Ngaay kĩ maacua
3
Ĩthõng thĩ, niigia ngaay cĩk eetu, adiim thẽk ngĩ athĩknu thoothonniok cĩk maacua cuguk, kõdẽ woyyia ngĩ abũrĩ nẽẽgẽ thõõth cĩ Nyekuco, anyiccu woccia katĩ niigia ĩnõõgõ kivitia kĩĩtõ lemnyiok gõõla cĩ adĩmanu thoothonniok cĩk abũnna, 2 nyatarka acĩn katĩ nẽẽgẽ gõõl cĩ adihiththu niigia Nyekuc, ĩthõng aavuttu gõõla cĩ edeemothi. 3 Nyatarka athii woccia cĩ ẽẽn ĩm cuguk cĩk atĩĩthĩ wo cĩk anyung ĩdĩhĩmtĩ, kõdẽ ngatĩ ahimittu lĩbẽn cĩk rianiak cĩk ẽẽn daab, kõdẽ ceremua cĩk uutiay nyarobinyay ĩcĩk meelĩk cĩk anyung ĩdĩhĩmtĩ. 4 Ĩthõng thĩ, anycĩk dihimitin cĩ aku thinnetinẽy cuguk kaanyung agiit aavut jurrung, ĩthõng iittu thimattiak. Ẽẽn coo dihimitin cĩ aavĩ kuumuc, cĩ atarnanĩ Nyekuci õrrõt. 5 Gõõl coo balna gõõ cĩ aatẽ ngaay cĩk ala Nyekuc, ĩthõng aryik thinneti cĩgĩk ĩcĩnnĩ, anyi balna nẽẽgẽ eleeti cĩgĩk kĩdĩhĩmtẽ. Ẽlẽmĩ nẽẽgẽ Nyekuc, ĩthõng ĩthĩhĩt maacua cĩgĩk. 6 Athĩrar balna Thaaraa Abraham,b ĩthõng ũtũvvũ ĩnõõnõ ennek ne, makayyioit cĩnnĩ. Eeginnu niigia dõõlĩ cĩgĩnĩk dĩdĩ, katĩ ngĩ adĩmannu thõõth cĩ edeemothi, ĩthõng athii cĩ ongolinu thõõth ĩmma.7 Ĩthõng niigia maacuana gõõla cĩ aduwõy thõng, ũrũmtẽ kĩ ngaay cuguk jurrung, otongollie ĩnõõgõ kĩ goonogu cĩk athii cĩ tiirti kaavutõ kĩ niigia, kĩcĩ othollu anyinit cĩ rũgẽt cĩ jõr, ĩdĩmanit ĩnõõgõ jurrung, kĩĩ katĩ kithii gii cĩ woccia alaam lawintiok cuguk tõ.
Hecinit, nyatarka thõõth cĩ abũnna
8 Turnanta, aavut niigia vẽlẽk kõdõwẽ jurrung, ĩĩtõ thimattiak, ĩthõng atamattik goonogu buu, ĩmĩnanit gotoonogu kĩ ngoonogu, ĩthõng nyĩ engerennu. 9 Nyĩ ĩcaacanu thoothonniok cĩk gerthek thoothiowẽy ĩcĩk gerthek, kõdẽ nyĩ adaaccu goonogu cĩk adaaccung agiitia. Ĩthõng thĩ, kẽnnẽ agatanit eet cĩk adaaccung thõng, nyatarka ũtũvvũwawung balna Nyekuci agiit ĩdĩmanit thoothonniok cĩkkõ, kĩĩ katĩ woccia aragĩthĩt niigia gatan cĩnnĩ. 10 Nyatarka aduwa Nyaraga cĩ Nyekuco athĩ ne,
“Ma woccia ngĩ amĩnan eeti rũgẽt,
ĩthõng ĩcĩn wathinniok cĩk meelĩk,
adiim thẽk nẽ ngĩ athũnnĩ ahaat cĩnnĩ gerthetina,
ĩthõng athii nẽ, cĩ õthõõth thoothonniok cĩk ẽẽn võlõng.
11 Ũtũngek thẽk nẽ thoothonniok cĩk gerthek,
ĩthõng itican kaal cĩk abũnna. Idiim nẽ ganõn,
ĩthõng ũthũũtĩ ganõn jurrung.
