6
Ĩthõng thĩna, athii naaga cĩ kadiimnya ngĩ kalimaneccung agiitia, thoothonniok cĩk ootinu, cĩk thõõth cĩ Kiristo naboo. Kadiim ngĩ kõvvõ naaga ĩcĩ owu, limana ĩcĩ anyung agiitia ĩĩtõ makatẽ, athii naaga cĩ kadiimnya ngĩ kalimannung agiitia naboo, thõõtha ĩcĩ aduwuanu niigia thoothonniok cuguk cĩk gerthek, cĩk ayaha daaĩth kĩ leminit cunung ĩcĩ Nyekuco. 2 Athii woccia cĩ kalna kalimanecung agiitia thõõth cĩ batithimowo, kĩ lawinit cĩ gatano, kĩ rũgũthanĩt cĩ daakciawu, kĩ thoothonniok cĩk ẽtẽdĩcẽ Nyekuci eet decianta ĩcĩ loocu. 3 Ĩthõng yoko, ma ngĩ ẽlẽmĩ Nyekuci, kalimannung katĩ naaga agiitia thoothonniok cĩk tiirtik.4 Nyatarka õkõmĩ katĩ õrrõt ĩcĩ eet, wũk balna agaacõ thõõth cĩ Nyekuco vẽlẽk, ngatĩ õbõdanĩ kivitia kũtũngtek gerthetin, ĩthõng umuddia nẽẽgẽ anyinit cĩ tammutiddino, ĩthõng otholit kaal cĩk anyi Ririwacĩ cĩ Dĩhĩmĩ, 5 ĩthõng atarit mẽdĩth cĩ thõõth cĩ Nyekuco, kĩ makathĩt cĩ rũgẽt cĩ katĩ aku kõr ĩmma, 6 ĩthõng yoko ũtũbũrĩt Nyekuc. Õkõmĩ õrrõt ĩcĩnĩng ngatĩ ũũngnĩcẽ gerthetin cĩnĩng, nyatarka ũtũbũrĩt nẽẽgẽ Ngẽrtĩ Nyekuco, ĩthõng aavutõ kĩcĩ ododdi ĩnõõnõ kurucea naboo, ĩthõng anycĩk Kiristo ngawani nguumtẽnẽy ĩcĩk meelitino.
7 Agatan Nyekuci mana kuruk tammu, ĩthõng ibbir jurrung, kĩĩ katĩ kẽtẽda baatĩnnẽ labĩ cĩk meelĩk. 8 Ĩthõng thĩ, mana cĩ abĩththĩ kõthõwa kĩ nyaanya, ẽẽn mana cĩ kaganoko cĩ ĩcĩĩnẽ, ĩthõng katĩ ũtũũthẽ.
9 Gõtõõnõga kĩ ngõõnõga, kõdẽ woyyia ngĩ kõthõõththa naaga ketee, kagayya naaga ngatĩ adĩmannu kaal cĩk abũnna cĩk mayyĩk cĩk atican eeta cĩk eliay. 10 Athii Nyekuci cĩ angalneei et ĩmma tuu, ĩnõõnõ thĩ cĩ athii nẽ cĩ ẽrẽhẽcĩ tiiciowa cuguk, kĩ mĩnan cĩ ẽyẽlanu niigia ngatĩ eelu balna eet cĩgĩnĩk, kĩcĩ ngaanĩ arkiccu eelu noko wo. 11 Kadiimnyung naaga agiit codoi codoi, elliõy nyaguana dõõkĩthĩ kõdõlan turnanẽt, kĩĩ katĩ kikiyyia muwẽẽnĩtĩ cunung cĩ abũnna kĩĩ dĩdĩ. 12 Athii cĩ kadiimnyung naaga agiitia ĩĩtõ nyamuttiok, kadiimnyung eyehethit eet wũk balna ayait leminit kĩ moginit, ĩthõng ivitia umuddia thõõth wũ balna ũbũtanek Nyekuci ĩnõõgõ.
Ẽẽn thõõth cĩ aduwa Nyekuci dĩdĩ
13 Balna ngĩ abũtaneei Nyekuci Abraham thõõth, athii balna eeti ĩmma cobbi cĩ ijiar Nyekuc tõ, ĩnõõnõ thĩ cĩ balna abũtan nẽ thaarĩy cĩgĩnĩk dõ, 14 athĩ ne, “Kagatanni katĩ na aniitia dĩdĩ, ĩthõng kaanyi aniitia dõõlĩ cĩk meelĩk õrrõt.”a 15 Ma natẽ, ikiyyia balna ẽrẽẽwõy Abrahamĩb kuumuc, kikiyyia kẽyẽla Nyekuci thõõth wũ balna abũtana nẽ.
16 Ĩthõng thĩ, yoko mĩ abũtan eeta kõngan, abũtan nẽẽgẽ ĩcĩ et cobbi cĩ ijiar ĩnõõgõ, kĩĩ katĩ kuthutti nẽẽgẽ kõngan nĩcẽ, ĩthõng ĩbĩlĩ kõnganĩ neccie pẽkan vẽlẽk. 17 Ĩthõng naboo, abũtan balna Nyekuci ẽla cĩnnĩ mĩn kõngan, kĩĩ katĩ kagaacõ eeta cĩgĩnnẽk wũk balna aduwaai nẽ kõngan ngatĩ ẽnnẽ thõõth cĩnnẽ dĩdĩ. 18 Ĩthõng thĩ, anyet balna Nyekuci thõõth cĩ abũtan nẽ kĩ kõngan cĩnnĩ, kĩĩ kallia thoothiowa cĩkkõ cĩk ẽẽn ramma wo, nyatarka athii Nyekuci cĩ õvõlõngĩ. Ĩthõng thĩ, naaga wũk balna kõõt ĩcĩ Nyekuco wo, kĩĩ katĩ kaanyĩk nẽ thinneti cĩgaac kokomit, nyatarka kẽrẽ muwẽẽnĩt cĩ abũnna cĩ ngaanĩ avĩya ĩcĩ owu. 19 Kẽyẽk naaga muwẽẽnĩt cĩnac cĩ abũnna cĩ õkõmĩ õrrõt, cĩ agamnyet ageeta. Ẽhẽẽt muwẽẽnĩtĩ cĩnac cĩ abũnna wo, cẽrẽm cĩ ẽngẽr Ciith cĩ Nyekucoc kõdõlan Ngĩtĩ Angiranni cĩ Dĩhĩmĩ Õrrõt. 20 Ẽẽn ngineccie ngini wũ balna utuwanehiet Yesu ageeta natẽ vẽlẽk. Ikiyyia ĩĩ nẽ Paadĩr cobbi cĩnac cĩ alna kũdũt, kĩ balna Mẽlthĩthẽdẽĩ.