Nyaraga cĩ eheedi Paulo
Lemnyiok cĩk Kelethia cĩ Vilipi
Thawinet kĩ lawinit cĩ Paulo
1
Nyaraga cĩ kẽhẽẽda na Paulo kĩ Timotia cĩk keeginna ticcianniok cĩk Yesu Kiristob coo. Ẽẽn Nyaraga coo cĩ lemnyiok cĩk callĩk vẽlẽk cĩk Nyekucak cĩk ẽẽn wobjiak cĩk Yesu Kiristo õlõõ ĩcĩ gaalawu cĩ Vilipi, kĩ makayyiok cuguk kĩ elliok cĩgĩk.2 Kalayyie na kathĩ ne, anycĩk Nyekuc Baangiet kĩ Makayyioit Yesu Kiristo, kaanycung bũnnathĩt kĩ ganõn.
Alawõõĩ Paulo lemnyiok cĩk Vilipi
3 Kennei na Nyekuc dõõkĩthĩ ne, ibalallẽ katĩ ngĩ kahadanung agiitia. 4 Mĩ kalayyie nana, kalawinung agiitia vẽlẽk dõõkĩthĩ talintia, 5 nyatarka balna gõõ otholecangũ niigia aneeta ngatĩ kalimanẽcẽ eet Nyemut cĩ Abũnnac cĩ Kiristo, ngaatĩ balna athĩknu ĩcĩ owu kuumuc kĩĩ noko. 6 Ĩthõng kagga na Nyekuc wũ balna ithiananĩ tiic coo, cĩ abũnna kõrgẽna cunung wo, alna katĩ adĩman nẽ tiic cĩnnĩ ĩcunung, kuumuc gii ngĩ ẽdẽcak nẽ tiic cĩnnĩ, kõrra ĩcĩ katĩ õbõdanĩ Kiristo Yesu.
7 Ĩthõng thĩ, abũnna ĩcannĩ dõ ngĩ kagga kaal cĩkkõ, nyatarka agiitia, nyatarka attiyyu niigia dõõkĩthĩ thĩnĩna cannĩ. Kõdẽ woyyia balna ngĩ kaavẽ na kĩjana, kõdẽ ngĩ kaduwai eet thõõth cĩ Nyemut cĩ Abũnna, othollu niigia kĩ aneeta vẽlẽk bũnnathĩt cĩ Nyekuco. 8 Nyekuc cĩ aga thõõth cĩ ẽẽn dĩdĩ, ngatĩ kadiimi kakuni kacinnung na agiitia. Aga nẽ ngatĩ kathunnung na agiitia, kĩcĩ athunnung Yesu Kiristo agiitia.
9 Kalayyie na, kĩĩ katĩ kĩĩ mĩnanĩ cunung maka kũũk ĩcĩ owu, kĩĩ katĩ agaac niigia ngatĩ amĩnanonu õrrõt jurrung, 10 kĩĩ katĩ agaac gõõl cĩ ẽbẽranu thoothonniok cĩk edeemothi, kĩĩ katĩ thẽk ayait rũgẽt cĩ abũnna, ĩthõng iittu eet cĩk amirnu attiyyu kuumuc gii ngĩ ikiyyia kõr cĩ katĩ õbõdanĩ Kiristo. 11 Anyung katĩ Yesu Kiristo aavut iticanit tiicanẽ cĩk abũnna, cĩk ayahai Nyekuc bulẽnĩt kĩ dĩhĩthẽnĩt.
Athanothĩk Nyemut cĩ Abũnna looc
12 Ĩthõng thĩ, yoko gõtõõnõga kĩ ngõõnõga, kadiimnyung na agiitia agaac, ngatĩ kaala cĩk atdukuaca aneeta ngato wo, anyi Nyemut cĩ Abũnna kathanothĩk looc. 13 Nyatarka thõõth coo, ivitia balna agaacõ nyĩcẽkẽrĩ cĩk ẽbẽk kõrõõk cĩ alaan cobbi cĩ Rũma kĩ eet õõgĩ vẽlẽk, ngatĩ kecebinie na, nyatarka katicanothi Kiristo. 14 Ĩthõng thĩ, yoko nyatarka kecebjie na kĩjana, ivitia okomit thinneti cĩk wobjiak cĩk Makayyioktak, ĩthõng ĩĩtõ muotĩ, ngatĩ irioni nyemut cĩ Nyekuco.
