Paadĩr Mẽlthĩthẽdẽk
7
Ẽẽn balna Mẽlthĩthẽdẽĩ alaan cĩ kõrõõk cĩ gaalawu cĩ Thalẽmĩ, ĩthõng ĩĩ paadĩr cĩ Nyekuc cĩ Ijiar vẽlẽk. Mẽlthĩthẽdẽk balna cĩ õkkõ aruumõy kĩ Abraham, ngaatĩ agatanĩ nẽ Abraham balna ngĩ õbõda jora cĩ balna õkõyyĩ nẽ, uukõnẽ kĩ alaanẽt cĩk meelĩk, ĩthõng atamaac ĩnõõgõ. 2 Ĩthõng ikiyyia Abrahamĩ ẽngẽr kaal wũk balna õbõdanĩ nẽ joraa goolliok õmmõtõ, ĩthõng aanyĩk codoi Mẽlthĩthẽdẽk. Ĩthõng thara cĩk athĩ Mẽlthĩthẽdẽk wo athĩ ne, “alaan cĩ bũnnathĩto,” ĩthõng thara cĩk athĩ ne, alaan cĩ Thalẽmĩ wo athĩ ne, “alaan cĩ ganono.” 3 Athii balna cĩ agayyi baatĩ Mẽlthĩthẽdẽĩ, kõdẽ yaatĩnnẽ, kõdẽ baajigia cĩgĩnnẽk cĩk baa lõõla, kõdẽ tuwuanẽtĩ, kõdẽ daaĩthĩ cĩnnẽ. Ikiyyia aala nẽ ĩthĩ paadĩr kũdũt kaavu, kĩ Ngẽrtĩ Nyekuco.4 Ummuit nõõnõ makathĩt cobbi cĩ Mẽlthĩthẽdẽĩ, ẽngẽrak Abrahamĩ ĩnõõnõ kaal wũk balna õbõdanĩ nẽ jora. Ẽngẽrak Abrahamĩ kaal cĩkkõ goolliok õmmõtõ, ĩthõng aanyĩk codoi ĩnõõnõ. 5 Ĩthõng yoko adiim thẽk Ngiranĩb cĩ Mutha paadĩrnya, cĩk tatũk cĩ Levi, kuluttia anyinit codoi kaalĩy wũk ẽẽn goolliok õmmõtõc eetĩnẽy vẽlẽk ĩcĩk Ĩthraĩlĩ, ĩcĩk ẽẽn nẽẽgẽ buu dõõlĩ cĩk dõõlĩ cĩk Abrahamĩ. 6 Athii balna Mẽlthĩthẽdẽĩ cĩ ẽẽn et cĩ tatũk cĩ Levi. Ma natẽ, ikiyyia ẽngẽrak Abrahamĩ ĩnõõnõ anyinit codoi kaalĩy wũk ẽẽn goolliok õmmõtõ. Ngaatĩ aku balna agatanĩ Mẽlthĩthẽdẽĩ Abraham, wũ balna abũtaneei Nyekuci ĩnõõnõ thoothonniok. 7 Ĩthõng thĩ, kagga naaga vẽlẽk ngĩ agatan eeti cobbi et cĩ dĩcĩ.
8 Paadĩrnya cĩk alũta anyinit codoi kaalĩy wũk ẽẽn goolliok õmmõtõ, ẽẽn eet cĩk katĩ adaaĩ, ĩthõng thĩ, maka Mẽlthĩthẽdẽĩ ijiar ĩnõõgõ, nyatarka aduwacet balna Nyaraga cĩ Nyekuco athĩ ne, arũgĩ Mẽlthĩthẽdẽĩ kũdũt. 9 Ĩthõng naboo kathĩ woccia naaga ne, paadĩrnya cĩk Levid cĩkkõ cĩk alũta anyinit codoi kaalĩy wũk ẽẽn goolliok õmmõtõ, õgõõn kĩ balna ma ngĩ anyi Abrahamĩ Mẽlthĩthẽdẽk anyinit codoi kaalĩy wũk ẽẽn goolliok õmmõtõ, aduwõy naboo kĩ balna ma ngĩ anyi Levi Mẽlthĩthẽdẽk anyinit codoi kaalĩy wũk ẽẽn goolliok õmmõtõ, 10 nyatarka balna ma ngĩ aruumõy Mẽlthĩthẽdẽĩ, kĩ Abraham nga balna paadĩrnya cĩk Levi aatĩ ẽla ĩcĩ Abrahamĩ.
11 Mĩ balna da kumuddia eeta gõõl cĩ ũũngnothĩcẽ gerthetini cĩnĩng, kaalĩy ĩcĩk cavawu ĩcĩk paadĩrnya,e cĩk tatũk cĩ Levi kĩ balna ngĩ aduwa Ngiranĩ cĩ Mutha, nyia nẽnnẽ kidiim Nyekuci kitiona paadĩr, ĩmma cĩ õgõõn kĩ Mẽlthĩthẽdẽĩ, ĩthõng athii cĩ itiona tatũga cĩ Aarõnĩ wo?
