Tiic cĩ Paulo Thẽthalonikawa
2
Gõtõõnõga kĩ ngõõnõga, agayyu balna niigia ngĩ kẽhẽrõnacung balna naaga agiitia kĩĩ umuddia niigia thõõth cĩ abũnna. 2 Kipiryiaha balna naaga, ĩthõng kadaccieha eetĩnẽy ĩcĩk aatĩ õlõõ ĩcĩ gaalawu cĩ Vilipi, kĩ balna ma ngĩ agayyu niigia buu thõõth coo elintia cĩ Nyekuco, ngatĩ ivitia okomit thinneti cĩgaak, ĩthõng kuduktiawung agiitia Nyemut cĩnnĩ cĩ Abũnna, kõdẽ woyyia balna ngĩ abũrnet eeta ageeta õrrõt. 3 Baa ngĩ kirioniccung naaga agiitia nyemut coo athii balna cĩ katicaninia võlõng, kõdẽ kadiimnya gimma ĩcunung, kõdẽ kĩgoollung agiitia.4 Nyatarka balna elemet Nyekuci ngatĩ anyet ageeta kuthuttia Nyemut cĩnnĩ cĩ Abũnna, ĩthõng balna athii cĩ kõthõõththa naaga, kĩĩ katĩ kebelbelit eeta, ĩthõng thĩ, ẽbẽlbẽl Nyekuci cĩ acĩn thõõth cĩ thinneti cĩgaak. 5 Agayyu niigia buu nga kĩtĩmanta naaga ngatĩ kadĩhĩththa et ĩmma võlõnga, kõdẽ kadiimnya gimma ĩcunung. Ẽẽn Nyekuci buu keberec cĩnang. 6 Ĩthõng athii balna cĩ kadiimnya naaga dĩhĩthẽnĩt ĩcĩ eetu, kõdẽ ĩcunung, kõdẽ ĩcĩ et ĩmma.
7 Kavvunna woyyia kẽnnẽ balna naaga kajinnung agiitia gimma, nyatarka keeginna naaga tionniaka cĩk Kiristo. Ĩthõng thĩ, kavvunna kẽnnẽ keeginna thimattiak kõrgẽna cunung kaavuttia kĩ yaatĩ doolenu wũ gõõ athũnnĩ dõõlĩ cĩgĩnĩk cĩk kĩdĩk. 8 Kamĩnannung balna naaga agiitia õrrõt, ĩthõng kẽbẽlbẽlla ngatĩ katiyyia, ĩthõng kotholit Nyemut cĩ Abũnna cĩ Nyekuco kĩ rũgẽt cĩnang kĩ agiitia buu, nyatarka eeginnu niigia eet cĩk kamĩnannung naaga õrrõt.
9 Ĩthõng dĩdĩ gõtõõnõga kĩ ngõõnõga, nga kĩlĩtawung agiitia tiici wũnang wũ õkõmĩ kĩ pĩrnanẽt. Ahaddiawu niigia gõõl cĩ katicaninia naaga õrrõt waathĩn kĩ baalin kĩĩ kabaakta, kithii cĩ kayahaca et ĩmma ĩcunung hecinit, ngĩ kirioniccung Nyemut cĩ Abũnna cĩ Nyekuco. 10 Eeginnu niigia kĩ Nyekuc kẽbẽrẽ cĩgaak, cĩk agayyu athinnu ne, keeginna naaga eet cĩk callĩk thinneti, eet cĩk ẽdẽẽm thoothonniok kĩ eet cĩk amĩrĩ ĩcunung lemnyiowĩy. 11 Agayyu niigia buu balna ngatĩ kathunnung naaga agiitia codoi codoi jurrung, kĩ gõõ ngĩ athũnnĩ baatĩ doolenu dõõlĩ cĩgĩnĩk. 12 Ketheryung balna naaga agiitia, kamanymanyannung, ĩthõng kĩlalliewung agiitia aavut gõõla cĩ ẽtẽmanõy kĩ Nyekuc, wũ balna avvuyyung agiitia ivitia kabicoc cĩnnĩ kĩ bulẽnĩt cĩnnĩ.
13 Kennecca naaga dõõkĩthĩ Nyekuc ne, ibalallẽ, nyatarka elemtu niigia thõõth cĩnnĩ wũ balna kalimaneccung naaga. Aku balna thõõth coo ĩcĩnnĩ athii cĩ aku ĩcĩ et cĩ olli oo kaganoko. Ĩthõng iticanõy thĩ thõõth cĩnnẽ ĩcunung eet cĩk eeginnu lemnyiok wo.
14 Ĩthõng thĩ, yoko gõtõõnõga kĩ ngõõnõga, eyeheththu niigia eet cĩk kelethianya cĩk Nyekucak looca ĩcĩ Yudea wũk balna ẽlẽmĩ Kiristo Yesu. Ipiryiawu yoko niigia ukwẽẽnĩt cĩ aku eetĩnẽy ĩcĩk looc cunung, ĩthõng gõõla ĩcĩ aduwõy dõ noko, apĩrna lemnyiowa cĩk kelethianya cĩk Yudea eetĩnẽy ĩcĩk ẽẽn Yudei, 15 wũk balna aruk Makayyioit Yesu kĩ eet cĩk õthõõth molook cĩ Nyekuco,b ĩthõng itingkayyiehet ageeta buu tuu. Athii thoothiowa cĩgĩk wo, cĩ anyi Nyekuc kẽbẽlbẽl, ĩthõng naboo aaburneei nẽẽgẽ eet vẽlẽk. 16 Alamnyet balna Yudei cĩkkõ ageeta ngatĩ kirionicia eet cĩk athii cĩ ẽẽn Yudei thõõth cĩ Kiristo, kĩĩ katĩ keelliay nẽẽgẽ. Ĩthõng gõõla ĩcoo noko nga Yudei cĩkkõ, ĩtooryi gerthetini cĩnĩng noko, ngaatĩ aku avaracĩcẽ Nyekuci ĩnõõgõ yoko.
Adiim Paulo ngĩ õkkõ acĩn lemnyiok cĩk Thẽthalonika naboo
17 Gõtõõnõga kĩ ngõõnõga, ma balna vurtia cĩ kengeryiõy nõõnõ naaga kĩ agiitia kĩdĩĩc eletinẽy cĩgaac, ĩthõng ngaanĩ kahadanung naaga agiitia thinnetinẽy cĩgaak. Kamukca õrrõt gõõl cĩ kavvu kacinnung agiitia naboo, ĩnõõnõ thĩ cĩ katĩmania õrrõt gõõl cĩ kõbõdania kicintung agiitia. 18 Kadiimnya balna ngatĩ kavvu kacinnung dĩdĩ, ĩthõng balna katĩmani na Paulo kir ngatĩ kakunie ngõnana ĩcĩk meelĩk, ĩthõng thĩ, kẽnnẽ alamnyet ageeta Thĩttanĩc ngatĩ kavvunna. 19 Ma katĩ thẽk vurtia cĩ katĩ ikiyyiaĩ Makayyioiti Yesu, ngẽnẽ woccia naboo cĩ anyet ageeta muwẽẽnĩt cĩ abũnna kĩ bẽlbẽllõn, cĩ anyet ageeta kẽngẽrẽnta tiica ĩcĩnang? Athii cĩ ẽẽn agiitia? 20 Ĩthõng dĩdĩ agiitia dõ cĩk eeginnu bulẽnĩt kĩ bẽlbẽllõn cĩnang.