Thoothonniok cĩk ẽyẽla Makayyioiti ngonothintia
12
Kiriani woccia na thẽk kũdũt, ĩthõng thĩ, athii kẽnnẽ gii cĩ karũba na riania tõ. Ĩthõng thĩ, kirianẽ katĩ na ngonothiok kĩ kaal õõgĩ cĩk ẽyẽla Makayyioiti. 2 Kagga na wobjiait ĩmma cĩ Kiristo wũ balna õdõng ngonothinetĩ ĩnõõnõ, ĩthõng ũũwĩ õlõõ cĩ Nyekuco tammuatiddina, erkinyiay wũk balna alacantẽ cĩk ẽẽn õmmõtõ kĩ wec. Athii na cĩ kagga ngatĩ balna õkõyyĩ nẽ ẽla cĩnnĩ noko, kõdẽ ririwaca cĩnnĩ, Nyekuc dõ cĩ aga.3 Kĩcĩ kathĩ na ne, Nyekuc dõ cĩ aga, katĩ da ngĩ õkkõ eeti neccie tammuatiddina ẽla cĩnnĩ noko, kõdẽ athiitõ. 4 Ĩthõng thĩ, õkõyyĩ balna ngonothinetĩ ĩnõõnõ paradithio ngatĩ aavẽ Nyekuci. Õkkõ balna athĩhĩ nẽ kaal cĩk dĩhĩmĩk õrrõt, cĩk amaacĩ ngatĩ aduwanĩ nẽ. 5 Kirianẽ katĩ na et nĩcẽ, athii katĩ cĩ kirianẽ ẽlẽ cannĩ, gii dũũwũk ma ngĩ kothoothi thõõth cĩ athii cĩ kẽnnẽ tiir na. 6 Kõdẽ woyyia mĩ kẽbẽra na rianii, athii katĩ cĩ kagiithie, nyatarka kaduwacung na agiitia thõõth cĩ ẽẽn dĩdĩ. Ĩthõng thĩ, athii cĩ kiriani na, kĩĩ katĩ kithii eeti cĩ amukca aneeta tõ, kijiar gii vẽlẽk cĩ kadĩmani nana, ĩthõng kuduwa.
7 Adiim Makayyioiti ngĩ abilnia aneeta riania, nyatarka ngonothinet kĩ kaal õõgĩ cĩk eyeleca nẽ aneeta, anyĩk nẽ Thĩttan kitionaha aneeta pĩrnanẽt cĩnnĩ kaanyĩk ẽlẽ cannĩ kĩpĩra. 8 Kala balna na Makayyioit ngõnana iyyio, kĩĩ katĩ kẽnyẽẽĩ nẽ pĩrnanẽt cĩ kayai na wo ngatĩvõrĩ. 9 Ĩthõng thĩ, ikiyyia ẽdẽcca nẽ aneeta ennea ne, “Bũnnathĩt cannĩ dõ cĩ adiimi niia, nyatarka ĩthĩ maka tiirthẽtĩ cannie pĩrnanta.” Ĩthõng thĩna, kiriani katĩ na õrrõt, nyatarka pĩrnanẽt cannĩ, kĩĩ katĩ kaavu tiirthẽtĩ cĩ Kiristo ẽla cannĩ. 10 Ĩnõõnõ thĩ cĩ katalnẽ na ngatĩ kapĩrnanẽ, kĩ ngatĩ kadacinie, kĩ ngatĩ kuukẽnẽ, kĩ ngatĩ kacanannie, nyatarka Kiristo. Nyatarka ngĩ kapĩrna na, keeni kẽnnẽ tiir.
Arĩcana Paulo wobjiak cĩk Makayyioktak
11 Kaarĩha balna na ẽlẽ cannĩ kaavu kĩ giitheeiti, ĩthõng agiitia balna cĩk omogecangũ aneeta kĩdĩman noko wo. Adiim thẽk woccia niigia ngĩ othoothiangũ aneeta jurrung, nyatarka kabũnna kẽnnẽ na buu kuduktowa kĩ eet nĩĩkĩ ĩgõõl eet athĩ ne, eegin tionniak cĩk tiirtik wo, kõdẽ woyyia ngĩ kaavu na kĩ gimma kaganoko. 12 Balna ngaanĩ karũmẽ na kĩ agiitia, kalna balna na komogi ngĩ katicani thoothonniok cĩk anaat eeta, cĩk ẽyẽla athĩ ne, kĩthĩ na tionniait cĩ Kiristo dĩdĩ. 13 Ijiaryung da thẽk agiitia meelitinnya cĩk lemnyiok cĩk Kiristo kelethianyay gwantĩk kuu? Ẽlla balna nẽẽgẽ aneeta dõ, ĩthõng athii balna na cĩ kajinnung agiitia elinit cunung. Ĩthõng ũtũngteangũ aneeta, nyatarka athii balna na cĩ kajinnung agiitia elinit.
