Heburu 1

Nyaraga cĩ eheedothi Lemnyiok cĩk Heburu

Othoothicet Nyekuci thaarĩy cĩk Ngẽrĩnĩ

Baa lõõla, othoothi baa gõõ Nyekuci õõ baatĩ baatĩ baangietĩ kutugetinẽy cĩk eet cĩk õthõõth molook cĩ Nyekuco ngõnana cĩk meelĩk goolliowẽy mĩn, mĩn. 2 Ĩthõng thĩ, yoko wathinniowẽy cĩk aturna wo, ikiyyia Nyekuci othoothihet ageeta thaarĩy cĩk Ngẽrĩnĩ, wũ balna ẽbẽra Nyekuci ĩnõõnõ kikiyyia karagĩth kaal vẽlẽk wũk balna ẽngẽnycanĩ Nyekuci looc kĩ tammutiddin ĩcĩ Ngẽrĩnĩ cĩnnĩ. 3 Ẽẽn Ngẽrĩnẽ lanyĩt cĩ bulẽnĩt cĩ Nyekuco, ĩthõng aduwõy nẽ kĩ Nyekuc goolliowẽy vẽlẽk. Agam nẽ looc vẽlẽk tiirthẽta cĩ thõõth cĩnnĩ. Ma baa vurtia ĩcĩ ũtũũnyĩ nẽ gerthetin cĩ eet vẽlẽk, ũũk aavu loota tammuatiddina attia cĩ athio makathĩta cĩ Nyekuco. 4 Ikiyyia ĩthĩ nẽ maka ijiar anjĩlẽt makathĩta cĩnnĩ, nyatarka akattiothĩk ĩnõõnõ thara cĩk ijiar thar cĩk anyĩwothi anjĩlẽta.

Maka Ngẽrtĩ Nyekuco ijiar anjĩlẽta

5 Nyatarka nga balna kennek Nyekuci anjĩlõ ĩmma ne,

“Eeni niia Ngẽrnanĩ cannĩ,

ĩthõng yoko kõr coo,

kikiyyia kĩthĩ na Baaba cunni.”

Kõdẽ ethei ne,

“Keeni katĩ na Baatĩnnĩ,

ĩthõng ẽẽn katĩ nẽ Ngẽrnanĩ cannĩ.”

6 Ma balna itiona Nyekuci Ngẽrĩnĩ cĩnnĩ kikiyyia loota ngato, ikiyyia õthõõth nẽ ĩĩ ne,

“Anycĩk anjĩlẽt cĩganĩk vẽlẽk kakattiek Ngẽrnanĩ

kuthungti, ĩthõng ubuluthit ĩnõõnõ.”

7 Ma balna natẽ, ikiyyia õthõõth Nyekuci thõõth cĩ anjĩletu ĩĩ ne,

“Kaanyĩha na anjĩlẽt cĩganĩk kaavutõ kĩ ngõõtĩ,

ĩthõng kaanyĩha ĩnõõgõ kaavutõ kĩ lanyĩtĩ cĩ guyyio.”

8 Ĩthõng uduwa balna Nyekuci thõõth cĩ Ngẽrĩnĩ ĩĩ ne,

“Nyekuc, alna katĩ alaanthẽtĩ cunnie kũdũt,

agami katĩ niia eet cugunik tẽlẽẽa cunni ĩcĩ bũnnathĩto.

9 Amĩnani niia thõõth cĩ abũnna,

ĩthõng aaburewu thõõth cĩ gerthe,

ĩthõng thĩna, Nyekuc, Nyekuc cunni cĩ aarici aniitia

jiar goonogu cugunik, gõõla cĩ

avuudi nẽ aniitia ngooroca cĩ talintio.”

10 Aduwaai balna Nyekuci Ngẽrĩnĩ ethei ne,

“Makayyioit, ẽngẽnyca balna niia looc baa lõõla,

ĩthõng ẽngẽnyca tammutiddin athĩnẽy cugunik.

11 Athii katĩ nẽẽgẽ, ĩthõng thĩ kẽnnẽ, alna niia kũdũt,

edeciay katĩ nẽẽgẽ kĩ ceremuana kaganoko.

Ũũwũ katĩ niia ĩnõõgõ kĩ ceremuana,

kĩĩ katĩ kithiicõ kũdũt.

12 Ũũwũ katĩ niia tammutiddin kĩ looc kĩ gõõ cẽrẽma,

ũũkcĩ katĩ nẽẽgẽ kĩ cẽrẽma,

ĩthõng thĩ, alna katĩ niia kĩyokowẽ noko,

ĩthõng athii katĩ erkinya cugunniek

cĩ edeciay kũdũt.”

13 Ngaanĩ balna kennek Nyekuci anjĩlõ ĩmma ne,

“Avvu niia ĩcĩ athiit cannĩ cĩ athio,

kuumuc gii ngĩ kaarĩha mĩrõk cugunik

loota thoonĩy ĩcugunik.”

14 Ĩthõng thĩna, thẽk ẽẽn anjĩlẽta ririwanĩn kaganoko cĩk itioniay, kivitia kiticantothĩk eet cĩk katĩ eliay.