𖼽𖽱𖾐 𖼐𖽕 𖼍𖽔𖾐 𖼰𖽕𖾑 𖼊𖽝 𖽂𖽙 𖼊𖽙𖾐 𖼦𖽑𖽻𖾐
14
1 𖼊𖽑𖽡 𖼐𖽑𖽡𖾐 𖼮𖽻𖾐，𖼺𖽻 𖼖𖽚 𖼞𖽳𖾐 𖼻𖽙 𖼽𖽱𖾐 𖼐𖽕 𖼍𖽔𖾐 𖼽𖽻 𖼖𖽙𖾐 𖼂𖽻𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼷𖽑𖽻𖾐 𖼖𖽦𖾑 𖼻𖽙 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼽𖽙𖾐，𖽃𖽔 𖼐𖽺𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼳𖽪𖾐 𖼞𖽳𖾐 𖽂𖽙 𖼖𖽦 𖼞𖽑𖽢 𖼞𖽑𖽶𖾑 𖼠𖽻𖾐 𖼽𖽡𖾐．” 𖼦𖽑𖽻𖾐 𖼊𖽑𖽻𖾐 𖼽𖽻 𖼀𖽙 𖼖𖽙𖾐 𖼄𖽔 𖼀𖽦𖾐 𖼊𖽑𖽧．2 𖼞𖽑𖽶𖾑 𖼮𖽶𖾐 𖼺𖽻 𖼖𖽚 𖼰𖽡𖾐 𖼂𖽡 𖼽𖽕𖾑 𖽂𖽙 𖼰𖽡𖽺𖾐 𖼦𖽜 𖼷𖽜𖾐，𖼄𖽡 𖼰𖽡𖾐 𖼖𖽪𖽦 𖼄𖽡𖾐 𖼊𖽺𖾐 𖼺𖽸𖾑 𖼄𖽡𖽚 𖼷𖽡𖾐 𖼞𖽑𖽶𖾐 𖼊𖽡𖾐，𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖽃𖽔 𖼖𖽙𖾐 𖼮𖽑𖽡𖽚 𖼦𖽑𖽙𖾐 𖼽𖽚𖾐 𖼮𖽻𖾐． 3 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼽𖽕𖾑 𖼳𖽡𖾐 𖼊𖽑𖽪𖾐 𖼞𖽳𖾐 𖼻𖽙，𖼍𖽡𖾐 𖼄𖽻 𖼽𖽕𖾑 𖼳𖽡𖾐 𖼽𖽕𖾑 𖼽𖽡 𖼇𖽮 𖼍𖽴 𖼈𖽦 𖼍𖽳𖾐；𖼽𖽕𖾑 𖼳𖽡𖾐 𖼊𖽑𖽪𖾐 𖼦𖽑𖽺𖾑 𖼽𖽡 𖼰𖽡𖽔𖾐 𖼂𖽚 𖼽𖽻 𖼍𖽕𖾑，𖼇𖽺𖾐 𖼐𖽑𖽧 𖼦𖽔𖾐 𖼞𖽳𖾐 𖼻𖽙，𖼽𖽡 𖼖𖽡𖾑 𖼞𖽳𖾐 𖼖𖽡𖾑 𖼂𖽙𖾐 𖼣𖽻𖾐，𖼽𖽡 𖼖𖽡𖾑 𖽃𖽙𖾑 𖼄𖽺 𖼊𖽑𖽙 𖼞𖽑𖽶𖾑 𖼮𖽶𖾐 𖼳𖽶𖾑 𖼖𖽚 𖼖𖽪𖾐 𖼞𖽑𖽶𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼍𖽡𖾐 𖼄𖽻 𖼂𖽺𖾐．
𖼽𖽱𖾐 𖼐𖽕 𖼍𖽔𖾐 𖼊𖽚𖾐 𖼽𖽡𖾐 𖼦𖽑𖽙𖾐 𖼖𖽺𖾑 𖼷𖽑𖽻𖾐 𖼷𖽪𖾐 𖼺𖽝𖾑 𖼺𖽪𖾐 𖼄𖽔 𖼮𖽻𖾐． 4 𖼽𖽻 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼮𖽻𖾐 𖼞𖽳𖾐 𖼽𖽡𖾐，𖼦𖽑𖽔𖾐 𖼮𖽶𖾐 𖼷𖽜𖾐 𖼳𖽚𖾑 𖼺𖽪𖾐 𖽂𖽙 𖼖𖽦 𖼞𖽑𖽢 𖼊𖽑𖽡 𖼄𖽦𖾐 𖼠𖽚 𖼖𖽡𖾐，𖽂𖽙 𖼖𖽦 𖼞𖽑𖽢 𖼐𖽑𖽡 𖼀𖽳 𖼈𖽦𖾑 𖼹𖽧𖾑 𖼈𖽦𖾑 𖼹𖽚𖾐 𖼣𖽻𖾐，𖼊𖽑𖽡 𖼊𖽝𖾐 𖼊𖽑𖽺 𖼂𖽙𖾐 𖼳𖽡𖽱𖾐 𖼄𖽡𖾐，𖼊𖽑𖽡 𖼊𖽝𖾐 𖼊𖽑𖽺 𖼳𖽡𖾐 𖼐𖽑𖽧 𖼄𖽡𖾐． 5 𖼈𖽦𖾑 𖼹𖽧𖾑 𖼈𖽦𖾑 𖼹𖽚𖾐 𖼊𖽑𖽡 𖼊𖽝𖾐 𖼀𖽑𖽡𖽻 𖼰𖽻𖾐 𖼳𖽶 𖼐𖽑𖽳𖾐 𖼄𖽡𖾐 𖼀𖽳 𖼄𖽧𖾑 𖼄𖽙 𖼖𖽪𖾐 𖼞𖽳𖾐 𖼠𖽚，𖼊𖽑𖽡 𖼊𖽝𖾐 𖼀𖽑𖽡𖽻 𖼰𖽻𖾐 𖼠𖽳𖾐 𖼻𖽸 𖼄𖽡𖾐 𖼀𖽳 𖼰𖽡𖽔𖾐 𖼂𖽔𖾐 𖼖𖽪𖾐 𖼞𖽳𖾐 𖼠𖽚． 6 𖼽𖽱𖾐 𖼐𖽕 𖼍𖽔𖾐 𖼞𖽑𖽻𖾑 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼷𖽑𖽻𖾐 𖼖𖽦𖾑 𖼻𖽙 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼽𖽙𖾐，𖽃𖽔 𖼐𖽺𖾑 𖼽𖽡𖾐 𖼷𖽑𖽳 𖼐𖽑𖽡𖾐 𖼮𖽡𖽺𖾐 𖼂𖽺𖾐 𖼄𖽔 𖼠𖽚 𖼺𖽪𖾐 𖼄𖽦 𖼀𖽑𖽙 𖼮𖽻𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐，𖼽𖽺𖾐 𖼦𖽴 𖼦𖽫 𖽃𖽔 𖼐𖽺𖾑 𖼖𖽙𖾐 𖼂𖽻𖾐 𖼮𖽨𖾐 𖼊𖽻𖾐 𖼖𖽡𖾐 𖼷𖽻．𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼷𖽑𖽻𖾐 𖼞𖽜 𖼰𖽕𖾑 𖼊𖽝 𖽂𖽙 𖼊𖽙𖾐，𖼞𖽑𖽶𖾑 𖼷𖽑𖽻𖾐 𖼄𖽨 𖼷𖽑𖽻𖾐 𖼣𖽻𖾐 𖼐𖽑𖽡𖽪𖾑 𖼖𖽙𖾐 𖼄𖽔 𖼮𖽻𖾐．”
