𖼺𖽔 𖼄𖽪 𖽃𖽳 𖼊𖽑𖽡 𖼺𖽪𖾑 12

𖼺𖽔 𖼄𖽪 𖽃𖽳 𖼄𖽳𖾑 𖼊𖽺𖾐 𖼊𖽻 𖼂𖽪𖾑

1 𖼺𖽔 𖼄𖽪 𖽃𖽳 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽦𖾐：“𖼐𖽦𖾐 𖼄𖽺！𖼣𖽙𖾐 𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼈𖽪𖾐 𖼍𖽦 𖼊𖽑𖽡 𖼽𖽚𖾐 𖼺𖽺𖾐 𖼍𖽙𖾑 𖼦𖽑𖽙𖾐． 2 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼈𖽪𖾐 𖼍𖽦 𖼮𖽻𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽳 𖼍𖽳𖾐 𖼦𖽑𖽻𖾐．𖼀𖽦𖾐 𖼣𖽙𖾐 𖼊𖽑𖽺 𖼮𖽑𖽡𖾐，𖼣𖽙𖾐 𖼞𖽑𖽚 𖼊𖽑𖽙 𖼄𖽻 𖼦𖽑𖽻𖾐，𖼈𖽪𖾑 𖼷𖽑𖽜𖾐 𖼀𖽑𖽨𖾐 𖼦𖽑𖽻𖾐，𖼣𖽙𖾐 𖼻𖽙 𖼖𖽺𖾑 𖼐𖽑𖽡𖾐 𖼈𖽳𖾐 𖼞𖽳𖾐 𖼞𖽑𖽶𖾑 𖼠𖽻𖾐 𖼮𖽻𖾐．𖼣𖽙𖾐 𖼊𖽑𖽡 𖼻𖽳𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽳， 3 𖼣𖽙𖾐 𖽃𖽔𖾑 𖼄𖽳𖾐 𖼦𖽑𖽺𖾑 𖼠𖽻𖾐 𖼮𖽻𖾐，𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼐𖽺𖾐 𖼽𖽻 𖼞𖽑𖽙𖾐 𖼺𖽺𖾐 𖼺𖽪𖾐 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺，𖼣𖽙𖾐 𖼄𖽔 𖼀𖽑𖽢 𖼊𖽪 𖼀𖽦𖾐 𖼊𖽑𖽧 𖼖𖽻𖾐 𖼻𖽻𖾐，𖼣𖽙𖾐 𖽃𖽔 𖼺𖽺 𖼞𖽳𖾐 𖼐𖽑𖽡 𖼐𖽻𖾑 𖼠𖽚 𖼣𖽻𖾐 𖼦𖽻，𖽃𖽔𖾐 𖼺𖽺 𖼞𖽳𖾐 𖼊𖽑𖽳 𖼖𖽳𖾐 𖼄𖽪 𖼮𖽴𖾐 𖼠𖽚 𖼣𖽻𖾐 𖼦𖽻，𖽃𖽔 𖼺𖽺 𖼊𖽑𖽺 𖼮𖽑𖽡𖾐 𖼻𖽸 𖼠𖽚 𖼣𖽻𖾐 𖼦𖽻，𖽃𖽔 𖼺𖽺 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼠𖽚 𖼣𖽻𖾐 𖼦𖽻 ？ 𖽃𖽔 𖼊𖽺𖾑 𖼽𖽚𖾐 𖼞𖽳𖾐 𖽂𖽚𖾑 𖼮𖽜 𖼷𖽶𖾐 𖼺𖽺𖾑 𖼀𖽳𖾐 𖼈𖽡𖾐 𖼖𖽙𖾐 𖼄𖽔 𖼮𖽑𖽻𖾐 𖼄𖽡𖽻 𖼂𖽺𖾐 𖼣𖽻𖾐 𖼦𖽻，𖼦𖽑𖽺𖾑 𖼳𖽶 𖼄𖽡𖽻 𖼮𖽻𖾐 𖼠𖽚 𖼊𖽑𖽡𖾑 𖼣𖽻𖾐，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽑𖽚 𖼞𖽜 𖼊𖽻𖾐．”

