Nyaraga cĩ ẽẽn Codoi cĩ eheedi Paulo
Lemnyiok cĩk Kelethia cĩ Thẽthalonika
Thawinet cĩ Paulo
1
Aneeta Paulo kĩ Thĩlath kĩ Timotia cĩk kẽhẽdacung Nyaraga coo agiitia lemnyiok cĩk kelethiab cĩ kõrõõk cĩ gaalawu cĩ Thẽthalonika wo. Kẽhẽdacung agiitia eet cĩk Nyekuc Baangiet cĩnac kĩ Makayyioit Yesu Kiristo.c Anycĩk bũnnathĩt kĩ ganõn cĩ Nyekuco, kaavu ĩcunung.2 Kennecca naaga Nyekuc dõõkĩthĩ ne, ibalallẽ, nyatarka agiitia vẽlẽk, ĩthõng kabuungnyung agiitia lawintia cĩnang kũdũt. 3 Kahadana naaga dõõkĩthĩ Nyekuc Baangiet, nyatarka leminit cunung kĩ tiic cunung cĩ õkõmĩ cĩ aku mĩnana cunung, kĩ ngatĩ ayawu muwẽẽnĩt cĩ abũnna ĩcĩ Makayyioit cĩnac Yesu Kiristo.
Leminit kĩ yelinit cĩ lemnyiok cĩk Thẽthalonika
4 Gõtõõnõga kĩ ngõõnõga, kagayyia naaga ngatĩ amĩnannung Nyekuci agiitia, ĩthõng ẽbẽrawung ĩĩtõ eet cĩgĩnĩk, 5 nyatarka balna athii cĩ kayahacung naaga agiitia Nyemut cĩ Abũnnad wo kutugetinẽy kaganoko. Ĩthõng thĩ, kayahacung balna naaga Nyemut coo tiirthẽta cĩ aku ĩcĩ Ririwac cĩ Dĩhĩmĩ,e kĩ thõõth cĩ kagayya cĩ ẽẽn dĩdĩ. Agayyu niigia gõõl wũ balna katiyyia naaga kõrgẽna cunung, nyatarka agiitia. 6 Ma balna thĩna ivitiawu niigia elemtu Nyemut cĩ Yesu, ĩthõng naboo ivitiawu niigia aavuttu kĩ naaga, ĩthõng aavuttu kĩ Makayyioiti. Kõdẽ woyyia balna ngĩ ũrũbtawu niigia pĩrnanẽt cobbi õrrõt, ĩthõng thĩ kẽnnẽ, anyung agiitia Ririwacĩ cĩ Dĩhĩmĩ ebelbelit. 7 Ĩthõng yoko, ivitiawu niigia iittu yelinit cĩ lemnyiowu looca cĩ Makedonia kĩ Akeyyia vẽlẽk. 8 Ĩthõng nyatarka agiitia, ikiyyia athanothĩk thõõth cĩ Makayyiokto loociok vẽlẽk athii cĩ ẽẽn Makedonia kĩ Akeyyia dõ, ĩthõng ikiyyia agawẽ leminiti cunung ĩcĩ Nyekuco loociok vẽlẽk. Ĩthõng thĩna, ĩthĩnga woccia thẽk kẽkẽb thõõth coo, 9 nyatarka ẽkẽb balna eeta vẽlẽk thõõth cĩ elemietu niigia ageeta, kõr wũ balna kẽhẽrõnacung naaga, kĩ gõõl wũ balna uungniccu niigia kaal cĩk ala eeta kĩĩtõ nyekucnya, ĩthõng iticantothiwu Nyekuc cĩ arũgĩ, ĩthõng ẽẽn dĩdĩ. 10 Ĩthõng ẽkẽb naboo eeta gõõl cĩ ereewu niigia Ngẽrtĩ Nyekuco, cĩ katĩ aku tammuatiddina wũ balna arũgũtha Nyekuci daaĩtha. Yesu thĩ nẽẽn cĩ aku ẽẽlaneet ageeta varacintia cĩ Nyekuco, kõrra katĩ cĩ aku ẽtẽẽdĩ nẽ thoothonniok cĩk eetu.