾐 𖼊𖽻𖾐．𖽃𖽙𖾑 𖼐𖽑𖽡𖾐 𖼣𖽙𖾐 𖼦𖽑𖽔𖾐 𖼖𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼷𖽪𖾐 𖼞𖽳𖾐 𖼷𖽑𖽻𖾐 𖼄𖽻𖾐 𖼀𖽑𖽨 𖼄𖽶 𖼖𖽙𖾐 𖼀𖽙 𖼣𖽕𖾐 𖼻𖽙 𖼞𖽜 𖼊𖽻𖾐，𖼄𖽡𖾐 𖼳𖽡𖽻𖾐 𖼀𖽙 𖼐𖽑𖽡𖾑 𖼳𖽶𖾐 𖼞𖽜 𖼷𖽙 𖼊𖽻𖾐．𖽃𖽔𖾐 𖼺𖽺𖾑，𖼄𖽶 𖼊𖽑𖽡 𖽂𖽚 𖼞𖽑𖽶𖾐 𖼷𖽑𖽻𖾐 𖼞𖽜 𖼺𖽝𖾑 𖼊𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼠𖽻𖾐 𖼊𖽑𖽺 𖽂𖽙 𖼺𖽙𖾐 𖼂𖽙𖾐 𖼊𖽑𖽡 𖼽𖽚𖾐 𖼮𖽻𖾐． 47 𖼦𖽑𖽔𖾐 𖼖𖽺𖾑 𖼷𖽑𖽻𖾐 𖼷𖽪𖾐 𖼦𖽑𖽺𖾑 𖼹𖽻𖾐 𖼞𖽑𖽙𖾐 𖼣𖽻𖾐 𖼺𖽝𖾑 𖼊𖽻𖾐，𖼽𖽺𖾐 𖼦𖽴 𖼦𖽫 𖼷𖽑𖽻𖾐 𖼊𖽑𖽺 𖼰𖽨𖾑 𖼞𖽑𖽶𖾑 𖽃𖽔𖾑 𖼊𖽑𖽙 𖼖𖽙𖾐 𖼣𖽜𖾐，𖼂𖽨𖾐 𖼹𖽶 𖼖𖽙𖾐 𖼣𖽜𖾐 𖼺𖽪𖾐 𖼄𖽔 𖼣𖽻𖾐，𖼞𖽪𖾐 𖼮𖽡𖽺𖾐 𖼰𖽕𖾑 𖼊𖽝 𖽂𖽙 𖼊𖽙𖾐 𖽂𖽙 𖼄𖽔 𖼊𖽙𖾐，𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼖𖽙𖾐 𖼮𖽻𖾐 𖼳𖽶 𖼣𖽻𖾐，𖼽𖽻 𖼐𖽑𖽡𖾐 𖼈𖽳𖾐 𖼊𖽑𖽺 𖼷𖽑𖽜𖾑 𖼷𖽑𖽜𖾐 𖼰𖽡𖽻𖾐 𖼣𖽙𖾐 𖼈𖽳𖾐 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼊𖽻𖾐．
48 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖽂𖽙𖾐 𖼺𖽜 𖽂𖽙𖾐 𖼍𖽕𖾑 𖼈𖽪𖽺𖾑 𖼖𖽙𖾐 𖼐𖽳 𖼖𖽻𖾐，𖼍𖽕𖾑 𖼈𖽪𖽺𖾑 𖼖𖽺𖾑 𖼐𖽕 𖼊𖽺𖾐 𖼰𖽡𖽴 𖼊𖽝 𖼊𖽦 𖼞𖽳𖾐 𖼽𖽡𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼊𖽝 𖼊𖽻𖾐． 49 𖼍𖽕𖾑 𖼈𖽪𖽺𖾑 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼰𖽧𖾑 𖼞𖽑𖽕𖾐 𖼞𖽑𖽶𖾐 𖼖𖽙𖾐 𖼻𖽙 𖼊𖽑𖽡 𖼊𖽝𖾐 𖼈𖽺𖾐 𖼊𖽑𖽧 𖼖𖽻𖾐，𖼮𖽙𖾐 𖼐𖽻𖾐 𖼻𖽜 𖼈𖽡𖾑 𖼊𖽑𖽧 𖼽𖽡𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼣𖽴 𖼠𖽻𖾐 𖼊𖽑𖽺 𖼊𖽝 𖼄𖽳𖾐，𖼖𖽚𖾐 𖼻𖽙 𖼊𖽝 𖼣𖽴 𖼠𖽻𖾐 𖼞𖽑𖽶𖾐 𖼊𖽡 𖼽𖽡𖾐 𖼺𖽺𖾑，𖼽𖽻 𖼀𖽜 𖼹𖽺𖾐 𖼽𖽡𖾐 𖼦𖽑𖽙𖾐，𖼄𖽡𖾑 𖼐𖽦𖾐 𖼀𖽙 𖼂𖽴𖾐 𖼍𖽳𖾐．
