Lawinit cĩ ũnũũk kĩ cĩ jõr
9
Ĩthõng yoko, Ngẽrẽmngẽrẽmĩ cĩ Ũnũũk wũ balna adĩman Nyekuci kĩ eet cĩk Ĩthraĩlĩ, ayak tĩrĩthẽntiok cĩk lawintiak, ĩthõng naboo, ayak Ciith cĩ Nyekuco looca. 2 Ẽngẽnyẽt balna eeta cĩk Ĩthraĩlĩ Ciith cĩ Nyekucoa wo, kayak Ciith vatĩk ramma. Ayak ngĩtĩ owu thiihit cĩ ayak kaal cĩk katũkũlẽnĩ kĩ lobele cĩ atadõthĩcẽ ahat cĩ avaadiay cĩ angiranni cĩ Nyekuco, ĩthõng balna athĩ ngittio ne, ẽẽn Ngĩtĩ Dĩhĩmĩ. 3 Ĩthõng Ciiatõ ĩcĩ Nyekuco ĩcĩ gõlla õwõbẽcĩ ngĩtĩ ẽẽn ramma, cĩ aavẽ cẽrẽm cĩ ẽngẽr Ciith kõrgẽna,b ĩthõng avvẽ ngĩtĩ ẽẽn ramma ẽẽ, athĩ ne, Ngĩtĩ Angiranni cĩ Dĩhĩmĩ Õrrõt, 4 cĩ ẽẽn ngĩtĩ todongintio cĩ ẽẽn daab cĩ avaadinie mõõcacĩ, ĩthõng ẽẽn Nyethuduwoc cĩ Ngẽrẽmngẽrẽmõ daab. Ĩthõng Nyethuduwoca ĩcoo ĩcĩtõ, ayak bool cĩ ẽẽn daab cĩ abbĩththĩ dainti cĩ athĩ maana,c ĩthõng balna aavĩ kẽẽt cĩ towominto cĩ Aarõnĩd cĩ appuwa ballõk, ĩthõng aavutõ bĩĩyẽna cĩk ngẽrẽmngẽrẽmmak tõ.e 5 Nyethuduwoca cĩ Ngẽrẽmngẽrẽmõ wo tiddina, abĩlĩ anjĩlẽta rammaf cĩk bulẽntak cĩk adĩmaniay daaba, ĩthõng ẽpẽtanit kavutanẽ cĩgĩk nyethuduwoca cĩ elothi biyyieta cĩk enyeeinie thoothonniowa cĩk gerthek cĩk eetu. Ĩthõng athii woccia naaga cĩ kẽkẽba thoothonniok cĩkkõ vẽlẽk õrrõt yoko. 6 Ĩthõng ma balna, ma ngĩ ĩdĩmantothĩk kaala vẽlẽk. Ẽhẽẽt paadĩrnya dõõkĩthĩ Ngĩtĩ Dĩhĩmĩ wo, kõõt kĩdĩmanit tiic cĩ woyyia gõõ adĩman nẽẽgẽ. 7 Ĩthõng thĩ, paadĩr cobbi dõ cĩ ẽhẽẽt Ngĩtĩ Angiranni cĩ Dĩhĩmĩ Õrrõtg kõr codoi doo erkita. Ayak paadĩrĩ biyyie cĩkkõ õkkõ anyi Nyekuc kũtũũny gerthetin cĩnnĩ kĩ gerthetin cĩ eetu, wũ balna atican nẽẽgẽ athii cĩ agawĩ. 8 Ĩthõng gõõla ĩcoo, ẽyẽla Ririwacĩ cĩ Dĩhĩmĩ athĩ ne, athii eeti cĩ woccia aavĩ Ngatĩ Angiranni cĩ Dĩhĩmĩ Õrrõt wo tõ, katĩ ngaanĩ abĩlĩ Ciith cĩ Nyekuco looca. 9 Ĩthõng ẽyẽla thõõth coo athĩ ne, athii muwẽẽnĩtĩ cĩ thinneti cĩk eetu cĩ ũũnyĩ kũbũnta, gõõla cĩ anyĩcẽ paadĩrnya anyintiok kĩ kaal cĩk cavawu Nyekuc. 10 Ẽẽn vowothnya cĩkkõ cĩk thoothonniok cĩk daintiak kĩ cĩk wũdẽntak kĩ tũũnyẽnẽt cĩ eleetinu kaganoko. Ĩthõng aatĩ tĩrĩthẽntiowa cĩkkõ kuumuc gii ngĩ ikiyyia Ngẽrẽmngẽrẽmĩ cĩ Jõr.
