𖼺𖽻 𖼖𖽚 𖼊𖽑𖽺 𖼳𖽡𖽻𖾐 𖼷𖽑𖽳𖾐 𖼐𖽡𖾑𖽑 𖼦𖽜 𖼈𖽪𖾐 𖼍𖽦 𖼂𖽺𖾐
10
1 𖼺𖽔 𖼄𖽪 𖽃𖽳 𖼳𖽡𖽻𖾐 𖼷𖽑𖽳𖾐 𖼊𖽑𖽡 𖼀𖽡𖽳𖾐 𖼈𖽺𖾐，𖼐𖽡𖾑𖽑 𖼺𖽻 𖼖𖽚 𖼈𖽪𖾑 𖼊𖽡𖾐 𖼊𖽑𖽺 𖼦𖽜，𖼹𖽦𖾑 𖼽𖽻 𖼖𖽙𖾐 𖼮𖽑𖽻𖾐 𖼮𖽑𖽻 𖼄𖽦𖾐 𖼹𖽮𖾑，𖼀𖽦𖾐：“𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼊𖽑𖽺 𖼳𖽡𖽻𖾐 𖼷𖽑𖽳𖾐 𖼐𖽡𖾑𖽑 𖼦𖽜 𖼺𖽺𖾑，𖼐𖽑𖽡𖾐 𖼞𖽜 𖼽𖽻 𖼷𖽑𖽻𖾐 𖼀𖽺 𖼞𖽳𖾐 𖼈𖽪𖾐 𖼍𖽦 𖼂𖽺𖾐 𖼄𖽔 𖼣𖽻𖾐 𖼖𖽔？ 2 𖽃𖽔𖾑 𖼄𖽳𖾐 𖼐𖽑𖽡𖾐 𖼣𖽙𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼮𖽑𖽻𖾐 𖼊𖽚𖾐 𖼽𖽡𖾐 𖼠𖽙𖾑 𖼍𖽻𖾐，𖼐𖽑𖽡𖾐 𖼽𖽡𖾐 𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼮𖽻𖾐 𖼞𖽳𖾐 𖼳𖽡𖽺𖾑 𖼺𖽔 𖼄𖽡𖾐 𖼊𖽺𖾐，𖼖𖽔𖾐 𖼰𖽡𖽦 𖼖𖽧 𖼀𖽳𖾐 𖼀𖽙 𖼮𖽑𖽶𖾐 𖼞𖽑𖽶𖾑 𖼠𖽻𖾐，𖼷𖽑𖽻𖾐 𖼐𖽑𖽡 𖼽𖽚𖾐 𖼖𖽙𖾐 𖼷𖽶𖾐 𖼄𖽳𖾐 𖼊𖽻𖾐．𖼽𖽻 𖼈𖽳𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼊𖽻𖾐：‘𖼐𖽑𖽡𖾐 𖼞𖽑𖽙𖾐 𖼰𖽙𖾐 𖼺𖽪𖾐 𖼊𖽑𖽳 𖼖𖽳𖾐 𖼄𖽪 𖼄𖽙𖾐 𖼞𖽑𖽶𖾑 𖼹𖽻𖾐 𖼰𖽙𖾐 𖽂𖽙𖾐 𖼦𖽑𖽻𖾐，𖼐𖽑𖽡𖽻𖾐 𖼀𖽙 𖽃𖽔𖾑 𖼄𖽳𖾐 𖼊𖽑𖽳 𖼖𖽳𖾐 𖼄𖽪 𖼄𖽙𖾐 𖼖𖽙𖾐 𖼀𖽙𖾐 𖼄𖽔 𖼠𖽻𖾐 𖼄𖽺，𖼞𖽚 𖼀𖽑𖽚𖾐 𖼐𖽑𖽡𖾐 𖼖𖽙𖾐 𖼀𖽙𖾐 𖼠𖽻𖾐 𖼄𖽺 𖼺𖽺𖾑，𖽃𖽔 𖼊𖽺𖾐 𖼂𖽺𖾐 𖼖𖽡𖾐 𖼄𖽔 𖼺𖽝𖾑，𖼽𖽻 𖼐𖽑𖽡𖾐 𖼠𖽙𖾑 𖼍𖽻𖾐 𖼰𖽙𖾐 𖼊𖽻𖾐．’