𖼺𖽻 𖼖𖽚 𖽂𖽙 𖼺𖽙𖾐 𖼂𖽙𖾐 𖼀𖽦𖾐 𖼺𖽪𖾐 𖼊𖽑𖽺 𖼊𖽻 𖼄𖽔 𖼐𖽙𖾐
15
1 𖼺𖽔 𖼄𖽪 𖽃𖽳 𖼺𖽻 𖼖𖽚 𖼖𖽙𖾐 𖼀𖽦𖾐：“𖼽𖽺𖾐 𖼦𖽴 𖼦𖽫 𖼣𖽙𖾐 𖼊𖽑𖽺 𖼹𖽡𖾐，𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼐𖽑𖽡𖾐 𖼊𖽑𖽺 𖼦𖽜，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐，𖽃𖽔𖾐 𖼺𖽺𖾑 𖽃𖽔𖾑 𖼄𖽳𖾐 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼖𖽡𖾐． 2 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽦𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼊𖽝 𖼊𖽦，𖽃𖽔𖾐 𖼺𖽺𖾑 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖽂𖽙 𖼇𖽕 𖼳𖽶 𖼊𖽻𖾐． 3 𖽃𖽔𖾑 𖼄𖽳𖾐 𖼐𖽑𖽡𖾐 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼊𖽝 𖼽𖽡𖾐 𖼖𖽡𖾐，𖼽𖽻 𖼈𖽳𖾐 𖼞𖽳𖾐 𖼞𖽑𖽙𖾐 𖼮𖽻𖾐 𖼳𖽶 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼖𖽡𖾐，𖼽𖽻 𖼈𖽳𖾐 𖼊𖽑𖽺 𖽂𖽙𖾐 𖼐𖽑𖽧𖾐 𖼮𖽡𖽻𖾐 𖼄𖽔 𖼊𖽙𖾐．𖼻𖽙 𖼄𖽳 𖼻𖽙 𖼐𖽜𖾐 𖼣𖽻𖾐 𖼦𖽻，𖽃𖽔𖾐 𖼐𖽑𖽳𖾐 𖼐𖽺𖾐 𖽃𖽔𖾐 𖼞𖽶𖾑 𖼀𖽕𖾑 𖼮𖽸𖾐 𖼮𖽑𖽸 𖼺𖽪𖾐 𖼣𖽻𖾐 𖼦𖽻，𖼐𖽑𖽡、𖽃𖽔𖾑 𖼮𖽑𖽸 𖼽𖽻𖾐、𖼖𖽚𖾑 𖼊𖽑𖽚 𖼐𖽺𖾐 𖼊𖽑𖽳 𖼖𖽳𖾐 𖼄𖽪，𖼄𖽳𖾑 𖼄𖽳 𖼺𖽦 𖼦𖽑𖽙𖾐 𖼖𖽡𖾐．4 𖽃𖽔𖾐 𖼺𖽺𖾑 𖼺𖽻 𖼖𖽚 𖼷𖽑𖽻𖾐 𖼷𖽪𖾐 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐，𖼊𖽑𖽧 𖼖𖽔𖾐 𖼽𖽺𖾐 𖼄𖽡𖾐 𖼊𖽺𖾐 𖼽𖽻 𖼈𖽳𖾐 𖼊𖽑𖽺 𖼈𖽜𖾐 𖼐𖽦𖾐，𖼮𖽨𖾐 𖼺𖽜 𖼺𖽪𖾐 𖼄𖽦 𖼀𖽑𖽙 𖼄𖽳𖾑 𖼄𖽳 𖼐𖽑𖽡 𖼷𖽑𖽡𖾐 𖼄𖽺 𖼮𖽻𖾐，𖼽𖽚 𖼍𖽕𖾑 𖼺𖽪𖾐 𖼄𖽦 𖼀𖽑𖽙 𖼊𖽑𖽡 𖼄𖽺 𖼮𖽻𖾐． 