Ngĩtĩ Yuwuthõn cĩ eet cĩk Nyekucak
4
Ĩthõng thĩna, abũnna thõõth wũ balna abũtan Nyekuci athĩ ne, kithio woccia naaga ngĩtĩnnĩ cĩ yuwuthono,a ĩthõng kadiim ngĩ karĩcana naaga, kĩĩ katĩ kithii eeti ĩmma ĩcunung cĩ abacĩ ngatĩ iithiowĩ nginicẽ. 2 Kĩthĩraritõ balna naaga Nyemut cĩ Abũnnab wo, kĩ balna ngĩ athĩrar eeta cĩk Ĩthraĩlĩ. Ĩthõng thĩ, ũtũbũrĩt nẽẽgẽ thõõth wũ balna ĩthĩraritõ vẽlẽk. Ma natẽ, ĩthĩnga Nyemut coo ẽẽl ĩnõõgõ, nyatarka athii cĩ ayak nẽẽgẽ leminit. 3 Naaga cĩk balna kẽlẽmĩ Nyemut coo wo, kithio naaga ngĩtĩnnĩ cĩ yuwuthono ẽẽ, kĩ balna ngĩ aduwa Nyekuci athĩ ne,“Ngaatĩ balna kabũtanẽ na varacintia cannĩ kathĩ ne,
‘Athii katĩ cĩ ẽhẽẽt nẽẽgẽ ngĩtannĩ cĩ yuwuthono kũdũt.’ ”c
Aduwa balna Nyekuci thõõth coo, kõdẽ woyyia balna ngĩ ẽdẽcak nẽ tiic cĩnnĩ, itina wũ balna ẽngẽnycanĩ looc. 4 Õthõõth balna Nyekuci thõõth cĩ ẽnnẽ lõõcĩ tũrgẽrẽm Nyaragawa cĩnnĩ athĩ ne, “Ikiyyia uyuwuth Nyekuci balna ma ngĩ ẽẽn lõõcĩ tũrgẽrẽm.”d 5 Ĩthõng balna naboo tõõna wũ eheeddi ĩcowu aduwa athĩ ne, “Athii katĩ nẽẽgẽ cĩ iithio ngĩtĩnanĩ cĩ yuwuthono.”e
6 Ngaanĩ oyyi ngĩtĩ yuwuthono wo, kĩĩ katĩ keteeitõ eeta gwuak, ĩthõng thĩ, eeta wũk balna athĩrar Nyemut cĩ Abũnna, ĩthĩnga iithio ngĩtĩ yuwuthono ẽẽ, nyatarka ũtũbũrĩt nẽẽgẽ ngatĩ athĩknĩ Nyemut coo. 7 Ĩthõng thĩna, naboo arĩk Nyekuci kõr ĩmma, ĩthõng ũtũvvũ ĩthĩ ne, “Kõr coo,” balna ngĩ aduwa nẽ thõõth coo kũtũga cĩ Davidef vurtia cĩ erkinya cĩk meelĩk, kĩ balna ngĩ aduwuay thoothiowẽy ĩcĩk owu athĩ ne,
“Kõr coo, mĩ ithiktu molook cĩ Nyekuco,
nyĩ anyiccu ooti cuguk kokomit.”g
8 Ma baalia kaanyĩk Jothuah eet yuwuthõn, athii woyyia baalia Nyekuci cĩ õthõõth thõõth cĩ kõr ĩmma naboo. 9 Ĩthõng thĩ, ũbũtanek balna Nyekuci eet cĩgĩnĩk ngĩtĩ yuwuthono, 10 nyatarka eeti cĩ ittio ngĩtĩ yuwuthono cĩ Nyekuco, ayuwuth katĩ nẽ buu tiica cĩnnĩ, kĩ balna ngĩ ayuwuth Nyekuci tiica cĩnnĩ. 11 Ĩthõng thĩna, yoko kadiim thẽk ngĩ kithio naaga ngĩtĩ yuwuthõn nĩcẽ õrrõt, kĩĩ katĩ kithii eeti ĩmma, cĩ uungnothi ngatĩ iithio ngĩtĩ yuwuthono wo, nyatarka õwõb nẽ thoothonniok cĩk eet cĩk Ĩthraĩlĩ, wũk balna abũrĩ Nyekuc.
12 Nyatarka arũgĩ thõõth cĩ Nyekuco, ĩthõng tiir. Ĩthõng lẽhẽd õrrõt õgõõn kĩ nyetubat, cĩ ẽtẽd thĩnĩn, kĩ ririwac, kĩ lobulet, kĩ kuthungti, kĩ konyoc. Amũda nẽ kaal cĩk kadiim naaga, kĩ muwẽẽnĩt thinnetinẽy cĩgaac. 13 Athii gii vẽlẽk wũ balna ẽngẽnyca Nyekuci cĩ woccia alugunyi kẽbẽrẽnĩy cĩgĩnĩk, acĩn nẽ gii vẽlẽk mũrũũr, nyatarka kaduwai katĩ naaga ĩnõõnõ thõõth vẽlẽk cĩ abũnna, kĩ thõõth cĩ gerthe cĩ balna kĩdĩmanit naaga.
Ẽẽn Yesu paadĩr cobbi cĩ ijiar vẽlẽk
14 Ĩthõng thĩna, kayak naaga paadĩr cobbi cĩ balna ũũk tammuatiddina, ĩnõõnõ nẽẽn Yesu Ngẽrtĩ Nyekuco. Ĩnõõnõ thĩ cĩ kathĩ ne, abũnna thẽk ngĩ kathũnnĩ thõõth cĩ kaduwa naaga, nyatarka kẽlẽmĩ ĩnõõnõ. 15 Agayyet paadĩrĩ cobbi coo ageeta ngĩ kalalĩ, nyatarka ĩtĩmanẽ balna nẽ pĩrnanta goolliowẽy vẽlẽk kĩ naaga, ĩthõng thĩ, athii gerthetini ĩcĩnnĩ tõ! 16 Kõõt thẽk naaga vẽlẽk taabawa cĩ bũnnatin cĩ Nyekuco mũrũũr, kothii tongolinit, kĩĩ katĩ woccia kũrũbta tamati, kĩ bũnnathĩt cĩ eliet nẽ ageeta, katĩ ngĩ kadiim elinit.