Yelinit cĩ avuthit cĩ Yesu
12
Ĩthõng thĩna, thẽk alĩkcet ageeta meelitini cobbi cĩ eet cĩk balna ẽẽn kẽbẽrẽ cĩk rũgẽt cĩ leminto. Kadiim thẽk kir ngĩ kuungni naaga gerthetin kir kĩ kaal vẽlẽk cĩk alamnyet ageeta, kĩĩ katĩ kivirit naaga jurrung virẽt wũ balna arihiet Kiristo ageeta. 2 Karyik naaga thinneti cĩgaac Yesu, cĩ uwuantecet ageeta, ĩthõng anyĩk nẽ leminit cĩnac kẽlẽntõy. Nyatarka talinit cĩ ẽrẽ ĩnõõnõ, ikiyyia balna Yesu õmõk ngawani cĩ kurucewo,a ĩthõng yoko, aavĩ nẽ loota ĩcĩ athiit cĩ athiob ĩcĩ taaba cĩ Nyekuco. 3 Ahaddia dacinet wũ balna õmõgĩ Yesu wũ balna adaacĩ eeta wũk ẽẽn gẽrẽthanniok ĩnõõnõ, kĩĩ katĩ ma ngĩ ipiryiawu niigia, athii katĩ cĩ uungniccu leminit cunung.4 Ĩthõng thĩ, gõõla cĩ uukonu niigia kĩ thoothonniok cĩk gerthek, ngaanĩ niigia adaait. 5 Erektewung da balna agiitia thoothonniowa wũk balna etherung Nyekuci kĩ doolia cĩgĩnnẽk? Aduwa balna nẽ athĩ ne,
“Doolec cannĩ, nyĩ amui niia tĩrĩthẽnĩt cĩ Makayyiokto
athĩ ne, ẽẽn gii cĩ kaganoko,
ĩthõng nyĩ anyi niia thĩnĩn cunni kũtũbũr
katĩ ngĩ atiriththi nẽ aniitia.
6 Nyatarka atĩrĩth Makayyioiti et cĩ amĩnan nẽnẽ,
ĩthõng uuk et cĩ ẽlẽmĩ ĩnõõnõ kĩĩ doolec cĩnnĩ.”c
7 Ayait moginit canana cĩ atirithung Nyekuci agiitia, nyatarka adĩmannung nẽ agiitia kĩ doolia cĩgĩnnẽk. Doolec woccia gõõ thẽk jang cĩ ngaanĩ kĩtĩrĩth baatĩnnẽ ĩnõõnõ? 8 Atĩrĩth Nyekuci dõõlĩ cĩgĩnĩk vẽlẽk, ĩthõng mĩ athii cĩ atirithung nẽnẽ, monogo athii cĩ eeginnu niigia dõõlĩ cĩgĩnĩk dĩdĩ. 9 Ĩthõng thĩ, kongollie naaga õõ baangietĩ cĩgaac katĩ ngĩ atĩrĩthet nẽẽgẽ ageeta. Ĩthõng thĩ, yoko koccia, abũnna thẽk ngĩ mayya ngĩ kongollie naaga Baangiet cĩ ririwanĩn cĩgaac cĩ atĩrĩthet, kĩĩ katĩ kũrũgĩt naaga kũdũt? 10 Nyatarka atĩrĩthet õõ baangietĩ loota ngato erkinya cĩk kĩdĩk kaganoko, gõõla cĩ amuk nẽẽgẽ ngĩ athĩ ne, mayya. Ĩthõng thĩ, abũnna kĩ ageeta dõõkĩthĩ katĩ ngĩ atĩrĩthet Nyekuci, kĩĩ katĩ kotholit bũnnathĩt cĩnnĩ. 11 Awuci dõõkĩthĩ katĩ ngĩ atĩrĩthet õõ baangietĩ thõng. Mĩ kilimanit ngatĩ kathĩknĩ thõõth katĩ ngaanĩ atĩrĩthet nẽẽgẽ, kadĩman katĩ naaga thõõth cĩ edeemothi, ĩthõng kaavutõ jurrung.
12 Ĩthõng thĩna, nyĩ abarrittu, anycĩk ĩbaati kĩ kuthungti cuguk kĩĩtõ tiirti. 13 “Ĩdĩmantek gõõl kũbũna,”d kĩĩ katĩ eeta cĩk awuli kithii cĩ innia, ĩthõng thĩ, ũbũnta katĩ nẽẽgẽ.
