Kõr cĩ katĩ õbõdanĩ Makayyioiti
5
Gõtõõnõga kĩ ngõõnõga, athii woccia cĩ adiim ma ngĩ kẽhẽdaccung naaga agiitia nyaraga cĩ itinnya kĩ wathinniok cĩk nyĩĩlõwẽ õõgĩ buu cĩk avvunni thoothonniowa cĩkkõ, 2 nyatarka agayyu niigia buu jurrung ma ngĩ, aavĩ kõr cĩ õbõdanĩ Makayyioitia kĩ gõõ goryiaiti ngĩ anĩha baal. 3 Mĩ ahad eeta athĩ ne, “Kattĩyya bũnnathĩta kĩ ganõna,” atdukai kẽnnẽ katĩ thaninieti cĩ athaan ĩnõõgõ kaavu, kĩ gõõ ma ngĩ alibai ngaa, cĩ anyakcie wuciithi cĩ uukcianẽ. Ĩthõng athii katĩ nẽẽgẽ cĩ alĩta.4 Gõtõõnõga kĩ ngõõnõga, nyĩ attiyyu niigia muwuratõ, kĩĩ katĩ kõrra cĩ õbõdaĩ Yesu, athii cĩ anyung kõr neccie agiitia ukulliek jien kĩ goryiaiti. 5 Eeginnu niigia vẽlẽk dõõlĩ cĩk lanyĩtak, ĩthõng iittu dõõlĩ cĩk waathĩnak, ĩthõng athii naaga cĩ keegin dõõlĩ cĩk baaliniak, kõdẽ cĩk muwurak. 6 Ĩthõng thĩna, athii woccia cĩ koogin naaga kĩ eeta cĩk oogin wo, kĩcĩntẽ, ĩthõng kaavutõ vĩrĩngĩng, ĩthõng kuthutti eleeti cĩgaac. 7 Nyatarka eeta cĩk oogin, oogin baal, ĩthõng eeta cĩk ĩbakci, ĩbakci baal. 8 Ĩthõng thĩ, naaga eeta cĩk kaatĩ waathĩna wo, kaavut vĩrĩngĩng kuthutti eleeti cĩgaac, ĩthõng karyik leminit kĩ mĩnan kaavu kĩ kiliba. Ĩthõng aavĩ muwẽẽnĩtĩ cĩ abũnna cĩ elintio, kĩ lũlũwocĩ cĩ ẽẽn thiihit cĩ arĩcana õõwa. 9 Athii balna cĩ ẽbẽranẽt ageeta Nyekuci, kĩĩ katĩ kuuket varacintia cĩnnĩ, adiim balna nẽ kivitia kũrũbta naaga elinit ĩcĩ Makayyioit cĩnac Yesu Kiristo. 10 Adaaĩ balna nẽ, nyatarka ageeta, kĩĩ katĩ kõõt kũrũmtẽ kĩ ĩnõõnõ kũdũt, kõdẽ woyyia ngaanĩ karũgĩ, kõdẽ kadaaitõ vẽlẽk. 11 Ĩthõng thĩna, etheryioy nyaguana, kĩĩ kokomit agiitia thinneti cuguk, kaavu kĩcĩ thẽk adĩmannu niigia yoko wo.
Ẽdẽcak Paulo rion
12 Gõtõõnõga kĩ ngõõnõga, kalayyung thinneti cuguk, otongollie makayyiok cuguk cĩk ũwayyung, ĩthõng iticantõy õrrõt kõrgẽna cunung, ĩthõng illimantewung agiitia thõõth cĩ Makayyiokto wo. 13 Otongollie, ĩthõng ĩmmĩnantu ĩnõõgõ õrrõt, nyatarka tiic cĩ adĩman nẽẽgẽ wo. Ĩthõng niigia buu kõrgẽna cunung aavut nyaguana ganõna jurrung. 14 Kĩlalleccung naaga agiitia õrrõt, gõtõõnõga kĩ ngõõnõga, ĩtĩrĩthĩt eet cĩk aatĩ kaganoko kiticantõy, etherit kulliak kokomit thinneti, eelit piryiak, ĩthõng omoktu thoothonniok cĩk eet vẽlẽk kõrgẽna cunung. 15 Ĩcĩnĩt jurrung, nyĩ anyiccu et ĩmma kĩdĩmanek gerthetin, et ĩmma cĩ adĩmaneei ĩnõõnõ gerthetin, ĩthõng ĩdĩmantek niigia dõõkĩthĩ thõõth cĩ abũnna eleeti cuguk mĩn, kĩ eet vẽlẽk.
16 Ebelbelit niigia dõõkĩthĩ, 17 alayyiõy dõõkĩthĩ, 18 ĩthõng entek Nyekuc dõõkĩthĩ ne, ibalallẽ thoothonniowẽy vẽlẽk, nyatarka ẽẽn coo gõõl cĩ adiim Nyekuci agiitia ĩdĩmanit nẽẽnẽn, nyatarka eeginnu niigia eet cĩk elemnyu Kiristo Yesu.
19 Nyĩ aburnu Ririwac cĩ Nyekuco, ĩthĩhĩt ĩnõõnõ, 20 nyĩ abayahannu thoothonniok cĩk aduwa eeta cĩk õthõõth molook cĩ Nyekuco. 21 Ĩthõng thĩ, ĩtĩmanit niigia kaal vẽlẽk, ĩthõng uthuutti thõõth cĩ abũnna dõ. 22 Ũtũbũrĩt thoothonniok vẽlẽk cĩk gerthek.
Thawinet cĩ Paulo cĩ aturna
23 Anycĩk niigia Nyekuc cĩ ganono kaanyung agiitia vẽlẽk ĩĩtõ callẽ. Anyĩk niia ririwac cunni kĩ muwẽẽnĩt cunni kĩ ẽlẽ cunni vẽlẽk, kaavutõ kĩmĩrĩt kũdũt, kuumuc gii ngĩ õbõda Makayyioiti cĩnac Yesu Kiristo. 24 Ĩthõng Nyekuci cĩ avvuyyung agiitia wo, athũnnĩ katĩ nẽ kõngan cĩnnĩ, ĩthõng adĩman katĩ nẽ.
25 Gõtõõnõga kĩ ngõõnõga, alayyioetu ageeta. 26 Ĩthaac gotoonogu kĩ ngoonogu vẽlẽk thawintia cĩ mĩnano. 27 Ĩthõng kalayyung na agiitia õrrõt thaarĩy cĩk Makayyioktak, ebelliek Nyaraga coo lemnyiok vẽlẽk.
28 Anycĩk niigia bũnnathĩt cĩ Makayyioit cĩnac Yesu Kiristo kaavu ĩcunung.