12 Nyatarka mĩ ũũkcĩ gõõl cĩ eberianĩ paadĩrĩ, adiim thẽk Ngiranĩ buu ngĩ ũũkcĩ. 13 Paadĩrĩ cĩ kõthõõth naaga wo, ẽẽn et cĩ tatũk cĩ rẽẽng, ĩthõng ngaanĩ kiticantõĩ eeta cĩgĩnnẽk ngĩtĩ todongintiof kĩ paadĩrnya. 14 Kagga naaga vẽlẽk aku balna Makayyioiti cĩnac Yesu tatũga cĩ Yudaa, ĩthõng ngaanĩ balna kuduwa Mutha thõõth, cĩ woccia avvunni paadĩrnya tatũga ĩcĩ Yudaa kũdũt.
Aduwõy Yesu kĩ Mẽlthĩthẽdẽk
15 Agawẽ balna tũwũwẽnĩtĩ coo õrrõt, balna ngĩ ikiyyia edenyiay paadĩrĩ cĩ rẽẽng cĩ eberiay cĩ aduwõy kĩ Mẽlthĩthẽdẽk thõng. 16 Ikiyyia ĩthĩ Yesu paadĩr, athii nẽ cĩ ẽẽn paadĩr, nyatarka ẽẽn nẽ et cĩ tatũk cĩ Levi, ĩthõng thĩ, aku ẽẽn nẽ paadĩr tiirthẽta cĩ rũgẽt cĩ alna kũdũt. 17 Aduwa balna Nyaraga cĩ Nyekuco athĩ ne,
“Eeni niia paadĩr cĩ alna kũdũt
avvu kĩ Mẽlthĩthẽdẽĩ.”g
18 Ikiyyia ũtũngothĩk gõõl wũ rẽẽnĩ, wũ balna gõõ eberianĩ paadĩrnya dõõkĩthĩ, nyatarka balna ĩthĩnga gõõl neccie tiir, ĩthõng athii cĩ adĩman gimma buu. 19 Nyatarka balna athii cĩ adĩmaneei Ngiranĩ gii ĩmma kũbũna, ĩthõng thĩ, yoko okomit thinneti cĩgaac, nyatarka muwẽẽnĩt cĩ abũnna cĩ mayyĩ cĩ anyet ageeta kivitia kĩĩtõ õjõõntĩ ĩcĩ Nyekuco.
20 Ĩthõng gõõl cĩ jõr cĩ ẽbẽranĩ Nyekuci paadĩr, ẽbẽra kõngana cĩnnĩ. Avvu balna doolia cĩk dõõlĩ cĩk Aarõnĩ ẽẽn paadĩrnya kaganoko athii kõnganĩ tõ, 21 ĩthõng thĩ, balna ikiyyia Yesu ĩthĩ paadĩr kõngana. Nyatarka balna ethei Nyekuci ĩnõõnõ ne,
“Ũbũtan balna Makayyioiti, ĩthõng ĩnĩnga
katĩ ũũwũ nẽ muwẽẽnĩt cĩnnĩ naboo,
wũ balna athĩ ne, ‘Eeni niia
paadĩr cĩ alna kũdũt.’ ”h
22 Ĩthõng nyatarka kõngan coo, ikiyyia anyet Yesu ngẽrẽmngẽrẽm cĩ mayyĩ.
23 Ĩthõng thĩ, yoko aatĩ balna paadĩrnya cĩk meelĩk, nyatarka balna alaam daaĩthĩ ĩnõõgõ ngatĩ ẽnnẽ paadĩrnya kũdũt. 24 Ĩthõng thĩ, Yesu cĩ arũgĩ kũdũt wo, alna paadĩrthẽt cĩnnẽ kũdũt. 25 Ĩthõng thĩna, thẽk ũũlĩ Yesu ngatĩ ẽẽlanẽ eet cĩk avvu ĩcĩ Nyekuco nyatarka ĩnõõnõ, nyatarka aavĩ nẽ dõõkĩthĩ kĩĩ kalawõõĩ ĩnõõgõ ĩcĩ Nyekuco.
26 Ẽẽn Yesu paadĩr cobbi cĩ kadiim naaga, nyatarka abũnna nẽ calla, ĩthõng aavĩ nẽ kothii gerthetin. Ĩthõng athii nẽ cĩ arũmẽ kĩ gẽrẽthanniok, ĩthõng anyĩwothi ĩnõõnõ ngĩtĩ obbi cĩ bulẽnto tammuatiddina. 27 Athii Yesu woccia cĩ apak gii cĩ cavĩto kĩ gõõ ngĩ apak paadĩrĩ cobbi kaal cĩk cavawu, nyatarka gerthetin cĩnnĩ ĩcĩ owu, ĩthõng naboo cĩ gerthetin cĩ eetu vurtia. Ĩthõng thĩ yoko, ẽlẽmaaĩ Yesu ẽlẽ cĩnnĩ kõr codoi doo, kĩĩ gii cĩ cavĩto, nyatarka gerthetin cĩ eetu vẽlẽk. 28 Ĩthõng thĩ, balna ẽbẽra Ngiranĩ paadĩrnya cĩk obbitik cĩk alalĩ. Ĩthõng thĩ, ma balna vurtia cĩ anyĩhĩ Nyekuci eet Ngiran, ikiyyia ẽbẽra nẽ Ngẽrĩnĩ kõngana kĩĩ paadĩr cobbi, cĩ abũnna õrrõt cĩ kothii gerthetin kũdũt.