Nyaraga cĩ eheedi Paulo Vĩlẽmõn
Ĩthaa Paulo Vĩlẽmõn
1
Aku Nyaraga coo ĩcannĩ Paulo kĩ gotooniet Timoti,a kaavẽ na kĩjana, nyatarka kirioni nyemut cĩ Kiristo Yesu.bKẽhẽdaci na aniitia Vĩlẽmõn Nyaraga coo, gotooniet cĩ kamĩnani, ĩthõng kiticantõy kõdõwẽ, 2 kĩ ngooniet cĩnang Appia, kĩ Arkiputh cĩk aticanothi Makayyioit, kĩ ageeta kĩ nyĩcẽkẽrowocĩ, kĩ lemnyiok cĩk kelethiawakc cĩk alayyie õlõõ cunni.
3 Kalayyie na, kĩĩ katĩ kaanyung Nyekuci Baangietĩ cĩnac kĩ Makayyioit cĩnac Yesu Kiristo agiitia bũnnathĩt kĩ ganõn!
Mĩnan kĩ leminit cĩ Vĩlẽmõnĩ
4 Laang Vĩlẽmõn, kennei na Nyekuc cannĩ ne, ibalallẽ, katĩ ngĩ kalawini aniitia dõõkĩthĩ, 5 nyatarka kathĩrari na leminit cunni cĩ ayahi niia ĩcĩ Makayyioit Yesu, kĩ mĩnan cĩ amĩnanẽ niia eet cĩk Nyekucak vẽlẽk cĩk callĩk. 6 Kĩyoko mĩ othollu niigia kĩ goonogu õõgĩ leminit, kalayyie na, kĩĩ katĩ woccia kivitia kagaacõ nẽẽgẽ vẽlẽk gatan cĩ anyet Kiristo ageeta. 7 Gõtõna, aanya mĩnanĩ cunnie aneeta bẽlbẽllõn cobbi, ĩthõng ẽthẽranĩ, nyatarka aanyĩk thimatĩthĩ cunnie eet cĩk callĩk thinneti cĩgĩk kebelbelit.
Uduwak Paulo Vĩlẽmõn thõõth cĩ Õnẽthĩmõthĩ
8 Ĩthõng thĩna, gõõla ĩcoo noko, anyi Kiristo thĩnĩn cannĩ kõkõm, kĩĩ katĩ kuduwai aniitia gii cĩ woccia adiimi niia ma ngĩ aticanni. 9 Ĩthõng nyatarka mĩnan cĩnac, kĩlaleci woccia na, muk thõõth coo kaavu kĩ jinẽntĩ cĩ aku ĩcannĩ Paulo, et cĩ katanganya wo, cĩ kaavẽ kĩjana, nyatarka katicanothi Kiristo Yesu, 10 kĩlaleci õrrõt ẽẽl doolec cannĩ Õnẽthĩmõth, kikiyyia kĩthĩ na baatĩnnĩ lemintia balna ngaanĩ kaavẽ kĩjanatõ. 11 Balna ĩcĩ owu, ẽẽn baa gõõ nẽ nyakapanait cĩ kaganoko ĩcunni, ĩthõng yoko, ikiyyia ẽẽla nẽ aneeta, ĩthõng elli aniitia buu.
12 Kõdẽ woyyia ma ngĩ kamĩnani na Õnẽthĩmõth thĩnĩna cannĩ õrrõt, kitionothi na ĩnõõnõ kũwũthĩ ĩcunni. 13 Kadiimi woccia na ĩnõõnõ kũrũmtea kĩ aneeta ngato, kĩĩ katĩ kabarĩc ngĩtĩ nunni kẽẽla aneeta ngaanĩ kecebjie kĩjana, nyatarka kirioni na Nyemut cĩ Abũnna wo. 14 Ĩthõng thĩ, athii woccia cĩ kadĩmani gimma mĩn ngaanĩ lẽm niia ĩcĩ owu. Kadiimi mĩ ẽlẽmanẽ niia thĩnĩna cunni mĩn, nyatarka athii cĩ atĩnganothici thõng. 15 Kerebo yoko balna engeroonu niia kĩ Õnẽthĩmõth kĩdĩĩc, kĩĩ katĩ ijjia woccia niia ũrũmtẽ kĩ ĩnõõnõ kũdũt. 16 Ĩthĩnga nẽ aavĩ kĩ nyakapanaiti ĩcunni naboo. Ijiar nẽ nyakapanait, nyatarka ĩthĩ nẽ gotooniet cĩ kamĩnan, ĩthõng kĩmĩnana na buu ĩnõõnõ dĩdĩ. Ĩthõng yoko, ikiyyia ĩthĩ nẽ et cĩ tiiri õrrõt ĩcunni, ĩthõng aavu kĩ gotoonietĩ ĩcĩ Makayyiokto.
17 Mĩ acĩnna niia aneeta kĩ goonu, gam ĩnõõnõ jurrung kĩ woyyia ma ngĩ agamnya aneeta. 18 Ma da balna ngĩ ĩgooli nẽ aniitia, kõdẽ ayak nyabolo cunni, nyẽ kuruk nana. 19 Aneeta Paulo cĩ keheedi Nyaraga coo attia cannĩ kir. Karuweci katĩ na Paulo aniitia nyabolo cĩ balna da ayak Õnẽthĩmõthĩ. Ĩthõng thĩ, nyĩ anyi niia kerehei ngatĩ balna keelli na aniitia mũda rũgẽt cĩ jõr ĩcĩ Kiristo! 20 Gõtõna, dĩmanea thõõth coo, nyatarka Makayyioit. Thẽra aneeta, nyatarka Kiristo. 21 Kĩcĩ keheedi na Nyaraga coo wo, kagga na ngatĩ katĩ adĩmanẽ thõõth cĩ kajinni na wo jurrung, ĩthõng adĩmani katĩ niia õrrõt, kijiar cĩ kajinni na wo.
22 Diimaha ciith ĩmma kikiyyia kaavue. Kayai muwẽẽnĩt cĩ abũnna kathĩ ne, ẽdẽcĩ katĩ Nyekuci lawinit cunni, ĩthõng anya kikiyyia kicini tamanoko.
Thawinet kĩ lawinit cĩ aturna