Ition Paulo Timoti kũũk ĩcĩ Thẽthalonika
3
Ma balna ngĩ athii cĩ nga kerewina kuumuc, kahaddia kiittia ne, abũnna ngĩ kattĩyya naaga dõ mĩn õlõõ ĩcĩ gaalawu cĩ Athenĩ. 2 Ĩthõng kitiontawung gotooniet Timoti kikiyyia kicinunga. Ẽẽn nẽ gotooniet cĩ katicanothĩca Nyekuc kõdõwẽ, thõõtha cĩ kirionia Nyemut cĩ Abũnna cĩ Kiristo. Kitionana balna naaga ĩnõõnõ kikiyyia kidihithung agiitia, kĩĩ katĩ kokomit thinneti cuguk lemintia ĩcunung. 3 Athii cĩ kadiimnya naaga et ĩmma kũtũngek Nyekuc, nyatarka canan wũ kamũdana naaga yoko. Agayyu balna niigia buu jurrung ngatĩ katĩ kacananini naaga. 4 Ĩthõng dĩdĩ, kaduwaccung balna gõõ naaga agiitia baa ngaanĩ karũmẽ kĩ agiitia ketheccung ne, kacananni katĩ naaga vẽlẽk. Ĩthõng yoko kivitia kacanantẽ dĩdĩ kĩcĩ thẽk agayyu niigia buu wo. 5 Ĩnõõnõ thĩ cĩ athii na woccia cĩ kereyyie wo, ĩthõng kitiona Timoti, kathĩ ne, kikiyyia kũmũda katĩ ngĩ ngaanĩ athunnu leminit cunung kĩ Nyekuc. Kongollie balna na ngatĩ woccia akuni anũmnũmmanung Thĩttanĩ agiitia gõõla ĩmmanĩ, ĩthõng koccia ikiyyia tiici wũnang balna, ĩĩ gimma kaganoko.Ayaha Timoti nyemut
6 Ĩthõng thĩ, yoko õbõda Timoti õdõlanet ageeta ngato, ikiyyia ayahahet nyemut cĩ aku ĩcunung cĩ athĩ ne, ngaanĩ athunnu niigia leminit kĩ mĩnan cunung noko. Ĩthõng naboo ĩĩ ne, amuwanetu niigia ageeta dõõkĩthĩ õrrõt, ĩthõng adiimnyu niigia ngĩ acĩnnetu ageeta, kĩcĩ kadiimnya naaga ngĩ kacinnung agiitia buu. 7 Ĩthõng thĩna, gõtõõnõga kĩ ngõõnõga, anyiccu niigia thinneti cĩgaak kokomit, nyatarka ngaanĩ athunnu leminit cunung, kõdẽ woyyia ngĩ kayakca naaga pĩrnanẽt kĩ hecinit. 8 Nyatarka okomtu niigia ĩcĩ Makayyiokto, õgõõn katĩ kĩ rũgẽtĩ cĩ jõr ĩcĩnac.
9 Kennecca woccia naaga Nyekuc ne, ibalallẽ, nyatarka ayahacetu niigia ageeta talinit nguuma cĩ Nyekuc cĩnac kuu? 10 Kalawina naaga waathĩn kĩ baalin dõõkĩthĩ thinnetinẽy cĩgaak dĩdĩ, kĩĩ katĩ woccia kaanyet Nyekuci ageeta kicintung agiitia naboo, kĩĩ keelung naaga agiitia ayait leminit cĩ tiiri.
11 Ĩthõng yoko, anya woccia Nyekuc Baangiet cĩnac kĩ Makayyioit cĩnac Yesu koiet ageeta gõõl cĩ kavvu kacinnung agiitia. 12 Anya woccia thẽk kĩtõõr Makayyioiti mĩnan kõrgẽna cunung kĩ cĩ eet vẽlẽk kĩtĩlĩth kĩĩ maka õrrõt, kaavu kĩcĩ kamĩnannung naaga agiitia buu. 13 Anyi woccia thẽk nẽ thinneti cuguk kokomit, kĩĩ katĩ ĩĩtõ niigia callẽ ĩmĩrĩt nguuma cĩ Nyekuc Baangiet cĩnac, kõrra cĩ katĩ akuni Makayyioiti cĩnac Yesu kĩ eet cĩgĩnĩk cĩk callĩk.