3 𖼐𖽑𖽡𖾐 𖼞𖽑𖽶𖾑 𖼠𖽻𖾐 𖼮𖽑𖽻𖾐 𖼺𖽜 𖽃𖽙𖾑 𖼄𖽺 𖼽𖽡𖾐，𖼊𖽑𖽔𖾐 𖼂𖽚 𖼄𖽡𖾐 𖼊𖽺𖾐 𖼺𖽧𖾐 𖼈𖽳 𖼷𖽶𖾐 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼂𖽚 𖼊𖽑𖽴𖾑 𖼖𖽡𖾑 𖼖𖽪𖾐 𖼞𖽳𖾐 𖼊𖽦𖾐 𖼽𖽡𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼍𖽡𖾐 𖼊𖽑𖽴 𖼺𖽪𖾐 𖼷𖽑𖽻𖾐 𖼺𖽙𖾐 𖼽𖽚𖾐 𖼖𖽙𖾐 𖼷𖽶𖾐 𖼄𖽳𖾐 𖼊𖽻𖾐，𖼽𖽻 𖼈𖽳𖾐 𖼠𖽻𖾐 𖼊𖽑𖽺 𖼊𖽑𖽡 𖼽𖽚𖾐 𖽃𖽔𖾑 𖼮𖽑𖽸 𖼻𖽙 𖼺𖽙𖾐 𖼊𖽝𖾐 𖼺𖽶𖾐，𖼊𖽑𖽡 𖼽𖽚𖾐 𖽃𖽔𖾑 𖼂𖽻𖾐 𖼺𖽙𖾐 𖼖𖽜 𖼀𖽶，𖼊𖽑𖽡 𖼽𖽚𖾐 𖼮𖽶𖾐 𖼀𖽳 𖼊𖽑𖽡 𖼖𖽧𖾑 𖼀𖽶 𖼍𖽳𖾐． 4 𖼽𖽻 𖼈𖽳𖾐 𖼐𖽑𖽡𖾐 𖼊𖽑𖽺 𖼺𖽙𖾑 𖼺𖽙𖾐 𖼮𖽻𖾐 𖼮𖽻𖾐 𖼊𖽻 𖼐𖽙𖾐，𖼦𖽑𖽔𖾐 𖼖𖽺𖾑 𖽃𖽔𖾑 𖼂𖽻𖾐 𖼐𖽑𖽡 𖼊𖽝𖾐 𖼈𖽺𖾐 𖼐𖽑𖽡𖾐 𖼊𖽑𖽺 𖼞𖽜 𖼊𖽻𖾐，𖼐𖽑𖽡𖾐 𖼽𖽻 𖼈𖽳𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖽃𖽔𖾑 𖼂𖽻𖾐 𖼷𖽶𖾐 𖼂𖽻𖾐 𖼖𖽻𖾐 𖼖𖽡𖾐．
5 𖼠𖽙𖾑 𖼍𖽻𖾐，𖼐𖽑𖽡𖾐 𖼰𖽡𖾐 𖼂𖽡 𖼽𖽕𖾑 𖼄𖽡𖾐 𖼊𖽺𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖽂𖽙 𖼷𖽪𖾐 𖼖𖽪𖾐 𖼊𖽑𖽺 𖼊𖽦𖾐 𖼽𖽡𖾐，𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼄𖽦 𖼀𖽑𖽙 𖼞𖽑𖽶𖾑 𖼠𖽻𖾐 𖼮𖽻𖾐 𖼍𖽳𖾐．𖼐𖽑𖽡𖾐 𖼖𖽪𖾐 𖼞𖽳𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼺𖽡𖾐 𖼻𖽙 𖼊𖽑𖽡 𖼷𖽪𖾐 𖼖𖽙𖾐 𖼷𖽶𖾐 𖼄𖽳𖾐 𖼊𖽻𖾐，𖼽𖽻 𖼈𖽳𖾐 𖽂𖽙 𖼰𖽡𖽺𖾐 𖼊𖽑𖽺 𖼄𖽡𖾐 𖼺𖽡𖾐 𖼷𖽻𖾐 𖼞𖽳𖾐 𖼮𖽑𖽻𖾐 𖼹𖽺𖾐 𖼖𖽻𖾐，𖼽𖽻 𖼈𖽳𖾐 𖼠𖽪、𖼊𖽑𖽡𖾐 𖼖𖽪𖾐、𖼍𖽡𖾑 𖼖𖽪𖾐 𖼐𖽺𖾐 𖼮𖽑𖽧 𖼈𖽺𖾐 𖼍𖽳𖾐，𖼄𖽳𖾑 𖼄𖽳 𖼊𖽑𖽺 𖼳𖽨𖾐 𖼮𖽢𖾑𖽑 𖼞𖽕 𖼍𖽪𖾐 𖼺𖽺𖾑 𖼊𖽻 𖼊𖽑𖽜𖾐． 