4
Niigia makayyiowa, ĩdĩmantek nyakapanak cuguk thoothonniok cĩk abũnna, cĩk edeemothi, nyatarka agayyu niigia buu ngatĩ ayawu Makayyioit cunung tammuatiddina.Therinet cĩ lawintio
2 Ĩrĩcanta eleeti cuguk lawintia dõõkĩthĩ, aavut vĩrĩngĩng, ĩthõng entewu Nyekuc kĩ eet ne, ibalallẽ. 3 Alayyioetu ageeta buu, kĩĩ katĩ woccia koiet Nyekuci ageeta gõõla, kĩĩ katĩ koottia kuduktiaha eet thõõth cĩ Kiristo cĩ ijiar gẽẽnyĩth cĩ eetu, wũ balna alugunyi cĩ yoko kecebinie na kĩjana wo. 4 Alayyiowangũ aneeta, kĩĩ katĩ woccia killiman na eet jurrung, nyatarka ẽẽn coo tiic cannĩ. 5 Aavut thẽk egeenyit jurrung katĩ ngĩ arumenu kĩ eet cĩk athii cĩ ẽẽn lemnyiok, kĩĩ katĩ kĩthĩhĩt nẽẽgẽ nyemut cĩ Nyekuco. 6 Anycĩk thõõth cĩ othooththu niigia dõõkĩthĩ kũbũna kutugu kĩ balangĩ cĩ edeemothi diati kẽmẽd, kĩĩ katĩ agaac ngatĩ woccia edeccu niigia eet vẽlẽk cĩk ajinnung agiitia gõõla cĩ abũnna.
Thawinet cĩ aturna
7 Aduwaccung katĩ Taicikathĩ nyemutua cĩganĩk vẽlẽk. Ẽẽn nẽ gotooniet cĩ abũnna õrrõt cĩ ẽẽn lemnyioit, ticciannioit cĩ katicanothĩca Makayyioit kõdõwẽ jurrung. 8 Kitionacung na ĩnõõnõ, kĩĩ katĩ agaac niigia avuthit cĩnang, ĩthõng kĩĩ katĩ kaanyĩk nẽ thinneti cuguk kokomit. 9 Iriowa Taicikathĩ kĩ Õnẽthĩmõth gotooniet cĩ athũnnĩ thõõth cĩ Nyekuco, ĩthõng kamĩnanna naaga ĩnõõnõ õrrõt, ẽẽn Õnẽthĩmõthĩ buu et cĩ kõrõõk cĩ gaalawu cunung. Avvu katĩ aduwaccung nẽẽgẽ thõõth vẽlẽk cĩ aavĩ ngato.
10 Ĩthayyung gõõna Arithtarkathĩ agiitia, cĩ karũmẽna kĩjana kõdõwẽ, ĩthayyung Marĩkõa midingni Barnabathĩb buu. Ithiktu balna niigia nyemut cĩ woccia mĩ akuni Marĩkõ kĩ agiitia, ma katĩ ngĩ arahawung nẽ agiitia, ũrũmtẽ kĩ ĩnõõnõ jurrung talintia. 11 Ĩthayyung Yesu, cĩ athĩ thar õõgĩ Juthtuth buu agiitia. Ẽẽn cĩkkõ lemnyiok dõ, eetĩnẽy cĩk ẽẽn Yudei cĩk katicanina kĩ aneeta kõdõwẽ nyatarka alaanthẽt cĩ Nyekuco, ĩthõng nẽẽgẽ anya aneeta kẽbẽlbẽl dĩdĩ. 12 Ĩthayyung Ẽpavrathĩ wunung agiitia, cĩ ẽẽn ticciannioit cĩ Yesu Kiristo. Alayyie nẽ dõõkĩthĩ õrrõt, nyatarka agiitia, kĩĩ katĩ okomit lemintia cunung, ĩthõng ĩdĩmantu diimẽnẽt cĩ Nyekuco jurrung. 13 Kĩcĩna na thõõth cĩ gõõ adĩman nẽ õrrõt, nyatarka agiitia, kĩ lemnyiok cĩk kõrõõk cĩ gaalawu cĩ Laodicea, kĩ cĩk Hairapolithi buu. 14 Ĩthayyung gotoonietĩ Luka, cĩ kamĩnanna naaga õrrõt cĩ ẽẽn akĩĩm kõdõwẽ kĩ Dẽmath. 15 Ĩthayyihangũ lemnyiok cĩk kõrõõk cĩ gaalawu cĩ Laodicea, kõdõwẽ kĩ ngooniet Nimvia, kĩ lemnyiok cĩk kelethiawak cĩk alayyie õlõõ cĩnnĩ.
16 Ma katĩ ngĩ ẽbẽlẽ Nyaraga coo, ĩthõng anyciwu kebelothĩk lemnyiok cĩk kelethia cĩ kõrõõk cĩ gaalawu cĩ Laodicea buu, ĩthõng ebellu niigia buu Nyaraga cĩ balna kitioni na ĩnõõgõ wo.
17 Uduktiak niigia Arkiputh entek ne, “Dẽcak tiic wũ balna anyi Makayyioiti aniitia.”
18 Kẽhẽdacung na Paulo thawinet coo attia cannĩ. Ahaddia thõõth cĩ kecebinie na kĩjana wo. Anycĩk bũnnathĩt cĩ Nyekuco kaavu ĩcunung.