4 𖼽𖽻 𖼈𖽳𖾐 𖼊𖽻 𖼞𖽑𖽚：“𖼐𖽑𖽡𖾐 𖼣𖽙𖾐 𖼈𖽳𖾐 𖼊𖽑𖽺 𖼮𖽑𖽡𖾐 𖼻𖽸 𖼄𖽔 𖼠𖽚，𖼣𖽙𖾐 𖼈𖽳𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼄𖽔 𖼠𖽚，𖼊𖽑𖽡 𖼽𖽚𖾐 𖼞𖽳𖾐 𖼄𖽡𖽻 𖼐𖽑𖽡 𖼖𖽺𖾑 𖼈𖽺𖾐 𖼄𖽔 𖼠𖽚．”

5 𖼺𖽔 𖼄𖽪 𖽃𖽳 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖽃𖽙𖾑 𖼐𖽑𖽡𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼮𖽨 𖼄𖽡𖽻𖾐 𖼂𖽺𖾐，𖼽𖽻 𖼳𖽡𖽻𖾐 𖼷𖽑𖽳𖾐 𖼐𖽡𖾑𖽑 𖼦𖽜 𖼺𖽪𖾐 𖼈𖽪𖾐 𖼍𖽦 𖼖𖽺𖾑 𖼐𖽑𖽡𖾐 𖼈𖽳𖾐 𖼠𖽻𖾐 𖼊𖽑𖽺 𖼮𖽨 𖼄𖽡𖽻𖾐 𖼂𖽺𖾐，𖼐𖽑𖽡𖾐 𖼈𖽳𖾐 𖼣𖽙𖾐 𖼞𖽳𖾐 𖼦𖽑𖽙 𖼮𖽨𖾐 𖼊𖽑𖽡 𖼳𖽶 𖼖𖽺𖾑 𖼰𖽙𖾐 𖼄𖽔 𖽂𖽙𖾐．”

𖼽𖽻 𖼈𖽳𖾐 𖼀𖽦𖾐：“𖼽𖽻 𖼞𖽜 𖼮𖽨 𖼄𖽡𖽻𖾐 𖼂𖽺𖾐 𖼻𖽻𖾐．”

6 𖼺𖽔 𖼄𖽪 𖽃𖽳 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐：“𖽃𖽙𖾑 𖼄𖽺 𖼊𖽑𖽙 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼊𖽑𖽺 𖼺𖽺𖾐 𖼊𖽑𖽧 𖼖𖽻𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽦𖾐 𖼖𖽻𖾐 𖼺𖽪𖾐，𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼣𖽻𖾐． 7 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼦𖽑𖽡𖽚 𖼍𖽳𖾐，𖼣𖽙𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼞𖽑𖽻𖾑 𖼐𖽑𖽡𖾐 𖼈𖽳𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼊𖽑𖽺 𖼞𖽑𖽙𖾐 𖼂𖽺𖾐 𖼺𖽪𖾐 𖼀𖽳𖾐 𖼈𖽡𖾐 𖼄𖽡𖽻，𖼣𖽙𖾐 𖼀𖽦𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼊𖽑𖽧 𖼊𖽻𖾐．