6 𖼽𖽺𖾐 𖼦𖽴 𖼦𖽫 𖼞𖽳𖾐 𖼳𖽨𖾐 𖼦𖽑𖽔𖾐 𖼮𖽶𖾐 𖼐𖽑𖽡𖾐 𖼊𖽑𖽺 𖼞𖽕 𖼍𖽪𖾐 𖼺𖽺𖾑，𖼐𖽑𖽡𖾐 𖼖𖽺𖾑 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜𖾐 𖼊𖽻 𖼊𖽑𖽜𖾐 𖼊𖽻𖾐，𖼐𖽑𖽡𖾐 𖼠𖽳𖾐 𖼖𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽙𖾐 𖼺𖽶𖾑 𖼀𖽑𖽢 𖼊𖽻𖾐．
7 𖼐𖽑𖽡𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼷𖽶𖾐 𖼄𖽳𖾐 𖼞𖽑𖽶𖾑 𖼮𖽶𖾐，𖼐𖽕 𖼊𖽺𖾐 𖼇𖽺𖾐 𖼖𖽡𖾑 𖼳𖽸𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼊𖽝 𖼽𖽡𖾐 𖼖𖽡𖾐，𖼞𖽪𖾐 𖼮𖽡𖽺𖾐 𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼊𖽻𖾐．
8 𖼐𖽑𖽡𖾐 𖼣𖽙𖾐 𖽃𖽙𖾑 𖼄𖽺 𖼰𖽧 𖼰𖽡𖽕 𖼄𖽡𖾐 𖼊𖽺𖾐 𖼹𖽺𖾐 𖼽𖽡𖾐 𖼖𖽡𖾐，𖼣𖽙𖾐 𖼖𖽺𖾑 𖼞𖽑𖽶𖾑 𖼠𖽻𖾐 𖼽𖽡𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼐𖽺𖾐 𖼺𖽙𖾑 𖼺𖽙𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼊𖽻𖾐，𖼐𖽑𖽡𖾐 𖼞𖽑𖽶𖾑 𖼠𖽻𖾐 𖼳𖽶 𖼐𖽑𖽡𖾐 𖼳𖽡𖽻𖾐 𖼺𖽺𖾑，𖼣𖽙𖾐 𖼖𖽻𖾐 𖼰𖽶𖾐 𖼮𖽑𖽡𖾐 𖼖𖽡𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖽃𖽔 𖼊𖽺𖾐 𖼂𖽺𖾐 𖼖𖽡𖾐 𖼄𖽪𖾑 𖼊𖽻𖾐．”