5 𖼺𖽻 𖼖𖽚 𖼽𖽡𖾐 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼖𖽪𖾐 𖼞𖽑𖽶𖾐 𖼮𖽑𖽡𖾐，𖼄𖽦 𖼀𖽑𖽙 𖼂𖽺𖾐 𖼳𖽡𖽻𖾐 𖼖𖽻𖾐 𖼠𖽕𖾑 𖼰𖽡𖽚𖾐 𖼞𖽑𖽶𖾐 𖼮𖽻𖾐． 6 𖼺𖽻 𖼖𖽚 𖼰𖽡𖾐 𖼐𖽑𖽧 𖼮𖽑𖽪𖾐 𖼳𖽶 𖼷𖽑𖽻𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼹𖽺𖾐 𖼽𖽡𖾐 𖼦𖽻！𖽃𖽔𖾑 𖼽𖽪𖾐 𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼖𖽺𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼄𖽳 𖼮𖽡𖽦 𖼦𖽑𖽙𖾐 𖼠𖽸𖾑．𖼞𖽪𖾐 𖼮𖽡𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽦𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼽𖽻 𖼈𖽳𖾐 𖼊𖽑𖽺 𖼹𖽳𖾐 𖼂𖽺𖾐 𖼠𖽚．” 𖽃𖽔𖾐 𖼺𖽺𖾑 𖼰𖽡𖾐 𖼐𖽑𖽧 𖼺𖽪𖾐 𖼷𖽑𖽻𖾐 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽜 𖼽𖽡𖾐．
7 𖼺𖽻 𖼖𖽚 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼺𖽦，𖼦𖽔𖾐 𖼇𖽺𖾐 𖼖𖽔𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖽃𖽦𖾐 𖼰𖽧 𖼠𖽚 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼞𖽳𖾐 𖼳𖽪𖾐 𖽃𖽳 𖼄𖽡𖾐 𖼊𖽺𖾐 𖼖𖽙𖾐 𖼮𖽑𖽡𖾐． 8 𖼺𖽻 𖼖𖽚 𖽃𖽔𖾑 𖼊𖽑𖽙 𖼻𖽜 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼊𖽑𖽺 𖼺𖽦 𖼦𖽑𖽙𖾐，𖼹𖽦𖾑 𖼽𖽕𖾑 𖼄𖽔 𖼖𖽧𖾑 𖼺𖽪𖾐 𖼈𖽪𖾐 𖼍𖽦 𖼽𖽕𖾑 𖼰𖽡𖽕 𖼊𖽑𖽺 𖼠𖽙𖾑 𖼠𖽙𖾑 𖼐𖽺𖾐 𖼵𖽪𖾐 𖽂𖽙𖾐． 9 𖼺𖽻 𖼖𖽚 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼽𖽕𖾑 𖼰𖽡𖽕 𖼊𖽑𖽺 𖼄𖽔 𖼺𖽦，𖼦𖽑𖽔𖾐 𖼖𖽺𖾑 𖼞𖽑𖽙𖾐 𖼹𖽳𖾐 𖼺𖽪𖾐 𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐，𖼐𖽑𖽡 