𖼽𖽕𖾑 𖼳𖽡𖾐 𖼄𖽡 𖼖𖽴𖾑 𖼍𖽕𖾑 𖼈𖽪𖽺𖾑 𖼊𖽑𖽺 𖼂𖽻𖾐 𖼮𖽨𖾐
21
1 𖼍𖽕𖾑 𖼈𖽪𖽺𖾑 𖼖𖽻𖾐 𖼐𖽚 𖼂𖽚 𖼖𖽪𖾐 𖼞𖽑𖽶𖾐 𖼍𖽡𖾐 𖼄𖽻 𖼽𖽕𖾑 𖼳𖽡𖾐 𖼄𖽡 𖼖𖽴𖾑 𖼞𖽳𖾐 𖼞𖽑𖽻𖾑 𖼮𖽑𖽡𖾐，𖼽𖽕𖾑 𖼳𖽡𖾐 𖼄𖽡 𖼖𖽴𖾑 𖼮𖽡𖽮𖾐 𖼮𖽡𖽮𖾐 𖼞𖽴𖾐 𖼞𖽴𖾐 𖼊𖽚𖾐 𖼖𖽻𖾐 𖼽𖽻 𖼊𖽑𖽺 𖼹𖽶𖾐，𖼽𖽻 𖼖𖽙𖾐 𖼀𖽦𖾐：“𖽃𖽔𖾐 𖼹𖽻𖾐 𖼐𖽑𖽡𖾐 𖼊𖽑𖽡 𖼽𖽚𖾐 𖼍𖽺𖾑 𖼖𖽻𖾐，𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼺𖽪𖾐 𖼄𖽔 𖼮𖽻𖾐 𖼐𖽺𖾑？”2 𖼍𖽕𖾑 𖼈𖽪𖽺𖾑 𖼽𖽕𖾑 𖼳𖽡𖾐 𖼄𖽡 𖼖𖽴𖾑 𖼖𖽙𖾐 𖼀𖽦𖾐：“𖼈𖽪𖾐 𖼍𖽦 𖼣𖽙𖾐 𖼊𖽑𖽺 𖼄𖽪𖾑 𖼍𖽴𖾑 𖼄𖽡𖽻 𖼊𖽑𖽡 𖼮𖽨𖾐 𖼂𖽺𖾐，𖼽𖽻 𖼀𖽦𖾐：‘𖼣𖽙𖾐 𖼐𖽑𖽡𖾐 𖼊𖽑𖽺 𖼹𖽶𖾐 𖼂𖽡𖾐 𖼽𖽡𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻，𖼊𖽑𖽡 𖼽𖽚𖾐 𖼞𖽜 𖼖𖽺𖾑 𖽂𖽙𖾐 𖼺𖽝𖾑 𖼄𖽔 𖼊𖽙𖾐，𖼣𖽙𖾐 𖼮𖽜𖾐 𖼀𖽑𖽙 𖼊𖽑𖽺 𖽃𖽔 𖼊𖽺𖾑 𖼠𖽻𖾐 𖼷𖽙𖾐 𖼖𖽙𖾐 𖼄𖽡𖽻𖾐 𖼖𖽡𖾐 𖼀𖽦𖾐 𖼄𖽪𖾑 𖼍𖽳𖾐 𖼦𖽑𖽻𖾐．’ 3 𖽃𖽔𖾑 𖼄𖽳𖾐 𖼐𖽑𖽡𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖽃𖽔 𖼊𖽺𖾑 𖼳𖽶 𖼷𖽙 𖼊𖽪𖾐 𖼮𖽻𖾐 𖼐𖽺𖾑？ 𖽃𖽔𖾑 𖼂𖽻𖾐 𖼣𖽙 𖼊𖽝𖾐 𖼣𖽻𖾐 𖼦𖽻，𖼠𖽳𖾐 𖼖𖽪𖾐 𖼷𖽙 𖼊𖽪𖾐 𖼣𖽻𖾐 𖼦𖽻，𖼣𖽙𖾐 𖼊𖽑𖽺 𖼄𖽻𖾑 𖼞𖽜 𖼖𖽻𖾐．”
4 𖼍𖽡𖾐 𖼄𖽻 𖼍𖽕𖾑 𖼈𖽪𖽺𖾑 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼠𖽳𖾐 𖼖𖽪𖾐 𖽃𖽔𖾑 𖼂𖽻𖾐 𖼄𖽔 𖼮𖽻𖾐，𖼍𖽡𖾐 𖼊𖽪𖾐 𖽃𖽔𖾑 𖼂𖽻𖾐 𖼍𖽺𖾑 𖼮𖽻𖾐．𖼦𖽑𖽻𖾐 𖼊𖽑𖽻𖾐，𖼻𖽙 𖼄𖽳 𖼄𖽡𖾐 𖼐𖽜𖾐 𖼊𖽑𖽺 𖼐𖽳 𖼄𖽔 𖼠𖽚 𖼺𖽪𖾐 𖼻𖽙 𖼐𖽜𖾐 𖼍𖽺𖾑 𖽂𖽙𖾐 𖼷𖽙 𖼊𖽙𖾐．”