𖼺𖽻 𖼖𖽚 𖼞𖽕 𖼍𖽪𖾐 𖼊𖽻 𖼊𖽑𖽜𖾐
9 𖼺𖽻 𖼖𖽚𖾐 𖼺𖽔 𖼄𖽪𖾐 𖽃𖽳 𖼊𖽑𖽺 𖼰𖽡𖾑 𖼦𖽑𖽙𖾐 𖼞𖽑𖽶𖾑 𖼮𖽶𖾐，𖽂𖽙 𖼺𖽙𖾐 𖼂𖽙𖾐 𖼽𖽻 𖼞𖽜 𖼷𖽑𖽻𖾐 𖼳𖽸 𖼊𖽑𖽡 𖼽𖽚𖾐 𖼀𖽑𖽢，𖼐𖽑𖽧𖾐 𖼄𖽙𖾐 𖼳𖽸𖾑 𖼳𖽸 𖼊𖽑𖽡 𖼊𖽝𖾐 𖼖𖽪 𖼽𖽻 𖼞𖽜，𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼄𖽡𖽻 𖼦𖽑𖽺𖾑 𖼹𖽻𖾐 𖼄𖽳𖾑 𖼄𖽳 𖼀𖽑𖽢 𖼦𖽑𖽻𖾐． 10 𖼺𖽻 𖼖𖽚 𖼰𖽡𖾐 𖼂𖽡 𖼽𖽕𖾑 𖼄𖽡𖾐 𖼊𖽺𖾐 𖼮𖽑𖽡𖾐 𖼞𖽑𖽶𖾑 𖼮𖽶𖾐，𖼺𖽡𖾐 𖼻𖽙 𖼊𖽑𖽡 𖼷𖽪𖾐 𖼖𖽙𖾐 𖼷𖽶𖾐 𖼄𖽳𖾐，𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼳𖽨𖾐 𖼦𖽑𖽔𖾐 𖼮𖽶𖾐 𖼽𖽻 𖼊𖽑𖽺 𖼞𖽕 𖼍𖽪𖾐，𖼽𖽻 𖼺𖽡𖾐 𖼻𖽙 𖼖𖽙𖾐 𖼮𖽑𖽻𖾐 𖼞𖽕 𖼍𖽪𖾐 𖽂𖽙𖾐 𖼊𖽻 𖼊𖽑𖽜𖾐． 11 𖽃𖽙𖾑 𖼄𖽺 𖼊𖽑𖽙 𖼺𖽻 𖼖𖽚 𖼊𖽑𖽺 𖼺𖽝𖾑 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼐𖽦𖾐 𖼄𖽡𖽻𖾐，𖼽𖽻 𖼖𖽺𖾑 𖼺𖽡𖾐 𖼻𖽙 𖼖𖽙𖾐 𖼮𖽑𖽻𖾐 𖼞𖽕 𖼍𖽪𖾐 𖽂𖽙𖾐 𖼊𖽻 𖼊𖽑𖽜𖾐，𖽃𖽔𖾐 𖼺𖽺𖾑 𖼷𖽙𖾐 𖼖𖽙𖾐 𖼮𖽑𖽻𖾐 𖼀𖽦𖾐：“𖼰𖽡𖾐 𖼳𖽸𖾑 𖼞𖽳𖾐 𖼻𖽙 𖽃𖽔 𖼊𖽺𖾑 𖼳𖽶 𖼄𖽡𖽻 𖼷𖽶𖾐 𖼄𖽳𖾐？ 𖼺𖽻 𖼖𖽚 𖼖𖽺𖾑 𖼺𖽡𖾐 𖼻𖽙 𖼊𖽑𖽡 𖼽𖽚𖾐 𖼣𖽻𖾐 𖼖𖽔𖾑？”