Biyyie cĩk Kiristo
11 Ĩthõng thĩ, yoko ikiyyia balna ĩthĩ Kiristo paadĩr cobbi cĩ kaal vẽlẽk cĩk abũnna cĩk kayak naaga yoko wo. Ĩthõng ittio nẽ Ciith cĩ Nyekuco tammuatiddina, cĩ balna athii cĩ ẽngẽnyca eeti cĩ olli, ĩthõng athii cĩ ẽẽn cĩ looc coo wo. 12 Athii balna cĩ ẽhẽẽt Kiristo Ngĩtĩ Angiranni cĩ Dĩhĩmĩ Õrrõt wo, biyyietĩy cĩk ẽẽthawu kĩ cĩk maalawu cĩk ẽẽn kaal cĩk cavawu. Ẽhẽẽt balna Kiristo nginicẽ kõr codoi doo biyyietĩy cĩgĩnĩk, kĩĩ kõõgaẽt ageeta thoothonniowẽy ĩcĩk gerthek cĩgaac kũdũt. 13 Ngirana wũ balna rẽẽnĩ, eeli balna gõõ eeta biyyie cĩk ẽẽthawu kĩ cĩk tõmõnyawu kĩ tithet cĩ avaadinie moolet, kũtũũnyĩtõ eleeti cĩk eet cĩk ẽẽn riiriny thõõtha cĩ Ngirano. 14 Ummuit da yoko nõõnõ gõõl cĩ katĩ mayya ma ngĩ ũũnyĩ biyyieta cĩk Kiristo muwẽẽnĩt cĩ thinneti cĩgaac gerthetin cĩnac, kĩĩ katĩ kĩĩtõ naaga ticcianniok cĩk Nyekuc cĩ arũgĩ kũdũt. Tiirthẽta cĩ Ririwac cĩ alna kũdũt, ikiyyia balna ẽlẽmaaĩ Yesu ẽlẽ cĩnnĩ kĩĩ gii cĩ cavĩto cĩ dĩhĩmĩ, nyatarka gerthetin cĩnac.
15 Ĩnõõnõ thĩ cĩ ẽnnẽ Yesu et, cĩ ẽẽn thooc cĩ õthõõthĩ eet ĩcĩ Nyekuco Ngẽrẽmngẽrẽmĩy cĩ Jõr, kĩĩ katĩ kivitia kũrũbta eeta vẽlẽk wũk balna avvuay rũgẽt cĩ alna kũdũt, wũ balna abũtana Nyekuci. Nyatarka balna thẽk adaaĩ Kiristo, kĩĩ kõõga ĩnõõgõ ukwẽẽnta cĩ gerthetin wũ balna atican nẽẽgẽ itina cĩ Ngẽrẽmngẽrẽm wũ Ũnũũwa.
16 Ĩthõng thĩ, yoko ma ngĩ õbõwẽ eeti ngĩ adaak, aduwa nẽ kaal cĩgĩnĩk õgõõn ngĩ engeryie kuu. Adiim thẽk eeta kagaacõ jurrung ngĩ adaak eeti neccie, 17 nyatarka athii eeta cĩ ẽngẽr kaal cĩk et nĩcẽ, gii katĩ ngĩ agaacõ nẽẽgẽ ĩnõõnõ ngĩ adaaha.
