Ĩthaa Paulo lemnyiok
16
Kadiimi na ngĩ kaduwacung agiitia tiic cĩ abũnna cĩ balna atican ngoonietĩ cĩnac Võẽbe, cĩ ẽẽn ticciannioit cĩ ekelethiaa cĩ lemnyiowu õlõõ ĩcĩ gaalawu cĩ Thenceria. 2 Kalayyung na agiit elemit ĩnõõnõ thaarĩy cĩk Makayyioktak, gõõla cĩ abũnna ĩcĩ lemnyiok cĩk callĩk, ĩthõng anycĩk elinit vẽlẽk cĩ woccia adiim nẽ ĩcunung, nyatarka balna gõõ ẽẽl nẽ eet cĩk meelĩk õrrõt kĩ aneeta buu.3 Ĩthaac Akwila kĩ ngaa cĩnnĩ Pirithila,b wũk gõõ katicaninia kõdõwẽ tiica cĩ Kiristo Yesu. 4 Atduk balna nẽẽgẽ rũgẽt cĩnĩng, nyatarka aneeta. Ĩthõng thĩ, athii cĩ ẽẽn, nyatarka aneeta dõ, atduk, nyatarka meelitin cĩ lemnyiok cĩk kelethianya vẽlẽk cĩk eet cĩk athii cĩ ẽẽn Yudei, ĩthõng kenteea ĩnõõgõ ne, ibalallẽ. 5 Ĩthayyihangũ meelitin cĩ lemnyiok wũk gõõ aruumõy ciitha cĩnĩng.
Ĩthayyihangũ gõõna Epenetath cĩ kamĩnani wũ balna arak ngatĩ ẽlẽmĩ Kiristo ĩcĩ owu looca cĩ Athia. 6 Ĩthaac Maria wũ balna aticanni õrrõt, nyatarka agiitia. 7 Ĩthaac Andronĩkath kĩ Juniath, wũk ẽẽn nẽẽgẽ tionniok cĩganĩk wũk balna kecebina kõdõwẽ. Ẽẽn nẽẽgẽ eet cĩk obbitik tionniaĩ, ĩthõng balna araktaĩ ngatĩ ẽlẽmĩ Kiristo ĩcĩ owu cannĩ. 8 Ĩthayyihangũ Ampiliatath, cĩ kamĩnani thaarĩy cĩk Makayyioktak. 9 Ĩthaac Urubanath gooniet wũ balna gõõ katicanni kõdõwẽ, nyatarka Kiristo, ĩthõng ĩthayyihangũ Thĩntaci buu wũ ẽẽn gõõna cĩ thĩnĩno.
10 Ĩthaac Apeeleth, wũ balna ĩtĩmanẽ, ĩthõng umudiay ngatĩ ẽnnẽ lemnyioit cĩ õkõmĩ lemintia, ĩthõng ẽlẽm Kiristo ĩnõõnõ. Ĩthaac eet cĩk kõrõõk cĩ Arithtobuluthĩ. 11 Ĩthaac Herodion wũ ẽẽn tionnioit cannĩ. Ĩthaac eet cĩk kõrõõk cĩ Narcithathĩ cĩk ẽlẽmĩ Makayyioit. 12 Ĩthaac gõõnõga õõ Tirivena kĩ Tirivotha, ngaay wũk balna aticanothi Makayyioit õrrõt. Ĩthaac Perthith buu gõõna cĩ thĩnĩno, ngaa wũ balna aticanni õrrõt thaarĩy cĩk Makayyioktak. 13 Ĩthaac Ruvuth wũ balna ẽbẽra Makayyioiti kĩ yaatĩnnĩ wũ balna õgõõn kĩ yaangĩ buu.