7 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼷𖽑𖽻𖾐 𖼖𖽦𖾑 𖼻𖽙 𖼽𖽱𖾐 𖼐𖽕 𖼍𖽔𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽝 𖼖𖽙𖾐 𖼮𖽑𖽻𖾐 𖼂𖽺𖾐 𖼻𖽻𖾐！𖼽𖽡𖾐 𖼄𖽺！𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼠𖽙𖾑 𖼍𖽻𖾐 𖼄𖽳𖾐 𖼊𖽻𖾐．”
8 𖼽𖽱𖾐 𖼐𖽕 𖼍𖽔𖾐 𖼀𖽦𖾐：“𖽃𖽔 𖼐𖽺𖾑 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼮𖽻𖾐 𖼞𖽳𖾐 𖼽𖽡𖾐，𖼂𖽕𖾑 𖼽𖽡𖾑 𖼽𖽻 𖼈𖽳𖾐 𖼞𖽜 𖽃𖽔 𖼐𖽺𖾑 𖼊𖽑𖽺 𖼄𖽡𖽻𖾐 𖼍𖽳𖾐． 9 𖼽𖽻 𖼈𖽳𖾐 𖽃𖽔 𖼐𖽺𖾑 𖼊𖽑𖽺 ‘ 𖼐𖽑𖽡𖾐 𖼈𖽳𖾐 𖼦𖽑𖽡𖽚 𖼍𖽳𖾐，𖼣𖽙𖾐 𖼈𖽳𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼮𖽑𖽡𖾐 𖼖𖽙𖾐 𖼳𖽡𖽻𖾐 𖼖𖽡𖾐 ’ 𖼀𖽦𖾐 𖼊𖽑𖽡𖾑 𖼣𖽻𖾐，𖽃𖽔 𖼐𖽺𖾑 𖼦𖽑𖽡𖽚 𖼍𖽳𖾐，𖼽𖽻 𖼈𖽳𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐 𖼄𖽔 𖼻𖽻𖾐． 10 𖼽𖽻 𖼈𖽳𖾐 𖽃𖽔 𖼐𖽺𖾑 𖼊𖽑𖽺 ‘ 𖼐𖽑𖽡𖾐 𖼈𖽳𖾐 𖼊𖽦𖾐 𖼖𖽻𖾐 𖼣𖽙𖾐 𖼈𖽳𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼄𖽺 ’ 𖼀𖽦𖾐 𖼊𖽑𖽡𖾑 𖼣𖽻𖾐，𖽃𖽔 𖼐𖽺𖾑 𖼊𖽦𖾐 𖼽𖽡𖾐 𖼻𖽻𖾐，𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖽃𖽔 𖼐𖽺𖾑 𖼊𖽑𖽺 𖼞𖽜 𖼺𖽪𖾐 𖼮𖽨 𖼄𖽡𖽻𖾐 𖼣𖽻𖾐．𖼞𖽪𖾐 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼊𖽑𖽺 𖼰𖽡𖽻𖾐 𖼺𖽺𖾑，𖽃𖽔 𖼐𖽺𖾑 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼦𖽑𖽙𖾐．”
11 𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼞𖽜 𖼐𖽦𖾐 𖼄𖽡𖽻𖾐 𖼺𖽺𖾑，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼀𖽦𖾐：“𖼐𖽦𖾐 𖼄𖽺！𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼮𖽡𖽪 𖼂𖽡𖽚𖾐 𖼊𖽪 𖼈𖽦𖾑 𖼳𖽡𖽪𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼖𖽻𖾐． 12 𖼞𖽑𖽶𖾑 𖼠𖽻𖾐 𖼳𖽪𖾐 𖼖𖽦 𖼠𖽸𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙，𖼞𖽻𖾑𖽑 𖼽𖽱𖾐 𖼐𖽕 𖼍𖽔𖾐 𖼐𖽺𖾐 𖼽𖽻 𖼖𖽙𖾐 𖼂𖽻𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽦𖾐 𖼖𖽻𖾐 𖼣𖽙𖾐 𖼈𖽳𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐！𖼣𖽙𖾐 𖼈𖽳𖾐 𖼄𖽡𖽻 𖼊𖽑𖽡 𖼮𖽨𖾐 𖼮𖽻𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧 𖼊𖽻𖾐．”
𖼽𖽱𖾐 𖼐𖽕 𖼍𖽔𖾐 𖼽𖽻 𖼖𖽙𖾐 𖼂𖽻𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽦𖾐 𖼽𖽡𖾐，𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼊𖽑𖽺 𖼰𖽡𖽻𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼦𖽑𖽙𖾐．”
