Ẽẽn Yesu Paadĩr cobbi cĩ ẽẽn tamatioit
5
Eberiay paadĩrĩ cobbi vẽlẽk eetĩnẽy, ẽẽn nẽ ticciannioit cĩnĩng nguuma cĩ Nyekuco, kaanyĩk Nyekuc anyintiok kĩ kaal cĩk cavawu cĩk ẽnyẽẽĩ gerthetin cĩ eetu. 2 Ẽẽn paadĩrĩ cobbi buu et cĩ athimatĩthĩ, ĩthõng aga ngatĩ amannĩcẽ eet cĩk ẽrẽk thõõtha, ĩthõng ithiicõ, nyatarka ẽẽn nẽ buu et cĩ alalĩ. 3 Ĩnõõnõ thĩ cĩ õtõdõngẽcĩ nẽ Nyekuc kaal cĩk cavawu, cĩk adĩm gerthetin cĩ eetu, kĩ gerthetin cĩnnĩ buu. 4 Athii woccia eeti cĩ ẽbẽraai ẽlẽ cĩnnĩ makathĩt kĩĩ paadĩr cobbi mĩn tõ, Nyekuc dõ cĩ ẽbẽra ĩnõõnõ kĩ balna ngĩ ẽbẽra Aarõn.a5 Ĩnõõnõ thĩ balna cĩ athii cĩ adiimi Kiristo makathĩt cĩ paadĩr cobbi mĩn, Nyekuc balna cĩ aduwaai ĩnõõnõ ethei ne,
“Eeni niia Ngẽrnanĩ cannĩ,
ĩthõng yoko kõr coo,
kikiyyia kĩthĩ na Baaba cunni.”b
6 Aduwuay balna ngamanĩ Nyaragawa cĩ Nyekuco athĩ ne,
“Eeni niia paadĩrc cĩ alna kũdũt
avvu kĩ Mẽlthĩthẽdẽĩ.”de
7 Wathinniowẽy wũk balna aavẽ Yesu loota ngato, ala nẽ Nyekuc, ĩthõng utuluwik ĩnõõnõ cĩ woccia ẽẽla ĩnõõnõ daaĩtha. Ma natẽ, ĩthĩrar Nyekuci ĩnõõnõ, nyatarka balna athĩrar Yesu thõõth cĩnnĩ. 8 Kõdẽ woyyia balna ngĩ ẽẽn Yesu Ngẽrtĩ Nyekuco, iliman balna nẽ thõõth cĩ tongolintio pĩrnanta ĩcĩnnĩ, 9 ĩthõng ma balna ngĩ iliman nẽ kaal vẽlẽk pĩrnanta ĩcĩnnĩ, ikiyyia ẽẽl nẽ eet vẽlẽk wũk athĩrar ĩnõõnõ. 10 Ngaatĩ balna aku Nyekuci ẽbẽranĩ ĩnõõnõ kĩĩ paadĩr cobbi, kaavu kĩ balna Mẽlthĩthẽdẽĩ.
Egeenyit nyĩ aburnu thõõth cĩ Nyekuco
11 Kõdẽ woyyia mĩ maka thõõth cĩ adiim ngĩ kaduwaccung naaga agiitia, ĩthõng thĩ kẽnnẽ, kamacina naaga gõõla cĩ kẽkẽbacung agiitia thõõth coo, nyatarka athii cĩ athĩknenu niigia tamanoko. 12 Iittu balna niigia lemnyiok baa lõõla kuumuc, ĩthõng thĩ, woccia yoko ilimantu goonogu thoothonniok cĩk ẽẽn dĩdĩ cĩk Nyekucak. Ĩthõng thĩ, monogo kẽnnẽ ngaanĩ adiimnyu et ĩmma kilimanung agiitia thoothonniok cĩk Nyekucak cĩk terehiantak. Ngaanĩ attiyyu niigia kĩ doolia cĩk ngaanĩ adiim aam ira, ĩthõng athii woccia nõõnõ cĩ anyĩwothi ahata. 13 Eeti ĩmma cĩ ngaanĩ adiim ir, aavĩ nẽ kĩ doolec cĩ dĩcĩ cĩ adiim ir dõ, ĩthõng athii nẽ cĩ aga thoothonniok cĩk abũnna cĩk edeemothi. 14 Ẽẽn ahat cĩ õkõmĩ cĩ et cobbi dõ, ĩthõng alna aliman ngatĩ ahadĩ gii cĩ abũnna kĩcĩ gerthe kuumuc.