𖼺𖽔 𖼄𖽪 𖽃𖽳 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼽𖽡𖾐 𖼽𖽺𖾐 𖼳𖽡𖾐 𖼊𖽑𖽺 𖼄𖽡𖽻𖾐
16
1 𖼽𖽺𖾐 𖼦𖽴 𖼦𖽫 𖼺𖽔 𖼄𖽪 𖽃𖽳 𖼖𖽙𖾐 𖼀𖽦𖾐：“𖼐𖽑𖽡𖾐 𖼺𖽻 𖼖𖽚 𖼖𖽙𖾐 𖼀𖽙𖾐 𖼮𖽑𖽧𖾐 𖼞𖽪 𖼺𖽺𖾑 𖼞𖽑𖽙 𖼊𖽑𖽻𖾐 𖼮𖽑𖽡𖾐 𖼊𖽻𖾐 𖼐𖽺𖾑？ 𖼣𖽙𖾐 𖼽𖽻 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽳𖾐 𖼈𖽪𖾐 𖼍𖽦 𖼄𖽔 𖼂𖽺𖾐 𖼊𖽻𖾐，𖼐𖽑𖽡𖾐 𖼽𖽻𖾐 𖼮𖽑𖽡𖽪𖾐 𖼞𖽑𖽶𖾐 𖽃𖽔 𖼮𖽑𖽙𖾐 𖼷𖽑𖽳𖾐 𖼰𖽡𖽺𖾐 𖼀𖽡𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖼹𖽡𖾐 𖼂𖽚 𖼖𖽡𖾑 𖼦𖽴 𖼖𖽪𖾐 𖼽𖽺𖾐 𖼳𖽡𖾐 𖼈𖽴 𖼞𖽳𖾐 𖼽𖽡𖾐 𖼊𖽻𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼽𖽻 𖼞𖽳𖾐 𖼻𖽙 𖼠𖽻𖾐 𖼊𖽑𖽺 𖼮𖽑𖽻𖾐 𖼊𖽑𖽡 𖼽𖽚𖾐 𖼂𖽺𖾐 𖼳𖽡𖽻𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽳𖾐 𖼈𖽪𖾐 𖼍𖽦 𖼂𖽺𖾐 𖼊𖽻𖾐．”2 𖼺𖽔 𖼄𖽪 𖽃𖽳 𖼀𖽦𖾐：“𖼣𖽙𖾐 𖽃𖽔 𖼊𖽺𖾐 𖼽𖽡𖾐 𖼊𖽙𖾐 𖼐𖽺𖾑？ 𖼺𖽻 𖼖𖽚 𖼊𖽻 𖼮𖽨 𖼊𖽑𖽡𖾑 𖼣𖽻𖾐，𖼣𖽙𖾐 𖼊𖽑𖽺 𖼺𖽦 𖼦𖽑𖽙𖾐 𖼊𖽻𖾐．”
𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽑𖽡𖾐 𖼐𖽑𖽡 𖼄𖽙𖾐 𖼦𖽑𖽦 𖼊𖽑𖽡 𖼮𖽑𖽡𖾐 𖼺𖽶𖾐 𖼂𖽡𖾐 𖼽𖽡𖾐，𖼦𖽑𖽺𖾑 𖼻𖽻𖾐 𖼀𖽦𖾐 𖼊𖽙𖾐：‘𖼣𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼍𖽡𖾐 𖼊𖽑𖽴 𖼖𖽻𖾐 𖼺𖽪𖾐 𖼣𖽻𖾐．’ 3 𖼐𖽑𖽡𖾐 𖼽𖽺𖾐 𖼳𖽡𖾐 𖼊𖽑𖽺 𖽃𖽶𖾐 𖼮𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽻𖾐 \fr，𖼣𖽙𖾐 𖼐𖽑𖽡𖾐 𖼊𖽑𖽺 𖽃𖽔 𖼊𖽺𖾐 𖼂𖽺𖾐 𖼖𖽡𖾐 𖼀𖽦𖾐 𖼄𖽪𖾑 𖼊𖽻𖾐，𖼣𖽙𖾐 𖼞𖽑𖽙𖾐 𖼺𖽺𖾐 𖼄𖽳𖾐 𖼺𖽪𖾐 𖼞𖽑𖽶𖾑 𖼽𖽚𖾐，𖼐𖽑𖽡𖾐 𖼽𖽻 𖼊𖽑𖽺 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼺𖽺𖾑 𖼽𖽻 𖼞𖽜 𖼈𖽪𖾐 𖼍𖽦 𖼂𖽺𖾐 𖼖𖽡𖾐．”
