Ithimatit niigia kĩ Kiristo
2
Etheryung da Kiristo agiitia, ĩthõng amanymanyanung mĩnana cĩnnĩ? Arumnyung da Ririwacĩ cĩ Dĩhĩmĩ agiitia, ĩthõng uthuuttu goonogu thimatĩtha kĩ bũnnathĩta? 2 Nyatarka ẽẽn kaala cĩkkõ vẽlẽk dĩdĩ, anyangũ thĩ aneeta kẽbẽlbẽl jurrung gõõla cĩ arumenu kõdõwẽ jurrung kĩ ngatĩ amĩnannu goonogu, ũrũmĩt thinneti, ĩthõng iticantowu kõdõwẽ. 3 Nyĩ eeginnu niigia muruthiok, ĩthõng nyĩ engerenuu goonogu, ĩthõng thĩ, anycĩk eleeti cuguk kĩĩtõ dĩcẽ, ĩthõng otongolliewu goonogu kaavutõ kĩcĩ ijiaryung agiitia. 4 Abũnna woyyia ngĩ eelu goonogu kĩ ngĩ eelu eleeti cuguk.5 Anycĩk muwẽẽnĩt cunung kuduktõy kĩcĩ Yesu Kiristo thõng.
6 Kõdẽ woyyia balna ngĩ ẽẽn nẽ Nyekuc dĩdĩ,
athii balna cĩ anyi nẽ ẽlẽ cĩnnĩ kuduktõy kĩ Nyekuc thõng.
7 Ĩthõng thĩ, ũtũngek balna kẽnnẽ nẽ gii vẽlẽk,
ĩthõng ikiyyia aavu kĩ nyakapanaiti
ĩthõng itirriay ĩĩ et cĩ olli.
8 Ma balna ngĩ aavu nẽ kĩ eeti cĩ olli,
ikiyyia õbõdaĩ nẽ ẽlẽ cĩnnĩ kĩĩ dĩca,
ĩthõng ĩthĩrar thõõth kuumuc kadaak
kẽlẽm daaĩth cĩ kurucewoa buu.
9 Ĩthõng thĩna, aanyĩk balna Nyekuci ĩnõõnõ
ngĩtĩ obbi õrrõt cĩ bulẽnto,
ĩthõng akatek ĩnõõnõ thar
cĩk ijiar thaaryiok vẽlẽk,
10 kĩĩ katĩ kakatit eeta vẽlẽk kuthungti
thaarĩy ĩcĩk Yesu,
cĩk aatĩ tammuatiddina kĩ cĩk aatĩ
loota ngato kĩ cĩk aatĩ loowuanĩy,
11 ĩthõng aduwa katĩ eeta vẽlẽk athĩ ne,
ẽẽn Yesu Kiristo Makayyioit
bulẽnta cĩ Nyekuc Baangiet.
Atalanyit kĩ mũnyũnya
12 Gõtõõnõga kĩ ngõõnõga, athĩknu balna gõõ niigia dõõkĩthĩ liman cannĩ baa nga karũmẽ kĩ agiitia. Kĩ yoko ngĩ kĩthĩ na rẽẽn ĩcunung wo, iticantõy niigia õrrõt tongolintia kĩ barritõna, kĩĩ kẽyẽla kir thõõth cĩ athĩ ne, elianu niigia. 13 Nyatarka aticanni Nyekuci ĩcunung, kĩĩ katĩ kaanyung agiitia idiimit ngatĩ adĩmanu kaal cĩk anyi ĩnõõnõ katal.
14 Ĩdĩmanit thoothonniok vẽlẽk gõõla cĩ athii cĩ ongongowu, kõdẽ nyĩ ẽpẽkanonu thõng, 15 kĩĩ katĩ ĩmĩrĩt, ĩthõng iittu dõõlĩ cĩk Nyekucak, cĩk dĩhĩmĩk cĩk athii gerthetini tõ. Attiyyu niigia looca cĩ eet cĩk ẽẽn lõrĩmĩnya kĩ cĩk ẽẽn gẽrẽthanniok, ĩthõng thĩ, anycĩk thoothonniok cĩk abũnna cĩk adĩmannu niigia wo, katalanyit kaavutõ kĩ mũnyũnya. 16 Uthuutti thõõth cĩ ayaha rũgẽt jurrung, kĩĩ katĩ mĩ õbõda Kiristo, kiriani katĩ na õrrõt kathĩ ne, monogo da balna athii cĩ kaviri kõdẽ katicannie kaganoko. 17 Ĩthõng thĩ, mĩ utduuttie biyyieta cĩganniek kĩĩ gii cĩ cavĩto cĩ anyĩwothi Nyekuc,b õgõõn kĩ tiici cunung cĩ aku lemintia ĩcunung, cĩ ẽẽn gii cĩ cavĩto cĩ anyĩwothi Nyekuc. Ĩthõng thĩ, katali katĩ na, ĩthõng kebelbelit kĩ agiitia kõdõwẽ. 18 Ĩthõng gõõla cĩ aduwõy thõng, kẽbẽlbẽl woccia kĩ aneeta kõdõwẽ.