14 Ĩthaac Athinkiritath, kĩ Velogon kĩ Hermeth, kĩ Patorobath, kĩ Hermath kĩ lemnyiok cĩk arũmẽ kĩ ĩnõõgõ. 15 Ĩthaac Vilologoth, kĩ Jullia kĩ Nereoth kĩ ngõõnĩ, kĩ Olimpath kĩ eet cĩk callĩk cĩk Makayyioktak vẽlẽk cĩk arũmẽ kĩ ĩnõõgõ. 16 Ĩthayyiõy niigia vẽlẽk codoi codoi õrrõt. Ĩthayyung lemnyiowa cĩk kelethianyawu vẽlẽk cĩk Kiristo agiitia.
17 Kalayyung na agiit gõtõõnõga kĩ ngõõnõga, uthuutti eleeti eetĩnẽy cĩk ĩkõtha ngẽrõnĩt kõrgẽna cunung, ĩthõng alamtung agiitia gõõla cĩ athii cĩ aduwõy kĩ liman wũ balna alimannung eeta agiitia. Ĩĩtõ niigia rẽẽntĩ kĩ ĩnõõgõ. 18 Nyatarka eeta cĩk aatĩ noko, athii cĩ aticanothi Kiristo Makayyioit cĩnac, ĩthõng thĩ, kẽnnẽ aticanothi nẽẽgẽ gii cĩ atarnanĩ nẽẽgẽ. Ĩgõõl nẽẽgẽ eet cĩk agiithi thoothiowẽy ĩcĩk ẽmmẽdẽ. 19 Ĩthĩraritõ balna eeta vẽlẽk leminit cunung, ĩthõng katali na õrrõt, nyatarka agiitia, ĩthõng thĩ, kadiimnyung na agiit egeenyit thõõtha cĩ abũnna, ĩthõng imiryu thõõtha cĩ gerthe.
20 Acakan katĩ Nyekuci cĩ anyet ganõn Thĩttanc thoonĩy cuguk tamanoko. Anycĩk bũnnathĩt cĩ Makayyioit cĩnac Yesu Kiristo kaavu kĩ agiitia.
21 Ĩthayyung Timoti ticciannioiti cĩ katicaninia kõdõwẽ, kĩ Luciwoth kĩ Jathõn kĩ Thothipater eet cĩganĩk cĩk ẽẽn tionniok.
22 Aneeta Tertioth cĩ keheedi nyaraga cĩ aduwa Paulo wo, ĩthõng kĩthayyung na buu agiit thaarĩy cĩk Makayyioktak.
23 Ĩthayyung Gauthi cĩ athunnia aneeta kĩ meelitin cĩ lemnyiowu vẽlẽk ngato agiitia. Ĩthõng ĩthayyung Erathtathĩ cĩ iyiang nyarobinya cĩk kõrõõk cĩ gaalawu kĩ gotooniet Kwartath buu agiitia. 24 Anycĩk niigia bũnnathĩt cĩ Makayyioit cĩnac Yesu Kiristo, kaavu kĩ agiit vẽlẽk. Amẽn.
25 Ĩdĩhĩthĩt Nyekuc! Anyung woccia nẽ agiit ĩĩtõ tiirti Nyemuta cĩ Abũnna cĩ Yesu Kiristo cĩ kirioni na wo. Nyatarka balna Nyemut coo cĩ alugunyi cĩ ijiar gẽẽnyĩth cĩ eetu, erkinya cĩk meelĩk õrrõt wo, 26 ĩthõng thĩ yoko, ikiyyia agawẽ kĩ balna ngĩ ẽhẽẽd eeta cĩk õthõõth molook cĩ Nyekuco, tĩrĩthẽnĩt cĩ aduwa Nyekuci cĩ arũgĩ kũdũt, kĩĩ katĩ woccia kelemit nẽẽgẽ Nyekuc, ĩthõng ĩthĩraritõ ĩnõõnõ. 27 Ĩthõng thĩ, yoko nyatarka Yesu Kiristo, kadĩhĩth woccia naaga Nyekuc cĩ ẽẽn geenyiait dõ kũdũt! Amẽn.