4 𖽃𖽔𖾐 𖼺𖽺𖾑 𖼺𖽔 𖼄𖽪 𖽃𖽳 𖼽𖽺𖾐 𖼦𖽴 𖼦𖽫 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐．𖼽𖽻 𖼂𖽚 𖼖𖽡𖾑 𖼦𖽴 𖼖𖽪𖾐 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼖𖽪𖾐 𖼞𖽑𖽶𖾐 𖼮𖽳 𖼄𖽻 𖼄𖽳𖾑 𖼄𖽳 𖼮𖽡𖽮𖾐 𖼮𖽡𖽮𖾐 𖼞𖽴𖾐 𖼞𖽴𖾐 𖼊𖽚𖾐 𖼖𖽻𖾐 𖼽𖽻 𖼊𖽑𖽺 𖼹𖽶𖾐，𖼀𖽦𖾐：“𖼐𖽑𖽡𖾐 𖼺𖽙𖾑 𖼺𖽙𖾐 𖼖𖽙𖾐 𖼀𖽙𖾐 𖼖𖽻𖾐 𖼺𖽪𖾐 𖼣𖽻𖾐 𖼣𖽻𖾐？”
5 𖼽𖽻 𖼊𖽻 𖼞𖽑𖽚：“𖼺𖽙𖾑 𖼺𖽙𖾐 𖼖𖽙𖾐 𖼀𖽙𖾐 𖼖𖽻𖾐 𖼺𖽪𖾐 𖼣𖽻𖾐 𖼍𖽳𖾐．𖼣𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼍𖽡𖾐 𖼊𖽑𖽴 𖼖𖽻𖾐 𖼳𖽶 𖼣𖽻𖾐．𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼞𖽚 𖼺𖽡 𖼮𖽡𖾐 𖼺𖽺𖾑，𖼣𖽙𖾐 𖼖𖽙𖾐 𖼮𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽡𖾐\fr．” 𖽃𖽔𖾐 𖼺𖽺𖾑 𖼺𖽔 𖼄𖽪 𖽃𖽳 𖼞𖽻𖾑𖽑 𖼽𖽺𖾐 𖼳𖽡𖾐 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼖𖽙𖾐 𖼀𖽙𖾐 𖼺𖽡 𖼮𖽡𖾐 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼦𖽑𖽙𖾐，𖼽𖽻 𖼈𖽳𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐 𖼊𖽑𖽡 𖼊𖽑𖽜 𖼍𖽡𖾐 𖼮𖽡𖽺𖾐 𖼂𖽺𖾐．
𖼺𖽔 𖼄𖽪 𖽃𖽳 𖼍𖽕𖾑 𖼈𖽪𖽺𖾑 𖼊𖽑𖽺 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼈𖽪𖾐 𖼍𖽦 𖼂𖽺𖾐
