Nyaraga cĩ eheedi Paulo
Lemnyiok cĩk Kelethianyawu Galathiawa
Yelinit cĩ Nyaraga cĩ Galathia
Eheedi balna Paulo wũ balna ẽẽn tionniait cĩ Yesu Kiristo Nyaraga coo, Kirithtianẽt cĩk balna athii cĩ ẽẽn Yudei cĩk balna aatĩ looca ĩcĩ Galathia. Ẽẽn balna Galathia kõrgẽn cĩ looc cĩ yoko athĩ Turkia wo. Irionitõ balna Paulo kĩ Barnabath Nyemut cĩ Abũnna cĩ Yesu korookjiowẽy gwantĩk ĩcĩk gaalawu ĩcĩk Galathia, ĩthõng ivitia ĩĩtõ eeta cĩk meelĩk wobjiak cĩk Kiristo, “Bẽl Nyaraga cĩ Tiicanẽ cĩk Tionniawu terehianta ĩcĩ ẽẽn 13-14.” Ĩthõng naboo vurtia cĩ wathinniok nĩĩkẽ, ivitia illimanit eeta gwuak wobjiak ngatĩ abũnna thẽk ngĩ õwõb nẽẽgẽ ngirantiok kĩ vowothnya cĩk Yudei, ĩthõng ũbũũranit eleeti cĩk eet cĩk maacĩk thõng. Ngaatĩ ahadacĩ Paulo wobjiak thõõth cĩ athĩ ne, ẽẽla Nyekuci eet vẽlẽk cĩk ẽlẽmĩ Kiristo, athii cĩ ẽẽla eet cĩk õwõb Ngiran cĩ Mutha dõ. Ĩthõng uduwak Paulo ĩnõõgõ gõõl cĩ balna ẽlẽmĩ tionniaha cĩk Kiristo thõõth coo Yeruthalẽma, “Bẽl Nyaraga cĩ Tiicanẽ cĩk Tionniawu terehianĩt cĩ ẽẽn 15.”
Nyaragawa ĩcĩ Galathia terehianta ĩcĩ ẽẽn 3-4, ẽkẽba Paulo jurrung athĩ ne, athii woccia cĩ kaanyi naaga Nyekuc kẽbẽlbẽl, nyatarka gii cĩ kadĩman naaga, ĩthõng naboo uduwa gõõl cĩ woccia kamadianĩ naaga kĩĩtõ mũrrẽ nguuma cĩ Nyekuco lemintia dõ, kĩ balna Abrahamĩ wũ balna ẽẽn nẽ baatĩ eet cĩk ẽẽn Yudei. Ĩthõng naboo, Nyaragawa ĩcĩ Galathia terehianta ĩcĩ ẽẽn 5-6, aduwa Paulo athĩ ne, abũnna wobjiaha cĩk Kiristo ngatĩ anyĩcẽ nẽẽgẽ Ririwac cĩ Dĩhĩmĩ kũthũtĩ rũgẽt cĩnĩng, kĩĩ katĩ kaanyĩk nẽ ĩnõõgõ tiirthẽt cĩ õwõbĩ Ngiran cĩ Nyekuco kĩĩ kĩmĩnanit eet õõgĩ.