Ẽẽn Paulo limannioit cĩ eet cĩk athii cĩ ẽẽn Yudei
3
Nyatarka thõõth coo, kikiyyia na Paulo kĩthĩ et cĩ kaavẽ kĩjana, nyatarka Yesu Kiristo, thõõtha ĩcĩ keelung na agiitia eet cĩk athii cĩ ẽẽn Yudei wo.2 Ĩthõng dĩdĩ, agayyu niigia bũnnathĩt cĩ Nyekuco, ngatĩ ẽbẽrania aneeta kikiyyia kĩdĩman tiic cĩ ellung agiitia. 3 Ĩthõng balna kẽtẽhẽẽdawung na agiitia nyaraga cĩ turi, cĩ eyeleca Nyekuci aneeta thoothonniok cĩgĩnĩk, cĩk balna gõõ alugunyi cĩk ijiar gẽẽnyĩth cĩ eetu. 4 Kĩ yoko ngĩ ebellu niigia Nyaraga coo, amũdanu katĩ gõõl cĩ kathĩknẽ na thõõth cĩ Kiristo cĩ alugunyi jurrung. 5 Ngaanĩ balna kagga eeti ĩmma thõõth cĩ alugunyi cĩ ijiar gẽẽnyĩth cĩ eetu wo, kuumuc kikiyyia kuduwak Ririwacĩ cĩ Nyekuco tionniak cĩgĩnĩk cĩk dĩhĩmĩk kĩ eet cĩk õthõõth molook cĩ Nyekuco cĩgĩnĩk cĩk dĩhĩmĩk. 6 Ĩthõng ẽẽn thõõth cĩ alugunyi wo, thõõth wũ balna anyi Nyekuci eet cĩk athii cĩ ẽẽn Yudei Nyemuta ĩcĩ Abũnna, kĩĩ katĩ kotholit kĩ eet cĩk ẽẽn Yudei vẽlẽk balinit cĩ katĩ abarĩc doolia cĩk Nyekucak, ĩthõng katĩ otholit kaal vẽlẽk wũk balna abũtana nẽ ĩcĩ Kiristo Yesu.
7 Anya balna Nyekuci aneeta bũnnathĩt kĩ tiirthẽt cĩnnĩ cobbi, kĩĩ katĩ kiticanothĩk na ĩnõõnõ kilimanek eet Nyemut cĩ Abũnna. 8 Kõdẽ woyyia ngĩ keeni na et ĩmma kaganokoa eetĩnẽy cĩk Makayyioktak vẽlẽk, anyĩwothĩca balna aneeta bũnnathĩtĩ coo, kĩĩ kilimanek eet cĩk athii cĩ ẽẽn Yudei gataninit cĩ Kiristo cĩ athii cĩ atĩmanni. 9 Keberiay balna na, kĩĩ kẽkẽbak eet vẽlẽk thoothonniok cĩk alugunyi cĩk ijiar gẽẽnyĩth cĩ eetu, wũ balna aluguny Nyekuci wũ ẽẽn Tengenyioit cĩ kaal vẽlẽk, balna thẽk thiananta. 10 Ẽẽn balna diimẽnẽtĩ cĩ Nyekuco vẽlẽk cĩ aticanini nẽ meelitin, cĩ lemnyiowu kelethiawa cĩnnĩ keyelek makayyiok, kĩ gaala cĩk tammutiddino gẽẽnyĩth cĩnnĩ. 11 Muwẽẽnĩt balna cĩ Nyekuco coo, balna ngaanĩ kẽtẽngẽnya nẽ looc, wũ balna ẽdẽcak nẽ, nyatarka kaal vẽlẽk wũk balna atican Yesu Kiristo Makayyioiti cĩnac. 12 Ĩthõng thĩ, yoko nyatarka kũrũmtẽ kĩ Kiristo, ĩthõng kelemit ĩnõõnõ. Athii cĩ kadiim ngĩ kongollie naaga ngĩ kõvvõ Nyekuca mũrũũr. 13 Ĩnõõnõ thĩ, cĩ woccia athii cĩ aduulẽnẽ thinneti cuguk, nyatarka kapĩrna na, nyatarka agiitia ĩnõõnõ thĩ cĩ ayahacung pĩrnanẽtĩ cannie agiitia bulẽnĩt wo.
Mĩnan cĩ Kiristo, nyatarka ageeta
14 Ma kamui thoothonniok cĩkkõ vẽlẽk, kakati na kuthungti ngatĩ kalawẽ Baangiet, 15 cĩ akaneei nẽ thar eet cĩk kõrõõk cĩnnĩ vẽlẽk tammuatiddina kĩ loota. 16 Kalayyie na kathĩ ne, anycĩk Nyekuc kaanyung agiitia tiirthẽt bulẽnta cĩ balinit cĩnnĩ Ririwaca cĩnnĩ, kĩĩ ĩĩtõ niigia wobjiak cĩk eeginnu tiirti, 17 kĩĩ koccia kaavu Kiristo thinnetinẽy cuguk, nyatarka leminit cunung. Uthuutti thõõth cĩnnĩ jurrung, ĩthõng okomit mĩnana cĩnnĩ. 18 Kalayyie na kathĩ ne, anycĩk woccia niigia Nyekuc kaanyung agiitia agaac kĩ eet cĩk callĩk vẽlẽk cĩk Nyekucak thõõth cĩ athĩ ne, maka mĩnanĩ cĩ Kiristo ijiar õrrõt, 19 ĩthõng agaac thõõth vẽlẽk cĩ mĩnan cĩ Kiristo, kõdẽ woyyia ngĩ ijiar gẽẽnyĩth cĩ woccia atĩmaniay, ĩthõng thĩ, katĩ ayaktu niigia vẽlẽk rũgẽt kĩ tiirthẽt cĩ aku Nyekuca.