6 𖼽𖽻 𖼈𖽳𖾐 𖼞𖽑𖽻𖾑 𖼮𖽑𖽡𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼺𖽔 𖼄𖽪 𖽃𖽳 𖼽𖽡 𖼖𖽡𖾑 𖼽𖽔𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼺𖽺𖾑，𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝：“𖼽𖽺𖾐 𖼦𖽴 𖼦𖽫 𖼣𖽙𖾐 𖼞𖽜 𖼳𖽡𖽻𖾐 𖼷𖽑𖽻𖾐 𖼐𖽑𖽡𖾑 𖼦𖽜 𖼊𖽻𖾐 𖼺𖽪𖾐 𖼷𖽑𖽻𖾐 𖼞𖽶𖾑𖽑 𖼦𖽺𖾑𖽑 𖼽𖽚𖾐 𖼣𖽻𖾐．”
7 𖼦𖽑𖽻𖾐 𖼊𖽑𖽻𖾐，𖼽𖽺𖾐 𖼦𖽴 𖼦𖽫 𖼺𖽔 𖼄𖽪 𖽃𖽳 𖼖𖽙𖾐 𖼀𖽦𖾐：“𖼽𖽻 𖼞𖽳𖾐 𖼀𖽑𖽡𖽻 𖼷𖽚𖾐 𖼐𖽺𖾐 𖼞𖽶𖾐 𖼂𖽚𖾐 𖼈𖽳 𖼖𖽙𖾐 𖼊𖽑𖽔 𖼐𖽦𖾐，𖼞𖽪𖾐 𖼮𖽑𖽡𖽺𖾐 𖼣𖽙𖾐 𖼽𖽻 𖼊𖽑𖽺 𖼄𖽔 𖼺𖽺𖾐．𖼽𖽺𖾐 𖼦𖽴 𖼦𖽫 𖼷𖽑𖽻𖾐 𖼊𖽑𖽺 𖼐𖽦𖾐 𖼺𖽪𖾐，𖼷𖽑𖽻𖾐 𖼮𖽑𖽻 𖼷𖽑𖽻𖾐 𖼐𖽦𖾐 𖼖𖽙𖾐 𖼄𖽔 𖼺𖽶𖾑；𖼷𖽑𖽻𖾐 𖼀𖽑𖽡𖽻 𖼷𖽚𖾐 𖼖𖽙𖾐 𖼐𖽦𖾐 𖼺𖽪𖾐 𖼣𖽻𖾐，𖼽𖽺𖾐 𖼦𖽴 𖼦𖽫 𖼷𖽑𖽻𖾐 𖼐𖽑𖽧𖾐 𖼄𖽙𖾐 𖼖𖽙𖾐 𖼐𖽦𖾐 𖼺𖽪𖾐 𖼣𖽻𖾐．”
8 𖼽𖽺𖾐 𖼳𖽡𖾐 𖼽𖽻 𖼻𖽙 𖼽𖽕𖾑 𖼂𖽡 𖼐𖽕 𖼍𖽕 𖼞𖽜 𖼺𖽔 𖼄𖽪 𖽃𖽳 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼠𖽚 𖼽𖽡𖾐，𖼺𖽔 𖼄𖽪 𖽃𖽳 𖼀𖽦𖾐：“𖼦𖽑𖽺𖾑 𖼽𖽚𖾐 𖼖𖽺𖾑 𖼽𖽺𖾐 𖼦𖽴 𖼦𖽫 𖼺𖽺𖾐 𖼄𖽳𖾐 𖼺𖽪𖾐 𖼄𖽔 𖼣𖽻𖾐．” 9 𖼽𖽺𖾐 𖼳𖽡𖾐 𖼹𖽦𖾑 𖼳𖽔𖾐 𖼄𖽔 𖼞𖽜 𖼺𖽔 𖼄𖽪 𖽃𖽳 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼠𖽚 𖼽𖽡𖾐，𖼺𖽔 𖼄𖽪 𖽃𖽳 𖼀𖽦𖾐：“𖼦𖽑𖽺𖾑 𖼽𖽚𖾐 𖼖𖽺𖾑 𖼽𖽺𖾐 𖼦𖽴 𖼦𖽫 𖼺𖽺𖾐 𖼄𖽳𖾐 𖼺𖽪𖾐 𖼄𖽔 𖼣𖽻𖾐．” 10 𖼽𖽺𖾐 𖼳𖽡𖾐 𖼞𖽳𖾐 𖼻𖽙 𖼳𖽶 𖼽𖽚𖾐 𖼐𖽺𖾐 𖼺𖽔 𖼄𖽪 𖽃𖽳 𖽃𖽙𖾑 𖼄𖽺 𖼮𖽑𖽡𖽺 𖼠𖽚 𖼽𖽡𖾐 𖼦𖽑𖽻𖾐．𖼦𖽑𖽻𖾐 𖼊𖽑𖽻𖾐，𖼺𖽔 𖼄𖽪 𖽃𖽳 𖼽𖽺𖾐 𖼳𖽡𖾐 𖼖𖽙𖾐 𖼀𖽦𖾐：“𖼽𖽻 𖼈𖽳𖾐 𖼊𖽑𖽡 𖼽𖽚𖾐 𖼖𖽺𖾑 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼺𖽺𖾐 𖼄𖽳𖾐 𖼺𖽪𖾐 𖼄𖽔 𖼣𖽻𖾐．” 11 𖼺𖽔 𖼄𖽪 𖽃𖽳 𖼽𖽺𖾐 𖼳𖽡𖾐 𖼖𖽙𖾐 𖼊𖽻 𖼐𖽙𖾐：“𖼐𖽑𖽡𖾐 𖼻𖽙 𖼄𖽳𖾑 𖼄𖽳 𖼦𖽑𖽺𖾑 𖼠𖽻𖾐 𖼮𖽻𖾐 𖼦𖽑𖽻𖾐 𖼖𖽔𖾑？”
