𖼽𖽕𖾑 𖼄𖽜𖾐 𖼺𖽪𖾐 𖼈𖽪𖾐 𖼍𖽦 𖼖𖽻𖾐 𖼽𖽔 𖼂𖽡 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽡𖽮𖾐
11
1 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼐𖽕 𖼳𖽡𖽕 𖼄𖽦 𖼀𖽑𖽙 𖼦𖽳 𖼊𖽦𖾐 𖼖𖽻𖾐，𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼞𖽳𖾐 𖼽𖽔 𖼂𖽡 𖼖𖽪𖾐 𖼊𖽑𖽺 𖼊𖽝 𖼊𖽻𖾐，𖼽𖽔 𖼂𖽡 𖼺𖽪𖾐 𖼷𖽑𖽻𖾐 𖼐𖽕 𖼳𖽡𖽕 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼺𖽺𖾑，𖼣𖽙𖾐 𖼈𖽳𖾐 𖼐𖽑𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐．”2 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼐𖽕 𖼳𖽡𖽕 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖼞𖽜 𖼐𖽑𖽡𖾐 𖼈𖽳𖾐 𖼊𖽑𖽡 𖼽𖽚𖾑 𖼽𖽚𖾐 𖼞𖽳𖾐 𖼽𖽙𖾐 𖼀𖽳 𖼄𖽦𖾐 𖼊𖽪 𖼊𖽑𖽺 𖼠𖽢𖾑 𖼊𖽑𖽧 𖼖𖽻𖾐 𖼺𖽺𖾑，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼊𖽙𖾐 𖼊𖽡𖾑𖽑 𖼣𖽻𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼊𖽻𖾐．”
3 𖼽𖽔 𖼂𖽡 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼐𖽑𖽡𖾐 𖼦𖽑𖽦 𖼳𖽶 𖼐𖽑𖽡𖾐 𖼣𖽙𖾐 𖼈𖽳𖾐 𖼊𖽑𖽺 𖼞𖽜 𖼺𖽺，𖼣𖽙𖾐 𖼈𖽳𖾐 𖼷𖽑𖽻𖾐 𖼹𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼽𖽡𖾐，𖼣𖽙𖾐 𖼈𖽳𖾐 𖼊𖽑𖽺 𖼰𖽨𖾑 𖼖𖽻𖾐 𖼺𖽪𖾐 𖼰𖽙𖾐 𖼄𖽔 𖽂𖽙𖾐 𖼊𖽡𖾑𖽑 𖼣𖽻𖾐，𖼣𖽙𖾐 𖼈𖽳𖾐 𖼊𖽚𖾐 𖼖𖽻𖾐 𖼐𖽑𖽡𖾐 𖼊𖽑𖽺 𖼮𖽻𖾑 𖼊𖽴 𖼊𖽻𖾐．
