Anyi Kiristo ẽlẽ cĩnnĩ kĩĩ gii cĩ cavĩto itina codoi
10
Aavĩ Ngiranĩ cĩ Mutha kĩ ririwacĩ cĩ kaal cĩk abũnna cĩk katĩ ngaanĩ avvu kõr ĩmma, ĩthõng thĩ, athii Ngiranĩ cĩ ẽẽn kaal cĩk abũnna eletinẽy cĩgĩk mĩn, nyatarka kaal cĩk cavawu cĩk apak paadĩrnya kũdũt erkinya kĩ erkinya athii cĩ ũũny gerthetin cĩ eetu. 2 Ma baalia kũtũũnyĩtõ kaala cĩk cavawu cĩkkõ gerthetin cĩ eet cĩk ala Nyekuc, athii woyyia yoko eeta cĩ adiim kaal cĩk cavawu õõgĩ naboo, nyatarka ũtũũnyẽ gerthetini cĩ muwẽẽnĩt cĩ thinneti cĩgĩk ũbũna. 3 Ĩthõng thĩ, kaala cĩk cavawu neekie, ahadaai kẽnnẽ eet thõõth cĩ gerthetin cĩnĩng erkinya kĩ erkinya vẽlẽk, 4 nyatarka athii woccia cĩ ũũny biyyieta cĩk tõmõnyawu kĩ cĩk ẽẽthawu gerthetin cĩ eetu.5 Ĩnõõnõ thĩ balna cĩ akuni Kiristo loota ngato wo, kikiyyia kennek Nyekuc ne,
“Athii balna niia cĩ adiimi gii cĩ cavĩto, kõdẽ anyinit,
ĩthõng thĩ, balna anya niia aneeta ẽlẽ cannĩ.
6 Athii balna niia cĩ ebelbeli,
anyinit cĩ avaaddi kĩ anyinit cĩ gẽrẽthaninto.
7 Ĩthõng thĩ, kĩthĩ balna na ne, ‘Nyekuc,
kakuni balna na kikiyyia kĩdĩman diimẽnẽt cunni,
kaavu kĩcĩ eheeddi Nyaragawa ĩcĩ Nyekuco.’ ”a
8 Aduwa Kiristo ĩcĩ owu athĩ ne, “Athii balna niia cĩ adiimi gii cĩ cavĩto, kõdẽ anyinit, kõdẽ athii cĩ atalneei niia ĩnõõgõ,” kõdẽ woyyia balna ngĩ adiim Ngiranĩ ĩnõõgõ kĩdĩmantẽ. 9 Ĩthõng thĩ, uduwa nẽ ĩĩ ne, “Aneeta coo, kakuni balna na kikiyyia kĩdĩman diimẽnẽt cunni.” Ikiyyia ẽnyẽẽĩ Kiristo Ngẽrẽmngẽrẽm wũ Ũnũũk, ĩthõng abarĩcek Ngẽrẽmngẽrẽm cĩ Jõr. 10 Ĩthõng dimẽnta ĩcĩ Nyekuco, kivitia naaga kĩĩtõ callẽ, nyatarka ẽlẽmaaĩ Yesu Kiristo ẽlẽ cĩnnĩ kũdũt kĩĩ gii cĩ cavĩto itina codoi doo, nyatarka eet vẽlẽk.
11 Wathinniok vẽlẽk abĩlĩ paadĩrĩ dõõkĩthĩ ngatĩ apaini kaala cĩk cavawu, kĩĩ kaanyĩk kaal cĩk cavawu cĩk aduwõy thõng dõõkĩthĩ, cĩk athii cĩ adĩm gerthetin cĩ eetu ngatĩvõrĩ. 12 Ĩthõng thĩ, balna ẽlẽmaaĩ Kiristo paadĩrĩ cĩnac ẽlẽ cĩnnĩ Nyekuc, kĩĩ gii cĩ cavĩto codoi doo cĩ adĩm gerthetin cĩ eetu ngatĩvõrĩ. Ma natẽ, ũũk aavu nẽ loota ngatĩ bulẽnto ĩcĩ athiit cĩ athiob cĩ Nyekuco. 13 Ngaatĩ õkkõ erewinie Kiristo natẽ, gii ngĩ ikiyyia atamaac Nyekuci mĩrõk cĩgĩnĩk vẽlẽk, 14 giiwa ĩcĩ cavĩto cĩ balna adĩman nẽ codoi cĩ abũnna kũdũt, ũtũngek nẽ gerthetin cĩ eetu vẽlẽk, wũk anyi gõõ nẽ ĩnõõgõ kĩĩtõ callẽ.