5 𖼍𖽕𖾑 𖼈𖽪𖽺𖾑 𖼍𖽡𖾐 𖼄𖽻 𖼊𖽑𖽺 𖼊𖽻 𖼞𖽑𖽚：“𖼣𖽙𖾐 𖼈𖽳𖾐 𖼠𖽕𖾐 𖼰𖽶𖾐 𖼦𖽺𖾑𖽑 𖼺𖽙𖾐 𖼐𖽑𖽡𖾐 𖼞𖽑𖽶𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼖𖽙𖾐 𖼐𖽳 𖼄𖽔 𖼠𖽚，𖽃𖽙𖾑 𖼄𖽺 𖼊𖽑𖽙 𖼰𖽕𖾑 𖼊𖽝 𖼽𖽡𖾐 𖼊𖽻𖾐 𖼞𖽑𖽶𖾑 𖼮𖽶𖾐 𖼖𖽙𖾐 𖼺𖽶𖾑．𖽃𖽙𖾑 𖼄𖽺 𖼊𖽑𖽙 𖼊𖽺𖾐 𖼊𖽚𖾐 𖼮𖽨𖾐 𖼺𖽜 𖼽𖽡𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼮𖽜𖾐 𖼀𖽑𖽙 𖼞𖽳𖾐 𖼞𖽶𖾐 𖼮𖽑𖽶 𖼺𖽡 𖼮𖽡𖾐 𖼺𖽪𖾐 𖼣𖽻𖾐，𖼦𖽑𖽺𖾑 𖼊𖽑𖽡 𖼂𖽦𖾑 𖼠𖽳𖾐 𖼖𖽳𖾐 𖼺𖽺𖾑 𖼽𖽻 𖼄𖽳𖾑 𖼞𖽚 𖼺𖽡 𖼄𖽔 𖼮𖽡𖾐 𖼊𖽙𖾐 𖼖𖽔𖾑？”
6 𖼍𖽡𖾐 𖼄𖽻 𖼍𖽡𖾐 𖼊𖽪𖾐 𖽃𖽔𖾑 𖼂𖽻𖾐 𖼈𖽺𖾐 𖼍𖽕𖾑 𖼈𖽪𖽺𖾑 𖼊𖽑𖽺 𖼞𖽜，𖼞𖽪𖾐 𖼮𖽡𖽺𖾐 𖼞𖽑𖽶𖾑 𖼠𖽻𖾐 𖼠𖽳𖾐 𖼖𖽪𖾐 𖽃𖽔𖾑 𖼂𖽻𖾐 𖼄𖽔 𖼮𖽻𖾐，𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼺𖽪𖾐 𖼍𖽡𖾐 𖼊𖽪𖾐 𖽃𖽔𖾑 𖼂𖽻𖾐 𖼍𖽺𖾑 𖼮𖽻𖾐，𖼞𖽑𖽶𖾑 𖽃𖽔𖾑 𖼂𖽻𖾐 𖼳𖽸 𖼈𖽺𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼹𖽙𖾐 𖼹𖽶𖾐 𖼊𖽑𖽺 𖼍𖽙𖾑 𖼺𖽺𖾑，𖼖𖽳𖾑 𖼹𖽺𖾐 𖼖𖽻𖾐 𖼺𖽪𖾐 𖽃𖽔𖾑 𖼂𖽻𖾐 𖼖𖽡𖾐 𖼞𖽑𖽶𖾑 𖼣𖽻𖾐．
7 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼺𖽻 𖼖𖽚 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼊𖽑𖽡 𖼽𖽚𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼊𖽑𖽙 𖼷𖽻，𖼽𖽻 𖼦𖽑𖽺𖾑 𖼽𖽡 𖼍𖽙𖾐 𖼺𖽪𖾐 𖼷𖽑𖽻𖾐 𖼣𖽻𖾐，𖼍𖽙𖾐 𖼽𖽡𖾑 𖼄𖽡𖾐，𖼺𖽻 𖼖𖽚 𖼞𖽳𖾐 𖼽𖽻𖾐 𖼖𖽚𖾑 𖼀𖽑𖽙 𖼈𖽪𖾑 𖼷𖽪𖾐 𖼣𖽻𖾐．