13 𖼽𖽱𖾐 𖼐𖽕 𖼍𖽔𖾐 𖼈𖽦𖾑 𖼹𖽚𖾐 𖼊𖽑𖽺 𖼄𖽝𖾐 𖼊𖽦𖾐 𖼽𖽡𖾐，𖼽𖽻 𖼖𖽙𖾐 𖼂𖽻𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼽𖽻 𖼠𖽙𖾑 𖼍𖽻𖾐 𖼄𖽳𖾐．𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼽𖽱𖾐 𖼐𖽕 𖼍𖽔𖾐 𖽃𖽙𖾑 𖼄𖽺 𖼮𖽑𖽡𖽺 𖼀𖽜 𖼹𖽺𖾐，𖼽𖽻 𖼖𖽙𖾐 𖼂𖽻𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼖𖽺𖾑 𖼽𖽻 𖼠𖽙𖾑 𖼍𖽻𖾐 𖼄𖽳𖾐，𖼽𖽻 𖼈𖽳𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼺𖽦 𖼳𖽶𖾐 𖼦𖽑𖽙𖾐． 14 𖼽𖽱𖾐 𖼐𖽕 𖼍𖽔𖾐 𖼐𖽺𖾐 𖼽𖽻 𖼖𖽙𖾐 𖼂𖽻𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐，𖼽𖽻 𖼈𖽳𖾐 𖼐𖽑𖽡 𖼽𖽚𖾐 𖽂𖽙 𖼊𖽺𖾐 𖼊𖽑𖽡 𖼂𖽦𖾑 𖼮𖽡𖾐 𖼂𖽦𖾐 𖼊𖽑𖽺 𖼺𖽦，𖽃𖽔 𖼖𖽙𖾐 𖼐𖽑𖽡 𖼷𖽑𖽡𖾐 𖼽𖽚𖾐 𖼺𖽦 𖼦𖽑𖽙𖾐，𖼄𖽳𖾑 𖼄𖽳 𖼊𖽑𖽺 𖼞𖽑𖽫𖾐 𖼞𖽳𖾐 𖼐𖽺𖾐 𖼳𖽶𖾐 𖼞𖽳𖾐 𖼖𖽺𖾑 𖽃𖽔 𖼖𖽙𖾐 𖼷𖽑𖽡𖾐 𖼣𖽙 𖼖𖽜𖾐 𖼮𖽻𖾐 𖼺𖽪𖾐 𖼄𖽡𖾐 𖼮𖽑𖽙𖾐 𖼊𖽑𖽡 𖼮𖽑𖽙𖾐\fr 𖼞𖽑𖽶𖾐 𖼮𖽑𖽻𖾐 𖼺𖽦 𖼦𖽑𖽙𖾐 𖼺𖽪𖾐 𖼣𖽻𖾐．
15 𖽃𖽔𖾐 𖼺𖽺𖾑，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼷𖽪𖾐，𖼄𖽡𖾐 𖼳𖽡𖽻𖾐 𖼠𖽻𖾐 𖼊𖽑𖽺 𖼮𖽻𖾐 𖼺𖽪𖾐 𖼐𖽺𖾐 𖼷𖽑𖽻𖾐 𖼀𖽺 𖼞𖽑𖽙𖾐 𖼣𖽻𖾐，𖼄𖽳𖾑 𖼄𖽳 𖼮𖽡𖽮𖾐 𖼞𖽴𖾐，𖼞𖽑𖽶𖾑 𖼠𖽻𖾐 𖼮𖽻𖾐 𖼺𖽪𖾐 𖼄𖽦 𖼀𖽑𖽙 𖼐𖽺𖾐 𖽃𖽙𖾑 𖼄𖽺 𖼮𖽑𖽻𖾐 𖼰𖽕𖾑 𖼊𖽝 𖼺𖽪𖾐 𖼄𖽦 𖼀𖽑𖽙 𖼖𖽺𖾑 𖼮𖽡𖽮𖾐 𖼞𖽴𖾐，𖼄𖽡𖾐 𖼖𖽺𖾑 𖼖𖽧𖾐 𖼍𖽪𖾐 𖼖𖽻𖾐，𖼦𖽑𖽺𖾑 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼷𖽑𖽚 𖼞𖽳𖾐 𖼄𖽡𖽻 𖼣𖽻𖾐．
𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽡𖾐 𖼂𖽦𖾐 𖼊𖽑𖽺 𖼞𖽕 𖼺𖽦
16 𖼺𖽻 𖼖𖽚 𖼞𖽳𖾐 𖼐𖽦𖾐 𖼳𖽪𖾐 𖼺𖽪𖾐 𖼄𖽦 𖼀𖽑𖽙，𖼂𖽡𖽦𖾑 𖼽𖽔 𖼄𖽡𖽺 𖼄𖽡𖾐 𖼊𖽺𖾐 𖼰𖽡𖾐 𖼂𖽡 𖼽𖽕𖾑 a 𖼖𖽪𖾐 𖼞𖽳𖾐 𖼮𖽻𖾐 𖼐𖽦𖾐 𖼄𖽡𖽻𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼷𖽪𖾐 𖼀𖽡𖾐 𖼖𖽡𖾐 𖼀𖽺 𖼖𖽺 𖼮𖽻𖾐 𖼦𖽑𖽻𖾐，𖼊𖽑𖽡 𖼹𖽻𖾐 𖼮𖽡𖽪 𖼊𖽑𖽡 𖼀𖽳 𖼽𖽡𖾐 𖼦𖽑𖽙𖾐． 17 𖽃𖽔𖾐 𖼺𖽺𖾑 𖼺𖽻 𖼖𖽚 𖼽𖽻 𖼖𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽑𖽡 𖼠𖽙𖾐 𖼈𖽜𖾐 𖼐𖽦𖾐，𖽃𖽔 𖼺𖽺 𖽃𖽔 𖼐𖽺𖾑 𖼠𖽻𖾐 𖼊𖽑𖽺 𖼮𖽑𖽻𖾐 𖼊𖽚𖾐 𖼽𖽡𖾐 𖼦𖽑𖽙𖾐．𖼽𖽻 𖼈𖽳𖾐 𖼈𖽜𖾐 𖼐𖽦𖾐 𖼦𖽑𖽙𖾐 𖼺𖽺𖾑 𖼺𖽝𖾑，𖼽𖽱𖾐 𖼐𖽕 𖼍𖽔𖾐 𖼐𖽺𖾐 𖼽𖽻 𖼖𖽙𖾐 𖼂𖽻𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼈𖽺𖾐 𖼺𖽪𖾐 𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼄𖽔 𖼮𖽻𖾐．