8 𖽃𖽙𖾑 𖼄𖽺 𖼊𖽑𖽙 𖼽𖽔 𖼠𖽴𖾑 𖼈𖽴 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽻𖾐，𖼠𖽙𖾑 𖼍𖽻𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼞𖽑𖽻𖾑 𖼄𖽚 𖼳𖽡𖾐 𖼐𖽺𖾐 𖼽𖽕𖾑 𖼖𖽪𖽦 𖼊𖽑𖽺 𖼹𖽡𖾐 𖼂𖽡𖾐 𖼽𖽡𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼊𖽑𖽺 𖼦𖽳 𖼊𖽚𖾐 𖼖𖽻𖾐，𖼽𖽻 𖼈𖽳𖾐 𖼞𖽜 𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽻𖾐． 9 𖼦𖽑𖽻𖾐 𖼊𖽑𖽻𖾐，𖼽𖽻 𖼈𖽳𖾐 𖼞𖽳𖾐 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼽𖽻 𖼈𖽳𖾐 𖼄𖽔 𖼦𖽙𖾑 𖼮𖽑𖽡 𖼦𖽑𖽻𖾐，𖽃𖽔𖾐 𖼺𖽺𖾑 𖽂𖽙 𖼺𖽙𖾐 𖼂𖽙𖾐 𖼽𖽻 𖼈𖽳𖾐 𖼊𖽑𖽺 𖼰𖽡𖽻𖾐 𖼳𖽡𖽕𖾑 𖼺𖽙 𖼖𖽪𖾐 𖼞𖽳𖾐 𖼄𖽦 𖼈𖽪𖾑 𖼷𖽪𖾐 𖼳𖽡𖾐 𖼳𖽡𖾐 𖼖𖽔𖾐，𖼄𖽚 𖼽𖽔𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼐𖽺𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼖𖽦 𖼠𖽻𖾐 𖼞𖽑𖽶𖾐 𖼰𖽡𖽺𖾐，𖽃𖽔𖾐 𖼺𖽺𖾑 𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼄𖽔 𖼐𖽙 𖼖𖽻𖾐 𖼽𖽻 𖼈𖽳𖾐 𖼊𖽑𖽺 𖼊𖽝 𖼊𖽦．

10 𖼽𖽻 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖼀𖽦𖾐：“𖼣𖽙𖾐 𖼈𖽳𖾐 𖼽𖽺𖾐 𖼮𖽑𖽡𖽪𖾑 𖼀𖽑𖽨 𖼦𖽑𖽻𖾐，𖼞𖽪𖾐 𖼮𖽡𖽺𖾐 𖼣𖽙𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽺𖾑， 𖼽𖽡𖾐 𖼂𖽔𖾐 𖼖𖽧𖾑 𖼺𖽡𖾐 𖼞𖽶𖾑𖽑 𖼹𖽻𖾐 𖼐𖽺𖾐 𖼽𖽕𖾑 𖼺𖽶𖾐 𖼊𖽑𖽔𖾐 𖼖𖽮𖾑 𖼺𖽡𖾐 𖼞𖽶𖾑𖽑 𖼹𖽻𖾐 𖼊𖽑𖽺 𖼍𖽡𖾐 𖼊𖽑𖽴．𖽃𖽔𖾑 𖼄𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼮𖽡𖾐 𖼂𖽦𖾐 𖼖𖽦 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼣𖽙𖾐 𖼈𖽳𖾐 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐 𖼞𖽜，𖼣𖽙𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐．” 11 𖽃𖽔𖾐 𖼺𖽺𖾑 𖼽𖽺𖾐 𖼦𖽴 𖼦𖽫 𖼞𖽑𖽻𖾑 𖼽𖽺𖾐 𖼖𖽪𖾑 𖼂𖽔𖾐 𖼖𖽧𖾑、𖼂𖽡 𖼍𖽕𖾑、𖼽𖽺𖾐 𖼇𖽮 𖼊𖽑𖽔𖾐 𖼐𖽺𖾐 𖼺𖽔 𖼄𖽪 𖽃𖽳 𖼊𖽑𖽺 𖼹𖽡𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼞𖽕 𖼰𖽡𖽺𖾐 𖼮𖽻𖾐 𖼺𖽪𖾐 𖼮𖽡𖾐 𖼂𖽦𖾐 𖼖𖽦 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐，𖼐𖽑𖽡𖾐 𖼈𖽳𖾐 𖼞𖽜 𖼺𖽙𖾑 𖼺𖽙𖾐 𖼄𖽡𖾐 𖼊𖽺𖾐 𖽂𖽙𖾐 𖼮𖽻𖾐．

