Nyaraga cĩ eheedothi Lemnyiok cĩk Heburu
Yelinit cĩ Nyaragawo
Athii balna cĩ agayyi eeti cĩ eheedi Nyaraga coo lemnyiok cĩk Heburu, ĩthõng thĩ, agayyi eeti neccie balna ngĩ ẽẽn wobjiait ĩmma cĩ Kiristo, cĩ balna ayak makathĩt meelitina cĩ lemnyiowu, ma balna itina ĩcĩ ẽhẽẽdĩcẽ Paulo Nyaragẽt cĩgĩnĩk lemnyiok cĩk kelethianya cĩk meelĩk. Eheedothi balna Nyaraga coo, eet õõgĩ cĩk Yudei cĩk balna ivitia ĩĩtõ wobjiak cĩk Kiristo, ĩthõng thĩ, kẽnnẽ balna ngaanĩ ayak nẽẽgẽ tĩman cĩ woccia ahadĩ ngĩ abũrnĩ Yesu.
Aduwa Nyaraga coo thõõth cĩ ẽnnẽ Yesu tiir lemnyiowĩy vẽlẽk, ĩthõng ẽyẽla ngatĩ ẽnnẽ Yesu Ngẽrtĩ Nyekuco, ijiar nẽ anjĩlẽt cĩk ẽlẽmĩ eeta cĩk Yudei wo. Ĩthõng thĩ, thẽk ijiar Yesu eet cĩk õthõõth molook cĩ Nyekuco cĩk Ngẽrẽmngẽrẽm cĩ Ũnũũwa, ĩthõng naboo, mayya kijiar Mutha wũ balna anyi Ngiran cĩ Nyekuco eet cĩk Yudei. Ĩthõng naboo, aduwa teheddioiti athĩ ne, mayya Yesu ijiar paadĩr cobbi cĩ Yudei, nyatarka balna nga nẽ kĩdĩman gerthetin ĩmma kũdũt, ngaatĩ thĩ balna adaaknĩ nẽ, kĩĩ gii cĩ cavĩto cĩ abũnna, ĩthõng ẽnyẽẽĩ todonginti cĩnnẽ gerthetin cĩ eet vẽlẽk cĩk ẽlẽmĩ ĩnõõnõ.
Turnanta cĩ nyaragawo, aduwa teheddioiti coo gõõl cĩ ẽlẽmĩ baajigi eet cĩk Yudei cĩk obbitik, cĩk eheeddi iyiaintiowẽy cĩgĩk Nyaragawa cĩ Ngẽrẽmngẽrẽm cĩ Ũnũũwa athĩ ne, atarnanĩ Nyekuci eet vẽlẽk, nyatarka ẽlẽmĩ nẽẽgẽ ĩnõõnõ. Ngaatĩ ẽyẽlẽcĩ teheddioiti coo, wobjiak cĩk Kiristo ngatĩ ẽthẽcĩ ne, adiim kallia kelemit Nyekuc, ĩthõng ĩthĩnga erehei thoothonniowa wũk balna atican Yesu, ĩthõng illiman ĩnõõgõ.