18 𖼺𖽻 𖼖𖽚 𖼽𖽕𖾑 𖼳𖽡𖾐 𖼽𖽕𖾑 𖼖𖽙𖾐 𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐𖼀𖽚𖾐 𖼮𖽡𖽺 𖼞𖽻𖾐 𖼂𖽻𖾐 𖼖𖽻𖾐！” 𖼞𖽪𖾐 𖼮𖽡𖽺𖾐 𖼞𖽑𖽶𖾑 𖼮𖽶𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼮𖽻𖾐． 19 𖼺𖽻 𖼖𖽚 𖼍𖽡𖾐 𖼄𖽻 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐 𖼞𖽑𖽶𖾑 𖼮𖽶𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼮𖽻𖾐 𖼞𖽳𖾐 𖼠𖽳𖾐 𖼠𖽳𖾐 𖼦𖽑𖽚 𖼊𖽦 𖼍𖽪𖾐 𖼖𖽻𖾐．𖽃𖽔𖾐 𖼺𖽺𖾑 𖼺𖽻 𖼖𖽚 𖼍𖽡𖾐 𖼄𖽻 𖼖𖽙𖾐 𖼀𖽦𖾐：“𖼀𖽑𖽨 𖼐𖽙 𖼦𖽻！”
20 𖼺𖽻 𖼖𖽚 𖼐𖽺𖾐 𖼽𖽻 𖼖𖽙𖾐 𖼞𖽑𖽙𖾐 𖼮𖽑𖽻𖾐 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳𖾐 𖼷𖽙𖾐 𖼖𖽙𖾐 𖼻𖽶𖾑 𖼖𖽻𖾐，𖼽𖽡𖾐 𖼰𖽕𖾑 𖼊𖽝 𖼞𖽳𖾐 𖼮𖽑𖽡𖾐 𖼺𖽺𖾑 𖼐𖽦𖾐 𖼄𖽡𖽻𖾐，𖼇𖽺𖾐 𖼖𖽡𖾑 𖼺𖽸𖾑 𖼺𖽪𖾐 𖼷𖽑𖽻𖾐 𖽃𖽔𖾑 𖼊𖽑𖽙 𖼈𖽺𖾐 𖼷𖽙𖾐 𖼖𖽙𖾐 𖼺𖽦，𖼦𖽑𖽔𖾐 𖼮𖽶𖾐 𖼦𖽑𖽚 𖼊𖽦． 21 𖽃𖽙𖾑 𖼄𖽺 𖼊𖽑𖽙 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼊𖽴 𖼺𖽪𖾐 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐，𖽃𖽔𖾑 𖼄𖽳𖾐 𖼰𖽻𖾐 𖼀𖽑𖽚𖾐 𖼺𖽻 𖼖𖽚 𖼐𖽺𖾐 𖼽𖽱𖾐 𖼐𖽕 𖼍𖽔𖾐 𖼦𖽳 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼊𖽴 𖼖𖽻𖾐． 22 𖼽𖽡 𖼇𖽕 𖼖𖽡𖽦 𖽂𖽙 𖼰𖽡𖽺𖾐 𖼀𖽙 𖼊𖽑𖽺 𖼮𖽡𖽪 𖼂𖽡𖽚𖾐 𖼺𖽪𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽻 𖼮𖽨，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼮𖽡𖽪 𖼀𖽑𖽻𖾐 𖼍𖽪𖾐 𖼽𖽡𖾐 𖼦𖽑𖽻𖾐，𖽃𖽔𖾐 𖼺𖽺𖾑 𖼽𖽡𖾐 𖼰𖽕𖾑 𖼊𖽝 𖼄𖽡𖾐 𖼊𖽺𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼺𖽦． 23 𖼞𖽑𖽶𖾑 𖼊𖽑𖽡 𖼐𖽑𖽡𖾐， 𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼊𖽝 𖽂𖽙 𖼊𖽙𖾐 𖼦𖽑𖽻𖾐．
𖼽𖽱𖾐 𖼐𖽕 𖼍𖽔𖾐 𖼽𖽻 𖼀𖽙 𖼄𖽪𖾑 𖼖𖽙𖾐 𖼄𖽔 𖼮𖽑𖽻𖾐
𖼠𖽙𖾑 𖼍𖽻𖾐 𖼰𖽕𖾑 𖼊𖽝 𖼺𖽺𖾑 𖼂𖽚 𖼽𖽕𖾑 𖼈𖽴 𖼖𖽪𖾐 𖼞𖽳𖾐 𖼮𖽑𖽡𖾐． 24 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼦𖽑𖽔𖾐 𖼮𖽶𖾐 𖼳𖽚𖾑 𖼞𖽑𖽪 𖼠𖽻𖾐 𖼰𖽡𖽳𖾐，𖼞𖽪𖾐 𖼮𖽡𖽺𖾐 𖼺𖽻 𖼖𖽚 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼄𖽳𖾐 𖼊𖽻 𖼊𖽑𖽜𖾐，𖼀𖽦𖾐：“𖽃𖽔𖾑 𖼄𖽶 𖼮𖽑𖽧 𖽃𖽙𖾑 𖼄𖽺 𖼣𖽙𖾐 𖼮𖽡𖾐 𖼂𖽦𖾐 𖼊𖽑𖽺 𖼄𖽔 𖽂𖽙𖾐 𖼖𖽦 𖼂𖽚𖾐 𖼺𖽺 𖼹𖽦𖾐 𖼷𖽙 𖼊𖽪𖾐 𖼷𖽙 𖼺𖽪𖾐，𖼽𖽻 𖼊𖽑𖽺 𖼷𖽑𖽜𖾑 𖼷𖽑𖽜𖾐 𖼮𖽙 𖼰𖽪𖾑 𖼄𖽳𖾐 𖼊𖽻𖾐．” 𖽃𖽔𖾐 𖼺𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼷𖽙 𖼊𖽪𖾐 𖼊𖽑𖽡 𖼳𖽶 𖼖𖽺𖾑 𖼄𖽔 𖼷𖽙． 25 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼺𖽧𖾐 𖼠𖽶𖾑 𖼖𖽶𖾐 𖼍𖽡𖾐 𖼞𖽑𖽶𖾐 𖼊𖽡 𖼽𖽡𖾐，𖼺𖽧𖾐 𖼠𖽶𖾑 𖼖𖽶𖾐 𖼍𖽡𖾐 𖼞𖽳𖾐 𖼄𖽡𖾑 𖼐𖽦𖾐 𖼀𖽙 𖼀𖽨 𖼈𖽡𖾐 𖼮𖽻𖾐． 26 𖼽𖽻 𖼈𖽳𖾐 𖼺𖽧𖾐 𖼠𖽶𖾑 𖼖𖽶𖾐 𖼍𖽡𖾐 𖼞𖽑𖽶𖾐 𖼊𖽡 𖼽𖽡𖾐 𖼦𖽑𖽙𖾐，𖼀𖽨 𖼈𖽡𖾐 𖼽𖽚 𖼊𖽑𖽧 𖼖𖽻𖾐 𖼞𖽳𖾐 𖼐𖽦𖾐 𖼄𖽡𖽻𖾐，𖼦𖽑𖽻𖾐 𖼊𖽑𖽻𖾐 𖼊𖽑𖽡 𖼽𖽚𖾐 𖼖𖽺𖾑 𖼖𖽦 𖼈𖽶 𖼮𖽑𖽡𖽺𖾐 𖼀𖽨 𖼈𖽡𖾐 𖼈𖽺𖾐 𖼷𖽙 𖼄𖽔 𖼂𖽡𖾑，𖼞𖽪𖾐 𖼮𖽡𖽺𖾐 𖼷𖽑𖽻𖾐 𖼞𖽑𖽙𖾐 𖼣𖽻𖾐 𖼄𖽳𖾐 𖼊𖽻 𖼞𖽑𖽶𖾑 𖼊𖽑𖽺 𖼮𖽡𖽮𖾐．
