Eet wũk balna ayak leminit cobbi
11
Anyet leminiti kagaac muwẽẽnĩt cĩ abũnna cĩ kẽyẽk naaga, ĩthõng eyelecet kaal cĩk athii naaga cĩ kacĩnĩ. 2 Aanyĩk balna leminiti cĩ õõ baajigi baajigi baajigiet cĩgaac Nyekuc katal.3 Ĩthõng lemintia, kagga naaga kathĩ ne, engenyciay balna lõõcĩ, thõõtha cĩ aduwa Nyekuci, kĩ kaal vẽlẽk cĩk balna engenyciay cĩk kacĩn naaga yoko wo, wũk balna ẽngẽnyca Nyekuci ĩnõõgõ, kaalĩy ĩcĩk balna athii naaga cĩ kacĩnĩ.
4 Ĩthõng lemintia ĩcĩ Abẽlĩ,a aanyĩk balna nẽ Nyekuc kẽlẽm gii cĩ cavĩto cĩnnĩ, kijiar gii cĩ cavĩto cĩ Keini. Aanyĩk balna leminti Abẽl kĩĩ et cĩ abũnna, ĩthõng ẽlẽm Nyekuci gii cĩ cavĩto cĩnnĩ. Kõdẽ woyyia balna ngĩ adaak Abẽlĩ baarenu, lemintia cĩnnĩ ngaanĩ othoothicet nẽ ageeta.
5 Ĩthõng lemintia cĩ Ẽnõkĩb ĩdĩm balna Nyekuci ĩnõõnõ rũgẽtẽt ũũwĩ tammuatiddina, athii balna nẽ cĩ adaaĩ, nyatarka ũũwĩ balna Nyekuci ĩnõõnõ. Balna ngaanĩ kĩdĩmẽ Ẽnõkĩ kũũk tammuatiddina, agayyi balna nẽ ngatĩ ẽnnẽ et cĩ anyi Nyekuc kẽbẽlbẽl. 6 Mĩ kithii leminiti, athii woyyia eeti cĩ anyi Nyekuc kẽbẽlbẽl tõ, nyatarka eeti ĩmma cĩ aku ĩcĩ Nyekuco, adiim thẽk ngĩ ẽlẽmĩ nẽ athĩ ne, aavĩ Nyekuci dĩdĩ, ĩthõng ẽlẽm nẽ ngatĩ adũmanĩ Nyekuci eet vẽlẽk cĩk adiim ĩnõõnõ.
7 Ĩthõng lemintia cĩ Nõõwac ẽtẽngẽnya balna nẽ kovowol cobbi, kẽẽl kõrõõk cĩnnĩ kithii cĩ adũddẽ tõwõnatõ, ĩthõng ikiyyia nẽ ĩthĩk Nyekuc wũ balna atĩrĩth ĩnõõnõ kaalĩy ĩcĩk balna ngaanĩ kivitia ĩcowu. Ĩthõng lemintia cĩ Nõõwa, ikiyyia etedĩk nẽ eet cĩk loocak kĩĩ gẽrẽthanniok, ĩthõng ẽlẽm Nyekuci ĩnõõnõ kĩĩ et cĩ abũnna, nyatarka leminit cĩnnĩ.
8 Leminit cĩ Abrahamĩ cĩ anyi ĩnõõnõ kĩthĩrar Nyekuc, balna ngĩ aduwaai Nyekuci ĩnõõnõ kũtũngek kõrõõk cĩnnĩ, ĩthõng ũũk looca ĩmmanĩ ĩcĩ katĩ anyi Nyekuci ĩnõõnõ. Balna ngĩ ithiananĩ nẽ wueet cĩnnĩ athii balna nẽ cĩ aga gõõl cĩ õkõyyĩ. 9 Nyatarka balna ayak Abrahamĩ leminit, aavu nẽ kĩ eeti cĩ rẽẽng looca wũ balna abũtaneei Nyekuci ĩnõõnõ. Balna ngĩ abaak nẽ tugguẽtẽy kĩ balna Aĩthaĩd kĩ Yokobe buu, wũk balna abũtaneei Nyekuci looc nĩcẽ dõ noko. 10 Atican balna Abrahamĩ ketee, nyatarka balna ẽrẽ nẽ kõrõõk cĩ gaalawu cobbi cĩ alna kũdũt,f wũ balna adiim ngĩ ẽngẽnyca Nyekuci.
11 Leminit balna cĩ Thaarag cĩ anyi ĩnõõnõ kayak doolec, kõdẽ woyyia balna ngĩ atangany nẽ õrrõt, ĩthõng abĩlĩ athii cĩ arit. Ikiyyia Abrahamĩ itirria ngẽrĩnĩ, nyatarka ẽlẽmĩ nẽ thõõth wũ balna abũtaneei Nyekuci ĩnõõnõ. 12 Kõdẽ woyyia balna ngĩ atangany Abrahamĩ õrrõt athii cĩ ayak dõõlĩ, ĩthõng balna ikiyyia ĩthĩ nẽ baatĩ eet cĩk meelĩk õrrõt. Ĩthõng thĩ, thẽk ketee ivitia doolia cĩk dõõlĩ cĩgĩnĩk itiryia dõõlĩ cĩk meelĩk õrrõt cĩk aduwõy kĩ mũnyũny cĩk tammutiddinak, kõdẽ cĩk aduwõy kĩ kathaac cĩk titim cĩ bũlũc cobbi.