𖼽𖽺𖾐 𖼳𖽡𖾐 𖼊𖽻 𖼞𖽑𖽚：“𖼦𖽑𖽔𖾐 𖼮𖽶𖾐 𖼽𖽳𖾐 𖼺𖽪𖾐 𖼊𖽑𖽡 𖼽𖽚𖾐 𖼮𖽻𖾐 𖼍𖽳𖾐 𖼺𖽺，𖼽𖽻 𖽃𖽔𖾑 𖼄𖽳𖾐 𖽃𖽔𖾑 𖼮𖽑𖽸 𖼽𖽻𖾐 𖼖𖽚𖾑．”
𖼺𖽔 𖼄𖽪 𖽃𖽳 𖼽𖽺𖾐 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼷𖽑𖽻𖾐 𖼹𖽡𖾐 𖼽𖽻 𖼊𖽑𖽺 𖽃𖽶𖾐 𖼞𖽚 𖼖𖽻𖾐，𖼽𖽻 𖼄𖽔 𖼮𖽑𖽡𖾐 𖼖𖽻𖾐 𖼊𖽡𖾑𖽑 𖼣𖽻𖾐，𖽃𖽔 𖼐𖽺𖾑 𖼻𖽦 𖼷𖽙𖾐 𖼄𖽔 𖼷𖽙 𖼊𖽻𖾐．”
12 𖽃𖽔𖾐 𖼺𖽺𖾑 𖼽𖽺𖾐 𖼳𖽡𖾐 𖼷𖽑𖽻𖾐 𖼹𖽡𖾐 𖼂𖽡𖾐 𖼽𖽡𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼦𖽳 𖼞𖽚 𖼖𖽻𖾐．𖼽𖽻 𖼦𖽙 𖼺𖽶𖾑 𖼹𖽳𖾐 𖼷𖽑𖽚，𖼄𖽦𖾐 𖼊𖽪 𖼈𖽻𖾑 𖼈𖽻𖾐，𖼀𖽑𖽡𖽻 𖼷𖽚𖾐 𖼐𖽑𖽧𖾐 𖼐𖽜𖾑．
𖼽𖽺𖾐 𖼦𖽴 𖼦𖽫 𖼀𖽦𖾐：“𖼦𖽑𖽺𖾑 𖼽𖽚𖾐 𖼣𖽻𖾐，𖼐𖽑𖽡𖾐 𖼍𖽪𖾐 𖼖𖽻𖾐 𖼽𖽻 𖼊𖽑𖽺 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜！”
13 𖽃𖽔𖾐 𖼺𖽺𖾑 𖼺𖽔 𖼄𖽪 𖽃𖽳 𖼳𖽡𖽻𖾐 𖼷𖽑𖽳𖾐 𖼰𖽡𖽺𖾐 𖼺𖽪𖾐 𖼽𖽻𖾐 𖼮𖽑𖽡𖽪𖾐 𖼈𖽺𖾐 𖼍𖽪𖾐 𖼖𖽻𖾐，𖼍𖽕𖾑 𖼈𖽪𖽺𖾑 𖼊𖽑𖽺 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼺𖽺𖾐 𖼊𖽑𖽧 𖼖𖽻𖾐 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜．𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽻𖾐 𖼍𖽪𖾐，𖼽𖽺𖾐 𖼦𖽴 𖼦𖽫 𖼞𖽳𖾐 𖼳𖽨𖾐 𖼈𖽳 𖼈𖽳 𖼄𖽙𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼞𖽕 𖼍𖽪𖾐．𖼄𖽡𖽻 𖼦𖽺𖾑𖽑 𖼠𖽙𖾑 𖼍𖽻𖾐，𖼺𖽔 𖼄𖽪 𖽃𖽳 𖼖𖽔𖾐 𖼄𖽔 𖼖𖽪𖾐 𖼞𖽳𖾐 𖼞𖽚 𖼽𖽡𖾐 𖼦𖽑𖽙𖾐．
