Gõõl cĩ kathĩknĩ Nyekuc
4
Ĩthõng thĩna, kĩ balna ngĩ eheccie Kiristo ẽla cĩnnĩ loota ngato wo, adiim niigia ngĩ adĩmanothicu, kĩĩ katĩ agaac ngatĩ katĩ ehecinu niigia buu, kĩ balna nẽnẽ. Nyatarka ẽyẽla hecinti ngatĩ ũtũngtewu niigia gerthetin. 2 Ẽyẽla thõõth coo, athĩ ne, ũtũngtewu niigia kaal cĩk ĩĩdĩ thinneti cuguk, ĩthõng idiimtu ngĩ ithiktu thõõth cĩ Nyekuco rũgẽta cunung vẽlẽk. 3 Ũnũũktothiwu balna niigia ngatĩ attiyyu kĩ eeta cĩk athii cĩ aga Nyekuc. Eeginnu balna niigia gẽrẽthanniok, ĩthõng owobtu thoothonniok cĩk gerthek cĩk abarritecu niigia. Adĩmannu thoothonniok cĩk ẽẽn riiriny, ĩthõng naboo, uduktowu õrrõt, ĩthõng uwuddiewu ĩbaktĩ taktak. Ĩthõng ataguththu kĩ ngaay cĩk meelĩk taktak, ĩthõng alayyu kaal cĩk aar eeta kĩĩtõ nyekucnya.4 Ĩthõng yoko, ukulliek goonogu wũk balna gõõ iriokcu kĩ agiitia jien, nyatarka ĩthĩnga iriokcu niigia kĩ ĩnõõgõ, ĩthõng ĩthĩnga adĩmannu thoothonniok cĩk gerthek, ĩthõng adaaccung nẽẽgẽ agiitia, nyatarka thoothonniok cĩkkõ. 5 Ĩthõng thĩ, ẽdẽcĩ katĩ nẽẽgẽ Nyekuc cĩ ereyyi ngatĩ ẽtẽẽdĩ thõõth cĩ eet cĩk arũgĩ, kĩ cĩk adaaitõ. 6 Nyatarka thõõth coo, irionothĩk balna Nyemut cĩ Abũnna eet cĩk adaaitõ, kĩĩ katĩ ma ngĩ woccia, etedothĩk ĩnõõgõ thõõth, nyatarka thõõth cĩ adĩman nẽẽgẽ ẽẽ, ĩthõng thĩ, abaaitõ ririwanĩnẽ cĩgĩk kĩ Nyekuc.
7 Õbõwẽ ditianẽtĩ cĩ loocu. Ĩthõng thĩna, ummuit thõõth jurrung, ĩthõng uthuutti eleeti cuguk jurrung, kĩĩ katĩ alayyiõy jurrung. 8 Thõõtha cĩ tiiri vẽlẽk, ĩmĩnantõy niigia õrrõt, nyatarka ũũny mĩnanĩ gerthetin cobbi õrrõt. 9 Anycĩk lemnyiok cĩk avvu korookjiowẽy cuguk ngĩtĩ kĩnyawu, kĩ gii cĩ adaĩ, ĩthõng nyĩ acũdũrothicu ĩnõõgõ thinnetinẽy cuguk.
10 Anycĩk eet codoi codoi kiticantõõĩ gõõ anyinit, cĩ balna aanyĩk Nyekuci ĩnõõgõ keelli gõõnõgĩ. Iticantõõĩ bũnnathĩt cĩ Nyekuco, cĩ obbi õrrõt gõõla cĩ abũnna. 11 Mĩ ayai anyinit cĩ õthõõthẽ, duwak eet thõõth cĩ Nyekuco. Mĩ ayai anyinit cĩ ẽẽlẽ eet, ticcan thẽk noko tiirthẽta wũ balna anyi Nyekuci. Adiim woccia ngĩ aticannu kaal vẽlẽk gõõla cĩ woccia ayahacu Nyekuc bulẽnĩt, nyatarka Yesu Kiristo cĩ abulie, ĩthõng ĩthĩ tiir erkinya kĩ erkinya. Amẽn.
Hecinit cĩ keeginnie lemnyiok
12 Niigia lemnyiowa, nyĩ akulecu jien, kõdẽ nyĩ abarrittu katĩ ngĩ atĩmaninu gõõla cĩ gerthe, kaavu kĩcĩ atdukwuacung gii cĩ athii cĩ agayyu. 13 Ĩthõng thĩ, ebelbelit ngatĩ ehecinu kĩ balna ngĩ eheccie Kiristo, kĩĩ katĩ umuddia woccia talinit cĩ obbi, katĩ ngĩ õbõda nẽ bulẽnta cĩnnĩ.
14 Ma da ngĩ adaaccung eeta, nyatarka eeginnu niigia lemnyiok cĩk Kiristo, agatantewu niigia, nyatarka aavĩ bulẽnĩtĩ cĩ Ririwac cĩ Nyekuco ĩcunung. 15 Mĩ ehecinu niigia, athii woccia cĩ ehecinu, nyatarka arukcu eeta, kõdẽ nyatarka gõr, kõdẽ ĩkõthanu thoothonniok cĩk gerthek, kõdẽ atdukothicu thoothonniok cĩk eet õõgĩ. 16 Ĩthõng thĩ, athii cĩ ẽẽn ngawani katĩ ngĩ ehecinu niigia, nyatarka eeginnu Kirithtianẽta.a Ĩdĩhĩthĩt Nyekuc, nyatarka eeginnu niigia eet cĩk Kiristo. 17 Nyatarka ĩĩthĩ itin cĩ ẽtẽẽdĩ Nyekuci thoothonniok cĩk eet cĩgĩnĩk. Mĩ ẽtẽrẽhanĩ ĩcĩnac, õgõõn kẽnnẽ woccia katĩ kĩ eet cĩk abũrĩ Nyemut cĩnnĩ cĩ Abũnna wo kuu? 18 Eheeddi Nyaragawa ĩcĩ Nyekuco athĩ ne,
“Ngĩ õkõmĩ ĩcĩ eet cĩk abũnna ngatĩ elianẽ,
õgõõn woccia kẽnnẽ katĩ eetĩnẽy
ĩcĩk athii cĩ ongollie Nyekuc kĩ gẽrẽthanniok kuu?”b
19 Ĩthõng thĩna, mĩ ehecinu niigia gõõla cĩ anyi Nyekuc kẽbẽlbẽl, ĩdĩmanit thoothonniok cĩk mũrrĩk noko, ĩthõng aryik thinneti cuguk Nyekuc Tengenyioit cunung, nyatarka athii katĩ nẽ cĩ anyung agiitia utduktiay.