Õthõõth Paulo thõõth cĩ Timoti kĩ Epavoroditothĩ
19 Ma ngĩ ẽlẽmaaĩ Makayyioiti Yesu, kitiona katĩ na Timoti tamanoko kikiyyia kẽhẽrõnawung agiitia. Ĩthõng katĩ anya nẽ aneeta kẽbẽlbẽl ngatĩ aku aduwacia avuthit cĩ attiyyu niigia. 20 Athii eeti ĩmma cĩ kayai na cĩ alnacung agiitia cĩ aduwõy kĩ ĩnõõnõ ngato tõ. 21 Alnai eeta gwuak thoothonniok cĩk adiim nẽẽgẽ, athii cĩ alnai thoothonniok cĩk Yesu Kiristo. 22 Ĩthõng thĩ, agayyu niigia ngĩ ẽẽn Timoti et cĩ itican tiic cĩ Yesu jurrung. Kiticantowa naaga kĩ ĩnõõnõ, õgõõn nẽ kĩ doolec cannie, ĩthõng kaavu na kĩ baatĩnnẽ cĩnnẽ, ngatĩ kirionicia balna Nyemut cĩ Abũnna eeta. 23 Ĩthõng thĩna, kĩyokowo kamui kitionacung katĩ ĩnõõnõ tamanoko, katĩ ngĩ kũmũda na gii cĩ katĩ aku ĩcannĩ. 24 Ĩthõng kagga na dĩdĩ kathĩ ne, ẽlẽmahia katĩ Makayyioiti aneeta buu kikiyyia tamanoko.
25 Ĩthõng thĩ, kamui woccia abũnna ngatĩ kitionacung agiitia Epavoroditoth kõbõda kĩ agiit naboo, ẽẽn nẽ gõtõna cannĩ lemintia, õgõõn nẽ kĩ nyĩcẽkẽrowocĩ cĩ katicaninia kõdõwẽ, cĩ ẽẽn tionniait cunung wũ balna itionanu niigia kikiyyia kuthuttia aneeta. 26 Kitionacung katĩ na agiitia ĩnõõnõ, nyatarka balna abarriteei nẽ ngatĩ aku acĩnnung agiitia, omothie balna nẽ õrrõt, nyatarka ithiktu balna niigia, nyemut cĩ mõõrĩth cĩnnĩ. 27 Ĩthõng dĩdĩ, ĩmmõrĩ balna Epavoroditothĩ õrrõt kõbõwẽ kidiim kadaak. Ĩthõng balna amanni Nyekuci ĩnõõnõ kĩ aneeta buu, kẽẽlawa aneeta uluana cobbi.
28 Ĩthõng thĩna, kĩyokowo kidiima thẽk kitionawung Epavoroditoth kõbõdawung agiitia naboo, kĩĩ katĩ mĩ icintu ĩnõõnõ naboo, atalnu katĩ, ĩthõng ikiyyia woccia barritõnĩ ĩthĩ dĩc ĩcannĩ buu. 29 Ĩthaac ĩnõõnõ talintia õrrõt, nyatarka ẽẽn nẽ lemnyioit cĩ Makayyiokto, ĩthõng otongolliewu eet cĩk aatĩ kĩ nẽnẽ, 30 nyatarka balna õbõwẽ Epavoroditothĩ idiim ngĩ adaak thõõtha cĩ tiic cĩ Kiristo, ikiyyia ẽlẽmaaĩ nẽ rũgẽt cĩnnĩ kĩdĩmaneha aneeta thõõth cĩ woccia balna athii cĩ adĩmanecangũ niigia aneeta, nyatarka eeginnu balna niigia rẽẽntĩ kĩ aneeta.