12 Ẽbẽk kẽbẽrẽ cĩk Makayyioktak eet cĩk abũnna,
ĩthõng athĩrar kĩĩna cĩgĩnnẽk lawinit cĩnĩng,
ĩthõng thĩ, abũrĩ nguum cĩ Makayyiokto
eet cĩk gerthek.”c
13 Ngẽnẽ cĩ woccia adĩmannung agiit buth katĩ ngĩ abarritecu ngatĩ adĩmannu thõõth cĩ abũnna? 14 Ĩthõng thĩ, ngĩ woccia mĩ ehecinu niigia, nyatarka adĩmannu thõõth cĩ abũnna, agatannung katĩ Nyekuci. “Nyĩ omothinu, kõdẽ nyĩ ongolinu thoothonniok cĩk woccia adĩmanecung nẽẽgẽ agiitia.”d 15 Ĩthõng thĩ, otongollie Kiristo kĩĩ Makayyioit thinnetinẽy cuguk. Ma ngĩ ajinnung eeti ĩmma thõõth cĩ muwẽẽnĩt cunung cĩ abũnna ĩcĩ Kiristo, ĩdĩmantothĩk dõõkĩthĩ, kĩĩ katĩ edecit, ĩthõng thĩ, ĩdĩmanit thõõth coo thimatĩtha kĩ ngatĩ ongolinu ĩnõõnõ. 16 Edecit ĩnõõgõ thinnetinẽy cĩk alalĩ, ĩthõng anycĩk muwẽẽnĩt cĩ thinneti cuguk kĩĩ callẽ. Mĩ othoothung eeta buth, agam katĩ ĩnõõgõ ngawani katĩ ngĩ acĩn rũgẽt cunung cĩ abũnna, nyatarka eeginnu niigia eet cĩk Kiristo. 17 Mayya katĩ ngĩ adiim Nyekuci agiitia ngatĩ ehecinu, nyatarka adĩmannu thõõth cĩ abũnna, kijiar ngatĩ ehecinu ngĩ adĩmannu thõõth cĩ gerthe.
18 Adaaĩ balna Kiristo itin codoi doo, nyatarka gerthetin cĩnac. Ngaanĩ balna kẽgẽrẽthan nẽ thõõth ĩmma kũdũt, ĩthõng thĩ, adaaĩ balna nẽ, nyatarka gẽrẽthanniok, kĩĩ katĩ kuuwung agiit ĩcĩ Nyekuco. Adaak balna nẽ, ĩthõng thĩ, aanyĩk Nyekuci ĩnõõnõ kũrũga Ririwaca cĩnnĩ, 19 ĩthõng thĩ, aanyĩk Ririwacĩ cĩ Nyekuco Kiristo kũũk kirionĩk ririwanĩn cĩk aatĩ kĩjana, 20 cĩk eet wũk balna athii cĩ athĩrar Nyekuc baa lõõla, ẽrẽ balna Nyekuci ĩnõõgõ kũtũngtek gerthetin cĩnĩng wathinniowẽy, wũk balna ngaanĩ ẽngẽnycĩ Nõõwae kovowol thõng. Eet cĩk kõrõõk cĩ Nõõwa dõ, balna cĩk ẽẽn turgi cĩk, balna eliay tõwõna wũ balna obbi õrrõt. 21 Eyehethothi maama cĩk tõwõnak batithimo cĩ yoko ẽẽlanung agiit wo. Ĩthõng thĩ, ijiar batithimo tũũnyẽnẽt cĩ riiriny cĩk ẽlak. Ẽẽn batithimo gõõl cĩ amiirothĩcẽ eeta Nyekuc muwẽẽnta cĩ thinneti cĩgĩk cĩk abũnna. Ellung batithimo agiitia, nyatarka balna ũrũga Yesu Kiristo daaĩtha, 22 ĩthõng ũũk tammuatiddina. Aavĩ yoko nẽ loota bulẽnta attia cĩ athio ĩcĩ Nyekuco, ĩthõng ẽlẽmĩ anjĩlẽta, kĩ makayyiok, kĩ makathĩt vẽlẽk cĩ tammutiddino ĩnõõnõ, ngatĩ ẽnnẽ nẽ Makayyioit cĩnĩng.