14 Kadiimi kẽhẽrõnacung na agiitia heeroni cannĩ cĩ ẽẽn iyyio. Ĩthõng athii katĩ cĩ kadiimi na elinit ĩmma ĩcunung. Kadiimnyung na agiitia dõ, athii cĩ ẽẽn, nyatarka kaal cĩk ayakcu niigia. Athii woccia doolia cĩk kĩdĩk cĩ ẽẽl baajigi kĩ ngaagĩ, ĩnõõgõ cĩk woccia ẽẽl dõõlĩ cĩgĩk. 15 Katali katĩ na õrrõt katĩ ngĩ kaanyung na agiitia kaal vẽlẽk cĩk kayai na kĩ ẽlẽ cannĩ buu. Ĩthõng mĩ, kamĩnanung na agiitia õrrõt, amĩnannangũ koccia katĩ niigia aneeta kĩdĩĩc? 16 Elemtu balna niigia iittu ne, athii na cĩ kõkõyyẽ kaal õõgĩ cuguk. Ĩthõng thĩ, athinnu kẽnnẽ niigia gwuak ne, kakuni na kalabjung agiitia gẽẽnyĩtha cannĩ ngatĩ kogolothicung thõng. 17 Ĩgoollung da balna eeta wũk balna kitionacung na agiitia? Athii tõ. 18 Kaduwai balna na Tiito kikiyyia kẽhẽrõnawung agiitia, ĩnõõnõ kĩ gotooniet ĩmma. Athii balna cĩ ĩgoollung Tiito agiitia thõng, ĩgoollung da? Kattĩyya thĩ da naaga gõõla codoi dõ kĩ nẽnẽ?
19 Ũnũũktothiwu balna niigia ngatĩ amuwu athinnu ne, kẽẽlana da naaga eleeti cĩgaak ĩcunung thoothonniowẽy ĩcĩk gerthek? Kõthõõththa naaga thoothonniok cĩk aga Nyekuci buu cĩk athĩ ne, keeginna wobjiak cĩk Kiristo. Gõõnõga, gii vẽlẽk cĩ kadĩmanna naaga, kadĩmanna, kĩĩ katĩ kõkõm leminiti cunung ĩcĩ Kiristo.
20 Nyatarka kongollie na kathĩ ne, mĩ kikiyyia na, athii katĩ cĩ katali na ngatĩ kamũdacung agiitia attiyyu gõõla cĩ athii cĩ kadiimi nana, ĩthõng athii katĩ niigia buu cĩ atalnu gõõl cĩ kaavẽ nana. Ĩthõng kongollie na ngatĩ woccia ayawu gẽrẽnyõn, kĩ mẽdẽr, kĩ varac, kĩ ngẽrõnĩt cĩ engeroonu nyaguana, kĩ thõõth cĩ othoothonu nyaguana buth, kĩ teedinet cĩ eetu, kĩ rianii, kĩ thõõth cĩ ayaha gẽrẽnyõnĩt. 21 Kongollie na kathĩ ne, mĩ kõbõda naboo, anya katĩ Nyekuci aneeta kĩthĩ thimattioit kõrgẽna cunung. Ĩthõng komoththie katĩ na, nyatarka mẽẽlĩ eeta cĩk ngaanĩ kũtũngtek gerthetin cĩnĩng wũ balna rẽẽnĩ, ngaanĩ mẽẽlĩ eeta cĩk atican kaal cĩk ẽẽn riiriny, kĩ kĩnyak cĩk oginnie eeta kĩ ngaay taktak, kĩ thoothonniok cĩk athii cĩ mũrrẽ meelitina cĩ lemnyiowu cĩk anyet ngawani.