Tĩrĩthẽnĩt katĩ ngĩ kabũrĩ Nyekuc
14 Ĩtĩmanit õrrõt ngatĩ attiyyu jurrung kĩ eet vẽlẽk ganõna! Aavut rũgẽta cĩ callĩ. Mĩ athii cĩ adĩmannu noko, athii katĩ niigia cĩ acĩnnu Makayyioit. 15 Uthuutti eleeti cuguk, kĩĩ katĩ kithii eeti cĩ abacĩ bũnnathĩt cĩ Nyekuco tõ. Nyĩ anyiccu et ĩmma kavarac, ĩthõng ĩkõthawung thoothonniok cĩk gerthek, ĩthõng ẽgẽrẽthan eet cĩk meelĩk. 16 Nyĩ ẽlẽmacu et ĩmma kitican thoothonniok cĩk ẽẽn riiriny cĩk oginnie kĩ ngaay taktak, ĩthõng ũtũbũr Nyekuc kĩ balna Ethau,e wũ balna ũũtẽnẽ gatan cĩnnĩ cĩ tirianĩt cĩ ẽnnẽ nẽ abuu, nyatarka ahat cĩ balna aduk kõr codoi doo. 17 Agayyu niigia vurtia cĩnnĩ, ikiyyia idiim Ethau ngĩ agatan baatĩnnẽ ĩnõõnõ, aku kẽnnẽ balna abũrĩ baatĩnnẽ ĩnõõnõ. Ĩthõng thĩ, balna athii cĩ ũũlĩ Ethau ngatĩ ĩlalẽcĩ baatĩnnĩ kõbõdaĩ thĩnĩn cĩnnĩ kagatan ĩnõõnõ, kõdẽ woyyia balna ngĩ alu nẽ õrrõt.
18 Nga niigia ivitia thiir cĩ Thĩnaĩ cĩ woccia acĩnnu, ĩthõng uwumtu. Thiir cĩ atũũth gua, kĩĩ muwur kĩĩ diith, ĩthõng ĩthĩ tiir ngõõtĩ, 19 kĩ nyeepu cĩ abũẽ. Athĩrar balna eeta cĩk Ĩthraĩlĩ molook cĩ othoothi ĩnõõgõ, ĩthõng thĩ, balna alaacõ nẽẽgẽ molook nĩcẽ kĩjawõy, 20 nyatarka balna ongollie nẽẽgẽ ngatĩ athĩknĩ thõõth cĩ aduwa moloowĩ cĩ athĩ ne, “Kõdẽ woyyia kelegit ĩmma cĩ awum thiir buu, anycĩk thẽk ĩnõõnõ kõvõcẽ kuruwue kadaak.”f 21 Abarrit balna Mutha õrrõt ngatĩ acĩnĩ kaal cĩk adĩmanni thiira, ĩthõng ĩthĩ nẽ ne, “Kabarriti na tongolintia cobbi.”g
22 Ĩthõng thĩ, ivitiawu niigia Thiira cĩ Thionĩ,h Yeruthalẽma tammuatiddina, kõrõõk cĩ gaalawu cobbi cĩ Nyekuc cĩ arũgĩ. Ivitiawu niigia ĩcĩ anjĩlẽt cĩk ẽẽn vucciaknya kĩ vucciaknya cĩk adĩhĩth Nyekuc. 23 Ĩthõng yoko, ivitiawu niigia kĩ meelitin cĩ lemnyiok cĩk kelethiawak cĩk eeginnu, dõõlĩ cĩk owu cĩk Nyekucak, wũk balna eheeddi thara cĩgĩk tammuatiddina. Ivitiawu niigia ĩcĩ Nyekuc ẽlẽ cĩnnĩ cĩ ẽngẽr thoothonniok vẽlẽk cĩk eetu. Ĩthõng naboo, ivitiawu ĩcĩ ririwanĩn cĩk eet cĩk abũnna tammuatiddina, cĩk yoko anycĩwothĩk kũbũnta wo. 24 Ĩthõng ivitiawu niigia ĩcĩ Yesu cĩ ẽẽn Et cĩ ẽẽn thooc, cĩ õthõõthĩ Ngẽrẽmngẽrẽm cĩk ẽẽn Jõr kõrgẽna cĩ Nyekuco kĩ eet cĩgĩnĩk, kĩ biyyieta cĩk atduuti, cĩk õthõõth thõõth cĩ abũnna cĩ ijiar biyyie cĩk Abẽlĩ.i
25 Ĩcĩnĩt jurrung, ĩthõng nyĩ aburnu ngatĩ athĩknu Nyekuc cĩ õthõõth wo. Athii balna cĩ avir eeta cĩk Ĩthraĩlĩ, wũk balna abũrĩ ngatĩ athĩknĩ Nyekuc, wũ balna othoothi nẽ ĩnõõgõ Thiira, cĩ Thĩnaĩ. Amukcu niigia athinnu woccia ne, aviryu katĩ, mĩ aburnu niigia ngatĩ athĩknu Nyekuc cĩ othoothicet ageeta tammuatiddina? 26 Ma balna ngĩ õthõõth Nyekuci ĩcĩ owu, balna ngĩ õmmõnnĩ moloowĩ cĩnnẽ looc dõ. Ĩthõng yoko aduwa nẽ athĩ ne, “Kõmõnnẽ katĩ na naboo looc kĩ tammutiddin buu vẽlẽk.”j 27 Athĩ thõõth coo ne, õmmõnnĩ katĩ Nyekuci kaal vẽlẽk wũk balna engenyciay kithiicõ, kĩĩ katĩ kũtũngtothĩk kaala cĩk athii cĩ õmmõtĩ dõ.k