12 𖼞𖽑𖽶𖾑 𖼄𖽡𖾐 𖼊𖽺𖾐 𖼞𖽳𖾐 𖼷𖽑𖽻𖾐 𖼊𖽑𖽡 𖼽𖽚𖾐 𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖼹𖽻𖾐 𖼞𖽳𖾐 𖽃𖽔 𖼀𖽙 𖼞𖽑𖽶𖾑 𖽃𖽔 𖼺𖽺 𖼣𖽻𖾐 𖼐𖽺𖾑？” 𖼦𖽑𖽺𖾑 𖼠𖽙𖾑 𖼍𖽻𖾐 𖼊𖽻 𖼂𖽪𖾑 𖼊𖽻 𖼮𖽑𖽡𖽻 𖼮𖽻𖾐，𖼀𖽦𖾐：“𖼺𖽻 𖼖𖽚 𖼖𖽺𖾑 𖼺𖽡𖾐 𖼻𖽙 𖼠𖽻𖾐 𖼊𖽑𖽺 𖼊𖽑𖽡 𖼽𖽚𖾐 𖼣𖽻𖾐 𖼖𖽔𖾑？”
13 𖼺𖽻 𖼖𖽚 𖼞𖽕 𖼍𖽪𖾐 𖽂𖽙𖾐 𖼊𖽻 𖼊𖽑𖽜𖾐 𖼦𖽑𖽻𖾐 𖼠𖽙𖾑 𖼍𖽻𖾐，𖽂𖽙 𖼰𖽡𖽺𖾐 𖼊𖽑𖽺 𖼄𖽡𖾐 𖼺𖽡𖾐 𖼷𖽻𖾐 𖼞𖽳𖾐 𖼊𖽦𖾐 𖼽𖽡𖾐． 14 𖼺𖽻 𖼖𖽚 𖼞𖽳𖾐 𖽃𖽔𖾐 𖼊𖽺𖾐 𖼞𖽑𖽻𖾑 𖼺𖽻 𖼖𖽚 𖼐𖽺𖾐 𖼽𖽻 𖼞𖽳𖾐 𖼮𖽜𖾐 𖼀𖽑𖽙 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾑 𖼠𖽻𖾐 𖼽𖽡𖾐 𖼦𖽑𖽙𖾐 𖼐𖽺𖾑？”
𖼽𖽻 𖼊𖽻 𖼞𖽑𖽚：“𖼊𖽑𖽳 𖼖𖽳𖾐 𖼄𖽪 𖼰𖽙𖾐 𖼽𖽡𖾐，𖼰𖽙𖾐 𖼄𖽔 𖽂𖽙𖾐 𖼺𖽺𖾑 𖼽𖽡𖾐 𖼺𖽔 𖼄𖽪 𖽃𖽳 𖼖𖽙𖾐 𖼄𖽡𖽻𖾐 𖼽𖽡𖾐．”
15 𖼺𖽻 𖼖𖽚 𖼞𖽳𖾐 𖽃𖽔𖾐 𖼊𖽺𖾐 𖼀𖽦𖾐：“𖼺𖽔 𖼄𖽪 𖽃𖽳 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼊𖽑𖽜𖾐 𖼺𖽪𖾐 𖼀𖽦𖾐 𖼣𖽙𖾐 𖼖𖽙𖾐 𖼰𖽨𖾐 𖼖𖽡𖾐．”
16 𖼺𖽻 𖼖𖽚 𖼽𖽻 𖽃𖽔𖾐 𖼊𖽺𖾐 𖼊𖽑𖽺 𖼊𖽻 𖼞𖽑𖽚：“𖼽𖽻 𖼄𖽡𖾐 𖼀𖽻𖾐 𖼀𖽦𖾐 𖼣𖽙𖾐 𖼈𖽳𖾐 𖼖𖽙𖾐 𖼊𖽑𖽧，𖼊𖽑𖽳 𖼖𖽳𖾐 𖼄𖽪 𖼰𖽙𖾐 𖽂𖽙𖾐 𖼦𖽑𖽻𖾐．” 𖼦𖽑𖽻𖾐 𖼊𖽑𖽻𖾐，𖼺𖽔 𖼄𖽪 𖽃𖽳 𖼀𖽦𖾐 𖼺𖽪𖾐 𖼽𖽻 𖼞𖽜 𖼈𖽪𖾐 𖼍𖽦 𖼂𖽺𖾐 𖼞𖽳𖾐 𖼄𖽡𖽻，𖼺𖽻 𖼖𖽚 𖼄𖽔 𖼀𖽦𖾐 𖼽𖽻 𖽃𖽔𖾐 𖼊𖽺𖾐 𖼊𖽑𖽺 𖼰𖽨𖾐．
𖼷𖽑𖽺𖾐 𖼞𖽻𖾐 𖼺𖽻 𖼖𖽚 𖼞𖽜 𖼈𖽪𖾐 𖼍𖽦 𖼂𖽺𖾐