13 Adaaitõ balna eeta cĩkkõ vẽlẽk, ĩthõng ngaanĩ ẽlẽmĩ thõõth wũ balna aduwaai Nyekuci ĩnõõgõ. Kõdẽ woyyia balna ngaanĩ kũrũbta nẽẽgẽ thõõth wũ balna abũtaneei Nyekuci ĩnõõgõ, ĩthõng thĩ, balna ẽbẽlbẽl nẽẽgẽ ngatĩ acĩnĩ thoothonniok nĩĩkẽ rẽẽna, ĩthõng elemit balna nẽẽgẽ ngatĩ ẽnnẽ eet cĩk kĩrẽẽng loota ngato. 14 Ĩthõng dĩdĩ, eeta cĩkkõ cĩk õthõõth ketee wo, adiim nẽẽgẽ gõõl cĩ arũbanĩ looc cĩnĩng kir. 15 Mĩ balna kahaddia nẽẽgẽ looc wũ balna avvunni, imiiryie woyyia baalia nẽẽgẽ õõt looca nĩcẽ. 16 Ĩthõng thĩ, balna adiim nẽẽgẽ looc cĩ abũnna cĩ mayyĩ cĩ aavĩ tammuatiddina. Ĩnõõnõ thĩ cĩ athii cĩ angawanĩ Nyekuci katĩ ngĩ avvũ nẽẽgẽ ĩnõõnõ ethei ne, ẽẽn nẽ Nyekuc cĩnĩng, nyatarka balna adiim Nyekuci ngĩ engenyceei ĩnõõgõ kõrõõk cĩ gaalawu cobbi.
17 Lemintia cĩ Abrahamĩ, ĩdĩma balna nẽ Aĩthak anyĩk Nyekuc kĩĩ gii cĩ cavĩto,h balna ngĩ atĩman Nyekuci ĩnõõnõ. Ijiowa balna Abrahamĩ thõõth wũ balna abũtaneei Nyekuci ĩnõõnõ, ĩthõng ikiyyia ẽlẽm ngatĩ adiim ngĩ õtõdõngẽcĩ ngẽrĩnĩ cĩ odoi Aĩthak Nyekuc kĩĩ gii cĩ cavĩto, 18 kõdẽ woyyia balna ngĩ aduwaai Nyekuci ĩnõõnõ ethei ne, “Arittiay katĩ doolia cugunniek ĩcĩ Aĩthaĩ.”i 19 Ahad balna Abrahamĩ athĩ ne, mĩ adaak Aĩthaĩ, arũgũtha katĩ Nyekuci ĩnõõnõ naboo. Ĩthõng dĩdĩ, õbõdaĩ Nyekuci Abraham ngẽrĩnĩ kaavu kĩcĩ arũgũtha daaĩtha.
20 Leminit cĩ Aĩthaĩ cĩ balna anyi ĩnõõnõ kagatan Yokob kĩ Ethauj thõõtha ĩcĩnĩng ĩcĩ katĩ aku.
21 Ayak balna Yokobĩ leminit balna ngĩ õbõwẽ idiim adaaha, ĩthõng itirõõĩ tẽlẽẽĩ cĩnnĩ cĩ towominto, ĩthõng ala Nyekuc. Ĩthõng nyatarka leminit cĩnnĩ, ikiyyia agatan nẽ dõõlĩk cĩk Yothẽbõl codoi, codoi.
22 Ĩthõng leminiti cĩ Yothẽbõ balna ngaanĩ kadaak nẽ, ẽlẽmĩ balna nẽ Nyekuc ngĩ athĩ Nyekuci ne, aluugi katĩ nẽ eet cĩk Ĩthraĩlĩ Ijiba. Ngaatĩ aduwacĩ ĩnõõgõ koyowotit ammẽ cĩgĩnĩkm katĩ ngĩ uluugitõ.
23 Nyatarka leminit balna cĩ baatĩ Mutha kĩ yaatĩnnĩ, ivitia ulugunyit nẽẽgẽ Mutha kuumuc kĩĩtõ nyĩĩlõwẽ iyyio. Acĩn balna nẽẽgẽ ngĩ dĩhĩm doolec cĩnĩng wo õrrõt, ĩthõng ĩthĩnga ongollie ngatĩ abũrnĩ thõõth wũ balna alaano.