8 𖼍𖽕𖾑 𖼈𖽪𖽺𖾑 𖼽𖽕𖾑 𖼳𖽡𖾐 𖼄𖽡 𖼖𖽴𖾑 𖼖𖽙𖾐 𖼊𖽻 𖼐𖽙：“𖼐𖽑𖽡𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼂𖽨𖾐 𖼹𖽶 𖼐𖽺𖾐 𖽃𖽔𖾑 𖼊𖽑𖽙 𖼮𖽻𖾐 𖼮𖽻𖾐？ 𖼞𖽪𖾐 𖼮𖽡𖽺𖾐 𖼈𖽪𖾐 𖼍𖽦 𖼞𖽳𖾐 𖼄𖽡𖽻 𖼦𖽑𖽺𖾑 𖼮𖽨𖾐 𖼦𖽑𖽔𖾐 𖼮𖽶𖾐 𖼂𖽺𖾐 𖼖𖽡𖾐 𖼰𖽡 𖼺𖽺𖾑，𖼣𖽙𖾐 𖽃𖽔𖾑 𖼊𖽑𖽙 𖼐𖽺𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼊𖽑𖽡 𖼳𖽶 𖼖𖽺𖾑 𖼈𖽺𖾐 𖼄𖽔 𖼄𖽳𖾐．”
9 𖼍𖽡𖾐 𖼄𖽻 𖼊𖽻 𖼞𖽑𖽚：“𖽃𖽔𖾑 𖼊𖽑𖽙 𖼊𖽑𖽡 𖼂𖽻𖾐 𖼮𖽻𖾐 𖼍𖽳𖾐，𖼞𖽑𖽶𖾑 𖼐𖽑𖽡𖾐 𖼽𖽡 𖼖𖽔𖾐 𖼖𖽻𖾐 𖼞𖽑𖽪 𖼮𖽻𖾐 𖼺𖽦 𖼦𖽑𖽙𖾐 𖼺𖽪𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼠𖽜𖾐 𖼖𖽡𖾑 𖼽𖽕𖾑 𖼞𖽳𖾐 𖽃𖽔𖾑 𖼊𖽑𖽙 𖼣𖽻𖾐，𖼄𖽳𖾐 𖼻𖽜 𖼖𖽧𖾐 𖼍𖽪𖾐 𖼀𖽑𖽨 𖼽𖽡 𖼇𖽮 𖼍𖽴 𖼠𖽙𖾑 𖼍𖽻𖾐 𖼀𖽳 𖼍𖽙𖾑 𖼍𖽳𖾐．𖼐𖽑𖽡𖾐 𖼻𖽜 𖼄𖽳𖾐 𖼊𖽑𖽡𖾑 𖼣𖽻𖾐 𖼈𖽺𖾐 𖼂𖽡𖾐 𖼽𖽡𖾐 𖼻𖽻𖾐，𖼞𖽪𖾐 𖼮𖽡𖽺𖾐 𖽃𖽔𖾑 𖼊𖽑𖽙 𖼦𖽑𖽺𖾑 𖼂𖽻𖾐 𖼍𖽺𖾑 𖼮𖽻𖾐，𖼠𖽳𖾐 𖼖𖽪𖾐 𖼰𖽕𖾑 𖼊𖽝 𖼄𖽡𖽻 𖼐𖽑𖽡 𖼄𖽔 𖼮𖽻𖾐．”
𖼍𖽕𖾑 𖼈𖽪𖽺𖾑 𖼀𖽦𖾐：“𖼣𖽙𖾐 𖼊𖽑𖽺 𖼞𖽜 𖼖𖽻𖾐 𖼄𖽺！𖼦𖽑𖽺𖾑 𖼦𖽶𖾑 𖼄𖽔 𖼷𖽑𖽶𖾐 𖼹𖽳𖾐 𖼺𖽪𖾐 𖽃𖽔𖾑 𖼊𖽑𖽙 𖼄𖽔 𖼮𖽻𖾐．”
𖼍𖽕𖾑 𖼈𖽪𖽺𖾑 𖼰𖽡𖽔𖾐 𖼊𖽑𖽴𖾑 𖼖𖽪𖾐 𖼞𖽳𖾐 𖼮𖽻𖾐 𖼷𖽑𖽻𖾐 𖼇𖽳 𖼖𖽙𖾐 𖼺𖽶𖾑 𖼂𖽺𖾐
