2
Ĩthõng thĩna, ibilli ngatĩ aaburneccu eet õõgĩ, ĩthõng nyĩ enneccu eet ne, abũnnanu, mĩ athii cĩ abũnnanu, nyĩ ariiwonu, kõdẽ nyĩ othooththu goonogu buth. 2 Aavut kĩ doolia cĩk kĩdĩk cĩk ngaanĩ arittiay, nyatarka adiimnyu niigia ir cĩk dĩhĩmĩk cĩk avvu Nyekuca dõ, kĩĩ katĩ keellung irana cĩkkõ agiitia ĩtĩlĩthĩt elianta cunung, 3 ĩthõng yoko, ataryu niigia ngatĩ abũnnanĩ Makayyioiti dĩdĩ.Aavĩ Kiristo kĩ bĩĩ cĩ arũgĩ
4 Ivitia ĩcĩ Kiristo cĩ õgõõn kĩ bĩĩ cĩ arũgĩ, cĩ balna abũrĩ eeta, ĩthõng thĩ, ẽbẽra balna Nyekuci ĩnõõnõ, ĩthõng tiir ĩcĩnnĩ õrrõt. 5 Ogoonnu niigia buu kĩ bĩĩyẽna cĩk arũgĩ, cĩk ẽngẽnycĩ Nyekuci Ciith cĩnnĩ. Ĩthõng naboo, iittu niigia buu meelitin cĩ paadĩrnya cĩk dĩhĩmĩk. Ellung katĩ Yesu Kiristo agiit anycĩk Nyekuc kaal cĩk cavawu cĩk atarnanĩ nẽ. 6 Kĩcĩ õthõõth Nyekuci Nyaragawa cĩnnĩa athĩ ne,
“Ĩcĩnĩt da nõ, kaari na bĩĩ Thiona,b
bĩĩ cĩ tiiri cĩ eberiay cĩ arĩwothĩk kĩĩ kõkõmĩ ciith,
ĩthõng eeti cĩ ẽlẽmĩ ĩnõõnõ,
athii katĩ cĩ agam ngawani kũdũt.”c
7 Ĩthõng niigia eeta cĩk elemnyu ĩnõõnõ wo, tiir bĩĩ coo õrrõt. Ĩthõng thĩ, eetĩnẽy ĩcĩk athii cĩ ẽlẽmĩ,
“Bĩĩ wũ balna ũtũbũrĩt tengenyiowa,
ikiyyia ĩthĩ bĩĩ cĩ tiiri õrrõt ciitha.”d
8 ĩthõng,
“Bĩĩ cĩ ĩdda eet kitiathõ,
anyi bĩĩ ĩnõõgõ kitiathõ.”e
Aritana balna ĩnõõgõ bĩĩ, nyatarka balna athii cĩ ẽlẽmĩ nẽẽgẽ nyemut nĩcẽ, ĩthõng diimẽnẽt cĩ balna Nyekuco neccie.
9 Ĩthõng thĩ, eeginnu niigia eet cĩk eberyiawu iittu paadĩrnya cĩk Nyekucak, eeginnu eet cĩk looc cĩ dĩhĩmĩ, ĩthõng naboo, iittu eet cĩk Nyekucak, kĩĩ katĩ ilimantek eet dĩhĩthẽnĩt cĩ Nyekuc wũ balna avaanung agiit muwuratõ, ivitia lanyĩta cĩnnĩ ĩcĩ abũnna õrrõt. 10 Ngaanĩ balna ĩĩtõ niigia eet cĩk Nyekucak balna ĩcĩ owu, ĩthõng thĩ yoko, iittu eet cĩgĩnĩk. Ngaanĩ balna katamatiwung Nyekuci agiitia, ĩthõng thĩ yoko, ikiyyia atamatiwung nẽ agiitia.
11 Gõtõõnõga kĩ ngõõnõga, kalayyung na agiit cĩk attiyyu kĩ eeta cĩk kĩrẽẽng looca coo, ũtũngtek kaal cĩk abarriteei eleeti cuguk cĩk uukonu kĩ agiit wo. 12 Aavut jurrung katĩ ngĩ arumenu kĩ eet cĩk ngaanĩ kelemit Nyekuc, kõdẽ woyyia ngĩ ovolongung nẽẽgẽ agiit thoothiowẽy ĩcĩk gerthek. Ma katĩ kõr cĩ ẽtẽẽdĩ Nyekuci thoothonniok, adĩhĩth katĩ nẽẽgẽ Nyekuc ngatĩ aduwanĩ thoothonniok cĩk abũnna cĩk balna acĩn ngatĩ adĩmannu niigia.
