Avuthit cĩ anyi Nyekuc kẽbẽlbẽl
4
Gõtõõnõga kĩ ngõõnõga, kalimaneccung balna naaga agiitia aavut avuthita cĩ abũnna cĩ anyi Nyekuc kẽbẽlbẽl dĩdĩ, kĩcĩ attiyyu niigia yoko wo. Ketheccung agiitia ne, ĩdĩmanit ketee õrrõt kũdũt thaarĩy cĩk Makayyioit Yesu. 2 Nyatarka agayyu niigia thõõth wũ balna kalimaneccung naaga agiitia makathĩta ĩcĩ Makayyioit Yesu.3 Adiimnyung Nyekuci agiitia ĩĩtõ callẽ, ĩthõng nyĩ oginnu kĩ ngaay taktak. 4 Ĩthõng niigia codoi codoi, abũnna ngĩ alimannu ngatĩ woccia athunnu eleeti cuguk gõõla cĩ callĩ ĩcĩ attiyyu jurrung. 5 Nyĩ eeginnu niigia nyakapanak cĩk thoothonniok cĩk abarritecu niigia cĩk ẽẽn riiriny, kĩ eeta cĩk athii cĩ aga Nyekuc. 6 Ĩthõng thĩ, nyĩ ẽgẽrẽthannu niigia lemnyioit ĩmma gõõla ĩcĩ alabẽ ĩnõõnõ. Uuk katĩ Makayyioiti eet cĩk adĩman thoothonniok cĩk ẽẽn riiriny cĩk aatĩ kĩyokowẽ, kĩ balna ngĩ kuduktiawung naaga agiitia vẽlẽk, ĩthõng kitirithung agiitia. 7 Nyatarka athii balna cĩ avvanet Nyekuci ageeta kiittia eet cĩk ngõrõnyĩk thinneti, ĩthõng thĩ, anyet nẽ ageeta kayahit rũgẽt cĩ dĩhĩmĩ. 8 Ĩthõng thĩna, eeti cĩ abũrĩ liman coo, athii cĩ abũrĩ nẽ et, abũrĩ nẽ Nyekuc cĩ anyung agiitia Ririwac cĩnnĩ cĩ Dĩhĩmĩ.
9 Athii woccia cĩ kẽhẽdaccung naaga agiitia nyaraga cĩ ketheccung ne, ĩmĩnanit eleeti cuguk, nyatarka balna illimanewung agiitia Nyekuci thõõth cĩ amĩnanonu nyaguana. 10 Ĩthõng dĩdĩ, amĩnannu niigia gotoonogu kĩ ngoonogu cĩk looc cĩ Makedonia vẽlẽk. Ĩthõng thĩ kẽnnẽ, kĩlalleccung ĩrĩcanta õrrõt ĩtooryik kijiar mĩnan wũ gõõ dõõkĩthĩ.
11 Ĩtĩmanit õrrõt ngatĩ abaawu jurrung ẽlẽmantẽ rũgẽta ĩcĩ abũnna, nyĩ abaawothicu thoothonniok cĩk eet õõgĩ, ĩthõng iticantõy athĩnẽy cuguk õrrõt kĩ balna ngĩ kaduwaccung naaga, 12 kĩĩ thĩ katĩ kotongoliewung eeta cĩk athii cĩ ẽẽn lemnyiok cĩk Makayyioktak rũgẽta ĩcunung ĩcĩ abũnna, ĩthõng katĩ ĩnĩnga niigia adiimnyu elinit ĩcĩ et ĩmma naboo.
Gõõl cĩ akuni Makayyioiti
13 Gõtõõnõga kĩ ngõõnõga, athii cĩ kadiimnyung naaga agiitia ĩĩtõ eet cĩk athii cĩ agayyu thõõth cĩ goonogu wũk balna adaaitõ vẽlẽk, kĩĩ katĩ athii niigia cĩ aluyyu ĩnõõgõ, ĩthõng aavuttu kĩ eeta cĩk athii cĩ ayak muwẽẽnĩt cĩ abũnna. 14 Kẽlẽmĩ naaga kathĩ ne, adaak Yesu balna, ĩthõng ũrũga naboo, ĩthõng naboo kẽlẽmĩ kathĩ ne, õbõdanĩ katĩ Nyekuci Yesu kĩ eet wũk balna ẽlẽmĩ ĩnõõnõ, wũk balna adaaitõ. 15 Kĩcĩ aduwa thõõth cĩ Makayyiokto wo, kaduwaccung naaga agiitia ketheccung ne, naaga cĩk ngaanĩ karũgĩ kuumuc wo, kõrra katĩ cĩ õbõdanĩ Makayyioiti, athii katĩ cĩ kuwantẽcĩ naaga goonogiet wũk balna adaaitõ vẽlẽk, 16 nyatarka allucciay katĩ Makayyioiti tammuatiddina acalcala moloowa cobbi ĩcĩ avẽẽnĩ, ĩthõng ẽgẽrẽnya moloowĩ cĩ makayyioit cĩ anjĩletu kĩ molook cĩ nyeepu cĩ avẽẽnĩ Nyekuci. Ma natẽ, arũkna katĩ eeta wũk balna adaaĩ lemintia cĩ Kiristo ĩcĩ owu. 17 Ĩthõng thĩ, naaga eeta cĩk ngaanĩ karũgĩ kõrra nĩcẽ, kõdõngtẽ katĩ naaga kõõt diitha, kõõt kũrũmtõthĩk eet cĩk arũkna ẽẽ, kurumtõy kĩ Makayyioit tammuatiddina. Ĩthõng thĩ, katĩ kõr nĩcẽ, kõõt kũrũmtẽ naaga kĩ Makayyioit kũdũt. 18 Ĩthõng thĩna, yoko, abũnna ngĩ etheronu nyaguana thoothiowẽy ĩcĩk kaduwacung na wo.