17 𖼺𖽔 𖼄𖽪 𖽃𖽳 𖼷𖽑𖽻𖾐 𖼀𖽺 𖼊𖽑𖽺 𖽃𖽶𖾐 𖼄𖽡 𖼺𖽶𖾐 𖼂𖽔𖾐 𖼄𖽡𖾐 𖼊𖽺𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼻𖽶𖾑 𖼖𖽻𖾐． 18 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘𖼣𖽙𖾐 𖼐𖽑𖽡𖾐 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼦𖽳 𖼊𖽚𖾐 𖼖𖽻𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽦 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐，𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽑𖽡𖾐 𖼻𖽸 𖼺𖽪𖾐 𖼞𖽑𖽙𖾐 𖼣𖽻𖾐 𖼠𖽚 𖼞𖽳𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐．’ 19 𖽂𖽙 𖼺𖽙𖾐 𖼂𖽙𖾐 𖼈𖽡𖾑 𖼞𖽑𖽙 𖼐𖽺𖾐 𖼠𖽻𖾐 𖼰𖽡𖽳𖾐 𖼞𖽑𖽶𖾐 𖼮𖽑𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼰𖽨𖾑 𖼊𖽑𖽧 𖼖𖽻𖾐，𖼦𖽑𖽻𖾐 𖼊𖽑𖽻𖾐 𖼐𖽑𖽡𖾐 𖼈𖽳𖾐 𖽃𖽙𖾑 𖼐𖽑𖽡𖾐 𖼽𖽻 𖼊𖽑𖽺 𖼰𖽡𖾑 𖼦𖽑𖽙𖾐，𖼦𖽑𖽔𖾐 𖼖𖽺𖾑 𖼀𖽦𖾐：‘𖼣𖽙𖾐 𖼈𖽳𖾐 𖼖𖽙𖾐 𖼀𖽙𖾐 𖼈𖽪𖾐 𖼍𖽦 𖼊𖽑𖽡 𖼽𖽚𖾐 𖼊𖽴𖾐 𖼺𖽺𖾑，𖼣𖽙𖾐 𖼈𖽳𖾐 𖼊𖽑𖽺 𖼠𖽕 𖼖𖽡𖾐．’ 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼮𖽑𖽪𖾐 𖼳𖽶 𖼐𖽺𖾐 𖼈𖽴 𖼮𖽑𖽪𖾐 𖼖𖽙𖾐 𖼮𖽑𖽻𖾐，𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽡𖽚 𖼖𖽡𖾐．”
