Ẽẽn Yesu paadĩr cĩnac cobbi cĩ Ngẽrẽmngẽrẽm cĩ Jõr
8
Thõõth kir cĩ addi cĩ kathĩ naaga ne, kayak naaga paadĩr cobbi, ĩnõõnõ Yesu cĩ aavĩ loota attia cĩ athioa taabawa, makathĩta cĩ Nyekuco tammuatiddina. 2 Aticanni nẽ ẽẽn paadĩr cĩnac cobbi Ciitha cĩ Nyekuco ĩcĩ ẽẽn dĩdĩ, ciitha cĩ balna ẽngẽnyca Nyekuci, ĩthõng athii cĩ ẽngẽnyca eeti cĩ olli kaganoko.3 Ĩthõng thĩ, ma ngĩ anyi paadĩrĩ cobbi codoi gõõ anyintiok kĩ kaal cĩk cavawu, adiim thẽk Kiristo paadĩrĩ cĩnac cobbi buu ma ngĩ anyi gii cĩ cavĩto. 4 Ma baalia kaavu nẽ loota ngato, athii woyyia baalia nẽ cĩ ẽẽn paadĩr, nyatarka balna aavutõ paadĩrnya loota ngato cĩk anyi nẽẽgẽ Nyekuc anyintiok kĩ kaal cĩk cavawu, cĩ balna aduwa Ngiranĩ cĩ Mutha. 5 Nyatarka balna aticanni nẽẽgẽ Ciiatõ cĩ Nyekuco baatha cĩ õdõõĩ kak,b Ciitha cĩ ẽẽn ririwac cĩ eyehethothi Ciith cĩ Nyekuco tammuatiddina. Ĩnõõnõ thĩ balna cĩ aduwacĩ Nyekuci Mutha balna ngĩ adiim ngĩ ẽngẽnyẽt nẽ Ciith cĩ Nyekuco ethei ne, “Gaa ĩthĩ ne, tẽngẽny thẽk niia Ciith coo kĩ balna ngĩ keyeleci na aniitia Thiira cĩ Thĩnaĩ.”c 6 Ĩthõng thĩ, yoko eberiay Yesu ĩthĩ paadĩr cĩnac cobbi, ĩthõng anyĩwothi tiici cĩ ijiar tiic cĩ paadĩrnya wũk obbitik wũk balna owu, nyatarka ĩthĩ nẽ et cĩ ẽẽn thooc cĩ othoothiet ageeta kĩ Nyekuc jurrung, thõõtha cĩ Ngẽrẽmngẽrẽm cĩ Jõr wũ mayyĩ wũ balna abũtana Nyekuci cĩ ijiar Ngẽrẽmngẽrẽm wũ Ũnũũwa.
7 Ma baalia kũbũna Ngẽrẽmngẽrẽmĩ wũ Ũnũũk, athii woyyia yoko cĩ kadiim Ngẽrẽmngẽrẽm ĩmma naboo. 8 Ĩthõng thĩ, aku balna kẽnnẽ arũba Nyekuci gerthetin ĩcĩ eetu, ngaatĩ õthõõthĩ nẽ athĩnnĩ ne,
“Athĩ Makayyioiti ne, aku katĩ kõr,
cĩ katĩ kadĩmanẽ na Ngẽrẽmngẽrẽm cĩ Jõr wo,
kĩ eet cĩk Ĩthraĩlĩ
kĩ eet cĩk Yudaa buu.
9 Athii katĩ Ngẽrẽmngẽrẽmĩ coo, cĩ aavĩ
kĩ wũ balna kadai na, kĩ õõ baajigi baajigi cĩgĩk
balna ngĩ kalũngana ĩnõõgõ Ijiba,
nyatarka balna athii cĩ athũnnĩ nẽẽgẽ Ngẽrẽmngẽrẽm cannĩ,
ĩthõng kikiyyia kũtũbũra na ĩnõõgõ.
Aduwa Makayyioiti thõõth coo.
10 Ẽẽn coo Ngẽrẽmngẽrẽm cannĩ cĩ katĩ kadĩmani na
kĩ eet cĩk Ĩthraĩlĩ kõr nĩcẽ.
Kaari katĩ na Ngiran cannĩ ootinẽy cĩgĩk,
ĩthõng ketehedĩha Ngiran cannĩ thinnetinẽy cĩgĩk.
Keeni katĩ na Nyekuc cĩnĩng,
ĩthõng ĩĩtõ katĩ nẽẽgẽ eet cĩganĩk.
11 Ĩthĩnga katĩ eeti cĩ ngaanĩ aliman et cĩ abakanõy,
kõdẽ aliman gõtõnĩ ethei ne, ‘Gaa Makayyioit,’
nyatarka agayya katĩ aneeta eeta vẽlẽk
dõõlẽnĩy ĩcĩk kĩdĩk kuumuc kõdõlan eet cĩk obbitik.
12 Nyatarka kamanni katĩ na thoothonniok cĩgĩk cĩk gerthek,
ĩthõng ĩnĩnga kahada gerthetin cĩnĩng kũdũt.”d
13 Ma ngĩ õthõõth Makayyioiti Nyekuci thõõth cĩ Ngẽrẽmngẽrẽm cĩ Jõr wo, ĩdĩman nẽ Ngẽrẽmngẽrẽm wũ Ũnũũk cĩ athii cĩ aticanni, kõbõwẽ kedecciay, ĩthõng ithii katĩ tamanoko.