Aavut vĩrĩngĩng
2
Kuthutti naaga thẽk thõõth wũ balna ilimanothĩhet ageeta, ĩthõng kĩthĩraritõ jurrung, kĩĩ katĩ kithii cĩ kathanni taktak, ĩthõng kũtũngtek thõõth cĩ ẽẽn dĩdĩ. 2 Nyatarka balna aduwa anjĩlẽta thõõth cĩ Nyekuco wũ ẽẽn dĩdĩ, ĩthõng balna gõõ ngĩ ẽgẽrẽthan eeti ĩmma thõõth nĩcẽ, uuki nẽ thõng. 3 Ĩthõng thĩ, kalĩta katĩ naaga ngĩ kũtũbũrĩt thõõth cĩ tiiri coo, cĩ ẽẽlaneet Makayyioiti Yesu ageeta wo kuu? Aduwaai balna nẽ eet ĩcĩ owu thõõth cĩ elianĩt cĩnac wo, ĩthõng uduktaet nẽẽgẽ ageeta athĩ ne, ẽẽn thõõth coo dĩdĩ. 4 Aduwa balna Nyekuci naboo kir athĩ ne, ẽẽn thõõth coo dĩdĩ, gõõla cĩ aticanĩ nẽ kaal cĩk meelĩk cĩk eyeliay, kĩ cĩk anaat eeta, ĩthõng aanyĩk Ririwacĩ cĩ Dĩhĩmĩa eet anyintiok kĩcĩ adiim Nyekuci.Eyelecet Yesu ageeta gõõl cĩ keelianẽ
5 Athii katĩ Nyekuci cĩ anyi anjĩlẽt kagamit looc cĩ katĩ aku, cĩ kõthõõth naaga wo. 6 Ĩthõng thĩ, aavĩ nginima cĩ eheeddi Nyaragawa ĩcĩ Nyekuco athĩ ne,
“Nyekuc, ẽẽn eeti nyia cĩ yoko amui niia ĩnõõnõ wo,
kõdẽ ẽẽn ngẽrtĩ eeto nyia cĩ athũnnẽ niia ĩnõõnõ wo?
7 Anyi balna niia ĩnõõnõ kĩĩ dĩc kĩ anjĩlẽta,
ĩthõng anyiwu ĩnõõnõ bulẽnĩt kĩ tongolinit.
8 Anyiwu balna niia ĩnõõnõ kagam kaal.”b
Ĩthõng baa ma ngĩ anyi Nyekuci ĩnõõnõ kagam kaal vẽlẽk, ngaanĩ kũtũngek Nyekuci gimma ngatĩvõrĩ makathĩta cĩnnĩ. Ĩthõng thĩ, yoko athii naaga cĩ kacĩnĩ kaal vẽlẽk cĩk agam nẽ makathĩta cĩnnĩ. 9 Ĩthõng thĩ, kĩcĩnĩt naaga Yesuc wũ balna aritaniay kĩdĩĩc kijiar anjĩlẽta, ĩthõng yoko, anyĩk Nyekuci ĩnõõnõ bulẽnĩt kĩ tongolinit, nyatarka balna acananẽ nẽnẽ, ĩthõng adaaha, kĩĩ katĩ bũnnathĩta cĩ Nyekuco, kikiyyia nẽ woccia kĩĩ katar daaĩth, nyatarka eet vẽlẽk.
10 Nyekuc balna cĩ ẽngẽnyca kaal vẽlẽk tiirthẽta cĩnnĩ, ngatĩ anyĩcẽ nẽ Yesu kũbũna pĩrnanta cĩnnĩ, kĩĩ katĩ kẽẽla nẽ eet cĩk meelĩk kotholit bulẽnĩt cĩnnĩ. 11 Calla Yesu thĩnĩn cĩnnẽ, ĩthõng anyĩk nẽ eet kĩĩ callẽ thinneti cĩgĩk, kĩĩ katĩ kĩĩtõ nẽẽgẽ vẽlẽk dõõlĩ cĩk odoi Baatĩnnẽ. Ĩnõõnõ thĩ cĩ athii cĩ angawanĩ Yesu ngatĩ avvũyyĩ ĩnõõgõ ẽthẽcĩ ne, ẽẽn nẽẽgẽ gõtõõnõgĩ kĩ ngõõnõgĩ cĩgĩnĩk. 12 Ethei balna Yesu Nyekuc ne,
“Kaduwai katĩ na eet cĩganĩk thar cugunik.
Kadihiththi katĩ na aniitia meelitina ĩcĩ lemnyiowu.”d
13 Ĩthõng uduwa naboo Yesu ĩĩ ne,
“Kaari katĩ na thĩnĩn cannĩ ĩcĩnnĩ.”e
Ĩthõng naboo, õthõõth nẽ ĩĩ ne,
“Aneeta coo kĩ dõõlĩ wũk balna anya Nyekuci aneeta.”f
14 Keegin naaga vẽlẽk eet cĩk kayak eleeti. Ĩnõõnõ thĩ cĩ balna aku ẽẽn Yesu et kĩ naaga wo, kĩĩ katĩ woccia kuruk nẽ daaĩtha cĩnnĩ alaan cĩ ririwanĩn cĩk gerthek,g wũ ayak tiirthẽt cĩ daaĩtho. 15 Ĩthõng gõõla cĩ woccia õõganẽ nẽ eet wũk balna alna ẽẽn nyakapanak kũdũt, nyatarka ongollie nẽẽgẽ daaĩth. 16 Nyatarka dĩdĩ, athii balna nẽ cĩ aku kẽẽl anjĩlẽta, ĩthõng thĩ, aku balna nẽ kẽẽla dõõlĩ cĩk Abrahamĩ.h 17 Ĩthõng thĩna, ikiyyia balna ĩdĩmanẽ nẽ kaavu kĩ gotoonogua kĩ ngoonogua cĩgĩnnẽk goolliowẽy vẽlẽk, kĩĩ kikiyyia nẽ kĩĩ paadĩr cobbii cĩ ẽẽn thimattioit, ĩthõng adĩman tiic cĩ Nyekuco jurrung. Ĩthõng thĩ, balna aanyĩk nẽ ẽlẽ cĩnnĩ kĩĩ gii cĩ cavĩto cĩ enyeeinie thoothonniowa cĩk gerthek cĩk eetu. 18 Nyatarka balna acananni nẽ balna ngĩ atĩmanni, ũũlĩ nẽ ngatĩ ẽẽlaneet ageeta buu katĩ ngĩ katĩmanni.