50 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼍𖽕𖾑 𖼈𖽪𖽺𖾑 𖼮𖽙𖾐 𖼐𖽻𖾐 𖼐𖽺𖾐 𖼖𖽚𖾐 𖼻𖽙 𖼊𖽑𖽡 𖼊𖽝𖾐 𖼍𖽺𖾑 𖼻𖽜 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖽂𖽙 𖼊𖽙𖾐 𖼦𖽑𖽙𖾐．𖼍𖽕𖾑 𖼈𖽪𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼊𖽝 𖼀𖽜 𖼦𖽑𖽙𖾐，𖼦𖽑𖽻𖾐 𖼊𖽑𖽻𖾐 𖼍𖽕𖾑 𖼈𖽪𖽺𖾑 𖼖𖽦 𖼀𖽑𖽦𖾐 𖼞𖽑𖽶𖾐 𖽃𖽔𖾑 𖼊𖽑𖽙 𖼄𖽔 𖼮𖽻𖾐． 51 𖼍𖽕𖾑 𖼈𖽪𖽺𖾑 𖼰𖽡𖽴 𖼂𖽡𖾐 𖼽𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼀𖽙 𖼮𖽑𖽶𖾐 𖼦𖽑𖽡𖽚，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼞𖽳𖾐 𖽃𖽔𖾑 𖼊𖽑𖽙 𖼞𖽻𖾐 𖼊𖽑𖽧 𖼖𖽻𖾐，𖼽𖽻 𖼊𖽑𖽺 𖼺𖽦 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖽃𖽔𖾐 𖼊𖽑𖽙 𖼻𖽜 𖼽𖽻 𖼈𖽪𖾑 𖼊𖽡𖾐 𖼊𖽝𖾐 𖼹𖽺𖾐 𖼖𖽻𖾐 𖼦𖽑𖽙𖾐．
𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼐𖽦𖾐 𖼄𖽡𖽻𖾐，𖼽𖽻 𖼈𖽳𖾐 𖼞𖽳𖾐 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼳𖽶𖾐 𖼦𖽑𖽙𖾐 𖼺𖽺𖾑，𖼄𖽳𖾑 𖼄𖽳 𖼮𖽡𖽪 𖼀𖽑𖽡𖽻𖾐 𖼍𖽪𖾐 𖼽𖽡𖾐 𖼦𖽑𖽙𖾐． 52 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼍𖽪𖾐 𖼖𖽻𖾐，𖼮𖽑𖽡𖽪 𖼈𖽳 𖼄𖽙𖾐 𖽃𖽶𖾐 𖼮𖽸，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽕 𖼺𖽺𖾑，𖼖𖽻𖾐 𖼞𖽑𖽪 𖼐𖽺𖾐 𖼽𖽡 𖼠𖽴 𖼖𖽪𖽦 𖼖𖽪𖾐 𖼞𖽳𖾐 𖼖𖽪𖾐 𖽃𖽔𖾑 𖼊𖽪 𖼮𖽑𖽡𖽺 𖼮𖽑𖽡𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼺𖽦 𖼳𖽔𖾐 𖼖𖽔𖾐 𖼽𖽺𖾐 𖼖𖽪𖾐 𖼞𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼀𖽜 𖼹𖽺𖾐 𖼦𖽑𖽙𖾐，𖼳𖽔𖾐 𖼖𖽔𖾐 𖼽𖽺𖾐 𖼖𖽪𖾐 𖼦𖽺𖾑𖽑 𖼰𖽡𖽔𖾐 𖼊𖽑𖽴𖾑 𖼖𖽪𖾐 𖼐𖽺𖾐 𖼽𖽡 𖼠𖽴 𖼖𖽪𖽦 𖼖𖽪𖾐 𖼞𖽳𖾐 𖼽𖽡𖾐 𖼮𖽨𖾐 𖼄𖽙𖾐 𖼊𖽑𖽺 𖼮𖽻𖾐． 53 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽕 𖼺𖽦 𖼀𖽑𖽚𖾐 𖼞𖽚 𖼖𖽻𖾐 𖼠𖽙𖾑 𖼍𖽻𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼦𖽑𖽺𖾐 𖼠𖽴𖾐 𖼍𖽚 𖼈𖽶 𖼠𖽚 𖼊𖽪 𖼐𖽻𖾑 𖽂𖽙𖾐． 