27 𖼺𖽻 𖼖𖽚 𖼷𖽑𖽻𖾐 𖼷𖽪𖾐 𖼞𖽜 𖼊𖽑𖽜𖾐 𖼺𖽪𖾐 𖼄𖽳𖾐 𖼊𖽻，𖼽𖽱𖾐 𖼐𖽕 𖼍𖽔𖾐 𖼊𖽻 𖼄𖽔 𖼮𖽨 𖼺𖽺𖾑，𖼍𖽚𖾐 𖼖𖽜 𖼈𖽺𖾐 𖼀𖽨 𖼮𖽑𖽡𖽻𖾐 𖼞𖽑𖽶𖾐 𖼀𖽨 𖼈𖽡𖾐 𖼍𖽙 𖼂𖽻𖾐 𖼖𖽻𖾐 𖼷𖽙，𖼐𖽕 𖼊𖽺𖾐 𖽂𖽙 𖼺𖽜𖾐 𖼍𖽪𖾐 𖼖𖽻𖾐 \frb． 28 𖼷𖽑𖽻𖾐 𖼷𖽪𖾐 𖼠𖽻𖾐 𖼊𖽑𖽺 𖼊𖽑𖽡 𖼽𖽚𖾐 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖽻𖾐 𖼀𖽙 𖼷𖽑𖽻𖾐 𖼷𖽪𖾐 𖼞𖽜 𖼄𖽳𖾐 𖼊𖽻 𖼊𖽑𖽜𖾐 𖼠𖽚：‘𖽃𖽙𖾑 𖼐𖽑𖽡𖾐 𖼠𖽻𖾐 𖼞𖽑𖽶𖾐 𖼷𖽙 𖼊𖽪𖾐 𖼷𖽙 𖼺𖽪𖾐，𖼽𖽻 𖼊𖽑𖽺 𖼮𖽙 𖼰𖽪𖾑 𖼄𖽳𖾐 𖼊𖽻𖾐．’” 𖽃𖽔𖾐 𖼺𖽺𖾑 𖼷𖽑𖽻𖾐 𖼷𖽪𖾐 𖽂𖽙 𖼄𖽔 𖼐𖽑𖽡𖾐 𖼦𖽑𖽻𖾐．
29 𖼽𖽱𖾐 𖼐𖽕 𖼍𖽔𖾐 𖼀𖽦𖾐：“𖼣𖽻𖾐 𖼀𖽙 𖼐𖽑𖽡𖾐 𖼈𖽳𖾐 𖼞𖽜 𖼳𖽚𖾑 𖼞𖽑𖽪 𖼷𖽶𖾐 𖼄𖽳𖾐．𖼐𖽦𖾐 𖼄𖽺！𖼣𖽙𖾐 𖼀𖽨 𖼈𖽡𖾐 𖼊𖽑𖽡 𖼀𖽧𖾑 𖼷𖽙 𖼦𖽑𖽙𖾐 𖼠𖽙𖾑 𖼍𖽻𖾐，𖽂𖽙 𖼺𖽜𖾐 𖼍𖽪𖾐 𖼖𖽻𖾐． 30 𖽃𖽙𖾑 𖼐𖽑𖽡𖾐 𖼷𖽑𖽻𖾐 𖼀𖽺 𖼮𖽡𖾐 𖼂𖽦𖾐 𖼖𖽦 𖼠𖽻𖾐 𖼞𖽑𖽶𖾐 𖼞𖽑𖽙𖾐 𖼐𖽻𖾑 𖽂𖽙𖾐 𖼺𖽪𖾐 𖼷𖽙 𖼊𖽪𖾐，𖼐𖽑𖽧𖾐 𖼺𖽳 𖽂𖽙𖾐 𖼷𖽙 𖼊𖽑𖽡𖾑 𖼣𖽻𖾐，𖽃𖽔𖾑 𖼄𖽳𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼺𖽦 𖼦𖽑𖽙𖾐 𖼺𖽪𖾐 𖼦𖽑𖽺𖾑 𖼄𖽨𖾐 𖼄𖽔 𖼷𖽑𖽶𖾐 𖼮𖽻𖾐 𖼊𖽻𖾐，𖼄𖽔 𖼣𖽻𖾐 𖼖𖽔？”
31 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼽𖽻 𖼈𖽳𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼺𖽦，𖼄𖽧𖾑 𖼄𖽙 𖼖𖽪𖾐 𖼞𖽳𖾐 𖼮𖽑𖽻𖾐 𖼺𖽺𖾑 𖼽𖽕𖾑 𖼽𖽔 𖼖𖽪𖽦 𖼖𖽪𖾐 𖼖𖽙𖾐 𖼮𖽑𖽡𖾐．𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼦𖽑𖽔𖾐 𖼮𖽶𖾐 𖽂𖽙 𖼞𖽶𖾐 𖼦𖽑𖽻𖾐 𖼺𖽺𖾑， 32 𖼽𖽻 𖼈𖽳𖾐 𖼐𖽕 𖼊𖽺𖾐 𖼐𖽻𖾑 𖽂𖽙𖾐 𖼺𖽪𖾐 𖽃𖽔𖾑 𖼮𖽑𖽸 𖼽𖽻𖾐、𖼐𖽑𖽡 𖼐𖽺𖾐 𖼐𖽑𖽡 𖼻𖽙 𖼺𖽶𖾐 𖼂𖽻𖾐 𖼖𖽻𖾐，𖼞𖽑𖽶𖾑 𖼠𖽻𖾐 𖼮𖽻𖾐 𖼺𖽦，𖼺𖽶 𖼮𖽑𖽻𖾐 𖼺𖽪𖾐 𖼦𖽙 𖼷𖽙 𖼦𖽑𖽙𖾐． 33 𖼺𖽻 𖼖𖽚 𖼖𖽙𖾐 𖼀𖽦𖾐 𖼊𖽑𖽧 𖼺𖽪𖾐 𖼷𖽑𖽻𖾐 𖼮𖽻𖾐：“𖼷𖽑𖽻𖾐 𖼷𖽪𖾐 𖼺𖽶 𖼮𖽑𖽻𖾐 𖼺𖽪𖾐 𖼦𖽙 𖼷𖽙，𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼽𖽺𖾐 𖼦𖽴 𖼦𖽫 𖼊𖽑𖽺 𖼖𖽺𖾐 𖼈𖽳𖾑 𖼦𖽑𖽻𖾐．”
𖼺𖽻 𖼖𖽚 𖼀𖽦𖾐：“𖼐𖽑𖽡𖾐 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼖𖽺𖾐 𖼈𖽳𖾑 𖼦𖽑𖽻𖾐，𖼐𖽕 𖼊𖽺𖾐 𖼖𖽚𖾐 𖼄𖽙𖾐 𖼈𖽳 𖼊𖽑𖽡 𖼊𖽝𖾐 𖼖𖽜𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼖𖽡𖾐．” 34 𖼺𖽻 𖼖𖽚 𖼦𖽑𖽔𖾐 𖼖𖽺𖾑 𖼀𖽦𖾐：“𖼐𖽑𖽡𖾐 𖼈𖽳𖾐 𖼀𖽜𖾐 𖼀𖽺 𖼷𖽑𖽻𖾐 𖼷𖽪𖾐 𖼠𖽻𖾐 𖼊𖽑𖽺 𖼽𖽡𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐 𖼊𖽑𖽧： 𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼞𖽳𖾐 𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖼺𖽶𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼺𖽦 𖼷𖽙 𖼖𖽡𖾐，𖼺𖽶 𖼮𖽑𖽻𖾐 𖼺𖽪𖾐 𖼦𖽙 𖽂𖽙𖾐 𖼷𖽙 𖼄𖽔 𖼊𖽙𖾐，𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼽𖽺𖾐 𖼦𖽴 𖼦𖽫 𖼊𖽑𖽺 𖼖𖽺𖾐 𖼈𖽳𖾑 𖼄𖽔 𖼊𖽙𖾐．’”
