Rũmẽnĩt ẽla cĩ Kiristo
4
Kalayyung na agiit, eeti cĩ kaavẽ kĩjana, nyatarka Makayyioit wo, aavut gõõla cĩ abũnna kĩ balna ngĩ ẽbẽrawung Nyekuci agiit ĩĩtõ eet cĩgĩnĩk. 2 Ĩĩtõ thimattiak õrrõt, ĩthõng ayaktu thinneti cĩk alalĩ, ayait thinneti cĩk makatĩk kĩ goonogu, ĩthõng omoktu thoothonniok cĩk goonogu vẽlẽk mĩnanintia. 3 Ĩtĩmanit ngatĩ athunnu rũmẽnĩt cĩ Ririwac cĩ Dĩhĩmĩ thinnetinẽy cuguk. Ĩdĩmanit ketee gõõla cĩ attiyyu jurrung ganõna. 4 Eeginnu niigia vẽlẽk eet cĩk ẽlẽ codoi doo. Ẽẽn Ririwacĩ cĩ Nyekuco codoi doo, kĩ balna ngĩ anyung Nyekuci agiitia muwẽẽnĩt codoi doo cĩ abũnna. 5 Kẽyẽk naaga Makayyioit codoi doo kĩ leminit codoi doo kĩ batithimo codoi doo. 6 Aavĩ Nyekuci codoi doo cĩ ẽẽn Baatĩ eet vẽlẽk. Agam nẽ eet kĩ kaal vẽlẽk, ĩthõng aavĩ nẽ eetĩnẽy vẽlẽk.7 Engerehet balna Kiristo ageeta vẽlẽk bũnnathĩta cĩnnĩ anyintiok cĩk ẽẽn nyẽgẽlẽ, nyẽgẽlẽ. 8 Kĩcĩ aduwa Nyaraga cĩ Nyekuco athĩ ne,
“Ma balna ngĩ õtõd nẽ ũũk tiddina,
ikiyyia ũũwĩ nẽ eet cĩk meelĩk cĩk agamnyie,
ĩthõng aanyĩk eet anyintiok.”a
9 Ma ngĩ athĩ ne, “Õtõd balna nẽ ũũk tiddina,” athĩ thõõth coo balna buu ne, ikiyyia Kiristo nõõnõ loota ngato looca ĩcĩ kaatẽ naaga wo. 10 Ĩthõng ĩnõõnõ wũ balna aavĩ loota ngato noko wũ balna ũũk tammuatiddina, kĩĩ katĩ kaavu nẽ tammuatiddina kĩ loota vẽlẽk. 11 Ẽbẽra balna Kiristo eet õõgĩ kĩĩtõ tionniak, ĩthõng ẽbẽra õõgĩ kĩĩtõ eet cĩk õthõõth molook cĩ Nyekuco, ĩthõng ẽbẽra õõgĩ kĩĩtõ eet cĩk alimaneei eet kelemit thõõth cĩ Nyekuco, ĩthõng ẽbẽra õõgĩ kĩĩtõ paadĩrnya kĩ limanniok, 12 kĩĩ kilimanit nẽẽgẽ eet cĩk Nyekucak gõõl cĩ aticanothĩcẽ Nyekuc, kĩĩ katĩ woccia kĩtĩlĩth ẽlẽ cĩ Kiristo kĩĩ tiir, 13 kuumuc kũrũmet leminiti, ĩthõng kagaacõ Ngẽrtĩ Nyekuco. Ĩthõng thĩ, katĩ kivitia kĩtĩlĩthĩt naaga kĩĩtõ makatẽ lemintia kĩ Kiristo, ĩthõng kivitia kaavutõ naaga kĩ nẽnẽ.
14 Ĩthõng thĩ, ĩthĩnga woccia kaatĩ naaga kĩ doolia cĩk kĩdĩk, cĩk aatĩ kĩ ngõõtĩ cĩ avungan taktak. Athii woccia cĩ kaanyi eet kĩgoolliet limana cĩnĩng ĩcĩ ẽẽn võlõng. 15 Ĩthõng thĩ kẽnnẽ, kõthõõth katĩ naaga thõõth cĩ ẽẽn dĩdĩ mĩnanintia, kalĩthĩ katĩ naaga thoothiowẽy vẽlẽk, kivitia kaavut kĩ Kiristo cĩ agam ẽlẽ cĩnnĩ cĩ ẽẽn kelethia cĩnnĩ. 16 Arũm Kiristo ẽlẽ cĩnnĩ kĩĩ codoi doo, ĩthõng anyĩk vatĩk vẽlẽk kiticantõy jurrung, kĩĩ katĩ kiticantõy vatĩka vẽlẽk codoi codoi cĩk ẽlak, kĩĩ kĩtĩlĩth ẽlẽ kõkõm, nyatarka mĩnan.