18 Ĩnõõnõ thĩ, balna cĩ arĩwõthĩcẽ Ngẽrẽmngẽrẽmĩ wũ Ũnũũk, kiticanõy biyyietĩy. 19 Ĩthõng thĩ, balna ebelek Mutha tĩrĩthẽntiok cĩk Ngiranak eet vẽlẽk, ikiyyia ĩdĩma nẽ biyyie cĩk maalawu kĩ maam, ĩthõng õvvõc Nyaraga cĩ Ngiran cĩ Nyekuco wo kĩ eet ĩmmanẽy ĩcĩk ẽẽthawu ballõĩ. 20 Ma natẽ, uduwak eet ethek ne, “Biyyie cĩk ngẽrẽmngẽrẽmmak cĩkkõ,h wũ balna aduwaccung Nyekuci agiitia uthuutti.”i 21 Gõõla nĩĩco dõ, ikiyyia õvvõc balna Mutha Ciith cĩ Nyekuco kĩ kaal vẽlẽk cĩk adĩmanini paadĩrnya lawintia. 22 Ĩthõng dĩdĩ, athĩ Ngirana cĩ Mutha ne, adiim kaala vẽlẽk keliothĩk biyyieta. Athii cĩ enyekci thoothonniowa cĩk gerthek katĩ ngĩ ngaanĩ kĩboryiay biyyieta.
23 Ĩnõõnõ thĩ cĩ ũũnyẽnẽ kaala cĩk aatĩ Ciitha cĩ Nyekuco looca, cĩk eyehethothi kaala cĩk aatĩ tammuatiddina biyyietĩy cĩk kaalu wo. Ĩthõng thĩ, kaala cĩk ẽẽn dĩdĩ cĩk aatĩ tammuatiddina, ũũnyĩ katĩ nẽẽgẽ biyyietĩy ĩcĩk abũnna cĩk ijiar vẽlẽk.
24 Ĩnõõnõ thĩ balna cĩ athii cĩ iithio Kiristo Ciith cĩ Nyekuco cĩ balna ẽngẽnyca eeti cĩ olli, cĩ eyehethothi Ciith cĩ Nyekuco cĩ ẽẽn dĩdĩ. Ĩthõng thĩ, balna ẽhẽẽt Kiristo tammutiddin, ĩthõng yoko arũmẽ nẽ kĩ Nyekuc keelet ageeta. 25 Athii balna cĩ ẽhẽẽt Kiristo tammutiddin kũũk kẽlẽmaĩ ẽlẽ cĩnnĩ iinyia cĩk meelĩk, athii nẽ cĩ õgõõn kĩ paadĩrĩ cobbi loota ngato, cĩ ẽhẽẽt Ngĩtĩ Angiranni cĩ Dĩhĩmĩ Õrrõt kũũk keelĩk biyyie cĩk kaalu kõr codoi doo erkinya vẽlẽk. 26 Ma baalia kẽlẽmaĩ Yesu ẽlẽ cĩnnĩ erkinya vẽlẽk kĩpĩra, apĩrna woyyia baalia nẽ ngõnana cĩk meelĩk kĩ balna thẽk, ngĩ ẽngẽnyca Nyekuci looc. Ĩthõng thĩ, balna ẽlẽmaaĩ nẽ ẽlẽ cĩnnĩ, kõr codoi dõ nyatarka eet vẽlẽk, kĩĩ katĩ kĩĩ ẽlẽ cĩnnẽ gii cĩ cavĩto, cĩ ẽnyẽẽĩ thoothonniok cĩk gerthek.
27 Kĩ gõõ ngĩ adaaĩ eeti kõr codoi doo, ĩthõng thĩ, ẽtẽd Nyekuci thõõth cĩnnĩ, 28 ĩthõng adaaĩ thĩ Kiristo buu kõr codoi dõ, kĩĩ gii cĩ cavĩto cĩ adĩm gerthetin cĩ eet cĩk meelĩk. Õbõda katĩ Kiristo naboo, athii cĩ õbõda kikiyyia kayak gerthetin cĩnac, ĩthõng thĩ, õbõda Kiristo kayaha elinit cĩ eet cĩk ẽrẽ ĩnõõnõ.