Tiic cĩ anyi Nyekuc kẽbẽlbẽl
13
Aavut ĩmĩnanit goonogu cĩk ẽẽn lemnyiok wo, kaavutõ kĩ gotoonogu kĩ ngoonogu. 2 Nyĩ anyiccu kerehewung ngatĩ avvanu eet cĩk kĩrẽẽng katĩ ngĩ avvu nẽẽgẽ korookjiok cuguk, nyatarka eeta gwuak cĩk balna avvuay cĩk kĩrẽẽng, monogo da kẽggẽ ẽẽn nẽẽgẽ anjĩlẽta, ĩthõng athii niigia cĩ agawu ngatĩ ẽẽn nẽẽgẽ anjĩlẽta. 3 Ahaddia goonogu cĩk aatĩ kĩjanatõ, aavut kĩcĩ ecebinu kĩ ĩnõõgõ kõdõwẽ. Ahaddia goonogu cĩk ẽhẽcĩ eeta ĩnõõgõ kipiryia, ĩthõng mĩ uuki nẽẽgẽ, anycĩk kaavu kĩcĩ uukwenu niigia buu.4 Niigia eeta cĩk itiktoowu, abũnna ma ngĩ arumenu niia kõdõwẽ kũdũt kĩ ngaa cunni, abũnna thẽk ma ngĩ athii cĩ oginnu niia kĩ ngaay õõgĩ taktak, nyatarka uuk katĩ Nyekuci eet cĩk atican thoothonniok cĩk ẽẽn riiriny tihẽnta kĩ eet cĩk oogin kĩ ngaay taktak. 5 Nyĩ aaburnu nyarobinyay, anycĩk nyarobinya cĩk kĩdĩk cĩk ayakcu kũwũpantunga. Nyatarka balna athĩ Nyekuci Nyaragawa cĩnnĩ ne,
“Athii katĩ na cĩ kuungnici aniitia,
ĩthõng kutdukei tuu.”a
6 Anyet woccia thõõth coo kothoothit kĩĩtõ ne,
“Ẽẽn Makayyioiti Ellioit cannĩ!
Athii katĩ na cĩ kongollie gimma.
Nyia woccia katĩ cĩ adĩmaneca eeti aneeta?”b
7 Ahaddia makayyiok cuguk wũk balna alimanecung agiitia thõõth cĩ Nyekuco. Ahaddia thoothonniok wũk balna atican nẽẽgẽ rũgẽta cĩnĩng, ĩthõng owobtu yelinit cĩ leminit cĩnĩng.
8 Athii Yesu Kiristo cĩ ũũkcĩ, aavĩ nẽ kĩ bõlõwath, kĩ kõr coo, ĩthõng alna kũdũt. 9 Ĩthõng thĩ, nyĩ anyiccu liman cĩ gerthe kĩgoolung agiitia. Mayya ngatĩ kamũdanĩ tiirthẽt bũnnathĩta ĩcĩ Nyekuco, kijiar ngirantiok cĩk aheenin õõgĩ cĩk woccia kaduk naaga. Ĩthõng thĩ, athii ngirantiowa cĩk aheenin cĩkkõ cĩ ẽẽl eet cĩk aduk wo.