15 Ĩthõng aduwacet balna Ririwacĩ cĩ Dĩhĩmĩ buu ageeta athĩ ne,
16 “Athĩ Makayyioiti ne, ẽẽn coo Ngẽrẽmngẽrẽm cannĩ
cĩ katĩ kadĩmanna na kĩ ĩnõõgõ vurtia cĩ kõr nĩcẽ.
Kaari katĩ na Ngiran cannĩ thinnetinẽy ĩcĩgĩk,
ĩthõng kẽtẽhẽẽda Ngiran cannĩ ootinẽy ĩcĩgĩk.”c
17 Ĩthõng ĩtoorĩk nẽ thõõth coo ĩthĩ ne,
“Ĩnĩnga na kahada gerthetin cĩnĩng,
kĩ thoothonniok cĩgĩk cĩk gerthek kũdũt.”d
18 Mĩ ũtũngek Nyekuci gerthetin vẽlẽk, ĩthĩnga thĩ apakci gii cĩ cavĩto, nyatarka gerthetin.
Gõõl cĩ jõr cĩ kithiowĩ Ciith cĩ Nyekuco tammuatiddina
19 Gõtõõnõga kĩ ngõõnõga, anyi biyyieta cĩk Yesu thinneti cĩgaac kokomit, kĩĩ katĩ kitioth Ngĩtĩ Angiranni cĩ Dĩhĩmĩ Õrrõt Ciitha ĩcĩ Nyekuco tammuatiddina, 20 gõõla cĩ jõr cĩ anyet rũgẽt. Kithio naaga cẽrẽm cĩ ẽngẽr Ciith cĩ Nyekucoe kõõt Ngatĩ Angiranni cĩ Dĩhĩmĩ Õrrõt, ĩthõng cẽrẽm coo ẽẽn ẽlẽ cĩ Kiristo. 21 Ĩthõng kẽyẽk naaga paadĩr cobbi cĩ agam Ciith cĩ Nyekuco, 22 ĩthõng thĩ, kadiim thẽk naaga ngĩ kõvvõ nguuma cĩ Nyekuco thinnetinẽy cĩk ẽẽn dĩdĩ ĩcĩk kẽlẽmĩ ĩnõõnõ, nyatarka ũtũũnyẽ balna muwẽẽnĩtĩ cĩ thinneti cĩgaac cĩk gerthetinak wo, maamĩy ĩcĩk callĩk, ĩcĩk anyet ageeta kĩĩtõ callẽ. 23 Kĩrĩcanta thẽk naaga ngatĩ kagamĩ muwẽẽnĩt cĩ abũnna cĩnac thõõtha wũ balna aduwacet Nyekuci ageeta, nyatarka atican katĩ nẽ thõõth wũ balna abũtana nẽnẽ. 24 Kuthutti ngatĩ kẽthẽrĩ eleeti cĩgaac gõõla cĩ kamĩnanõnĩ nyaguana, ĩthõng kĩdĩmanit thoothonniok cĩk abũnna. 25 Kurumtõy thẽk dõõkĩthĩ ngatĩ lawintio, ĩthõng athii woccia cĩ kadiim ngĩ kẽyẽhẽth eet wũk gõõ abũrĩ ngatĩ adĩmanĩ noko, ĩthõng thĩ, kadiim thẽk naaga ngĩ kẽthẽr eleeti cĩgaac nyaguana dõõkĩthĩ, gõõla coo kuumuc kĩ yoko ngĩ acĩnnu niigia buu wo, õbõwẽ kõr cĩ katĩ õbõdanĩ Makayyioiti.