4 𖼹𖽡𖾐 𖼖𖽦 𖼖𖽻𖾐 𖼺𖽻 𖼖𖽚 𖼮𖽻𖾐 𖼞𖽳𖾐 𖼰𖽡𖾐 𖼂𖽡 𖼽𖽕𖾑 𖼄𖽡𖾐 𖼊𖽺𖾐 𖼮𖽑𖽡𖾐，𖼊𖽻 𖼂𖽪𖾑 𖼦𖽑𖽺𖾑 𖼹𖽻𖾐 𖼀𖽦𖾐 𖼷𖽑𖽻𖾐 𖼷𖽪𖾐 𖼖𖽙𖾐 𖼊𖽑𖽧，𖽃𖽔𖾐 𖼺𖽺𖾑 𖼷𖽑𖽻𖾐 𖼄𖽳𖾑 𖼄𖽳 𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐． 5 𖼞𖽑𖽶𖾑 𖼮𖽶𖾐，𖼺𖽻 𖼖𖽚 𖼄𖽡𖾐 𖼠𖽻𖾐 𖼮𖽑𖽻𖾐 𖼐𖽑𖽡 𖼞𖽕 𖼞𖽚 𖼖𖽻𖾐 𖼍𖽺𖾑 𖼺𖽺，𖼽𖽻 𖼊𖽻 𖼐𖽙𖾐：“𖽃𖽔 𖼊𖽺𖾑 𖼳𖽶 𖼄𖽡𖽻 𖼣𖽻𖾐？ 𖽃𖽔𖾐 𖼹𖽻𖾐 𖼷𖽑𖽻𖾐 𖼄𖽳𖾑 𖼄𖽳 𖼣𖽶𖾐 𖼐𖽺𖾑？”𖽃𖽔𖾐 𖼺𖽺𖾑 𖼷𖽑𖽻𖾐 𖼊𖽑𖽡 𖼹𖽻𖾐 𖼽𖽔 𖼂𖽡 𖼺𖽪𖾐 𖼷𖽑𖽻𖾐 𖼞𖽳𖾐 𖼊𖽻 𖼂𖽪𖾑 𖼀𖽦𖾐 𖼽𖽻 𖼖𖽙𖾐 𖼊𖽑𖽧．
𖼺𖽻 𖼖𖽚 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖽂𖽙 𖼊𖽙𖾐 𖼦𖽑𖽙𖾐
6 𖼺𖽻 𖼖𖽚 𖼊𖽻 𖼂𖽪𖾑 𖼦𖽑𖽺𖾑 𖼊𖽻 𖼮𖽨 𖼦𖽑𖽻𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼳𖽨𖾐 𖼦𖽑𖽔𖾐 𖼮𖽶𖾐 𖼽𖽻 𖼊𖽑𖽺 𖼞𖽕 𖼍𖽪𖾐 𖼺𖽺𖾑，𖼽𖽻 𖼦𖽑𖽔𖾐 𖼮𖽶𖾐 𖼦𖽑𖽦 𖼞𖽑𖽴． 7 𖼽𖽻 𖼐𖽑𖽡 𖼖𖽙 𖼦𖽑𖽳𖾐 𖼊𖽑𖽡 𖼷𖽜𖾐 𖼺𖽶𖾐 𖼂𖽻𖾐 𖼖𖽻𖾐 𖼺𖽦 𖼦𖽑𖽙𖾐，𖼐𖽑𖽡 𖼦𖽙 𖼊𖽝𖾐 𖼊𖽑𖽡 𖼮𖽡𖽦 𖼊𖽑𖽡 𖼮𖽡𖽦 𖼂𖽺𖾐，𖼈𖽺𖾐 𖼹𖽡𖾐 𖼖𖽦 𖼞𖽜 𖼦𖽑𖽙𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼮𖽻𖾐 𖼞𖽳𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼽𖽡𖾐，𖼀𖽦𖾐：“𖼄𖽔 𖼊𖽚𖾐 𖼖𖽻𖾐 𖼺𖽻 𖼖𖽚 𖼐𖽺𖾐 𖼺𖽔 𖼄𖽪 𖽃𖽳 𖼠𖽙𖾑 𖼍𖽻𖾐 𖼮𖽑𖽻𖾐 𖼺𖽪𖾐，𖼽𖽻 𖼞𖽳𖾐 𖼐𖽑𖽡 𖼖𖽺𖾑 𖼦𖽑𖽺𖾑 𖼖𖽙𖾐 𖼺𖽶𖾑 𖼀𖽑𖽢 𖼊𖽻𖾐．” 𖼽𖽺𖾐 𖼦𖽴 𖼦𖽫 𖼷𖽑𖽻𖾐 𖼀𖽺 𖼞𖽜 𖼮𖽡𖽮𖾐 𖼺𖽺𖾑，𖼽𖽻 𖼈𖽳𖾐 𖼊𖽑𖽡 𖼐𖽑𖽧𖾐 𖼄𖽙𖾐 𖼮𖽻𖾐，𖼄𖽳𖾑 𖼄𖽳 𖼊𖽚𖾐 𖼖𖽻𖾐 𖼦𖽑𖽻𖾐． 8 𖼺𖽻 𖼖𖽚 𖼂𖽡 𖼺𖽴𖾑 𖼄𖽡𖾐 𖼊𖽺𖾐 𖼮𖽻𖾐 𖼷𖽑𖽻𖾐 𖼀𖽺 𖼊𖽑𖽺 𖼈𖽜𖾐 𖼐𖽦𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼺𖽙𖾐 𖼷𖽑𖽡𖾐 𖼄𖽺 𖼮𖽻𖾐，𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼺𖽙𖾐 𖼄𖽺 𖼮𖽻𖾐．
