Nyaraga cĩ ẽẽn Codoi cĩ eheedi Paulo
Lemnyiok cĩk Kelethia cĩ Korinto
Yelinit cĩ Nyaraga cĩ ẽẽn Codoi cĩ Korinto
Eheedi balna Paulo wũ ẽẽn tionniait cĩ Yesu Kiristo Nyaraga coo wobjiak cĩk Kiristo õlõõ ĩcĩ gaalawu cobbi ĩcĩ Korinto looca cĩ Akeyyia cĩ tõõn cĩ looc cĩ Girihi. Aliman balna Paulo eet cĩk Korinto erkit codoi, bẽl Nyaraga cĩ Tiicanẽ cĩk Tionniawu terehianĩt cĩ ẽẽn 18. Ĩthõng elemit eeta cĩk meelĩk Yesu kĩĩ Kiristo. Ĩthõng thĩ, ma balna ngĩ ũtũngek Paulo Korinto, ivitia ilibtia thoothiowa natẽ cĩk meelĩk cĩk gerthek õrrõt, kõrgẽna cĩ wobjiak cĩk Kiristo. Ngaatĩ ẽhẽẽdĩ Paulo Nyaraga coo, kĩĩ katĩ kĩdĩmanek thoothonniok cĩk gerthek wo.
Nyaragawa ĩcoo, uduwa Paulo thõõth cĩ gerthe cĩ engerini meelitini cĩ wobjiawu, ĩthõng ẽgẽrẽnycõy nyaguana. Bẽl terehiantiok cĩk ẽẽn 1-4. Ma thĩ natẽ, egerenyek Paulo eet õõgĩ kõrgẽna cĩnĩng, nyatarka atican thoothonniok cĩk ẽẽn riiriny kĩ eeta cĩk athii cĩ aga Nyekuc, bẽl terehiantiok cĩk ẽẽn 5-6. Ĩthõng illimaneek nẽ ĩnõõgõ gõõl cĩ woccia athũnnĩ maacuana kĩ ngaay cĩgĩk eleeti cĩgĩk, korookjiowẽy ĩcĩgĩk, bẽl terehianĩt cĩ ẽẽn 7. Ĩthõng naboo, ĩtĩrĩthẽk nẽ ĩnõõgõ gõõl cĩ aatẽ kĩ wobjiaha cĩk Kiristo, katĩ ngĩ arũmẽ kĩ eet cĩk ala nyekucnya õõgĩ kaganoko, bẽl terehianĩt cĩ ẽẽn 8. Ĩthõng illimaneek nẽ gõõl cĩ abuluthi Nyekuc, katĩ ngĩ avvu alayyie nẽẽgẽ, bẽl terehiantiok cĩk ẽẽn 9-11. Aduwaai balna nẽ ĩnõõgõ jurrung, gõõl cĩ anyi ĩnõõgõ Ririwacĩ cĩ Dĩhĩmĩ anyintiok cĩk obbitik, anyinit kir cĩ tiiri cĩ amĩnanõnĩ nẽẽgẽ, ĩthõng anyintiowa cĩkkõ ẽẽl ĩnõõgõ kubuluthit Nyekuc, ĩthõng aavutõ kĩ wobjiaha cĩk Kiristo, bẽl terehiantiok cĩk ẽẽn 12-14. Ĩthõng eyeleei nẽ ĩnõõgõ, ngatĩ arũkna balna Kiristo daaĩtha, aga nẽẽgẽ ngĩ athĩ ne, arũgũtha katĩ Nyekuci ĩnõõgõ buu naboo, bẽl terehianĩt cĩ ẽẽn 15.