20 𖼺𖽔 𖼄𖽪 𖽃𖽳 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽜 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐 𖼷𖽑𖽺𖾐 𖼞𖽻𖾐 𖼺𖽺𖾑，𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼞𖽻𖾐 𖽂𖽙𖾐； 21 𖼹𖽦𖾑 𖼂𖽡𖽦𖾑 𖼽𖽔 𖼄𖽡𖽺 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽜 𖼈𖽴 𖼮𖽑𖽪𖾐 𖼖𖽙𖾐 𖼮𖽑𖽻𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐 𖼷𖽑𖽺𖾐 𖼞𖽻𖾐 𖼺𖽺𖾑，𖼄𖽔 𖼊𖽑𖽴𖾑 𖼖𖽡𖾑 𖼈𖽴 𖼮𖽑𖽪𖾐 𖼊𖽑𖽺 𖼞𖽻𖾐 𖽂𖽙𖾐；𖼹𖽦𖾑 𖼷𖽑𖽺𖾐 𖼞𖽻𖾐 𖼺𖽺𖾑 𖼰𖽡𖾐 𖼳𖽸𖾑 𖼞𖽳𖾐 𖼻𖽙 𖼺𖽻 𖼖𖽚 𖼊𖽑𖽺 𖼞𖽻𖾐 𖽂𖽙𖾐．𖼷𖽑𖽻𖾐 𖼷𖽪𖾐 𖼽𖽻 𖼊𖽑𖽺 𖼰𖽙𖾐，𖼽𖽻 𖼊𖽑𖽺 𖼰𖽙𖾐 𖼄𖽔 𖽂𖽙𖾐． 22 𖼽𖽻 𖼈𖽳𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼊𖽻 𖼐𖽙𖾐：“𖼷𖽑𖽻𖾐 𖼞𖽑𖽶𖾑 𖼽𖽚𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼖𖽻𖾐？”
𖼽𖽺𖾐 𖼦𖽴 𖼦𖽫 𖼀𖽦𖾐：“𖼽𖽻 𖼮𖽡𖽪 𖼺𖽺𖾑 𖼄𖽡𖽻 𖼐𖽑𖽡 𖼂𖽜𖾐 𖼠𖽻𖾐 𖼊𖽑𖽺 𖼈𖽶 𖼍𖽳𖾐．” 23 𖼽𖽻 𖼈𖽳𖾐 𖼰𖽡𖽴 𖼂𖽡𖾐 𖼽𖽡𖾐 𖼺𖽻 𖼖𖽚 𖼊𖽑𖽺 𖼦𖽳 𖼊𖽚𖾐 𖼖𖽻𖾐，𖼽𖽻 𖼷𖽑𖽻𖾐 𖼷𖽪𖾐 𖼠𖽻𖾐 𖼊𖽑𖽺 𖼦𖽑𖽡𖽚 𖼞𖽑𖽶𖾑 𖼮𖽶𖾐，𖼄𖽶𖾐 𖼞𖽳𖾐 𖼈𖽪𖾑 𖼊𖽡𖾐 𖼊𖽑𖽡 𖼊𖽝𖾐 𖼺𖽙𖾐 𖼊𖽑𖽺 𖼠𖽳𖾐．