15 Ẽẽn dĩdĩ, aatĩ eeta gwuak cĩk aliman thõõth cĩ Kiristo, nyatarka alĩlĩweca aneeta, ĩthõng thĩ, alimanni gwuak thinnetinẽy ĩcĩk abũnna. 16 Aliman nẽẽgẽ Nyemut cĩ Abũnna thinnetinẽy cĩk ẽẽn dĩdĩ, ĩthõng amĩnan nẽẽgẽ Kiristo, ĩthõng agaacõ ĩĩtõ ne, kaavẽ na ngato, kĩĩ katĩ kẽbẽk na Nyemut cĩ Abũnna. 17 Ĩthõng thĩ, aliman eeta gwuak nyemut cĩ Kiristo, nyatarka adiim ma ngĩ ẽẽn eet cĩk obbitik. Adiim ngĩ amaaraca nẽẽgẽ aneeta pĩrnanẽt, ngaanĩ kaavẽ kĩjanatõ. 18 Ĩthõng thĩ, nyia cĩ gerthe katĩ ngĩ irion eeta nyemut cĩ Kiristo? Thõõth cĩ addi dõ, cĩ ilimanõĩ thõõth cĩ Kiristo goolliowẽy vẽlẽk, kõdẽ woyyia ngĩ ayak eeta gwuak muwẽẽnĩt cĩ gerthe, kõdẽ ayak gwuak muwẽẽnĩt cĩ abũnna. Ĩthõng nyatarka thõõth cĩ liman coo, kẽbẽlbẽla nana. Ii, kalna katĩ na kebelbeli, 19 nyatarka kagga na lawintia ĩcunung kĩ elinit cĩ aku ĩcĩ Ririwac cĩ Yesu Kiristo,d gii wũ balna adĩmanothĩca aneeta, aku katĩ ũũkcĩ kĩĩ thõõth cĩ koogianẽ nana.
Abuluth Paulo Yesu rũgẽta kĩ daaĩtha
20 Kahadeei na muwẽẽnta kathĩ ne, athii katĩ cĩ kangawani kũdũt, ĩthõng thĩ, alna katĩ thĩnĩn cannie õkõmĩ, kĩĩ katĩ kubulie Kiristo rũgẽta cannĩ, kõdẽ woyyia ngĩ karugi, kõdẽ kadaai. 21 Mĩ karugi nana karugi, kĩĩ kiticanothĩk Kiristo, ĩthõng mĩ kadaai mayya. 22 Ĩthõng thĩ, mĩ kalna karugi na, katicani koccia na tiicanẽ cĩk abũnna. Ĩthõng thĩ, athii cĩ kagga jang cĩ woccia kẽbẽra. 23 Ẽngẽrya aneeta thoothiowa cĩk ẽẽn ramma wo kõrgẽna. Kabarriteei na ngatĩ kadaaknẽ, kĩĩ katĩ kũrũmtea kĩ Kiristo, ĩthõng thĩ, thõõth woccia cĩ abũnna õrrõt ĩcannĩ coo, 24 ĩthõng thĩ, mayya ngatĩ kalna karũknẽ, kĩĩ katĩ keelung agiitia. 25 Nyatarka kagga thõõth coo, kagga na kathĩ ne, kalna katĩ karugi, ĩthõng karũmẽ katĩ kĩ agiitia vẽlẽk, kĩĩ katĩ keelung agiitia ĩtĩlĩthĩt, ĩthõng ebelbellu, nyatarka leminit cunung, 26 ĩnõõnõ thĩ cĩ katĩ ma ngĩ kikiyyia kẽhẽrõnawung naboo, avvu katĩ ebelbelecu niigia Yesu Kiristo õrrõt, ĩthõng ũthũũcẽ bẽlbẽllõnĩ cunung, nyatarka aneeta.
27 Thoothiowẽy vẽlẽk, aavut niigia gõõla cĩ ayahacu bulẽnĩt Nyemut cĩ Abũnna Kiristo. Kõdẽ woyyia ngĩ kẽhẽrõnacung, kõdẽ athii tõ, kathihi katĩ na ngĩ athĩ ne, ayakcu niigia vẽlẽk muwẽẽnĩt gõõla codoi doo. Ĩthõng katĩ kagawa kĩthĩ ne, aticaninu niigia vẽlẽk kõdõwẽ, ĩthõng atĩmannu õrrõt ngatĩ ayahanu eet õõgĩ kivitia kelemit Nyemut cĩ Abũnna, 28 gõõla cĩ athii cĩ ongolinu mĩrõk cuguk kũdũt. Ẽẽn coo yelinit ĩcĩnĩng cĩ athĩ ne, athaan katĩ Nyekuci ĩnõõgõ, ĩthõng thĩ, ẽẽlanung katĩ nẽ agiitia. 29 Nyatarka anyung Kiristo agiitia vẽlẽk elemit ĩnõõnõ, ĩthõng naboo ipiryiawu, nyatarka ĩnõõnõ, 30 ĩthõng thĩ, yoko acanantewu niigia buu gõõla wũ balna kacanannie nana, kĩ yoko ngĩ acĩnnu niigia mĩ nga kacanannie na wo.