26 Lõgõth, ma ngĩ alna kiyacaneei naaga gõõ ngĩ kadĩman gerthetin noko, vurtia cĩ balna kĩthĩraritõ gẽẽnyĩth cĩ thõõth cĩ ẽẽn dĩdĩ wo, ĩthĩnga katĩ gii cĩ cavĩto cĩ adĩm gerthetin nĩcẽ, 27 ĩthõng thĩ, kotongollie naaga ngatĩ, katĩ aku ẽtẽd Nyekuci gerthetin cĩnac dõ, kĩ guo cĩ katĩ atũũth mĩrõk cĩk abũrĩ Nyekuc. 28 Ĩthõng eeti ĩmma cĩ balna abũrĩ Ngiran cĩ Mutha, aruwue kothii tamati kẽbẽrẽnĩy cĩk eet cĩk ẽẽn kẽbẽrẽ cĩk ẽẽn ramma, kõdẽ iyyio,f ngatĩ aduwanĩ nẽẽgẽ thõõth cĩ adĩman nẽ. 29 Ummuit da yoko nõõnõ ngatĩ awucni ukwẽẽntĩ cĩ katĩ uukẽnẽ eeti cĩ abũrĩ thõõth cĩ Ngẽrtĩ Nyekuco. Arannĩ nẽ biyyie cĩk ngẽrẽmngẽrẽmmak, kaavu kĩcĩ athii cĩ dĩhĩmẽ, ĩthõng naboo, adaac nẽ Ririwac cĩ Dĩhĩmĩ cĩ ayahacet ageeta bũnnathĩt ĩcĩ Nyekuco. 30 Nyatarka kagga naaga Nyekuc wũ balna aduwa athĩ ne, “Aneeta woccia cĩ kĩcaaca. Kadũmani katĩ na ĩnõõgõ thõõth cĩnĩng cĩ gerthe ẽẽ.”g Ĩthõng naboo ĩthĩ nẽ Nyaragawa cĩnnĩ ne, “Ẽngẽr katĩ Makayyioiti thoothonniok cĩk eet cĩgĩnĩk.”h 31 Gẽrtha õrrõt katĩ ngĩ uuk Nyekuci cĩ arũgĩ, et athĩnẽy cĩgĩnĩk.
32 Nyĩ anyiccu kerektewung wathinniowa wũk balna ootinu, wũk balna athĩknu niigia thõõth cĩ Yesu, ahaddia naboo gõõl wũ balna elemu niigia thõõth cĩnnĩ, kõdẽ woyyia balna ngĩ maka pĩrnanẽtĩ cunung õrrõt noko. 33 Adaaccung balna gõõ eeta agiitia wathinniowẽy gwantĩk, ĩthõng ĩdĩmantung buth meelitina ĩcĩ eetu. Ĩthõng naboo itinnyiay gwantĩk otholit niigia pĩrnanẽt cĩ apĩrnanẽ eeta gwuak. 34 Atamattiwu balna niigia eet wũk balna ariwothi kĩjan. Ma balna ngĩ ootti eeta ijjio cuguk vẽlẽk, ẽlẽmacu balna niigia talintia, nyatarka agayyu balna niigia ngatĩ ereyyung kaala cuguk agiitia cĩk abũnna cĩk mayyĩk cĩk alna kũdũt.
35 Ĩnõõnõ thĩ cĩ kathĩnna naaga ne, nyĩ atdukeecu kõmĩth cĩ leminit cunung tuu, nyatarka õbõdacung katĩ anyinti agiitia cobbi. 36 Adiim thẽk ngĩ omokju thoothonniok, kĩĩ katĩ ngĩ edeciawu niigia ngatĩ adĩmanu diimẽnẽt cĩ Nyekuco, ũrũbtawu thĩ katĩ niigia thõõth wũ balna abũtana nẽnẽ. 37 Nyatarka ĩthĩ itini dĩca,
“Ikiyyia katĩ Nyekuci tamanoko,
ĩthõng athii katĩ cĩ avĩya kuumuc.
38 Ĩthõng thĩ, arũgĩ katĩ eeti cannie cĩ abũnna,
nyatarka leminit cĩnnĩ.
Ĩthõng athii katĩ na cĩ katali,
ma ngĩ abũrna nẽ aneeta.”i
39 Ĩthõng thĩ, athii naaga cĩ kattĩyya kĩ eeta wũk abũrĩ Nyekuc, ĩthõng ẽgẽrẽthantẽ, ĩthõng thĩ, kaatĩ naaga kĩ eeta cĩk ẽlẽmĩ Nyekuc, ĩthõng eliay.