Tĩrĩthẽnĩt kĩ thawinet cĩ aturna
13
Ẽẽn katĩ coo heeroni cannĩ cĩ ẽẽn iyyio, cĩ kẽhẽrõnacung agiitia. Kĩcĩ eheeddi Nyaragawa ĩcĩ Nyekuco athĩ ne, “Thõõth vẽlẽk cĩ aduwuay kagawẽ eetĩnẽy ĩcĩk ẽẽn kẽbẽrẽ cĩk ẽẽn ramma, kõdẽ iyyioa cĩk acĩn thõõth coo ngatĩ ẽnnẽ dĩdĩ.”b 2 Kuduwawung balna na agiitia vẽlẽk, balna ngĩ kẽhẽrõnacung agiitia, hẽẽrõna cannĩ wũ balna ẽẽn ramma. Ĩthõng kathĩ yoko naboo ne, ngaanĩ keegin rẽẽntĩ. Mĩ kõbõda, kakuni katĩ kuuki eet wũk balna ẽgẽrẽthantõy ĩcĩ owu vẽlẽk, kõdẽ eet õõgĩ cĩk ẽgẽrẽthan thoothonniok noko, 3 ĩthõng kĩcĩ adiimnyu niigia ngĩ agayyu ngatĩ õthõõth Kiristo nyatarka aneeta wo. Athii cĩ apĩrna tiirthẽtĩ cĩnnẽ, katĩ ngĩ adiim Kiristo ngĩ õbõdanung agiitia gerthetina cunung, ĩthõng thĩ, maka tiirthẽtĩ cĩnnẽ kõrgẽna cunung. 4 Kõdẽ woyyia balna ngĩ otodowothĩk nẽ kurucea, aavĩ kĩcĩ balna apĩrna tiirthẽtĩ cĩnnẽ. Ĩthõng thĩ yoko, arũgĩ nẽ tiirthẽta cĩ Nyekuco noko. Gõõla ĩcĩ aduwõy thõng, kapĩrna naaga buu kĩ balna Kiristo. Ĩthõng thĩ, nẽnnẽ acĩnnu niigia ngĩ karũgĩ naaga kĩ ĩnõõnõ tiirthẽta cĩ Nyekuco, kĩĩ katĩ kiticantothiwung agiitia.5 Ĩtĩmanit eleeti cuguk, kĩĩ katĩ umuddia, ma ngĩ elemtu niigia Kiristo gõõla ĩcĩ ẽẽn dĩdĩ. Ĩtĩmanit eleeti cuguk, amũdanu katĩ ngatĩ aavẽ Yesu Kiristo ĩcunung, ĩthõng mĩ utduktiawu niigia tĩmana ĩcoo, athii cĩ aavĩ Kiristo ĩcunung. 6 Ĩthõng kamui woccia athii katĩ cĩ amũdanu ngĩ athĩ ne, kutduktiay naaga tĩmana. 7 Ĩthõng yoko, kalayya naaga Nyekuc, kĩĩ katĩ kithii cĩ adĩmannu niigia kaal cĩk gerthek. Athii cĩ ẽẽn, nyatarka acĩn eeta ngĩ athĩ ne, kijiarya naaga tĩman vẽlẽk, ĩthõng thĩ, adĩmannu katĩ kẽnnẽ niigia thoothonniok cĩk edeemothi, kõdẽ woyyia kaavu kĩcĩ amuk eeta ngĩ kutduktiaha tĩmana. 8 Nyatarka athii woccia cĩ kadĩmanna naaga thoothonniok cĩk athii cĩ ẽẽn dĩdĩ, ĩthõng thĩ, kadĩmanna naaga thoothonniok cĩk ẽẽn dĩdĩ dõ. 9 Kẽbẽlbẽlla naaga katĩ ngĩ okomnyu niigia, ĩthõng thĩ, kipiryiaha naaga. Ĩthõng kalawina naaga õrrõt kathĩnna ne, abũnna ma ngĩ athii cĩ adĩmannu kaal cĩk gerthek. 10 Ĩnõõnõ thĩ cĩ kẽhẽdacung na agiitia thoothonniok cĩkkõ yoko wo, balna ngaanĩ kaavĩya rẽẽna, kĩĩ katĩ mĩ kikiyyia, athii woccia cĩ kothoothicung tiirion kĩ makathĩta cannĩ, wũ balna anya Makayyioiti, ĩthõng thĩ, keelung agiitia, athii cĩ kathaanung agiitia thõng.
Thawinet cĩ Paulo cĩ aturna
11 Turnanta cannĩ, gõtõõnõga kĩ ngõõnõga, ebelbelit niigia, ĩthõng ĩdĩmanit kaal vẽlẽk gõõla ĩcĩ abũnna, ĩthĩrarit ĩlaalii cannĩ, ayait muwẽẽnĩt codoi doo, ĩthõng katĩ aavu ganõnĩ cĩ Nyekuco kĩ mĩnan cĩnnĩ ĩcunung.