24 Nyatarka leminit cĩ ayak Mutha balna ngĩ ĩtĩlĩtha nẽ ĩthĩ maka, ikiyyia ũtũbũr nẽ ngatĩ ẽnnẽ ngẽrtĩ bũwẽnyĩ alaan cĩ Ijibi.n 25 Ẽlẽmĩ balna nẽ ngatĩ apĩrnanẽ kĩ eet cĩk Nyekucak kõdõwẽ, kijiar ngatĩ ebelbelei thõõth cĩ gerthetino itina ĩcĩ dĩcĩ. 26 Ahad balna Mutha athĩ ne, mayya ngatĩ apĩrnanẽ nẽ, nyatarka Kiristo, kijiar ngatĩ arũbanĩ nẽ balinit cĩ Ijibi vẽlẽk, nyatarka ẽrẽ nẽ dũmaniniet cĩnnĩ cobbi cĩ katĩ aku kõr ĩmma. 27 Nyatarka leminit cĩnnĩ, ikiyyia ũtũngek Mutha Ijib. Acĩn balna nẽ Nyekuc cĩ athii cĩ edenyiay, ĩthõng athii nẽ cĩ ongollie varac cĩ alaano. 28 Aanyĩk balna leminiti cĩ Mutha ĩnõõnõ kũthũtĩ Kõr cobbi cĩ Ngothio,o balna ngĩ eeli eeta cĩk Ĩthraĩlĩ biyyie kẽẽnĩy cĩk katũgẽt cĩgĩk, kĩĩ katĩ kithii cĩ aruk Nyekuci dõõlĩ cĩk maacĩk cĩk ẽẽn abuuẽt cĩk Ĩthraĩlĩ.
29 Nyatarka leminit cĩnĩng, ivitia abaaktẽ eeta cĩk Ĩthraĩlĩ Bũlũc cĩ Merihi gõõla cĩ õdõõĩ. Ma balna ngĩ adiim eeta cĩk Ijibi ngĩ abaakci wo, adũddẽ kẽggẽ thõng.
30 Nyatarka leminit cĩnĩng, oyokonit balna eeta cĩk Ĩthraĩlĩ kõrõõk cĩ gaalawu cĩ Jeriko wathinniok tũrgẽrẽm, ngaatĩ aku oyowini lũwatĩ cobbi cĩ Jerikop kĩĩ lõõcĩ ĩĩr.
31 Nyatarka leminit cĩ Rahabĩq wũ ẽẽn tegemnyiait, ikiyyia nẽ uluguny torotiak wũk balna avvu Ĩthraĩla. Ma natẽ, ĩthĩnga nẽ aruwue kĩ eet wũk balna athii cĩ athĩhĩ Nyekuc.
32 Kathĩ woccia yoko na ne? Athii itini cĩ woccia kẽtdẽbananẽ thõõth cĩ Gidionĩr kĩ Barak,s Thamthõnt kĩ Jevatha,u Davide kĩ Thamuele,v kĩ eet cĩk balna õthõõth molook cĩ Nyekuco tõ. 33 Ẽẽl balna leminiti cĩnĩng ĩnõõgõ kagamit kabicõnĩnẽ, ĩthõng nyatarka ĩdĩmanit nẽẽgẽ thoothonniok gõõla ĩcĩ edeemothi, umuddia nẽẽgẽ thõõth wũ balna abũtaneei Nyekuci, ĩthõng ecebit kutugeti cĩk maatu, 34 ĩthõng ĩdĩtĩtõ lanyĩttiok cĩk guyyienu, ĩthõng ivirit, nyatarka nyetubanya cĩk mĩrõk cĩgĩk. Kõdẽ woyyia balna ngĩ ẽẽn nẽẽgẽ eet cĩk athii cĩ tiirti, anyĩwothĩk balna ĩnõõgõ makathĩtĩ kĩ tiirthẽt cĩ ingkawĩ mĩrõk cĩk loociok cĩk kĩrẽẽng kivirit. 35 Ma natẽ, umuddia balna ngaay gwuak cĩk ẽẽn lemnyiok eet cĩgĩk cĩk arũkna daaĩtha.
Ĩthõng thĩ, balna acanantẽ lemnyiowa gwuak õrrõt, ĩthõng ũtũbũrĩt ngatĩ oogianẽ kĩjanatõ, kĩĩ katĩ kumuddia dũmaniniet cĩ abũnna cĩ mayyĩ, katĩ ngĩ ũrũkta nẽẽgẽ vẽlẽk daaĩtha. 36 Arannĩ balna eeta lemnyiok õõgĩ, ĩthõng uukitõ õõgĩ thõng, ĩthõng ecebit õõgĩ ngarikonyay kĩjanatõ. 37 Ĩthõng balna alna ovoccie gwuak bĩĩyẽnĩy kadaaitõ, kõdẽ apakci gwuak kĩĩtõ ramma, kõdẽ aruwue nyetubanyay. Athii balna õõgĩ ceremuana tõ, ĩthõng thĩ, balna ahimit nẽẽgẽ ceremua cĩk athaanu kĩ cĩk ẽẽthawu. Ẽẽn balna nẽẽgẽ ngĩjũrra, ĩthõng acanantẽ, ĩthõng uuktie thõng buu. 38 Abũrĩ balna lõõcĩ lemnyiok cĩkkõ, cĩk balna õyõkõn baathiok cĩk õdõõĩ kak ẽẽ, kĩ thiiryiok, ĩthõng aavutõ ngilomĩtẽy, ĩthõng ulugunycie loowuanĩytõ.