10 𖼞𖽑𖽶𖾑 𖼊𖽑𖽡 𖼐𖽑𖽡𖾐，𖼍𖽕𖾑 𖼈𖽪𖽺𖾑 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼺𖽻 𖼖𖽚 𖼊𖽑𖽺 𖼮𖽡𖽪 𖼀𖽑𖽻𖾐 𖼺𖽺𖾑，𖼰𖽡𖽔𖾐 𖼊𖽑𖽴𖾑 𖼖𖽪𖾐 𖼽𖽕𖾑 𖼰𖽧 𖼈𖽪𖾐 𖼍𖽦 𖼞𖽳𖾐 𖼮𖽑𖽡𖾐． 11 𖼽𖽕𖾑 𖼰𖽧 𖽂𖽚 𖼞𖽑𖽶𖾐 𖼞𖽳𖾐 𖼷𖽶 𖼄𖽻 𖼽𖽕𖾑 𖼰𖽧 𖼖𖽙𖾐 𖼀𖽦𖾐：“𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼠𖽚 𖼞𖽳𖾐 𖼈𖽪𖾐 𖼍𖽦 𖼍𖽕𖾑 𖼈𖽪𖽺𖾑 𖼄𖽔 𖼣𖽻𖾐 𖼖𖽔？ 𖼽𖽻 𖼈𖽳𖾐 𖼞𖽳𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼺𖽪𖾑 𖼮𖽻 𖼞𖽪𖾐 𖼰𖽴𖾐 𖼺𖽺𖾑，𖼀𖽦𖾐：
‘𖼺𖽻 𖼖𖽚 𖼍𖽪𖾐 𖼍𖽪𖾐 𖼽𖽚𖾐 𖼺𖽦 𖼳𖽶𖾐，
𖼍𖽕𖾑 𖼈𖽪𖽺𖾑 𖼄𖽺 𖼄𖽺 𖼽𖽚𖾐 𖼺𖽦 𖼳𖽶𖾐．’
𖼞𖽑𖽶𖾑 𖼦𖽺𖾑𖽑 𖼽𖽚𖾐 𖼄𖽔 𖼣𖽻𖾐 𖼖𖽔𖾑？” 12 𖼍𖽕𖾑 𖼈𖽪𖽺𖾑 𖼊𖽻 𖼂𖽪𖾑 𖼦𖽑𖽺𖾑 𖼊𖽻 𖼮𖽨 𖼺𖽺𖾑，𖼀𖽑𖽨 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼰𖽡𖽺𖾐，𖼽𖽻 𖼰𖽡𖽔𖾐 𖼊𖽑𖽴𖾑 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼽𖽕𖾑 𖼰𖽧 𖼊𖽑𖽺 𖼦𖽑𖽔𖾐 𖼮𖽶𖾐 𖼮𖽡𖽮𖾐． 13 𖽃𖽔𖾐 𖼺𖽺𖾑，𖼽𖽻 𖼷𖽑𖽻𖾐 𖼷𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼷𖽑𖽻𖾐 𖼇𖽳 𖼖𖽙𖾐 𖼺𖽶𖾑 𖼄𖽔 𖼦𖽙𖾑 𖼄𖽔 𖼮𖽑𖽡 𖼂𖽺𖾐，𖼖𖽪𖾐 𖼞𖽳𖾐 𖽃𖽔𖾑 𖼊𖽪 𖼀𖽑𖽡 𖼊𖽑𖽺 𖼄𖽔 𖼠𖽕𖾐 𖼈𖽝 𖼍𖽦𖾐，𖼦𖽑𖽔𖾐 𖼖𖽺𖾑 𖼍𖽧𖾑 𖼈𖽧 𖼈𖽝 𖼀𖽙 𖼀𖽺 𖼊𖽑𖽺 𖼹𖽺𖾐 𖼖𖽻𖾐．