𖼻𖽙 𖼷𖽑𖽪𖾐、𖽃𖽔𖾑 𖼮𖽑𖽸 𖼽𖽻𖾐 𖼻𖽙 𖼐𖽺𖾐 𖼞𖽑𖽙𖾐 𖼹𖽳𖾐 𖼺𖽪𖾐 𖼄𖽡𖽻 𖼐𖽑𖽡 𖼊𖽑𖽺 𖼐𖽦𖾐 𖼊𖽑𖽝𖾐 𖼺𖽺𖾑，𖼦𖽑𖽺𖾑 𖼹𖽻𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼄𖽔 𖼽𖽦，𖼞𖽑𖽙𖾐 𖼠𖽴𖾐 𖼺𖽪𖾐 𖼐𖽺𖾐 𖼀𖽑𖽶 𖼄𖽔 𖼊𖽴 𖼺𖽪𖾐 𖼽𖽻 𖼈𖽳𖾐 𖼮𖽑𖽢𖾑 𖼄𖽳 𖼮𖽡𖽦 𖼦𖽑𖽙𖾐 𖼦𖽑𖽻𖾐．
𖼺𖽻 𖼖𖽚 𖼊𖽑𖽺 𖼦𖽑𖽳𖾐 𖼄𖽳𖾐
10 𖼽𖽺𖾐 𖼦𖽴 𖼦𖽫 𖼺𖽔 𖼄𖽪 𖽃𖽳 𖼊𖽑𖽺 𖼀𖽑𖽪𖾐 𖼄𖽪𖾑，𖼀𖽦𖾐： 11 “𖼣𖽙𖾐 𖼺𖽻 𖼖𖽚 𖼊𖽑𖽺 𖼺𖽺𖾐 𖼈𖽪𖾐 𖼍𖽦 𖼂𖽺𖾐 𖼦𖽑𖽔𖾐 𖼮𖽶𖾐 𖼐𖽑𖽧𖾐 𖽃𖽝𖾐 𖼠𖽚 𖼳𖽚𖾑，𖼞𖽪𖾐 𖼮𖽡𖽺𖾐 𖼽𖽻 𖼣𖽙𖾐 𖼊𖽑𖽺 𖼰𖽡𖾑 𖼦𖽑𖽙𖾐，𖼣𖽙𖾐 𖼠𖽙𖾑 𖼍𖽻𖾐 𖼄𖽔 𖼮𖽑𖽻𖾐，𖼣𖽙𖾐 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼖𖽺𖾑 𖼄𖽔 𖼳𖽪𖾐．” 𖼺𖽔 𖼄𖽪 𖽃𖽳 𖼦𖽑𖽔𖾐 𖼮𖽶𖾐 𖼀𖽶 𖼻𖽶，𖼊𖽑𖽡 𖼦𖽑𖽦 𖼐𖽺𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐．
12 𖼺𖽔 𖼄𖽪 𖽃𖽳 𖼷𖽑𖽶𖾐 𖼐𖽦 𖼍𖽪𖾐 𖼖𖽻𖾐，𖼺𖽻 𖼖𖽚 𖼊𖽑𖽺 𖼄𖽡𖽻𖾐 𖼽𖽡𖾐 𖼊𖽻𖾐．𖼺𖽔 𖼄𖽪 𖽃𖽳 𖼊𖽑𖽺 𖼀𖽦𖾐 𖼊𖽑𖽧 𖼺𖽪𖾐 𖼷𖽑𖽻𖾐 𖼮𖽻𖾐：“𖼺𖽻 𖼖𖽚 𖼽𖽡𖾐 𖼰𖽡𖽔𖾐 𖼄𖽧𖾑 𖼖𖽪𖾐 𖼞𖽳𖾐 𖼽𖽻 𖼄𖽳𖾑 𖼄𖽡𖾐 𖼊𖽻 𖼊𖽑𖽺 𖼦𖽙𖾑 𖼮𖽑𖽡 𖼖𖽡𖾐 𖼖𖽙𖾐 𖼀𖽙𖾐 𖼖𖽚𖾐 𖼀𖽳𖾐 𖼊𖽑𖽡 𖼊𖽝𖾐 𖼍𖽳𖾐 𖼍𖽙𖾑 𖼺𖽺𖾑，𖼠𖽙𖾑 𖼍𖽻𖾐 𖼀𖽑𖽚𖾐 𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼹𖽺𖾐 𖼽𖽡𖾐 𖼦𖽑𖽙𖾐．”
13 𖼺𖽔 𖼄𖽪 𖽃𖽳 𖼽𖽡𖾐 𖼺𖽻 𖼖𖽚 𖼞𖽳𖾐 𖼞𖽑𖽶𖾑 𖼠𖽻𖾐 𖼮𖽑𖽡𖾐，𖼺𖽻 𖼖𖽚 𖼽𖽻 𖼖𖽙𖾐 𖼀𖽦𖾐：“𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼄𖽢 𖼖𖽪𖾐 𖼞𖽜！𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽪𖾑 𖼊𖽻 𖼣𖽙𖾐 𖼳𖽪𖾐 𖼮𖽑𖽡𖾐 𖼦𖽑𖽻𖾐．”
14 𖼺𖽔 𖼄𖽪 𖽃𖽳 𖼀𖽦𖾐：“𖼣𖽙𖾐 𖽃𖽔𖾑 𖼮𖽑𖽸 𖼽𖽻𖾐 𖼐𖽺𖾐 𖼐𖽑𖽡 𖼞𖽳𖾐 𖼀𖽶𖾐 𖼮𖽑𖽡𖽪 𖼊𖽻 𖼮𖽨，𖼞𖽑𖽶𖾑 𖽃𖽔 𖼊𖽺𖾑 𖼳𖽶 𖼄𖽡𖽻 𖼣𖽻𖾐 𖼐𖽺𖾑？