12 𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼞𖽑𖽶𖾑 𖼐𖽑𖽡𖾐 𖼈𖽳𖾐 𖼞𖽳𖾐 𖼈𖽪𖾐 𖼍𖽦 𖼣𖽻𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼐𖽦𖾐 𖼄𖽡𖽻𖾐，𖼽𖽕𖾑 𖼄𖽜𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼐𖽕 𖼳𖽡𖽕 𖼖𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼊𖽝 𖼊𖽦 𖼞𖽶𖾑𖽑 𖼮𖽶𖾐，𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐 𖼄𖽔 𖼦𖽶𖾐，𖼀𖽦𖾐：“𖼄𖽔 𖼊𖽙𖾐，𖼣𖽙𖾐 𖼈𖽳𖾐 𖼖𖽺𖾑 𖼈𖽪𖾐 𖼍𖽦 𖼊𖽑𖽡 𖼽𖽚𖾐 𖼮𖽻𖾐 𖼺𖽺𖾑，𖼣𖽙𖾐 𖼈𖽳𖾐 𖼊𖽑𖽺 𖼠𖽕 𖼖𖽡𖾐．” 13 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼺𖽺𖾐 𖼞𖽑𖽙𖾐 𖼖𖽡𖾐 𖼺𖽪𖾐 𖼈𖽪𖾐 𖼍𖽦 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．𖼐𖽦𖾐 𖼄𖽺！𖼽𖽺𖾐 𖼦𖽴 𖼦𖽫 𖼈𖽪𖾐 𖼍𖽦 𖼊𖽑𖽡 𖼽𖽚𖾐 𖼞𖽪𖾐 𖼹𖽪𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼠𖽕 𖼍𖽳𖾐 𖼦𖽑𖽻𖾐．

14 𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐，𖼽𖽻 𖼊𖽑𖽺 𖼮𖽻𖾑 𖼊𖽴，𖼽𖽻 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐，𖼽𖽻 𖼄𖽪𖾑 𖼍𖽴𖾑 𖼺𖽪𖾐 𖼊𖽑𖽺 𖼳𖽪𖾐，𖼐𖽑𖽡𖾐 𖼈𖽳𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼠𖽕 𖼺𖽪𖾐 𖼈𖽪𖾐 𖼍𖽦，𖼐𖽑𖽡𖾐 𖼈𖽳𖾐 𖼞𖽳𖾐 𖼽𖽺𖾐 𖼦𖽴 𖼦𖽫 𖽂𖽙 𖼺𖽙𖾐 𖼂𖽙𖾐 𖼠𖽙𖾑 𖼍𖽻𖾐 𖼮𖽑𖽻𖾐 𖼊𖽑𖽡𖾑 𖼣𖽻𖾐，𖼦𖽑𖽺𖾑 𖼹𖽳𖾐 𖼳𖽶 𖼣𖽻𖾐． 15 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽻 𖼂𖽪𖾑 𖼊𖽑𖽺 𖼊𖽻 𖼄𖽔 𖼐𖽙𖾐，𖼽𖽻 𖼄𖽪𖾑 𖼍𖽴𖾑 𖼺𖽪𖾐 𖼊𖽑𖽺 𖼄𖽔 𖼳𖽪𖾐 𖼊𖽑𖽡𖾑 𖼣𖽻𖾐，𖼽𖽺𖾐 𖼦𖽴 𖼦𖽫 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼊𖽑𖽺 𖽂𖽙 𖼇𖽕 𖼳𖽶 𖼖𖽙𖾐 𖼺𖽶𖾑，𖼐𖽑𖽡𖾐 𖼈𖽳𖾐 𖼊𖽑𖽺 𖼖𖽺𖾑 𖽂𖽙 𖼇𖽕 𖼳𖽶 𖼊𖽻𖾐．

16 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼦𖽑𖽡𖽚 𖼍𖽳𖾐 𖼐𖽦𖾐 𖼻𖽻𖾐，𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼄𖽦𖾐 𖼊𖽪 𖼮𖽑𖽡𖽺 𖼄𖽡𖽻 𖼈𖽳 𖼊𖽑𖽡 𖼮𖽨𖾐 𖼂𖽺𖾐 𖼊𖽻𖾐． 17 𖽃𖽔𖾑 𖼄𖽳𖾐 𖼳𖽙𖾐 𖼷𖽑𖽳 𖼰𖽶𖾐 𖽃𖽔𖾑 𖼄𖽶 𖼦𖽡𖽳𖾐 𖼄𖽔 𖼣𖽻𖾐 𖼖𖽔？𖼣𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑，𖽃𖽔𖾑 𖼄𖽶 𖼠𖽶、𖽃𖽔𖾑 𖼄𖽶 𖼦𖽑𖽙𖾐 𖼹𖽺𖾐 𖼖𖽻𖾐 𖼊𖽻𖾐，𖼐𖽑𖽡𖾐 𖼈𖽳𖾐 𖼞𖽜 𖼺𖽝𖾑，𖼦𖽑𖽔𖾐 𖼖𖽺𖾑 𖼐𖽦𖾐 𖼊𖽚𖾐 𖼖𖽻𖾐 𖼊𖽙𖾐，𖼐𖽑𖽡𖾐 𖼈𖽳𖾐 𖼈𖽪𖾐 𖼍𖽦 𖼊𖽑𖽡 𖼽𖽚𖾐 𖼰𖽙𖾐，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼽𖽺𖾐 𖼮𖽑𖽡𖽪𖾑 𖼈𖽳 𖼀𖽑𖽨 𖼳𖽶 𖼣𖽻𖾐．