𖽃𖽔𖾐 𖼺𖽺𖾑，𖼞𖽑𖽶𖾑 𖼊𖽑𖽡 𖼦𖽑𖽦，𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼽𖽻 𖼄𖽳𖾑 𖼞𖽳𖾐 𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖼺𖽶𖾐 𖼞𖽑𖽶𖾑 𖼠𖽻𖾐 𖼖𖽻𖾐 𖼺𖽦 𖼦𖽑𖽙𖾐． 35 𖼺𖽻 𖼖𖽚 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼍𖽡𖾐 𖼷𖽻𖾐 𖼊𖽑𖽡 𖼷𖽻𖾐 𖼷𖽑𖽧𖾐，𖼦𖽑𖽺𖾑 𖼽𖽻 𖽂𖽙 𖼊𖽺𖾐 𖼊𖽑𖽡 𖼂𖽦𖾑 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽙𖾐 𖼍𖽡𖾐 𖼷𖽻𖾐 𖼷𖽑𖽧𖾐 𖼺𖽪𖾐 𖼣𖽻𖾐．
36 𖼺𖽻 𖼖𖽚 𖼀𖽦𖾐：“𖽃𖽔 𖼐𖽺𖾑 𖼄𖽶 𖼮𖽑𖽧 𖼠𖽻𖾐 𖼞𖽑𖽶𖾐 𖼹𖽺𖾐 𖼽𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽕，𖼽𖽻 𖼈𖽳𖾐 𖼞𖽳𖾐 𖼄𖽡𖽻 𖼐𖽑𖽡 𖼐𖽻𖾑 𖼮𖽴𖾐 𖼺𖽺𖾑，𖽃𖽔𖾑 𖼄𖽶 𖼊𖽑𖽡 𖼰𖽶𖾐 𖼮𖽑𖽡𖾐 𖼻𖽻𖾐，𖼽𖽻 𖼈𖽳𖾐 𖼊𖽑𖽡 𖼽𖽚𖾐 𖼊𖽑𖽺 𖼖𖽺𖾑 𖼊𖽑𖽔 𖼹𖽺𖾐 𖼍𖽙𖾑 𖼖𖽡𖾐．”
𖼽𖽻 𖼈𖽳𖾐 𖼀𖽦𖾐：“𖼐𖽑𖽡𖾐 𖼊𖽡 𖼮𖽑𖽻 𖽃𖽔 𖼊𖽺𖾐 𖼂𖽺𖾐 𖼺𖽺𖾑 𖼹𖽳𖾐，𖽃𖽔 𖼊𖽺𖾐 𖼂𖽺𖾐 𖼻𖽻𖾐！”
𖼦𖽑𖽻𖾐 𖼊𖽑𖽻𖾐 𖼍𖽡𖾐 𖼄𖽻 𖼀𖽦𖾐：“𖼣𖽙𖾐 𖼈𖽳𖾐 𖼦𖽑𖽺𖾑 𖼠𖽻𖾐 𖼮𖽻𖾐，𖽃𖽙𖾑 𖼄𖽺 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽻 𖼐𖽙𖾐 𖼺𖽺！”
37 𖼺𖽻 𖼖𖽚 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼊𖽻 𖼐𖽙𖾐，𖼀𖽦𖾐：“𖼣𖽙𖾐 𖼹𖽺𖾐 𖼽𖽡𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼞𖽕 𖼽𖽡𖾐 𖼊𖽙𖾐 𖼊𖽙𖾐？ 𖼐𖽑𖽡𖾐 𖼽𖽻 𖼈𖽳𖾐 𖼊𖽑𖽺 𖼰𖽡𖽻𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐 𖼐𖽺𖾑 𖼄𖽔 𖼰𖽡𖽺𖾐？” 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼽𖽻 𖼈𖽳𖾐 𖼊𖽑𖽺 𖼊𖽻 𖼄𖽔 𖼞𖽑𖽚．
38 𖼺𖽻 𖼖𖽚 𖼀𖽦𖾐：“𖼷𖽑𖽻𖾐 𖼀𖽺 𖼞𖽳𖾐 𖼈𖽪𖾑 𖼷𖽪𖾐 𖽃𖽔𖾐！𖼐𖽑𖽡𖾐 𖼈𖽳𖾐 𖼺𖽜 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐 𖼺𖽺𖾑，𖽃𖽙𖾑 𖼐𖽑𖽡𖾐 𖽃𖽔 𖼐𖽺𖾑 𖽃𖽔 𖼊𖽺𖾑 𖼳𖽶 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼮𖽑𖽕 𖼄𖽡𖾐 𖼀𖽻𖾐 𖼖𖽡𖾐．” 39 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽨𖾑 𖼺𖽪𖾐，𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫，𖼣𖽙𖾐 𖼽𖽻 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐，𖼣𖽙𖾐 𖼻𖽙 𖼽𖽱𖾐 𖼐𖽕 𖼍𖽔𖾐 𖼮𖽑𖽢𖾑 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼀𖽦𖾐 𖼖𖽺𖾑，𖼽𖽻 𖼞𖽜 𖼷𖽑𖽜𖾑 𖼷𖽑𖽜𖾐 𖼳𖽶𖾐 𖼊𖽻𖾐．𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽺𖾑 𖼊𖽻 𖼞𖽑𖽚 𖼺𖽪𖾐 𖼄𖽔 𖼮𖽻𖾐．