15 𖼺𖽻 𖼖𖽚 𖼊𖽻 𖼞𖽑𖽚：“𖼮𖽡𖽺 𖼦𖽑𖽺𖾑 𖼹𖽻𖾐 𖼷𖽑𖽻𖾐 𖼀𖽺 𖼞𖽑𖽻𖾑 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽺𖾐 𖼂𖽻𖾐 𖼖𖽻𖾐 𖼳𖽶 𖼣𖽻𖾐，𖼞𖽪𖾐 𖼮𖽡𖽺𖾐 𖼽𖽻 𖼈𖽳𖾐 𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖼦𖽑𖽺𖾑 𖼹𖽻𖾐 𖼊𖽑𖽺 𖼐𖽙𖾑 𖼣𖽜，𖼦𖽑𖽙𖾐 𖼐𖽑𖽡𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐 𖼊𖽻𖾐，𖼷𖽺 𖼷𖽺𖾐 𖼺𖽪𖾐 𖼄𖽳𖾑 𖼄𖽳 𖼣𖽙𖾐 𖼈𖽳𖾐 𖼮𖽑𖽢𖾑 𖼄𖽳 𖼮𖽡𖽦 𖼦𖽑𖽙𖾐 𖼦𖽑𖽻𖾐．”
16 𖼺𖽔 𖼄𖽪 𖽃𖽳 𖼺𖽻 𖼖𖽚 𖼖𖽙𖾐 𖼀𖽦𖾐：“𖼊𖽑𖽔 𖼊𖽑𖽜𖾐 𖼦𖽻！𖽃𖽔 𖼄𖽺𖾐 𖼽𖽺𖾐 𖼦𖽴 𖼦𖽫 𖼣𖽙𖾐 𖼖𖽙𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑，𖼣𖽙𖾐 𖼀𖽦𖾐 𖼐𖽑𖽡𖾐 𖼖𖽙𖾐 𖼊𖽑𖽧 𖼊𖽻𖾐．”
𖼺𖽻 𖼖𖽚 𖼺𖽔 𖼄𖽪 𖽃𖽳 𖼖𖽙𖾐 𖼀𖽦𖾐：“𖼐𖽑𖽡𖾐 𖼀𖽦𖾐 𖼄𖽺！”
17 𖼺𖽔 𖼄𖽪 𖽃𖽳 𖼀𖽦𖾐：“𖽃𖽙𖾑 𖼄𖽺 𖼊𖽑𖽙 𖼐𖽑𖽡𖾐 𖼽𖽻 𖼄𖽳𖾑 𖼞𖽚 𖼽𖽳𖾐 𖼺𖽪𖾐 𖼰𖽕𖾐，𖽃𖽔𖾑 𖼄𖽳𖾐 𖼐𖽑𖽡𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾑 𖼷𖽪𖾐 𖽂𖽙𖾐 𖼂𖽺𖾐 𖼄𖽔 𖼣𖽻𖾐 𖼖𖽔？ 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼳𖽡𖽻𖾐 𖼷𖽑𖽳𖾐 𖼐𖽑𖽡𖾑 𖼦𖽜 𖼺𖽺𖾑，𖼐𖽑𖽡𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼞𖽳𖾐 𖼈𖽪𖾐 𖼍𖽦 𖼂𖽺𖾐， 18 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼹𖽡𖾐 𖼄𖽪𖾑，𖼀𖽦𖾐：‘𖼐𖽑𖽡𖾐 𖼽𖽡𖾐 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼺𖽪𖾐 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼊𖽝 𖼊𖽦，𖼽𖽻 𖼈𖽳𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼖𖽡𖾐．’ 