54 𖼍𖽕𖾑 𖼈𖽪𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼞𖽑𖽶𖾑 𖼽𖽚𖾐 𖼞𖽳𖾐 𖼈𖽪𖾑 𖼊𖽡𖾐 𖼈𖽺𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽳𖾐 𖼽𖽡𖾐，𖼦𖽑𖽻𖾐 𖼊𖽑𖽻𖾐 𖼍𖽕𖾑 𖼈𖽪𖽺𖾑 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼞𖽳𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼀𖽑𖽨 𖼽𖽻 𖼞𖽳𖾐 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼍𖽙𖾑 𖼍𖽧𖾑 𖼦𖽑𖽙𖾐．
𖼺𖽻 𖼖𖽚 𖼍𖽕𖾑 𖼈𖽪𖽺𖾑 𖼊𖽑𖽺 𖽃𖽶𖾐 𖼂𖽡𖾐 𖼽𖽡𖾐
55 𖼺𖽻 𖼖𖽚 𖼐𖽦𖾐 𖼄𖽡𖽻𖾐，𖼍𖽕𖾑 𖼈𖽪𖽺𖾑 𖼽𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼊𖽝，𖽃𖽔𖾐 𖼺𖽺𖾑 𖼄𖽦 𖼈𖽪𖾑 𖼷𖽪𖾐 𖼽𖽔𖾐 𖼐𖽑𖽧 𖽃𖽳 𖼊𖽑𖽺 𖼊𖽻 𖼐𖽙𖾐：“𖼽𖽔𖾐 𖼐𖽑𖽧 𖽃𖽳 𖽃𖽔𖾐！𖼷𖽑𖽻𖾐 𖼖𖽦𖾑 𖼻𖽙 𖼦𖽑𖽺𖾑 𖽃𖽔 𖼺𖽺 𖼻𖽙 𖼣𖽻𖾐？”
𖼽𖽔𖾐 𖼐𖽑𖽧 𖽃𖽳 𖼊𖽻 𖼞𖽑𖽚：“𖼣𖽙𖾐 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺 𖼄𖽳𖾐 𖼊𖽻 𖼊𖽑𖽜𖾐 𖼂𖽡𖾑，𖼣𖽙𖾐 𖼄𖽔 𖼺𖽝𖾑．”
56 𖼈𖽪𖾐 𖼍𖽦 𖼀𖽦𖾐：“𖼐𖽑𖽡𖾐 𖼽𖽡𖾐 𖼊𖽑𖽡 𖼠𖽙𖾐 𖼊𖽻 𖼐𖽙𖾐，𖼷𖽑𖽻𖾐 𖼖𖽦𖾑 𖼻𖽙 𖼦𖽑𖽺𖾑 𖽃𖽔 𖼺𖽺 𖼻𖽙 𖼣𖽻𖾐．”
57 𖼍𖽕𖾑 𖼈𖽪𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼺𖽦 𖼦𖽑𖽙𖾐 𖼞𖽚 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽔𖾐 𖼐𖽑𖽧 𖽃𖽳 𖼽𖽻 𖼖𖽙𖾐 𖼹𖽶𖾐 𖼖𖽻𖾐，𖼽𖽻 𖼊𖽑𖽺 𖼦𖽳 𖼺𖽻 𖼖𖽚 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽡𖾐，𖼍𖽕𖾑 𖼈𖽪𖽺𖾑 𖼖𖽦 𖼀𖽑𖽦𖾐 𖼞𖽑𖽶𖾐 𖼦𖽑𖽔𖾐 𖼖𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼞𖽳𖾐 𖼈𖽪𖾑 𖼊𖽡𖾐 𖼈𖽺𖾐 𖼍𖽳𖾐 𖼺𖽺． 58 𖼺𖽻 𖼖𖽚 𖼽𖽻 𖼊𖽑𖽺 𖼊𖽻 𖼐𖽙𖾐：“𖼷𖽑𖽻𖾐 𖼖𖽦𖾑 𖼻𖽙 𖽃𖽔𖾐！𖼐𖽑𖽡𖾐 𖽃𖽔 𖼺𖽺 𖼻𖽙 𖼣𖽻𖾐？”
𖼍𖽕𖾑 𖼈𖽪𖽺𖾑 𖼊𖽻 𖼞𖽑𖽚：“𖼣𖽙𖾐 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼐𖽑𖽡𖾐 𖼮𖽜𖾐 𖼀𖽑𖽙 𖼽𖽺𖾐 𖼳𖽡𖾐 𖼞𖽳𖾐 𖼻𖽙 𖼣𖽻𖾐．”