𖼍𖽕𖾑 𖼈𖽪𖽺𖾑 𖼺𖽻 𖼖𖽚 𖼖𖽙𖾐 𖼀𖽙𖾐 𖼮𖽑𖽧 𖼀𖽝𖾐
14 𖼽𖽺𖾐 𖼦𖽴 𖼦𖽫 𖼞𖽳𖾐 𖼳𖽨𖾐 𖼺𖽻 𖼖𖽚 𖼊𖽑𖽺 𖼰𖽡𖾑 𖼦𖽑𖽙𖾐．𖼳𖽨𖾐 𖼊𖽑𖽡 𖼊𖽝𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼮𖽑𖽻𖾐 𖼖𖽻𖾐 𖼺𖽻 𖼖𖽚 𖼊𖽑𖽺 𖼻𖽸．
15 𖼺𖽻 𖼖𖽚 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼽𖽻 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼳𖽨𖾐 𖼊𖽶𖾐 𖼐𖽑𖽡𖾐 𖼊𖽑𖽺 𖼻𖽸． 16 𖼈𖽪𖾐 𖼍𖽦 𖽃𖽔𖾐！𖼐𖽑𖽡𖾐 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼊𖽑𖽺 𖼹𖽡𖾐 𖼺𖽺𖾑，𖼮𖽑𖽧 𖼀𖽝𖾐 𖼠𖽸𖾑 𖼺𖽪𖾐 𖼊𖽑𖽡 𖼽𖽚𖾐 𖼰𖽙𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼳𖽨𖾐 𖼊𖽶𖾐 𖼐𖽑𖽡𖾐 𖼊𖽑𖽺 𖼻𖽸 𖼞𖽑𖽶𖾑 𖼮𖽶𖾐，𖼽𖽻 𖼐𖽑𖽡𖾐 𖼖𖽙𖾐 𖼂𖽻𖾐 𖼮𖽑𖽧 𖼀𖽝𖾐 𖼺𖽺𖾑，𖼐𖽑𖽡𖾐 𖼺𖽙𖾑 𖼺𖽙𖾐 𖽂𖽙𖾐 𖼮𖽻𖾐 𖼊𖽙𖾐．”
17 𖼺𖽻 𖼖𖽚 𖼽𖽻 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼣𖽙𖾐 𖼖𖽙𖾐 𖼂𖽻𖾐 𖼮𖽑𖽧 𖼀𖽝𖾐 𖼹𖽳𖾐 𖼺𖽪𖾐 𖼊𖽑𖽡 𖼽𖽚𖾐 𖼰𖽙𖾐，𖼦𖽳 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐．”
18 𖼮𖽜𖾐 𖼀𖽑𖽙 𖼊𖽑𖽡 𖼽𖽚𖾐 𖼊𖽻 𖼞𖽑𖽚：“𖼣𖽙𖾐 𖼂𖽚 𖼖𖽡𖾑 𖼦𖽴 𖼖𖽪𖾐 𖼽𖽺𖾐 𖼳𖽡𖾐 𖼞𖽳𖾐 𖼻𖽙 𖼊𖽑𖽡 𖼽𖽚𖾐 𖼊𖽑𖽺 𖼄𖽡𖽻𖾐 𖼠𖽚，𖼽𖽻 𖼮𖽑𖽧 𖼦𖽑𖽔𖾐 𖼮𖽶𖾐 𖼀𖽝𖾐 𖼹𖽳𖾐，𖼊𖽻 𖼂𖽪𖾑 𖼊𖽑𖽜𖾐 𖼹𖽳𖾐，𖼀𖽑𖽡𖽻 𖼷𖽚𖾐 𖼐𖽑𖽧𖾐 𖼐𖽜𖾑，𖽂𖽙 𖼐𖽑𖽡𖾐 𖼈𖽳 𖼮𖽻𖾐，𖼰𖽕𖾑 𖼊𖽝 𖼖𖽕𖾐 𖼺𖽪𖾐 𖼄𖽦 𖼀𖽑𖽙 𖼊𖽑𖽡 𖼽𖽚𖾐 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖼖𖽺𖾑 𖼽𖽻 𖼖𖽙𖾐 𖼮𖽑𖽻𖾐 𖼮𖽻𖾐．”