19 𖼐𖽑𖽡𖾐 𖽃𖽔𖾐 𖼹𖽻𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽪𖾑 𖼊𖽻 𖼊𖽑𖽺 𖼄𖽔 𖼳𖽪𖾐，𖼞𖽚 𖼀𖽑𖽚𖾐 𖼐𖽕 𖼊𖽺𖾐 𖼽𖽡𖾐 𖼰𖽕𖾑 𖼊𖽝 𖽂𖽙𖾐 𖼺𖽪𖾐 𖼄𖽡𖽻 𖼐𖽑𖽡 𖼐𖽻𖾑 𖼺𖽺𖾑，𖼽𖽺𖾐 𖼦𖽴 𖼦𖽫 𖼊𖽶𖾐 𖼰𖽕𖾐 𖼺𖽪𖾐 𖼄𖽡𖽻 𖼞𖽑𖽶𖾑 𖼂𖽺𖾐 𖼐𖽺𖾑？”
20 𖼺𖽻 𖼖𖽚 𖼺𖽔 𖼄𖽪 𖽃𖽳 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖼠𖽕𖾐 𖼰𖽶𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽪𖾑 𖼊𖽻 𖼊𖽑𖽺 𖼳𖽪𖾐 𖼦𖽑𖽻𖾐，𖼣𖽙𖾐 𖼽𖽻 𖼞𖽑𖽙𖾐 𖼹𖽡𖾐 𖼄𖽪𖾑 𖼺𖽪𖾐 𖼮𖽨𖾐 𖼄𖽙𖾐 𖼺𖽜 𖼦𖽑𖽙𖾐，𖼣𖽙𖾐 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼽𖽕𖾑 𖼰𖽡𖽕 𖼊𖽑𖽺 𖼵𖽪𖾐 𖼞𖽚 𖼖𖽻𖾐，𖼦𖽑𖽔𖾐 𖼖𖽺𖾑 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽑𖽙𖾐 𖼣𖽻𖾐 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐． 21 𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼀𖽺 𖼍𖽺𖾑 𖼰𖽕𖾑 𖼊𖽝 𖽂𖽙𖾐 𖼺𖽪𖾐 𖼄𖽡𖽻 𖼐𖽑𖽡 𖼠𖽻𖾐 𖼊𖽑𖽺 𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖼈𖽺𖾐 𖼂𖽻𖾐 𖼖𖽻𖾐 𖼺𖽺𖾑，𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼮𖽻𖾐 𖼦𖽑𖽙𖾐 𖼐𖽑𖽡𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼍𖽡𖾐 𖼊𖽻𖾐．
22 𖼺𖽔 𖼄𖽪 𖽃𖽳 𖼀𖽦𖾐：
“𖼽𖽺𖾐 𖼦𖽴 𖼦𖽫 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼐𖽺𖾐 𖼺𖽙𖾑 𖼺𖽙𖾐 𖼍𖽡𖾐 𖼮𖽡𖽺𖾐 𖼊𖽑𖽺 𖼐𖽑𖽧𖾐 𖼺𖽳，
