Maka Yesu ijiar Mutha
3
Ĩthõng thĩna, gõtõõnõga kĩ ngõõnõga, ẽbẽrawung balna Nyekuci agiitia, ĩĩtõ eet cĩgĩnĩk cĩk callĩk thinneti cuguk. Ĩthõng thĩ, ummuit Yesu cĩ kathĩ naaga ne, ẽẽn nẽ tionniait, ĩthõng ẽẽn paadĩr cobbi cĩ Nyekuco cĩ kaduwai naaga eet ketheei ne, kẽlẽmĩ naaga ĩnõõnõ. 2 Athĩrar balna Yesu Nyekuc balna ngĩ ẽbẽra nẽ ĩnõõnõ, ĩthõng aavu Yesu kĩ balna ngĩ athĩrar Muthaa Nyekuc, ngatĩ aticanothĩcẽ eet vẽlẽk cĩk Nyekucak. 3 Ĩthõng thĩ, ẽtẽmanõy Yesu kĩ bulẽnĩt cobbi kijiar Mutha, kaavu kĩ tengenyioiti cĩ ẽngẽnyẽt ciith kĩdĩhĩthẽ nẽ, kijiar ngatĩ kadĩhĩthĩ ciith. 4 Nyatarka ayak ciith vẽlẽk tengenyioit, ĩthõng thĩ, ẽngẽnyca Nyekuci kaal vẽlẽk.5 Ẽẽn balna Mutha ticciannioit cĩ aticanothi eet cĩk Nyekucak jurrung, ĩthõng uduwa mũrũũr thoothonniok cĩk Nyekucak cĩk katĩ avvu edenyiay kõr ĩmma. 6 Ĩthõng thĩ, ẽẽn Kiristob Ngẽrtĩ Nyekuco, cĩ agam eet cĩk Nyekucak jurrung. Ĩthõng keegin naaga eet nĩĩkẽ, katĩ ngĩ kagam thinneti cĩgaac kokomit, ĩthõng kayait muwẽẽnĩt cĩ abũnna ĩcĩ Kiristo.
Yuwuthõn cĩ eet cĩk Nyekucak
7 Ĩthõng thĩ, kĩcĩ balna aduwa Ririwacĩ cĩ Dĩhĩmĩ athĩ ne,
“Kõr coo, mĩ ithiktu molook cĩ Nyekuco,
8 nyĩ anyiccu ooti cuguk kokomit,
kĩ balna ngĩ abũrna aneeta eeta cĩk Ĩthraĩlĩ,c
wũk balna atĩmanna aneetad baatha cĩ õdõõĩe kak,
9 nginiwa wũ balna atĩmania aneeta baajigu, kõdẽ woyyia
balna ngĩ ĩcĩnĩt nẽẽgẽ thoothonniok cĩk anaat eeta,
wũk balna kadĩmani na erkinya eet ramma.
10 Ĩnõõnõ thĩ cĩ balna kavaracĩcẽ na eet nĩĩkẽ erkinyiay nĩĩkẽ,
kathĩ ne, ‘Ẽẽn nẽẽgẽ eet cĩk abũrna aneeta thinnetinẽy cĩgĩk,
ĩthõng ngaanĩ kagaacõ goolliok cĩganĩk.’
11 Ngaatĩ balna kabũtanẽ na varacintia cannĩ kathĩ ne,
‘Athii katĩ cĩ ẽhẽẽt nẽẽgẽ ngĩtannĩ cĩ yuwuthono kũdũt.’ ”f
12 Gõtõõnõga kĩ ngõõnõga, ĩcĩnĩt jurrung nyĩ akidiannu, kõdẽ ayakcu thinneti cĩk gerthek cĩk anyung ũtũngtek Nyekuc cĩ arũgĩ. 13 Ĩthõng thĩ, etheryioy nyaguana dõõkĩthĩ, ma ngĩ ẽẽn, “Kõr coo,” kĩĩ katĩ kithii cĩ ĩgõõl gerthetini et ĩmma, ĩthõng õkõm õõ cĩnnẽ ngatĩ athĩknĩ thõõth cĩ Nyekuco. 14 Nyatarka ngĩ kathũnnĩ naaga thõõth cĩ Nyekuco kuumuc kadaait, kaavut kĩĩtõ tiirti lemintia ĩcĩ kẽlẽmĩ Kiristo kĩ balna ĩcĩ owu, kõvvõ katĩ kõthõl naaga vẽlẽk kaal cĩgĩnĩk kõdõwẽ. 15 Ĩthõng kĩcĩ athĩ Nyaraga cĩ Nyekuco ne,
“Kõr coo, mĩ ithiktu molook cĩ Nyekuco,
nyĩ anyiccu ooti cuguk kokomit,
kĩ balna ngĩ abũrĩ eeta cĩk Ĩthraĩlĩ Nyekuc.”g
16 Õõ ngẽnẽ balna wũk athĩrar molook cĩ Nyekuco, ĩthõng ũtũbũrĩta? Athii wõnõ cĩ ẽẽn nẽẽgẽ eet wũk balna ayaha Mutha looca cĩ Ijibi? 17 Õõ ngẽnẽ wõnõ wũk balna anyi nẽẽgẽ Nyekuc kavarac kuumuc erkinya eet ramma? Athii wõnõ cĩ ẽẽn ĩnõõgõ wũk balna ẽgẽrẽthantõy, ĩthõng adaaitõ baatha cĩ õdõõĩ kak? 18 Õõ ngẽnẽ wũk balna abũtaneei Nyekuci, baa ma ngĩ athĩ nẽ ne, athii katĩ nẽẽgẽ cĩ iithio ngĩtĩnnĩ cĩ ayuwuthi nẽẽgẽ, athii wõnõ cĩ ẽẽn ĩnõõgõ wũk balna abũrĩ thõõth cĩ Nyekuco? 19 Ĩthõng thĩ, kĩcĩnĩt naaga ngĩ athii balna cĩ iithio nẽẽgẽ ngĩtĩnnĩ cĩ yuwuthono wo, nyatarka abũrĩ nẽẽgẽ thõõth cĩ Nyekuco.