1 Pẽtũrũ 1

Nyaraga cĩ ẽẽn Codoi cĩ ẽhẽẽd

Pẽtũrũ

Thawinet kĩ lawinit cĩ Pẽtũrũ

Nyaraga cĩ aku ĩcannĩ Pẽtũrũ tionniait cĩ Yesu Kiristo coo. Keheedi na Nyaraga coo eet cĩk ẽbẽra Nyekuci cĩk õgõõn kĩ eeta cĩk kĩrẽẽng, cĩk athaantothĩk vatĩk cĩk loociok cĩk Pontuthi, kĩ Galathia, kĩ Kapadocia, kĩ Athia, kĩ Bithinia. 2 Agawung balna Nyekuci Baangietĩ agiit, ĩthõng ẽbẽrawung agiitia baa lõõla, ĩthõng anyung Ririwacĩ cĩnnẽ agiit ĩĩtõ callẽ. Ĩthõng nyatarka thõõth coo, ithiktu niigia Yesu Kiristo, ĩthõng eliwung agiit biyyie cĩgĩnĩk. Anycĩk Nyekuc kaanyung bũnnathĩt kĩ ganõn cobbi õrrõt.

Muwẽẽnĩt cĩ abũnna cĩ alna kũdũt

3 Kĩdĩhĩthĩt Nyekuc cĩ ẽẽn Baatĩ Makayyioit cĩnac Yesu Kiristo. Tamatintia cĩnnĩ cobbi, anyet Nyekuci ageeta tirianĩt cĩ jõr kĩ muwẽẽnĩt cĩ abũnna cĩ aavĩ kũdũt, ngatĩ arũknanĩ Yesu Kiristo daaĩtha. 4 Ayak Nyekuci gimma cĩ abũnna cĩ katĩ aragiththu niigia tammuatiddina, cĩ woccia athii cĩ ammu, kõdẽ ẽgẽrẽthanni, kõdẽ athii. 5 Ĩthõng nyatarka leminit cunung wo, athunnung agiitia Nyekuci tiirthẽta cĩnnĩ, gii ngĩ umuddiawu elianĩt coo, cĩ ereyyung wo, kĩĩ katĩ kĩcĩnĩt eeta elianĩt coo, kõrra cĩ ditianẽt cĩ loocu. 6 Kõr nĩcẽ ebelbelit dĩdĩ, kõdẽ woyyia yoko ngĩ omokju tĩman goolliowẽy cĩk meelĩk kĩdĩĩc. 7 Ẽyẽla katĩ goolliowa cĩk tĩman coo ngatĩ ẽẽn leminiti cunung dĩdĩ. Atĩmanni katĩ leminiti cunung kĩ daabĩ cĩ atĩmanni guyyia, kõdẽ woyyia tiir leminiti cunung õrrõt kijiar daab cĩ woccia edeciay kaganoko. Ĩthõng thĩ, õkõmĩ woccia katĩ leminiti cunung kũdũt katĩ ngĩ atĩmanni tĩmana ĩcĩ obbi, ayahacung woccia katĩ agiit dĩhĩthẽnĩt, kĩ bulẽnĩt cĩ obbi kõrra cĩ katĩ akuni Yesu Kiristo. 8 Amĩnannu niigia Yesu, kõdẽ woyyia ngaanĩ ĩcĩnĩt ĩnõõnõ. Kõdẽ woyyia ma ngaanĩ ĩcĩnĩt niigia ĩnõõnõ yoko, elemnyu niigia ĩnõõnõ, ĩthõng ebelbellu talintia ĩcĩ ayak bulẽnĩt cĩ athii cĩ ekebji, 9 nyatarka ellianu niigia lemintia cunung ĩcĩ Kiristo.

10 Thõõtha cĩ elianĩt coo, aduwa eeta balna cĩk õthõõth molook cĩ Nyekuco bũnnathĩt cĩ Nyekuco cĩ anyung nẽ agiitia, ĩthõng ẽrẽpan nẽẽgẽ õrrõt thõõth coo, 11 ngatĩ aavẽ Ririwacĩ cĩ Kiristo eletinẽy cĩgĩk, cĩ aduwaai ĩnõõgõ ngatĩ katĩ ehecini Kiristo katĩngan, kĩ gõõl cĩ ehecini nẽ, ĩthõng anyĩwothĩk bulẽnĩtĩ cobbi ĩnõõnõ.

12 Aduwaai balna ĩnõõgõ athĩ ne, aticanothicung agiitia, athii cĩ aticanothi eleeti cĩgĩk mĩn. Eyeleei balna ĩnõõgõ Ririwacĩ wũ itioniay tammuatiddina Nyemut cĩ Abũnna cĩ katĩ irionicung agiit eeta tiirthẽta cĩnnĩ. Kõdẽ woyyia thẽk ngĩ adiim anjĩlẽta buu ngĩ aga Nyemut coo.