𖼞𖽑𖽶𖾑 𖼷𖽑𖽻𖾐 𖼽𖽻 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼦𖽶𖾑 𖼄𖽔 𖼷𖽑𖽶𖾐 𖼐𖽑𖽧𖾐 𖼺𖽳 𖼠𖽸𖾑 𖼖𖽔𖾑？
𖼊𖽻 𖼐𖽙𖾐 𖼦𖽶𖾐 𖼞𖽑𖽶𖾑 𖼍𖽡𖾐 𖼮𖽡𖽺𖾐 𖼂𖽺𖾐 𖼦𖽶𖾑 𖼄𖽔 𖼷𖽑𖽶𖾐 𖼹𖽳𖾐，
𖼮𖽻𖾑 𖼊𖽴 𖼦𖽶𖾐 𖼞𖽑𖽶𖾑 𖼽𖽻𖾐 𖼖𖽙𖾐 𖼷𖽑𖽳𖾐 𖼊𖽑𖽺 𖼠𖽳𖾐 𖼳𖽶 𖼣𖽻𖾐．
23 𖼖𖽺𖾐 𖼈𖽳𖾑 𖼐𖽺𖾐 𖼳𖽳 𖼂𖽺𖾐 𖼞𖽑𖽶𖾑 𖼷𖽙𖾐 𖼖𖽙𖾐 𖼺𖽶𖾑 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼺𖽪𖾐 𖼣𖽻𖾐，
𖼐𖽑𖽧𖾐 𖼠𖽴𖾐 𖼐𖽺𖾐 𖼺𖽡𖾐 𖼮𖽑𖽡𖽻𖾐 𖼊𖽑𖽺 𖼊𖽑𖽴 𖼞𖽑𖽶𖾑 𖼊𖽑𖽡 𖼳𖽶 𖼍𖽺𖾑 𖼣𖽻𖾐．
𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽪𖾑 𖼊𖽻 𖼊𖽑𖽺 𖼄𖽔 𖼳𖽪𖾐 𖼺𖽺𖾑，
𖼽𖽺𖾐 𖼦𖽴 𖼦𖽫 𖼖𖽺𖾑 𖼐𖽑𖽡𖾐 𖼊𖽑𖽺 𖼰𖽡𖾑 𖼦𖽑𖽙𖾐，
𖼐𖽑𖽡𖾐 𖼞𖽜 𖼈𖽪𖾐 𖼍𖽦 𖼂𖽺𖾐 𖼐𖽑𖽧𖾐 𖼄𖽔 𖼺𖽳 𖼦𖽑𖽻𖾐．”
𖼺𖽻 𖼖𖽚 𖼽𖽺𖾐 𖼮𖽑𖽡𖽪𖾑 𖼵𖽜𖾑
24 𖽃𖽔𖾐 𖼺𖽺𖾑 𖼺𖽻 𖼖𖽚 𖼺𖽔 𖼄𖽪 𖽃𖽳 𖼖𖽙𖾐 𖼀𖽦𖾐：“𖼣𖽙𖾐 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼦𖽑𖽻𖾐，𖼣𖽙𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽪𖾑 𖼊𖽻 𖼐𖽺𖾐 𖼐𖽑𖽡𖾐 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼄𖽔 𖼳𖽪𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼷𖽑𖽻𖾐 𖼷𖽪𖾐 𖼊𖽑𖽺 𖼮𖽡𖽮𖾐 𖼺𖽺𖾑，𖼽𖽻 𖼈𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼺𖽪𖾐 𖼣𖽻𖾐． 25 𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼽𖽺𖾐 𖼮𖽑𖽡𖽪𖾑 𖼊𖽑𖽺 𖼄𖽡𖽺 𖼞𖽜，𖼐𖽑𖽡𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼞𖽚 𖼽𖽡𖾐 𖼊𖽡𖾑𖽑 𖼣𖽻𖾐，𖼣𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖽂𖽙𖾐 𖼍𖽡𖾐 𖼊𖽑𖽴 𖼊𖽙𖾐．”
