<<    <     1 Pẽtũrũ     5     >    >> 
Ẽẽn kelethia meelitin cĩ lemnyiok cĩk Nyekucak
5
Ĩthõng yoko, kayai thõõth cĩ kadiimi ngĩ kaduwacung agiit makayyiok cĩk meelitin cĩ lemnyiowu. Keeni na buu makayyioit, ĩthõng kĩthĩ keberec cĩ hecinit cĩ Kiristo, ĩthõng kõthõlla katĩ naaga buu kĩ ĩnõõnõ bulẽnĩt cĩnnĩ, katĩ ngĩ õbõda nẽ loota ngato. Kalayyung agiit kĩ makayyioiti cĩ kaduwõy kĩ agiitia. 2 Ũtũwac meelitin cĩ lemnyiok wũk balna anyung Nyekuci agiitia, kĩ tũwayyioiti cĩ athũnnĩ tẽẽny cĩ athaanu. Uthuutti ĩnõõgõ jurrung, kĩcĩ adiim Nyekuci agiitia ĩdĩmanit, nyatarka athii cĩ adangothicung thõng. Ĩthõng thĩ, iticanit tiic cunung, athii cĩ ẽẽn, nyatarka kĩĩ katĩ umuddiaĩ dũman, ĩthõng thĩ, nyatarka adiimnyu niigia ngĩ eelu ĩnõõgõ. 3 Nyĩ engerenu niigia ngatĩ agamu eet cĩk anyung Nyekuci agiitia ũtũwac, ĩthõng thĩ, eyelliek ĩnõõgõ kilimanta thõõth cĩ abũnna ĩcunung. 4 Ma ngĩ õbõda Tũwayyioiti Cobbi, arũbanu katĩ bulẽnĩt cĩ alna kũdũt.
5 Niigia ngĩthõrõĩ, gõõla nĩco dõ noko, otongollie eet cĩk ĩĩtõ obbitẽ kĩ agiitia, ĩthĩrarit thõõth cĩnĩng. Ĩthõng iticantothĩk niigia vẽlẽk goonogu thinnetinẽy cĩk athimatĩthĩ, nyatarka,
 
“Abũrĩ Nyekuci eet cĩk ẽngẽrẽnĩ, ĩthõng thĩ,
anyĩk nẽ eet cĩk athimatĩth bũnnathĩt.”a
 
6 Ĩĩtõ thimattiak nguuma cĩ Nyekuc cĩ ayak makathĩt cĩ ijiar vẽlẽk, kĩĩ katĩ woccia kodongung nẽ agiitia kõrra cĩ adiim nẽnẽ. 7 Anycĩk niigia barritõn cunung vẽlẽk Nyekuc, nyatarka ĩnõõnõ cĩ athunnung agiitia.
8 Uthuutti niigia eleeti cuguk, ĩthõng aavuttu vĩrĩngĩng. Õyõkõn miroiti cunung alaanĩ cĩ ririwanĩn cĩk gerthekb looc, kĩ maa cĩ arruk adiim et cĩ adaĩ. 9 Atamaacit ĩnõõnõ, ĩthõng okomtu lemintia cunung, nyatarka agayyu niigia ngatĩ ehecini lemnyiowa buu, looca coo vẽlẽk kĩ yoko niigia wo.
10 Ĩthõng thĩ, ũtũvvũwawung balna agiit Nyekuci bũnnathĩta cĩnnĩ vẽlẽk, kĩĩ katĩ otholit bulẽnĩt cĩnnĩ cĩ alna kũdũt, nyatarka Yesu Kiristo. Ĩthõng thĩ, vurtia cĩ eheciewu kĩdĩĩc, ẽẽlanung katĩ nẽ agiit, ĩthõng anyung okomit lemintia cunung. 11 Anycĩk kaavu tiirthẽtĩ ĩcĩnnĩ erkinya kĩ erkinya. Amẽn.
Thawinet cĩ aturna
12 Ẽẽla Thĩlathĩ aneeta kẽtẽhẽẽdawung nyaraga cĩ turi wo, ẽẽn nẽ wobjiait cĩ athũnnĩ thõõth cĩ Kiristo jurrung. Kadiimi ngĩ ketheryung, ĩthõng kuduwawung gõõl cĩ anyung Nyekuci agiitia bũnnathĩt cĩnnĩ dĩdĩ, kĩĩ katĩ aavut bũnnathĩta ĩcĩnnĩ.
13 Ĩthayyung wobjiaha cĩk Makayyioktak cĩk aatĩ Babilonia.c Ẽẽn nẽẽgẽ eet cĩk ẽbẽra Nyekuci. Ĩthõng ĩthayyung Marĩkõd cĩ aavĩ kĩ doolec cannie buu agiitia. 14 Ĩthayyiõy õrrõt mĩnanintia. Anycĩk ganõn kaavu ĩcunung agiit vẽlẽk cĩk eeginnu eet cĩk Kiristo.