Ĩĩtõ niigia eet cĩk callĩk cĩk Nyekucak

13 Ĩthõng thĩna, aavut vĩrĩngĩng, ĩthõng anycĩk muwẽẽnĩt cunung kĩĩ mũrra tiica. Aryik muwẽẽnĩt cunung cĩ abũnna vẽlẽk bũnnathĩta jurrung, ĩcĩ katĩ anyĩwothicung agiitia ngĩ edenyiay Yesu Kiristo. 14 Aavut ĩĩtõ dõõlĩ cĩk Nyekucak cĩk athĩknẽ. Nyĩ ngaanĩ amiirothicu thoothonniok wũk balna rẽẽntĩk wũk gerthek, wũk balna gõõ adĩmannu niigia balna ngaanĩ erekcung thõõth cĩ Nyekuco. 15 Ĩthõng thĩ, kĩ balna thẽk Nyekuci wũ ẽbẽranung agiitia ngĩ calla, ĩthõng yoko abũnna thẽk ma ngĩ eeginnu niigia buu callẽ giiwa vẽlẽk ĩcĩ adĩmannu niigia, 16 nyatarka õthõõth Nyekuci Nyaragawa cĩnnĩ athĩ ne, “Ĩĩtõ thẽk niigia callẽ, nyatarka keeni na calla.”

17 Ahaddia Nyekuc Baaba cunung cĩ alayyu niigia wo, athii nẽ cĩ angalĩt eeta. Eteedi katĩ nẽ eet codoi codoi thõõth, ĩthõng adũmanung katĩ nẽ agiitia thoothonniowẽy, ĩcĩk aticannu niigia. Ĩthõng thĩna, adiim thẽk ngĩ ongolinu Nyekuc ngaanĩ attiyyu looca, kĩcĩ eeginnu eet cĩk kĩrẽẽng wo. 18 Nyatarka agayyu niigia ngĩ ẽẽlanung agiit Nyekuci rũgẽta cĩ gerthe cĩ kaganoko, wũ balna alimanecung baajigu baa lõõla. Ĩthõng agayyu niigia ngĩ athii cĩ ẽẽlanung agiit Nyekuci thĩĩhĩy ĩcĩk athĩ kathalkathal, kõdẽ daaba cĩ ẽgẽrẽthanni, 19 ĩthõng thĩ, ellung balna nẽ agiitia biyyietĩy cĩk addi ĩcĩk Kiristo, Nyion cĩ Nyekuco cĩ kothii gerthetin, kõdẽ athii cĩ awuli. 20 Ẽbẽra balna Nyekuci ĩnõõnõ kĩĩ Ellioit cunung, balna ngaanĩ ketengenyiay lõõcĩ. Ĩthõng thĩ, yoko nyatarka agiitia, ikiyyia eyelewung Nyekuci ĩnõõnõ agiit wathinniowẽy ĩcĩk aturna wo. 21 Ĩthõng nyatarka Kiristo, ivitia elemtu niigia Nyekuc, ĩthõng ayaktu leminit cunung kĩ muwẽẽnĩt cĩ abũnna ĩcĩ Nyekuc wũ balna arũgũtha Kiristo daaĩtha, ĩthõng aanyĩk ĩnõõnõ bulẽnĩt cobbi õrrõt.

22 Ẽnyẽktẽ balna agiitia thoothonniowa cuguk cĩk gerthek balna ngĩ athĩraryu thõõth cĩ ẽẽn dĩdĩ, kĩĩ katĩ ĩmĩnanit goonogu cĩk ẽẽn lemnyiok. Ĩthõng adiim thẽk ngĩ amĩnanonu niigia vẽlẽk jurrung thinnetinẽy ĩcuguk dĩdĩ. 23 Nyatarka itiryiawu balna niigia naboo, athii cĩ aritiaccu rũgẽt cĩ aturna. Alna katĩ rũgẽtĩ cunung cĩ jõr kũdũt, nyatarka ẽẽn rũgẽt cĩ aku thõõtha ĩcĩ Nyekuc cĩ alna kũdũt. 24 Kĩcĩ õthõõth Nyaraga cĩ Nyekuco athĩ ne,

“Õgõõn eeta vẽlẽk kĩ kartienti,

ĩthõng aavĩ bulẽnĩtĩ cĩnĩng kĩ vurẽẽna cĩk bõõnak.

Õgõõn nẽẽgẽ kĩ kartienti cĩ amuduith,

ĩthõng arurrie vurẽẽna cĩgĩk,

25 ĩthõng thĩ, alna thõõth cĩ Makayyiokto kũdũt.”

Ĩthõng ẽẽn thõõth coo Nyemut cĩ Abũnna wũ balna alimanothicung agiitia.