26 𖼺𖽔 𖼄𖽪 𖽃𖽳 𖼺𖽻 𖼖𖽚 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼄𖽔 𖼽𖽡𖾐！𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽪𖾑 𖼊𖽻 𖼊𖽑𖽺 𖼄𖽻 𖼳𖽪𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼖𖽺𖾑 𖼐𖽑𖽡𖾐 𖼊𖽑𖽺 𖼰𖽡𖾑 𖼦𖽑𖽙𖾐，𖼐𖽑𖽡𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽳𖾐 𖼈𖽪𖾐 𖼍𖽦 𖼄𖽔 𖼂𖽺𖾐 𖼦𖽑𖽻𖾐．”
27 𖼺𖽔 𖼄𖽪 𖽃𖽳 𖼰𖽻𖾐 𖼀𖽑𖽚𖾐 𖼺𖽜 𖼽𖽡𖾐 𖼊𖽻𖾐 𖼞𖽑𖽶𖾑 𖼮𖽶𖾐，𖼺𖽻 𖼖𖽚 𖼺𖽔 𖼄𖽪 𖽃𖽳 𖼞𖽳𖾐 𖼀𖽑𖽡𖽻𖾐 𖼮𖽻 𖼄𖽳𖾑 𖼰𖽸𖾐 𖼍𖽡 𖼺𖽺𖾑，𖼀𖽑𖽡𖽻𖾐 𖼄𖽳𖾑 𖼖𖽦 𖼰𖽸𖾐 𖼮𖽑𖽡𖽦 𖼦𖽑𖽙𖾐． 28 𖼺𖽔 𖼄𖽪 𖽃𖽳 𖼺𖽻 𖼖𖽚 𖼖𖽙𖾐 𖼀𖽦𖾐：“𖽃𖽙𖾑 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼊𖽑𖽺 𖼦𖽺𖾑𖽑 𖼖𖽙𖾐 𖼺𖽶𖾑 𖼰𖽸𖾐 𖼮𖽑𖽡𖽦 𖼦𖽑𖽙𖾐 𖼺𖽺𖾑，𖼖𖽪 𖼐𖽑𖽡𖾐 𖼦𖽶𖾑 𖼄𖽔 𖼷𖽑𖽶𖾐 𖼹𖽳𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼊𖽑𖽺 𖼞𖽜 𖼊𖽻𖾐． 29 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼺𖽡 𖼀𖽑𖽙，𖼽𖽻 𖼇𖽪 𖼊𖽻 𖼄𖽔 𖼊𖽑𖽜，𖼽𖽻 𖼣𖽝 𖼷𖽑𖽦𖾐 𖼺𖽪𖾐 𖼊𖽑𖽺 𖼄𖽔 𖼣𖽝 𖼀𖽑𖽚𖾐 𖼊𖽻𖾐．𖼞𖽪𖾐 𖼮𖽡𖽺𖾐 𖼽𖽻 𖼊𖽺𖾐 𖼊𖽑𖽺 𖼷𖽑𖽻𖾐 𖼖𖽙𖾐 𖼄𖽔 𖼺𖽶𖾑，𖼽𖽻 𖼷𖽑𖽜𖾑 𖼷𖽑𖽜𖾐 𖼄𖽔 𖼣𖽝 𖼀𖽑𖽚𖾐 𖼊𖽻𖾐．”
