Gõõl cĩ kaatẽ rũgẽta cĩ jõr
3
Ũrũgũthawung balna Nyekuci agiitia kõdõwẽ kĩ Kiristo daaĩtha. Ĩthõng thĩ, yoko aryik niigia thinneti cuguk kaalĩy cĩk tammutiddinak, ngatĩ aavẽ Kiristo attia cĩ athioa ĩcĩ Nyekuco. 2 Ummuit thoothonniok cĩk tammutiddinak, nyĩ amukcu kaal cĩk looc coo. 3 Nyatarka balna aavuttu niigia kĩcĩ adaaktu vẽlẽk, ĩthõng yoko ulugunyie rũgẽtĩ cunung cĩ jõr ĩcĩ Kiristo cĩ aavĩ ĩcĩ Nyekuco. 4 Ma ngĩ õbõda Kiristo cĩ anyung agiitia ũrũgĩt wo, avvu katĩ arumenu niigia kĩ ĩnõõnõ bulẽnta.5 Ĩthõng thĩ, thẽk uruit niigia thoothonniok cĩk ẽẽn riiriny cĩk abarriteei eleeti cuguk kadaaitõ. Thoothonniok cĩk aatĩ kĩ cĩk oginnie eeta kĩ ngaay taktak, muwẽẽnĩt cĩ thoothonniok cĩk ẽẽn riiriny, thõõth cĩ abarritecu thoothonniok cĩk gerthek, kõdẽ nyĩ athinnu ngam ngam kaalĩy ĩcĩk gerthek, aduwõy ngarubitini kĩ ngatĩ alawu nyekucnya cĩk athii cĩ ẽẽn dĩdĩ thõng. 6 Nyatarka thoothonniok cĩk gerthek cĩkkõ, aku katĩ varacĩ cĩ Nyekuco. 7 Adĩmannu balna gõõ niigia thoothonniok cĩkkõ, balna ngaanĩ attiyyu rũgẽta cĩ looc coo. 8 Ĩthõng thĩ, yoko ũtũbũrĩt thoothonniok cĩk aatĩ kĩ cĩkkõ, varac, kĩ ngatĩ aaburneccu goonogu õrrõt, ĩthõng umuktu gõõl cĩ adĩmanecu ĩnõõgõ thoothonniok cĩk gerthek, kĩ kirirẽn, kĩ ngatĩ othooththu thoothonniok cĩk gerthek. 9 Nyĩ ngaanĩ ovolongecu goonogu, nyatarka utuburyu niigia rũgẽt cunung, wũ balna rẽẽnĩ kĩ thoothonniok vẽlẽk cĩgĩnĩk. 10 Iittu niigia vẽlẽk eet cĩk jõr. Ũũwũ Nyekuci rũgẽt cunung dõõkĩthĩ kuduktõy kĩ ĩnõõnõ cĩ ẽẽn Tengenyioit, ĩthõng ivitiawu katĩ agayyu ĩnõõnõ jurrung. 11 Rũgẽta ĩcĩ jõr wo, aduwonu niigia vẽlẽk thõng, kõdẽ ngĩ eeginnu Girik, kõdẽ eeginnu Yudei, kõdẽ ngĩ abũũrannu eleeti cĩk eet cĩk maacĩk, kõdẽ ngaanĩ ũbũũranit, kõdẽ eeginnu eet cĩk rẽẽng, kõdẽ eet cĩk looc cĩ Thĩthĩanĩ,b kõdẽ eeginnu nyakapanak, kõdẽ eet cĩk athii cĩ ẽẽn nyakapanak. Kiristo dõ cĩ tiiri, ĩthõng aavĩ nẽ ĩcĩnac vẽlẽk.
12 Ĩthõng thĩna, thẽk amĩnannung Nyekuci agiitia, ĩthõng ẽbẽrawung ĩĩtõ eet cĩgĩnĩk cĩk dĩhĩmĩk. Ĩthõng thĩ, atamattik goonogu, ũbũnta kĩ goonogu, ĩthõng iittu thimattiak, omogit thoothonniok. 13 Adanganit goonogu, ĩthõng atamattiwu ĩnõõgõ kĩ balna ngĩ amannicung Makayyioiti agiitia. 14 Ĩthõng thoothiowẽy ĩcĩkkõ vẽlẽk, tiir mĩnanĩ ijiar gii vẽlẽk, mĩnan cĩ arũm kaal vẽlẽk kõdõwẽ.
15 Anycĩk niigia ganõn cĩ Kiristo kagam thinneti cuguk, nyatarka balna ũtũvũwawung balna Kiristo agiitia, kĩĩ katĩ aavut ganõna, kĩ eeta cĩk ẽlẽ codoi doo. Ĩthõng entewu ĩnõõnõ ne, ibalallẽ. 16 Anycĩk nyemut cĩ Kiristo kaavu kĩ agiitia rũgẽta cunung vẽlẽk, kĩcĩ aticaninu gẽẽnyĩth cunung vẽlẽk ngatĩ alimannu goonogu. Ebelit tegelua cĩk lawintiak talintia, ĩthõng entewu Nyekuc ne, ibalallẽ. 17 Ĩthõng gii vẽlẽk cĩ adĩmannu, kõdẽ thõõth cĩ othooththu, ĩdĩmanit thaarĩy ĩcĩk Makayyioit Yesu, ngatĩ etheccu Nyekuc Baangiet nyatarka ĩnõõnõ ne, ibalallẽ.
Tĩrĩthẽntiok cĩk rũgẽt cĩ meelitin cĩ lemnyiowu
18 Niigia ngaay, ĩthĩrarit maacua cuguk gõõla cĩ adiim Makayyioiti. 19 Niigia maacuana, ĩmĩnanit ngaay cuguk, ĩthõng nyĩ aminyu ĩnõõgõ gõõla ĩcĩ gerthe thõng.
20 Niigia doolia, ĩthĩrarit baajigu kĩ ngaagu thoothiowẽy vẽlẽk, nyatarka mĩ adĩmannu ketee, ẽbẽlbẽl Makayyioiti õrrõt.
21 Niigia baajigi doolenu, nyĩ õgõrgõrrannu dõõlĩ cuguk, kõdẽ katĩ ngĩ aduuli thinneti cĩgĩk.
22 Niigia nyakapanaĩ, ĩthĩrarit thoothonniok vẽlẽk cĩk aduwaccung makayyiowa cuguk cĩk looc coo, athii cĩ ẽẽn, nyatarka ebekcung nẽẽgẽ agiitia thõng, kĩĩ katĩ kataryiawung nẽẽgẽ agiitia thõng dõ, ĩthõng thĩ, ĩthĩrarit ĩnõõgõ thinnetinẽy dĩdĩ kĩ tongolintia cĩ Makayyiokto. 23 Gii vẽlẽk cĩ adĩmannu niigia, iticanit thinnetinẽy cĩk võõrĩk, kaavu kĩcĩ aticanothicu Makayyioit, nyĩ anyiccu kaavu kĩcĩ aticanothicu eeta. 24 Ahaddia ĩĩtõ ne, amũdanu katĩ niigia anyinit thoothonniowẽy ĩcĩk abarrĩcu ĩcĩ Makayyiokto. Ĩthõng aticanothicu niigia Kiristo cĩ ẽẽn Makayyioit cunung. 25 Ĩthõng thĩ, eeti cĩ atican thõõth cĩ gerthe, adĩmanothi katĩ ĩnõõnõ buu thõõth cĩ gerthe, nyatarka athii tangalinti ĩcĩ Nyekuco tõ.