24 𖼺𖽔 𖼄𖽪 𖽃𖽳 𖼷𖽑𖽻𖾐 𖼷𖽪𖾐 𖼖𖽙𖾐 𖼀𖽦𖾐：“𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼺𖽺𖾐 𖼺𖽪𖾐 𖼷𖽑𖽻𖾐 𖼐𖽑𖽡𖾐 𖼈𖽳𖾐 𖼐𖽦𖾐 𖼄𖽡𖽻𖾐 𖼄𖽡𖽻𖾐？ 𖼷𖽑𖽻𖾐 𖼷𖽪𖾐 𖼠𖽻𖾐 𖼊𖽑𖽺 𖼽𖽻 𖼖𖽙𖾐 𖼄𖽳𖾐 𖼊𖽙𖾐 𖼺𖽪𖾐 𖼄𖽔 𖼮𖽻𖾐．”
𖼷𖽑𖽻𖾐 𖼷𖽪𖾐 𖼄𖽳𖾑 𖼄𖽳 𖼞𖽜𖾐 𖼺𖽜𖾐 𖽃𖽶𖾐 𖼮𖽸 𖼍𖽪𖾐 𖼖𖽻𖾐，𖼀𖽦𖾐：“𖼈𖽪𖾐 𖼍𖽦 𖼞𖽜 𖼻𖽳𖾐 𖼻𖽳𖾐 𖽂𖽙𖾐 𖼮𖽻𖾐 𖼖𖽡𖾐．” 25 𖼈𖽪𖾐 𖼍𖽦 𖼞𖽳𖾐 𖼷𖽶 𖼊𖽺𖾐 𖼐𖽺𖾐 𖼳𖽪𖾐 𖼮𖽨𖾐，𖼺𖽔 𖼄𖽪 𖽃𖽳 𖼀𖽦𖾐 𖼷𖽑𖽻𖾐 𖼀𖽺 𖼖𖽙𖾐 𖼰𖽨𖾐，𖼦𖽑𖽔𖾐 𖼖𖽺𖾑 𖼈𖽝 𖼺𖽪𖾑 𖼊𖽑𖽺 𖼍𖽦𖾐，𖼀𖽑𖽨 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑，𖼠𖽙𖾑 𖼍𖽻𖾐 𖼷𖽑𖽻𖾐 𖼀𖽺 𖼞𖽜 𖼽𖽻 𖼄𖽳𖾑 𖽃𖽔𖾑 𖼞𖽑𖽶𖾐 𖼞𖽚 𖼽𖽡𖾐 𖼦𖽑𖽙𖾐．
26 𖼺𖽻 𖼖𖽚 𖼖𖽺𖾑 𖼀𖽑𖽚𖾐 𖼰𖽡𖾐 𖼂𖽡 𖼽𖽕𖾑 𖼄𖽡𖾐 𖼊𖽺𖾐 𖼽𖽻 𖽃𖽔𖾑 𖼞𖽑𖽶𖾐 𖼞𖽚 𖼽𖽡𖾐 𖼦𖽑𖽙𖾐，𖽂𖽙 𖼐𖽑𖽡𖾐 𖼈𖽳 𖼮𖽻𖾐 𖼺𖽪𖾐 𖼊𖽑𖽡 𖼹𖽻𖾐 𖼽𖽻 𖼖𖽙𖾐 𖼮𖽑𖽻𖾐 𖼽𖽡𖾐，𖼦𖽑𖽺𖾑 𖽂𖽙 𖼺𖽙𖾐 𖼂𖽙𖾐 𖼮𖽑𖽢𖾑 𖼐𖽑𖽧𖾐 𖼄𖽙𖾐 𖼞𖽕 𖼍𖽪𖾐 𖽂𖽙𖾐 𖼺𖽪𖾐 𖼷𖽑𖽻𖾐 𖼣𖽻𖾐． 27 𖼦𖽑𖽻𖾐 𖼊𖽑𖽻𖾐，𖼷𖽑𖽻𖾐 𖼖𖽕𖾐 𖼀𖽕𖾐 𖼊𖽑𖽡 𖼹𖽻𖾐 𖼀𖽦𖾐：“𖼷𖽑𖽻𖾐 𖼦𖽑𖽺𖾑 𖼽𖽚𖾐 𖽃𖽔 𖼐𖽺𖾑 𖼊𖽑𖽺 𖼰𖽨𖾑 𖼠𖽸𖾑 𖼍𖽳𖾐 𖼖𖽔𖾑？” 𖽃𖽔𖾐 𖼺𖽺𖾑 𖼽𖽻 𖼊𖽑𖽺 𖼐𖽦𖾐 𖼄𖽔 𖼍𖽪𖾐，𖼺𖽙 𖼂𖽪𖾐 𖼄𖽡𖽻 𖼐𖽑𖽡 a 𖼖𖽺𖾑 𖼄𖽔 𖼦𖽑𖽙𖾐 𖼽𖽻 𖼊𖽑𖽺 𖼞𖽜，𖼦𖽑𖽻𖾐 𖼊𖽑𖽻𖾐 𖼺𖽻 𖼖𖽚 𖼊𖽑𖽡 𖼳𖽶 𖼖𖽺𖾑 𖼄𖽔 𖼀𖽦𖾐．