10 Kayak naaga ngĩtĩ todongintioc cĩ athii paadĩrnya cĩk aticanni Ciitha cĩ Nyekuco loota ngato, cĩ aduwi kaal cĩk otodongnyi ngatĩ todongintio wo. 11 Õkõyyĩ balna paadĩrĩ cobbi biyyie cĩk kaalu, kĩĩtõ kaal cĩk cavawu cĩk gẽrẽthanniowu Ciiatõ cĩ Nyekuco, Ngatĩ Angiranni cĩ Dĩhĩmĩ Õrrõt, ĩthõng õõt avaaddie eleeti cĩk kaal nĩĩkẽ ngatĩvõrĩ ngatĩ athii eeta cĩ abaaknĩ. 12 Acananni balna Yesu buu, ĩthõng adaak ngatĩvõrĩ katũga cobbi ĩcĩ Yeruthalẽmĩ, kĩĩ katĩ kaanycĩk biyyieta cĩgĩnnẽk eet kĩĩtõ callẽ. 13 Ĩnõõnõ thĩ cĩ kadiim thẽk ngĩ kõvvõ naaga buu ngatĩvõrĩ ĩcĩ kõrõõk cĩ gaalawu, kõõt kũrũbtõthĩk Yesu, kĩĩ katĩ kotholit naaga ngawani cĩnnĩ. 14 Nyatarka athii lõõcĩ coo, cĩ ẽẽn kõrõõk cĩnac cĩ gaalawu cĩ aavĩ kũdũt, ngaanĩ kẽrẽ naaga kõrõõk cĩnac cĩ gaalawu cĩ katĩ aku.d
15 Ĩthõng thĩ, thẽk ĩcĩ Yesu kaanycĩk Nyekuc gii cĩ cavĩto katĩ ngĩ kadĩhĩth naaga ĩnõõnõ, ĩthõng kuduktiak eet kentek ne, keegin naaga dõõlĩ cĩgĩnĩk. 16 Ĩthõng nyĩ anyiccu kerehewung ngatĩ eelu eet õõgĩ, ĩthõng otholit niigia ijjio cuguk, kĩ ĩnõõgõ. Õgõõn kaala cĩkkõ, kĩ kaala cĩk cavawu cĩk anyi Nyekuc katal.
17 Niigia lemnyiowa, ĩthĩrarit makayyiok cuguk, ĩthõng ĩdĩmantu thoothonniok cĩk aduwaccung nẽẽgẽ. Ebekcung nẽẽgẽ agiitia, ĩthõng ẽngẽr katĩ Nyekuci thoothonniok cĩgĩk. Adiim thẽk woccia niigia ngĩ athĩknu ĩnõõgõ, kĩĩ katĩ woccia katalit nẽẽgẽ tiica cĩnĩng, ĩthõng woccia athii tiici cĩnĩng cĩ addi, nyatarka athii woccia kẽnnẽ cĩ ellung agiit kũdũt.
18 Alayyioetu ageeta, nyatarka calla muwẽẽnĩtĩ cĩ thinneti cĩgaak, ĩthõng katĩmanna dõõkĩthĩ ngatĩ, kadĩmania thoothonniok cĩk edeemothi. 19 Kadiimi na ngĩ alawiniangũ niigia aneeta ĩcĩ Nyekuco,e kĩĩ katĩ kẽhẽrõnawung agiit naboo tamanoko.
20 Anycĩk woccia Nyekuc cĩ ganono wũ balna arũgũtha Makayyioit cĩnac Yesu, cĩ ẽẽn Tũwayyioit cobbi cĩ athaanu, wũ balna adak ngẽrẽmngẽrẽm cĩ alna kũdũt kĩ eet cĩgĩnĩk biyyietĩy ĩcĩgĩnĩk, 21 kĩdĩmanewung nẽ agiitia kaal cĩk abũnna, kĩĩ katĩ ĩdĩmanit niigia thoothonniok cĩk adiim nẽ. Anycĩk Yesu keelung ĩdĩmanit thoothonniok cĩk anyi Nyekuc kẽbẽlbẽl. Anycĩk bulẽnĩt kaavu ĩcĩ Yesu Kiristo kũdũt! Amẽn.
22 Gõtõõnõga kĩ ngõõnõga, kẽhẽdacung na agiitia nyaraga cĩ ayak thõõth cĩ dĩcĩ kaganoko, kĩĩ katĩ ketherung agiitia, ĩthõng kalayyung agiitia ĩthĩrarit thõõth cĩ kaduwa na wo jurrung.
23 Kadiimnyung na agiit yoko agaac ĩĩtõ ne, ooguay gotoonietĩ cĩnac Timotif kĩjana. Mĩ ikiyyia nẽ ngato tamanoko, kõyõwõta katĩ ĩnõõnõ kikiyyia kicinung agiitia.
24 Ĩthayyihangũ makayyiok cuguk kĩ eet cĩk Nyekucak vẽlẽk. Ĩthayyung lemnyiowa cĩk Nyekucak cĩk aatĩ Ĩtali buu agiitia.
25 Kala na Nyekuc, kĩĩ katĩ kaanyung nẽ agiitia vẽlẽk bũnnathĩt cĩnnĩ.