19 𖽃𖽔𖾐 𖼺𖽺𖾑 𖼺𖽻 𖼖𖽚 𖼷𖽑𖽻𖾐 𖼹𖽡𖾐 𖼽𖽺𖾐 𖼳𖽡𖾐 𖼊𖽑𖽺 𖼄𖽡𖽻𖾐 𖼽𖽡𖾐，𖼀𖽦𖾐：“𖼐𖽑𖽡𖾐 𖼻𖽙 𖽃𖽔𖾑 𖼮𖽑𖽸 𖼽𖽻𖾐 𖼖𖽚𖾑 𖼺𖽪𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼦𖽳 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼞𖽜．” 20 𖽃𖽔𖾐 𖼺𖽺𖾑 𖼽𖽺𖾐 𖼳𖽡𖾐 𖼊𖽑𖽳 𖼖𖽳𖾐 𖼄𖽪 𖼊𖽑𖽡 𖼷𖽳 𖼺𖽶𖾐 𖼂𖽻𖾐 𖼖𖽻𖾐，𖽃𖽔𖾑 𖼂𖽻𖾐、𖼮𖽶𖾐 𖼀𖽳 𖼊𖽑𖽡 𖼖𖽧𖾑 𖼐𖽺𖾐 𖼽𖽻𖾐 𖼻𖽙 𖼊𖽑𖽡 𖼊𖽝𖾐，𖼰𖽡𖽻𖾐 𖼽𖽻 𖼻𖽙 𖼍𖽕𖾑 𖼈𖽪𖽺𖾑 𖼊𖽑𖽺 𖼞𖽜 𖼺𖽺𖾑，𖼦𖽑𖽙𖾐 𖼺𖽻 𖼖𖽚 𖼊𖽑𖽺 𖼞𖽜 𖼽𖽡𖾐．
21 𖼍𖽕𖾑 𖼈𖽪𖽺𖾑 𖼽𖽡𖾐 𖼺𖽻 𖼖𖽚 𖼞𖽳𖾐 𖼞𖽑𖽻𖾑 𖼮𖽑𖽡𖾐，𖼺𖽻 𖼖𖽚 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼹𖽡𖾐 𖼖𖽦 𖼂𖽺𖾐．𖼺𖽻 𖼖𖽚 𖼽𖽻 𖼊𖽑𖽺 𖼦𖽑𖽔𖾐 𖼮𖽶𖾐 𖼐𖽑𖽧𖾐 𖼺𖽳，𖽃𖽔𖾐 𖼺𖽺𖾑 𖼽𖽻 𖼺𖽻 𖼖𖽚 𖼞𖽳𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼂𖽺𖾐．
22 𖽃𖽔𖾐 𖼺𖽺𖾑，𖼺𖽻 𖼖𖽚 𖼷𖽑𖽻𖾐 𖼹𖽡𖾐 𖼽𖽺𖾐 𖼳𖽡𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐，𖼀𖽦𖾐：“𖼐𖽑𖽡𖾐 𖼍𖽕𖾑 𖼈𖽪𖽺𖾑 𖼞𖽜 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼣𖽙𖾐 𖼊𖽑𖽺 𖼠𖽙𖾐 𖼳𖽙𖾐 𖼖𖽻𖾐 𖼞𖽜，𖼞𖽪𖾐 𖼮𖽡𖽺𖾐 𖼣𖽙𖾐 𖼽𖽻 𖼊𖽑𖽺 𖼐𖽑𖽧𖾐 𖼺𖽳．”
23 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼳𖽨𖾐 𖼊𖽶𖾐 𖼖𖽻𖾐 𖼺𖽻 𖼖𖽚 𖼞𖽶𖾐 𖼮𖽑𖽶 𖼊𖽑𖽺 𖼞𖽑𖽙𖾐 𖼻𖽸 𖼞𖽑𖽶𖾑 𖼮𖽶𖾐，𖼍𖽕𖾑 𖼈𖽪𖽺𖾑 𖼮𖽑𖽧 𖼈𖽺𖾐 𖼂𖽻𖾐 𖼖𖽻𖾐 𖼀𖽝𖾐，𖼺𖽻 𖼖𖽚 𖼐𖽑𖽧𖾐 𖼄𖽙𖾐 𖼺𖽙𖾑 𖼺𖽙𖾐 𖽂𖽙𖾐 𖼮𖽻𖾐，𖼳𖽨𖾐 𖼊𖽶𖾐 𖼖𖽺𖾑 𖼽𖽻 𖼊𖽑𖽺 𖼰𖽡𖾑 𖼦𖽑𖽙𖾐．