18 𖽃𖽔𖾐 𖼺𖽺𖾑 𖼺𖽔 𖼄𖽪 𖽃𖽳 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐，𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼹𖽦𖾐 𖼽𖽺𖾐 𖼦𖽴 𖼦𖽫 𖽃𖽔𖾑 𖼄𖽶 𖼠𖽶、𖽃𖽔𖾑 𖼄𖽶 𖼦𖽑𖽙𖾐 𖼹𖽺𖾐 𖼖𖽻𖾐 𖼺𖽺𖾑，𖼷𖽑𖽻𖾐 𖼀𖽺 𖼽𖽺𖾐 𖼦𖽴 𖼦𖽫 𖼐𖽺𖾐 𖼺𖽔 𖼄𖽪 𖽃𖽳 𖼊𖽑𖽺 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼷𖽑𖽚． 19 𖼷𖽑𖽻𖾐 𖼀𖽺 𖼺𖽔 𖼄𖽪 𖽃𖽳 𖼖𖽙𖾐 𖼀𖽦𖾐：“𖼣𖽙𖾐 𖼈𖽳𖾐 𖼖𖽙𖾐 𖼀𖽙𖾐 𖼐𖽑𖽡𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐 𖼞𖽜，𖼣𖽙𖾐 𖼈𖽳𖾐 𖼞𖽜 𖼊𖽑𖽔 𖼳𖽶𖾐 𖼮𖽡𖽦 𖼄𖽶𖾑 𖼞𖽜，𖼞𖽪𖾐 𖼮𖽡𖽺𖾐 𖼣𖽙𖾐 𖼈𖽳𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼈𖽪𖾐 𖼍𖽦 𖼞𖽪𖾐 𖼹𖽪𖾐 𖼍𖽙𖾑 𖼺𖽪𖾐 𖼄𖽡𖽻，𖼦𖽑𖽺𖾑 𖼽𖽺𖾐 𖼮𖽑𖽡𖽪𖾑 𖼊𖽑𖽺 𖼽𖽺𖾐 𖼮𖽑𖽡𖽪𖾑 𖼈𖽳 𖼀𖽑𖽨 𖼳𖽶 𖼣𖽻𖾐．”