40 𖽃𖽔𖾐 𖼺𖽺𖾑 𖼺𖽻 𖼖𖽚 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼀𖽳 𖼦𖽑𖽡𖽚，𖼣𖽙𖾐 𖼐𖽺𖾐 𖼣𖽙𖾐 𖼻𖽙 𖼽𖽱𖾐 𖼐𖽕 𖼍𖽔𖾐 𖼞𖽑𖽶𖾑 𖼀𖽳 𖼦𖽑𖽡𖽚．”
𖼷𖽑𖽻𖾐 𖼷𖽪𖾐 𖼺𖽻 𖼖𖽚 𖼊𖽑𖽺 𖼊𖽻 𖼞𖽑𖽚：“𖼐𖽑𖽡𖾐 𖽃𖽔 𖼊𖽺𖾐 𖼂𖽺𖾐 𖼊𖽡 𖼮𖽑𖽻，𖽃𖽔 𖼊𖽺𖾐 𖼂𖽺𖾐 𖼻𖽻𖾐．”
41 𖼺𖽻 𖼖𖽚 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐，𖼀𖽦𖾐：“𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼈𖽳𖾐 𖼊𖽑𖽺 𖼀𖽦𖾐 𖼄𖽪𖾑 𖼞𖽜，𖽃𖽔 𖼺𖽺 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼺𖽪𖾐 𖼣𖽻𖾐！” 𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼷𖽑𖽺𖾐 𖼞𖽻𖾐，𖼽𖽱𖾐 𖼐𖽕 𖼍𖽔𖾐 𖼐𖽺𖾐 𖼺𖽻 𖼖𖽚 𖼊𖽑𖽺 𖼞𖽻𖾐 𖼄𖽳𖾐，𖼷𖽑𖽻𖾐 𖼷𖽪𖾐 𖼖𖽙𖾐 𖼮𖽡 𖼄𖽔 𖼠𖽳𖾐．
42 𖼺𖽻 𖼖𖽚 𖼀𖽦𖾐：“𖼐𖽑𖽡𖾐 𖼈𖽳𖾐 𖼹𖽦𖾑 𖼷𖽑𖽺𖾐 𖼞𖽻𖾐，𖼣𖽙𖾐 𖼣𖽻𖾐 𖼐𖽺𖾑 𖼣𖽙𖾐 𖼻𖽙 𖼣𖽻𖾐．” 𖼠𖽙𖾑 𖼍𖽻𖾐 𖼽𖽱𖾐 𖼐𖽕 𖼍𖽔𖾐 𖼊𖽑𖽺 𖼞𖽻𖾐 𖼄𖽳𖾐．
𖼺𖽻 𖼖𖽚 𖼽𖽱𖾐 𖼐𖽕 𖼍𖽔𖾐 𖼊𖽑𖽺 𖼺𖽦 𖼊𖽻𖾐
43 𖼺𖽻 𖼖𖽚 𖼽𖽱𖾐 𖼐𖽕 𖼍𖽔𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼀𖽦𖾐 𖼣𖽙𖾐 𖼖𖽙𖾐 𖼊𖽑𖽧，𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖼄𖽡𖽻 𖼂𖽺𖾐 𖼺𖽪𖾐 𖼣𖽻𖾐？”
𖼽𖽱𖾐 𖼐𖽕 𖼍𖽔𖾐 𖼊𖽻 𖼞𖽑𖽚：“𖼣𖽻𖾐 𖼮𖽶𖾐，𖼣𖽙𖾐 𖼍𖽚𖾐 𖼖𖽜 𖼈𖽺𖾐 𖼀𖽨 𖼈𖽡𖾐 𖼊𖽑𖽡 𖼀𖽧𖾑 𖼍𖽙 𖼖𖽝．𖽃𖽔𖾑 𖼄𖽳𖾐 𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐，𖼣𖽙𖾐 𖼞𖽜 𖼳𖽶𖾐 𖼊𖽻𖾐 𖼖𖽔𖾑？”
44 𖼺𖽻 𖼖𖽚 𖼀𖽦𖾐：“𖼽𖽱𖾐 𖼐𖽕 𖼍𖽔𖾐 𖽃𖽔𖾐！𖼐𖽑𖽡𖾐 𖼷𖽑𖽜𖾑 𖼷𖽑𖽜𖾐 𖼳𖽶𖾐 𖼊𖽻𖾐，𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖼞𖽜 𖼣𖽙𖾐 𖼊𖽑𖽺 𖽂𖽙 𖼇𖽕 𖼳𖽶 𖼻𖽻𖾐．”
45 𖼷𖽑𖽻𖾐 𖼷𖽪𖾐 𖼺𖽻 𖼖𖽚 𖼖𖽙𖾐 𖼀𖽦𖾐：“𖼽𖽱𖾐 𖼐𖽕 𖼍𖽔𖾐 𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽨𖾑 𖼞𖽳𖾐 𖼄𖽡𖽻 𖼈𖽳 𖼂𖽺𖾐 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼽𖽻 𖼞𖽜 𖼷𖽑𖽜𖾑 𖼷𖽑𖽜𖾐 𖼳𖽶𖾐 𖼊𖽻𖾐 𖼖𖽔𖾑？ 𖼦𖽑𖽺𖾑 𖼻𖽻𖾐 𖽂𖽙𖾐 𖼂𖽺𖾐 𖼄𖽔 𖼊𖽙𖾐！𖼣𖽙𖾐 𖼈𖽳𖾐 𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽑𖽪 𖼍𖽳𖾐 𖼄𖽳𖾐 𖼷𖽑𖽦𖾐，𖼽𖽻 𖼞𖽳𖾐 𖼈𖽪𖾑 𖼷𖽑𖽜𖾐 𖼊𖽑𖽡 𖼮𖽑𖽡𖾐 𖼖𖽺𖾑 𖽂𖽙𖾐 𖼀𖽳𖾐 𖼄𖽡𖾑 𖼐𖽦𖾐 𖼀𖽜 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼽𖽻 𖽃𖽙𖾑 𖼐𖽑𖽡𖾐 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼮𖽑𖽻𖾐 𖼄𖽡𖽻 𖼂𖽺𖾐 𖼺𖽪𖾐 𖼣𖽻𖾐．𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼷𖽑𖽻𖾐 𖼷𖽪𖾐 𖼽𖽱𖾐 𖼐𖽕 𖼍𖽔𖾐 𖼊𖽑𖽺 𖼰𖽨𖾑，𖼽𖽻 𖼞𖽜 𖼄𖽔 𖼳𖽶𖾐 𖼄𖽶𖾑．