9 𖼺𖽻 𖼖𖽚 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼽𖽔 𖼂𖽡 𖼖𖽪𖾐 𖼞𖽳𖾐 𖼮𖽑𖽻𖾐 𖼖𖽻𖾐 𖼺𖽪𖾐 𖼹𖽡𖾐 𖼖𖽦 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽡𖾐 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼽𖽔 𖼂𖽡 𖼖𖽪𖾐 𖼞𖽳𖾐 𖼷𖽑𖽻𖾐 𖼖𖽙𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼊𖽑𖽧：‘𖽃𖽔𖾑 𖼞𖽶𖾐 𖼐𖽑𖽡𖾐 𖽃𖽔𖾑 𖼄𖽶 𖼐𖽑𖽡𖾐 𖼊𖽦𖾐 𖼖𖽚𖾐 𖼞𖽶𖾑𖽑 𖼮𖽶𖾐，𖼐𖽑𖽡𖾐 𖼈𖽳𖾐 𖽂𖽙𖾐 𖼰𖽨𖾑 𖼊𖽻𖾐．’” 𖼹𖽡𖾐 𖼖𖽦 𖼀𖽑𖽚𖾐 𖼞𖽚 𖼽𖽡𖾐 𖼰𖽡𖾐 𖼖𖽡𖽦𖾑 𖼄𖽡𖾐 𖼊𖽺𖾐 𖼽𖽔 𖼂𖽡 𖼖𖽪𖾐 𖼞𖽳𖾐 𖼷𖽑𖽻𖾐 𖼖𖽙𖾐 𖼀𖽦𖾐 𖼊𖽑𖽧，𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼦𖽑𖽔𖾐 𖼮𖽶𖾐 𖼖𖽺𖾑 𖽂𖽙𖾐．
10 𖼽𖽔 𖼂𖽡 𖼺𖽪𖾐 𖼷𖽑𖽻𖾐 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐：“𖽃𖽔𖾑 𖼞𖽶𖾐 𖼐𖽑𖽡𖾐 𖼣𖽙𖾐 𖼈𖽳𖾐 𖼊𖽚𖾐 𖼖𖽻𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽻𖾑 𖼊𖽴 𖼊𖽻𖾐，𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾐 𖼂𖽺𖾐 𖼊𖽡 𖼮𖽑𖽻 𖼊𖽑𖽡𖾑 𖼣𖽻𖾐，𖽃𖽔 𖼊𖽺𖾐 𖼂𖽺𖾐 𖼻𖽻𖾐． 11 𖼠𖽙𖾑 𖼍𖽻𖾐 𖼊𖽑𖽡 𖼐𖽑𖽡𖾐，𖼺𖽻 𖼖𖽚 𖼷𖽑𖽻𖾐 𖼷𖽪𖾐 𖼊𖽑𖽺 𖼀𖽜𖾐 𖼺𖽙𖾐 𖼷𖽪𖾐 𖼂𖽺𖾐，𖽃𖽔𖾑 𖼄𖽶 𖼊𖽑𖽡 𖼖𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼮𖽻𖾐 𖼞𖽳𖾐 𖼠𖽻𖾐 𖼊𖽑𖽺 𖼊𖽡 𖼽𖽡𖾐，𖼽𖽻 𖼈𖽳𖾐 𖼊𖽑𖽺 𖼺𖽦 𖼺𖽺𖾑 𖽃𖽔𖾑 𖼄𖽶 𖼐𖽑𖽡𖾐 𖼊𖽦𖾐 𖼖𖽚𖾐 𖼰𖽶𖾐 𖼮𖽑𖽡𖾐，𖼷𖽺 𖼷𖽺𖾐 𖼺𖽪𖾐 𖼄𖽳𖾑 𖼄𖽳 𖼮𖽡𖽪 𖼀𖽑𖽻𖾐 𖼍𖽪𖾐 𖼽𖽡𖾐 𖼦𖽑𖽙𖾐，𖼊𖽑𖽡 𖼽𖽚𖾐 𖼖𖽺𖾑 𖼊𖽑𖽡 𖼽𖽚𖾐 𖼖𖽙𖾐 𖼄𖽔 𖽂𖽙𖾐 𖼮𖽑𖽻𖾐．
𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼮𖽻𖾐 𖼺𖽻 𖼖𖽚 𖼊𖽑𖽺 𖼞𖽪𖾐 𖼹𖽪𖾐 𖼈𖽪𖾐 𖼍𖽦 𖼂𖽺𖾐
12 𖼷𖽑𖽻𖾐 𖼀𖽺 𖼺𖽔 𖼄𖽪 𖽃𖽳 𖼖𖽙𖾐 𖼀𖽦𖾐：“𖼺𖽻 𖼖𖽚 𖼞𖽜 𖽃𖽔 𖼐𖽺𖾑 𖼞𖽳𖾐 𖼈𖽪𖾐 𖼍𖽦 𖽂𖽙𖾐 𖼂𖽺𖾐 𖼄𖽔 𖼊𖽙𖾐 𖼀𖽦𖾐 𖼺𖽪𖾐 𖼞𖽑𖽶𖾑 𖽃𖽔 𖼺𖽺 𖼣𖽻𖾐？ 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼊𖽑𖽺 𖼺𖽶𖾐 𖼊𖽑𖽧 𖼖𖽻𖾐，𖼣𖽙𖾐 𖼈𖽳𖾐 𖼽𖽻 𖼈𖽳𖾐 𖼊𖽑𖽺 𖼺𖽦 𖼦𖽑𖽙𖾐 𖼊𖽻𖾐．”
13 𖼺𖽻 𖼖𖽚 𖼀𖽦𖾐：“𖽃𖽙𖾑 𖼐𖽑𖽡𖾐 𖼷𖽑𖽻𖾐 𖽂𖽙𖾐 𖼺𖽦 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖽃𖽙𖾑 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼰𖽨𖾑 𖼞𖽳𖾐 𖼐𖽑𖽡𖾐 𖼦𖽑𖽦 𖼣𖽻𖾐．”
14 𖼺𖽔 𖼄𖽪 𖽃𖽳 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐：“𖼖𖽻𖾐 𖼄𖽺！𖽃𖽔 𖼐𖽺𖾑 𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼽𖽡𖾐，𖼺𖽻 𖼖𖽚 𖼈𖽪𖾐 𖼍𖽦 𖼣𖽻𖾐 𖼀𖽦𖾐 𖼊𖽑𖽧 𖼖𖽡𖾐．” 15 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼽𖽡𖾐，𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼺𖽻 𖼖𖽚 𖼞𖽜 𖼈𖽪𖾐 𖼍𖽦 𖼂𖽺𖾐，𖼦𖽑𖽔𖾐 𖼖𖽺𖾑 𖽂𖽙 𖼺𖽙𖾐 𖼂𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼺𖽙𖾑 𖼺𖽙𖾐 𖼍𖽡𖾐 𖼮𖽡𖽺𖾐 𖼂𖽺𖾐，𖼺𖽻 𖼖𖽚 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼞𖽑𖽶𖾑 𖼠𖽻𖾐 𖼮𖽻𖾐，𖼦𖽑𖽔𖾐 𖼮𖽶𖾐 𖼖𖽺𖾑 𖼞𖽜𖾐 𖼺𖽜𖾐．