30 𖼺𖽻 𖼖𖽚 𖼀𖽦𖾐：“𖼣𖽙𖾐 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼦𖽑𖽻𖾐，𖼦𖽑𖽻𖾐 𖼊𖽑𖽻𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼮𖽳 𖼄𖽻 𖽃𖽙𖾑 𖼄𖽺 𖼮𖽑𖽡𖽺 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺，𖼐𖽑𖽡𖾐 𖼣𖽙𖾐 𖼊𖽑𖽺 𖼮𖽑𖽻 𖼄𖽦𖾐 𖼍𖽙𖾑 𖼞𖽜，𖼐𖽑𖽡𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼞𖽚 𖼽𖽡𖾐 𖼞𖽜，𖼣𖽙𖾐 𖼞𖽜 𖼐𖽑𖽡𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖽂𖽙𖾐 𖼍𖽡𖾐 𖼊𖽑𖽴 𖼊𖽙𖾐． 31 𖽃𖽔𖾐 𖼺𖽺𖾑，𖼺𖽔 𖼄𖽪 𖽃𖽳 𖼺𖽻 𖼖𖽚 𖼖𖽙𖾐 𖼮𖽑𖽻𖾐 𖼞𖽚 𖼽𖽡𖾐，𖼺𖽻 𖼖𖽚 𖼽𖽺𖾐 𖼦𖽴 𖼦𖽫 𖼊𖽑𖽺 𖼍𖽡𖾐 𖼊𖽑𖽴．
𖼺𖽔 𖼄𖽪 𖽃𖽳 𖼽𖽕𖾑 𖼄𖽔 𖼖𖽧𖾑 𖼺𖽪𖾐 𖼈𖽪𖾐 𖼍𖽦 𖼊𖽑𖽺 𖼺𖽦 𖼦𖽑𖽙𖾐
32 𖼠𖽙𖾑 𖼍𖽻𖾐 𖼺𖽔 𖼄𖽪 𖼀𖽦𖾐：“ 𖼽𖽕𖾑 𖼄𖽔 𖼖𖽧𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼽𖽕𖾑 𖼰𖽡𖽕 𖼊𖽑𖽺 𖼦𖽳 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐！” 𖽃𖽔𖾐 𖼺𖽺𖾑 𖼽𖽕𖾑 𖼰𖽡𖽕 𖼖𖽺𖾑 𖼖𖽺𖾑 𖼺𖽪𖾐 𖼺𖽪𖾐 𖼄𖽙𖾐 𖼺𖽜 𖼺𖽔 𖼄𖽪 𖽃𖽳 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐，𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼣𖽝：“𖼣𖽙𖾐 𖼳𖽶𖾐 𖼮𖽡𖽦 𖼞𖽳𖾐 𖼠𖽻𖾐 𖼰𖽡𖽳𖾐 𖼄𖽔 𖼷𖽶𖾐 𖼊𖽻𖾐！” 33 𖼺𖽔 𖼄𖽪 𖽃𖽳 𖼀𖽦𖾐：“𖼐𖽑𖽡𖾐 𖽃𖽔 𖼊𖽺𖾐 𖽃𖽔𖾑 𖼊𖽑𖽙 𖼻𖽜 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽳𖾐 𖼻𖽙 𖼊𖽑𖽺 𖼺𖽦 𖼦𖽑𖽙𖾐，𖼐𖽑𖽡𖽻𖾐 𖼄𖽙𖾐 𖼞𖽳𖾐 𖼻𖽙 𖼖𖽺𖾑 𖼞𖽑𖽶𖾑 𖼻𖽻𖾐 𖼺𖽦 𖼄𖽳𖾐 𖼊𖽻𖾐．” 𖽃𖽔𖾐 𖼺𖽺𖾑 𖼺𖽔 𖼄𖽪 𖽃𖽳 𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼮𖽻𖾐，𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼽𖽕𖾑 𖼰𖽡𖽕 𖼊𖽑𖽺 𖼺𖽦 𖼦𖽑𖽙𖾐，𖼽𖽻 𖼞𖽶𖾐 𖼮𖽑𖽶 𖼊𖽑𖽺 𖼷𖽦𖾐 𖼐𖽝𖾐 𖼦𖽑𖽙𖾐．