46 𖼺𖽻 𖼖𖽚 𖼊𖽦𖾐 𖼞𖽚 𖼽𖽡𖾐，𖼹𖽦𖾑 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽔 𖼞𖽕 𖼽𖽡𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽺𖾑 𖼀𖽑𖽚𖾐 𖼽𖽻 𖼄𖽳𖾑 𖼄𖽡𖾐 𖼊𖽺𖾐 𖼞𖽚 𖼽𖽡𖾐 𖼦𖽑𖽙𖾐．
𖼺𖽻 𖼖𖽚 𖼰𖽕𖾑 𖼊𖽝 𖽂𖽙 𖼊𖽙𖾐
47 𖼺𖽻 𖼖𖽚 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼈𖽪𖾐 𖼍𖽦 𖼂𖽺𖾐 𖼞𖽑𖽶𖾑 𖼮𖽶𖾐，𖼄𖽔 𖼐𖽙 𖼞𖽕 𖼰𖽡𖽺𖾐 𖼞𖽳𖾐 𖼮𖽡𖾐 𖼂𖽦𖾐 𖼊𖽑𖽺 𖼊𖽝 𖼊𖽦，𖼞𖽑𖽶𖾑 𖼄𖽚 𖼽𖽔𖾐 𖼺𖽪𖾐 𖼷𖽑𖽻𖾐、𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐、𖼽𖽡 𖼍𖽙𖾐 𖼺𖽪𖾐 𖼷𖽑𖽻𖾐、𖼺𖽙 𖼂𖽔𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼷𖽪𖾐 𖼐𖽺𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼣𖽻𖾐．𖼽𖽻 𖽃𖽔 𖼊𖽺𖾑 𖼠𖽻𖾐 𖼊𖽝 𖼽𖽡𖾐 𖼣𖽻𖾐 𖼦𖽻，𖼊𖽝 𖽂𖽙 𖼊𖽙𖾐 𖼦𖽑𖽻𖾐． 48 𖼺𖽻 𖼖𖽚 𖼄𖽡𖽻 𖼂𖽺𖾐 𖼦𖽑𖽔𖾐 𖼮𖽶𖾐 𖼐𖽑𖽧𖾐 𖼈𖽳，𖼽𖽕𖾑 𖼄𖽔 𖼖𖽧𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼦𖽑𖽙𖾐，𖼽𖽻 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼺𖽙𖾐 𖼮𖽑𖽢𖾑 𖼮𖽴𖾐 𖼂𖽡𖾐 𖼽𖽡𖾐 𖼺𖽪𖾐 𖼖𖽦 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐．
𖼺𖽻 𖼖𖽚 𖼈𖽴 𖼮𖽑𖽪𖾐 𖼷𖽑𖽻𖾐
49 𖼺𖽻 𖼖𖽚 𖼞𖽳𖾐 𖼻𖽙 𖼞𖽑𖽶𖾑 𖼽𖽱𖾐 𖼐𖽕 𖼍𖽔𖾐、𖼽𖽡𖾑 𖼳𖽶𖾐 𖼈𖽪𖽺 𖼐𖽺𖾐 𖼄𖽦𖾑 𖼰𖽡𖾐 𖼳𖽪𖾐 𖼽𖽕𖾑 𖼣𖽻𖾐，𖼻𖽙 𖼄𖽳 𖼈𖽳 𖼺𖽪𖾐 𖼄𖽡 𖼖𖽔𖾐 𖼄𖽡𖾐，𖼽𖽳𖾐 𖼺𖽪𖾐 𖼄𖽡 𖼰𖽡𖽕 𖼄𖽡𖾐． 50 𖼺𖽻 𖼖𖽚 𖼞𖽳𖾐 𖼄𖽳 𖼻𖽙 𖼞𖽑𖽶𖾑 𖼽𖽕𖾑 𖼳𖽡𖾐 𖼐𖽫 𖼄𖽡𖾐，𖼽𖽻 𖼦𖽑𖽺𖾑 𖼽𖽕𖾑 𖼳𖽡𖾐 𖼄𖽔 𖼺𖽶𖾐 𖼞𖽳𖾐 𖼻𖽙 𖼄𖽳 𖼣𖽻𖾐．𖼺𖽻 𖼖𖽚 𖼞𖽳𖾐 𖼄𖽦 𖼈𖽪𖾑 𖼷𖽪𖾐 𖼞𖽑𖽶𖾑 𖼐𖽑𖽧 𖽃𖽳 𖼞𖽳𖾐 𖼻𖽙 𖼽𖽔𖾐 𖼐𖽑𖽧 𖽃𖽳 𖼣𖽻𖾐，𖼐𖽑𖽧 𖽃𖽳 𖼦𖽑𖽺𖾑 𖼺𖽻 𖼖𖽚 𖼞𖽳𖾐 𖽃𖽔𖾐 𖼊𖽺𖾐 𖼣𖽻𖾐． 51 𖼺𖽻 𖼖𖽚 𖼽𖽻 𖼀𖽙 𖼰𖽡𖾐 𖼳𖽸𖾑 𖼐𖽺𖾐 𖼽𖽔𖾐 𖼐𖽑𖽧 𖽃𖽳 𖼽𖽻 𖼀𖽙 𖼐𖽑𖽧 𖽃𖽳，𖼦𖽑𖽺𖾑 𖼽𖽕𖾑 𖼂𖽡𖽦 𖼞𖽳𖾐 𖼻𖽙 𖼣𖽻𖾐．
52 𖼺𖽻 𖼖𖽚 𖼊𖽑𖽡 𖼻𖽳𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽝 𖼊𖽦．𖼺𖽻 𖼖𖽚 𖼰𖽕𖾑 𖼊𖽝 𖼖𖽕𖾐 𖼺𖽪𖾐 𖼐𖽺𖾐 𖽂𖽙 𖼐𖽑𖽡𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼐𖽦𖾐 𖼄𖽡𖽻𖾐 𖼞𖽑𖽶𖾑 𖼮𖽶𖾐，𖼄𖽳𖾑 𖼄𖽳 𖼰𖽙𖾐 𖼂𖽻𖾐 𖼖𖽻𖾐 𖼽𖽻 𖼖𖽙𖾐 𖼮𖽑𖽻𖾐．