Gõõl cĩ kathĩknĩ makayyiok cĩk agamnyet kĩ cĩk alimanneta
13 Adiimnyung Makayyioiti agiit ĩthĩrarit thoothonniok cĩk gaala cuguk vẽlẽk, kõdẽ alaan cobbi cĩ agam eet vẽlẽk, 14 kõdẽ athĩknu gaala cĩk obbitik buu, nyatarka balna itiona alaanĩ cobbi ĩnõõgõ kivitia kuukitõ eet cĩk ẽgẽrẽthan thoothonniok, ĩthõng ĩdĩhĩthĩt eet cĩk adĩman thoothonniok cĩk abũnna. 15 Nyatarka adiimnyung Nyekuci agiit ibilli eet cĩk õthõõth thoothonniok cĩk giithakthẽtak, gõõla cĩ adĩmanu niigia thoothonniok cĩk edeemothi. 16 Aavut kĩ cĩ athii niigia cĩ eeginnu nyakapanak cĩk eetu, ĩthõng thĩ, ngaanĩ eeginnu nyakapanak cĩk Nyekucak noko, ĩthõng thĩ, nyĩ aticaninu thõõth cĩ oogianu aavut jurrung wo, kĩĩ katĩ ĩdĩmantĩ thoothonniok cĩk gerthek. 17 Otongollie eet vẽlẽk, ĩthõng ĩmmĩnantu gotoonogu kĩ ngoonogu cĩk ẽẽn lemnyiok. Otongollie Nyekuc, ĩthõng otongolliewu alaan cunung buu.
Yelinit cĩ pĩrnanẽt cĩ Kiristo
18 Niigia nyakapanaĩ ĩthĩrarit makayyiok cuguk, ĩthõng otongolliewu ĩnõõgõ dõõkĩthĩ. Ĩdĩmanit ketee, athii cĩ adĩmanecu makayyiok cĩk abũnna, kĩ cĩk athimaticung dõ, ĩthõng thĩ, ĩthĩrarit makayyiok cĩk ẽẽn lõrĩmĩnya buu. 19 Agatannung katĩ Nyekuci agiitia, katĩ ngĩ adĩmannu thoothonniok cĩk agayyu niigia ngĩ mũrrẽ, ĩthõng omoktu thoothonniok cĩk gerthek, nyatarka agayyu niigia Nyekuc. 20 Athii gii cĩ amũdanu niigia katĩ ngĩ uukwenu tõ, nyatarka thõõth cĩ ẽgẽrẽthannu. Ĩthõng thĩ, agatannung katĩ Nyekuci katĩ ngĩ omokju hecinit, nyatarka adĩmannu thõõth cĩ abũnna. 21 Ĩthõng thĩ, ẽbẽrawung balna agiitia Nyekuci ipiryia owobit gõõl wũ balna apĩrnanẽ Kiristo, ĩthõng ẽẽn pĩrnanẽtĩ cĩnnẽ yelinit cunung, kĩĩ katĩ owobit niigia ĩnõõnõ.
22 “Athii balna cĩ ẽgẽrẽthan nẽ thõõth ĩmma,
kõdẽ aduwa võlõng.”f
23 Kõdẽ baalia woyyia ngĩ adaac eeta ĩnõõnõ, athii balna nẽ cĩ ĩcaaca. Ma balna ngĩ eheccie nẽ, athii balna cĩ egerenyeei nẽ et ĩmma. Ĩthõng thĩ kẽnnẽ, balna ngaanĩ ayak nẽ leminit Nyekuca, cĩ ẽtẽd thoothonniok cĩk eetu jurrung. 24 Ũwĩ balna Kiristo gerthetin cĩnac baa ngĩ ododowothi nẽ kurucea, kĩĩ katĩ kadaait naaga gerthetina, ĩthõng kabaaitõ gõõla cĩ kadĩmanĩ thoothonniok cĩk edeemothi. Anyung nẽ agiit ũbũnta tũbẽnĩy cĩgĩnĩk. 25 Ithiiyyu balna niigia aavuttu kĩ athaa cĩk ithiicõ, ĩthõng thĩ, yoko oboddiawu ĩcĩ Yesu Tũwayyioit cunung cĩ athunnung agiitia.