20 𖼺𖽔 𖼄𖽪 𖽃𖽳 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐：“𖼮𖽡𖽮𖾐 𖼄𖽔 𖼻𖽻𖾐！𖼐𖽑𖽡𖾐 𖼈𖽳𖾐 𖼊𖽶𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼂𖽺𖾐 𖼦𖽑𖽙𖾐 𖼊𖽑𖽻𖾐，𖼽𖽺𖾐 𖼦𖽴 𖼦𖽫 𖼊𖽑𖽺 𖼰𖽡𖾑 𖼦𖽑𖽙𖾐 𖼄𖽔 𖼊𖽙𖾐，𖼊𖽑𖽡 𖼐𖽑𖽧𖾐 𖼄𖽙𖾐 𖼽𖽻 𖼊𖽑𖽺 𖼠𖽙𖾐 𖼳𖽙𖾐 𖼖𖽡𖾐． 21 𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼰𖽡𖾑 𖼦𖽑𖽙𖾐 𖼺𖽺𖾑，𖼽𖽡𖾐 𖼠𖽻𖾐 𖼄𖽶𖾐 𖼖𖽡𖾐 𖼺𖽪𖾐 𖼀𖽸𖾐 𖼮𖽑𖽡𖽻𖾐 𖼊𖽑𖽺 𖼍𖽡𖾐 𖼊𖽑𖽴 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼀𖽸𖾐 𖼮𖽑𖽡𖽻𖾐 𖼞𖽑𖽶𖾑 𖼠𖽻𖾐 𖼄𖽶𖾐 𖼖𖽡𖾐 𖼍𖽺𖾑 𖼣𖽻𖾐，𖼷𖽑𖽻𖾐 𖼊𖽑𖽺 𖼰𖽨𖾑 𖼄𖽔 𖼠𖽸𖾑，𖼷𖽑𖽻𖾐 𖼽𖽻 𖼊𖽑𖽺 𖼍𖽡𖾐 𖼊𖽑𖽴 𖼞𖽑𖽶𖾑 𖼷𖽻 𖼀𖽜𖾐 𖼊𖽑𖽡 𖼳𖽶 𖼖𖽺𖾑 𖼄𖽔 𖼮𖽻𖾐． 22 𖼽𖽺𖾐 𖼦𖽴 𖼦𖽫 𖼽𖽻 𖼞𖽳𖾐 𖼄𖽡𖾐 𖼊𖽻 𖼖𖽙𖾐 𖼀𖽙𖾐 𖼺𖽺𖾑，𖼽𖽻 𖼷𖽑𖽻𖾐 𖼀𖽺 𖼊𖽑𖽺 𖼰𖽡𖾑 𖼦𖽑𖽙𖾐 𖼄𖽔 𖼠𖽸𖾑，𖼞𖽪𖾐 𖼮𖽡𖽺𖾐 𖼽𖽻 𖼐𖽑𖽡𖾐 𖼈𖽳𖾐 𖼞𖽜 𖼽𖽻 𖼞𖽳𖾐 𖼷𖽑𖽻𖾐 𖼀𖽺 𖼂𖽺𖾐 𖼐𖽑𖽧𖾐 𖼺𖽳．

23 𖼀𖽦𖾐 𖼣𖽙𖾐 𖼖𖽙𖾐 𖼮𖽑𖽡𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼄𖽔 𖼮𖽑𖽡 𖼮𖽡𖽺𖾐 𖼊𖽑𖽡𖾑 𖼣𖽻𖾐，𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡𖽺 𖼂𖽚𖾐 𖼳𖽶 𖼣𖽻𖾐，𖼣𖽙𖾐 𖼦𖽑𖽺𖾑 𖼳𖽶 𖼄𖽡𖽻 𖼄𖽔 𖼂𖽺𖾐 𖼊𖽻𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼖𖽡 𖼮𖽨𖾐 𖼹𖽳𖾐 𖼐𖽺𖾐 𖼮𖽨𖾐 𖼄𖽙𖾐 𖼰𖽶𖾐 𖼄𖽪𖾑 𖼊𖽻𖾐． 24 𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐，𖼐𖽑𖽧𖾐 𖼨𖽡𖽳 𖼐𖽑𖽧𖾐 𖼻𖽺𖾐 𖼄𖽙𖾐 𖼽𖽻 𖼊𖽑𖽺 𖼮𖽻𖾑 𖼊𖽴 𖼖𖽡𖾐，𖼞𖽪𖾐 𖼮𖽡𖽺𖾐 𖼽𖽻 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼄𖽡𖽻 𖼈𖽳 𖼞𖽑𖽙𖾐 𖼂𖽺𖾐 𖼠𖽚 𖼺𖽪𖾐 𖼐𖽑𖽡𖾐 𖼈𖽳𖾐 𖼐𖽦𖾐 𖼄𖽡𖽻𖾐 𖼦𖽑𖽻𖾐． 25 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼈𖽳𖾐 𖼄𖽔 𖼐𖽙 𖼊𖽶𖾐 𖼄𖽡𖽻 𖼂𖽺𖾐 𖼊𖽡𖾑𖽑 𖼣𖽻𖾐，𖼐𖽑𖽡𖾐 𖼈𖽳𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼊𖽑𖽡 𖼊𖽑𖽜 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐．