2
Kadiimnyung na agiitia agaac ngatĩ katicaninie na õrrõt, nyatarka agiit, kĩ eet cĩk aatĩ õlõõ ĩcĩ gaalawu cĩ Laodicea, kĩ eet õõgĩ vẽlẽk cĩk ngaanĩ kurumtowa kĩ aneeta vẽlẽk. 2 Kadiimi ngĩ ketheri na ĩnõõgõ õrrõt, kĩĩ katĩ kũrũmtẽ kõdõwẽ, nyatarka mĩnan cĩnĩng. Ĩthõng kadiimi na ĩnõõgõ kagaacõ thõõth cĩ alugunyi cĩ Nyekuco cĩ ijiar gẽẽnyĩth cĩ eetu, ĩnõõnõ thĩ Kiristo, 3 cĩ alugunyi balinti cobbi cĩ gẽẽnyĩtho kĩ gawinit vẽlẽk ĩcĩnnĩ. 4 Kaduwacung na agiitia thõõth coo, kĩĩ katĩ kithii eeti cĩ ĩgoollung agiitia thõõtha cĩ aavĩ kĩcĩ ẽẽn dĩdĩ tõ. 5 Kõdẽ woyyia ngĩ keeni na rẽẽn ĩcunung, alna nga kamukcung agiitia dõõkĩthĩ. Ĩthõng katali ngatĩ kathĩknẽ ngĩ athĩ ne, attiyyu gõõla cĩ abũnna, ĩthõng elemtu Kiristo tiirthẽta.Ayaha Yesu rũgẽt dĩdĩ
6 Ĩthõng thĩ, yoko kĩcĩ elemtu balna niigia Yesu Kiristo kĩĩ Makayyioit cunung wo, aavut owobit ĩnõõnõ dõõkĩthĩ. 7 Anycĩk leminit cunung kĩtĩlĩth ĩcĩ Kiristo kĩĩ tiir leminti cunung, kĩ balna ngĩ ilimantewung eeta gwuak agiitia, kĩĩ katĩ entek niigia Kiristo ne, ibalallẽ õrrõt.
8 Nyĩ anyiccu et ĩmma kĩgoolung thoothiowẽy cĩk athii cĩ ẽẽn dĩdĩ. Aatĩ thoothiowa cĩgĩnnẽk wo kĩcĩ ẽẽn dĩdĩ, ĩthõng thĩ, athii woccia cĩ ẽẽl et ĩmma. Ẽẽn ngirantiowa cĩgĩk wo cĩk avvu ĩcĩ eet cĩk ollik kaganoko. Avvu ngirantiowa cĩgĩk wo gẽẽnyĩtha ĩcĩ looc coo, athii cĩ avvu ĩcĩ Kiristo.
9 Nyatarka aavĩ Nyekuci vẽlẽk ẽla cĩ Kiristo, 10 ĩthõng balna ivitiawu itilithu niigia jurrung lemintia cunung, nyatarka iittu eet cĩk Kiristo cĩ ẽẽn Makayyioit cĩ agam tiirthẽt kĩ makathĩt vẽlẽk. 11 Ĩthõng ẽnyẽẽĩ balna Kiristo ĩcunung thoothonniok cĩk gerthek cuguk buu, ĩthõng thĩ, athii cĩ ẽẽn bũũraninietĩ coo, cĩ abũũranini ẽlẽ cĩ et cĩ maacĩ.a Ẽẽn bũũraninietĩ coo cĩ abũũran Kiristo gerthetin cunung eletinẽy cuguk. 12 Adayyiewu balna niigia kĩ Kiristo kõdõwẽ, kõrra wũ balna agamu batithimo, ĩthõng ũrũktawu kõdõwẽ kĩ ĩnõõnõ lemintia cunung tiirthẽta ĩcĩ Nyekuco, wũ balna arũknanĩ Kiristo daaĩtha.
13 Adaaktu balna niigia, nyatarka balna eeginnu gẽrẽthanniok, ĩthõng ngaanie balna ĩĩtõ eet cĩk Nyekucak. Ĩthõng thĩ, balna anyung Nyekuci agiitia ũrũgĩt ĩcĩ Kiristo. Ngatĩ balna uungniciet nẽ gerthetin cĩnac, 14 ĩthõng ikiyyia upucan nẽ nyaraga wũ balna eheedothi thoothonniowa cĩgaac cĩk gerthek, ĩthõng otoddowek ĩnõõgõ kurucea. 15 Ma balna ngĩ ijiar nẽ tiirthẽt kĩ makathĩt vẽlẽk cĩk ẽẽn mĩrõk cĩgĩnĩk, ikiyyia aanyĩk ĩnõõgõ ngawani meelitina thõõtha cĩ ijiarĩ nẽ ĩnõõgõ kurucea.
16 Ĩthõng thĩna, thẽk nyĩ anyiccu et ĩmma ketediwung agiitia thõõth, nyatarka dainit cĩ adakcu, kõdẽ, nyatarka gii cĩ awuddu, kõdẽ nyatarka peyian cĩ erkito, kõdẽ nyatarka peyian cĩ nyĩĩlok cĩ ngaanĩ ẽnyẽrkẽ thõng, kõdẽ nyatarka Kõr cĩ Yuwuthono.b 17 Õgõõn thoothiowa cĩkkõ vẽlẽk kĩ ririwacĩ cĩ kaal cĩk ngaanĩ avvu, ĩthõng thĩ, kaala cĩkkõ ẽẽn dĩdĩ aatĩ ĩcĩ Kiristo. 18 Nyĩ anyiccu eet cĩk ẽngẽrẽn cĩk õvõlõng athĩ ne, eegin nẽẽgẽ thimattiak, ĩthõng alaacõ anjĩlẽt,c kĩgoollung agiitia. Irian nẽẽgẽ athĩ ne, kĩcĩnta thoothonniok cĩk eyeleei Nyekuci ĩnõõgõ ngonothintia. Ĩthõng thĩ, ẽẽn thõõth cĩnĩng wo võlõng kaganoko, nyatarka muwẽẽnĩt cĩ ngẽrẽn cĩnĩng cĩ abbĩththĩ thoothonniowa cĩk gerthek thinnetinẽy cĩgĩk. 19 Ĩthĩnga eeta cĩkkõ ẽẽn tõõn cĩ ẽlẽ cĩ Kiristo, cĩ ẽẽn Makayyioit cĩ elo, nyatarka arũm nẽ vatĩk cĩk ẽlak vẽlẽk kĩĩtõ codoi doo, kĩĩ kĩtĩlĩth ẽlẽ tiirthẽta cĩ Nyekuco.
Rũgẽt cĩ jõr kĩ Kiristo
20 Adaaktu balna niigia kĩ Kiristo limana cĩ eet cĩk looc coo vẽlẽk, ĩthõng naboo, alna ngaanĩ owobju niigia liman cĩnĩng noko nyia? 21 Liman cĩ athĩ ne, “Nyĩ agamnyu gii nĩcẽ! Nyĩ atarnu dainit nĩcẽ! Nyĩ awumnyu gii nĩcẽ!” 22 Edecciay katĩ kaala cĩkkõ vẽlẽk, nyatarka aari balna eeta cĩk ollik kaganoko tĩrĩthẽnĩt cĩ thoothonniok cĩkkõ. 23 Aatĩ tĩrĩthẽntiowa cĩkkõ kĩ gẽẽnyĩthĩ, cĩ woccia adĩmannu niigia. Aduwaccung nẽẽgẽ gõõl cĩ woccia alawu niigia Nyekuc, ĩthõng aduwaccung agiit ĩĩtõ thimattiak gõõla cĩ edeeththu eleeti cuguk. Ĩthõng thĩ, nẽnnẽ athii nẽẽgẽ cĩ ayak tiirthẽt cĩ woccia anyung agiitia ũtũngtek thoothonniok cĩk ẽẽn riiriny, cĩk adiimnyu niigia.