Ayaha Yesu rũgẽt cĩ jõr
17 Aduwacca Makayyioiti aneeta kethewung ne, ibilli avuthit cĩ attiyyu kĩ eeta cĩk agiithi cĩk athii cĩ aga Nyekuc ẽẽ. 18 Adĩĩtĩ ooti cĩgĩk pĩd, ĩthõng ĩĩtõ rẽẽntĩ kĩ avuthit cĩ Nyekuco, ĩthõng agiithi nẽẽgẽ, nyatarka alna ooti cĩgĩk õkõmĩ kak noko. 19 Athii cĩ angawan nẽẽgẽ. Adĩman nẽẽgẽ gii vẽlẽk cĩ ẽẽn riiriny kũdũt, ĩthõng abarriteei nẽẽgẽ ngatĩ adĩmanĩ kaal nĩĩkẽ gõõ noko.
20 Ĩthõng thĩna, niigia athii balna cĩ avvu alimannu Kiristo gõõla nĩĩcẽ. 21 Dĩdĩ, ivitiawu balna niigia ithiktu ĩnõõnõ, ĩthõng illimantewu thõõtha cĩnnĩ gõõla cĩ thõõth cĩ ẽẽn dĩdĩ, cĩ aavĩ ĩcĩ Yesu. 22 Aduwaccung balna agiitia eeta athĩ ne, ẽgẽrẽthannung katĩ agiitia barritõnĩ cunung cĩ volongo, adiim thẽk niigia ngĩ atdukeecu gõõl wũ rũgẽt wunung wũ rẽẽnĩ tuu, kĩ avuthit vẽlẽk cĩnnĩ wũ gerthe.b 23 Anycĩk muwẽẽnĩt cunung kũtũwẽ kĩĩ jõr, 24 ĩthõng ivitiawu niigia iittu eet cĩk jõr, wũk balna ẽngẽnycanung Nyekuci agiit aavut kĩ nẽnẽ, abũnna ngĩ adĩmannu thoothonniok cĩk adiim nẽnẽ, ĩthõng iittu eet cĩgĩnĩk cĩk callĩk.c
Ngirantiok cĩk rũgẽt cĩ jõr
25 Ĩthõng thĩna, nyĩ ngaanĩ ovolongecu goonogu, ithiantaĩ uduktiak ĩnõõgõ thõõth cĩ ẽẽn dĩdĩ, nyatarka keegin naaga vẽlẽk tõõn cĩ ẽlẽ codoi doo. 26 “Nyĩ anyiccu varac cunung kaanyung ẽgẽrẽthantõy,”d nyĩ ovvoyyu kĩnyaaĩy varaaca, 27 ĩthõng nyĩ ẽlẽmacu alaan cĩ ririwanĩn cĩk gertheke kẽtẽẽhawung agiitia. 28 Eeti cĩ balna gõõ õgõrthẽ, anycĩk ĩnõõnõ kũtũngek gõr, adiim thẽk nẽ ngĩ atican tiic athĩnẽy cĩgĩnĩk, kĩĩ katĩ kũmũda gii cĩ woccia õthõl kĩ piryiak.
29 Nyĩ othooththu thoothonniok cĩk gerthek. Anycĩk thoothonniok cĩk aduwuanu kĩĩ cĩk abũnna, kĩĩ katĩ keelitõ eet cĩk athĩraryung agiitia. 30 Ĩthõng nyĩ anyiccu Ririwac cĩ Dĩhĩmĩ cĩ Nyekuco kutulu, Ririwac wũ balna amacaraninu niigia, nyatarka kõr cĩ katĩ oogianu gerthetina cunung. 31 Ũtũngtek ngongowi, kĩ varac, kĩ lĩlĩwõn, kĩ jore, kĩ thõõth cĩ othoothu goonogu buth, kĩ thoothonniok vẽlẽk cĩk gerthek. 32 Ĩthõng thĩ, kẽnnẽ ĩĩtõ niigia thimattiak, ĩthõng atamattiwu goonogu, kĩ balna ngĩ amannicung Nyekuci agiitia, nyatarka Kiristo.f