Anyĩk eet õõgĩ kebelbelit athii cĩ ẽnnẽ ẽlẽ cunni
15
Ma ngĩ õkõmĩ leminiti cĩnac, kadiim thẽk ngĩ kẽẽl eet wũk ayak leminit cĩ dĩcĩ pĩrnanta ĩcĩnĩng, ĩthõng athii cĩ kaanyi eleeti cĩgaac kebelbelit. 2 Kaanyi woccia naaga eet cĩk kaarõy kebelbelit, kĩĩ katĩ kabaaitõ nẽẽgẽ jurrung. 3 Nyatarka athii balna Kiristo buu cĩ anyi ẽlẽ cĩnnĩ kẽbẽlbẽl, ĩthõng thĩ, kĩcĩ õthõõth Kiristo Nyaragawa cĩ Nyekuco, athĩ ne, “Nyekuc, adaacci eeta aniitia, adaacca nẽẽgẽ aneeta buu.”a 4 Nyatarka kaala wũk balna eteheddie vẽlẽk loota Nyaragawa ĩcĩ Nyekuco baa lõõla, eheeddi balna kilimantet ageeta moginit kĩ ngatĩ etheriet ageeta, kĩĩ katĩ kayait muwẽẽnĩt cĩ abũnna.5 Anyet woccia Nyekuci ageeta moginit kĩ bẽlbẽllõn. Kalayyie na keelung nẽ agiitia abaait niigia vẽlẽk ganõna kĩ goonogu vẽlẽk, kĩ yoko ngĩ owobju niigia Kiristo Yesu wo, 6 kĩĩ katĩ woccia ĩdĩhĩthĩt niigia Nyekuc cĩ ẽẽn Baatĩ Makayyioit cĩnac Yesu Kiristo, thĩnĩna kĩ kũtũga codoi doo thẽk!
Ẽẽn Nyemut cĩ Abũnna cĩ eet cĩk athii cĩ ẽẽn Yudei buu
7 Ĩthõng thĩ, elemit goonogu cĩk ẽẽn lemnyiok kõrgẽna cunung kaavu kĩ balna ngĩ elemnyung Kiristo agiitia, kĩĩ katĩ ayaktak Nyekuc bulẽnĩt. 8 Kaduwacung na kethecung ne, ikiyyia balna ĩthĩ Kiristo ticciannioit cĩ Yudei, kĩĩ katĩ kẽyẽla ngĩ athũnnĩ balna Nyekuci bũtan wũ balna aduwaai nẽ baajigi cĩgĩk, 9 kĩĩ katĩ kĩdĩhĩthĩt eeta cĩk athii cĩ ẽẽn Yudei Nyekuc, nyatarka amanni nẽ ĩnõõgõ buu. Õgõõn kĩcĩ eheeddi Nyaragawa ĩcĩ Nyekuco athĩ Yesu ne,
“Ĩthõng thĩna, kadihiththi katĩ na aniitia
kõrgẽna cĩ loociowu,
kebelei katĩ na thar cugunik
tegelua cĩk dĩhĩthẽntak.”b
10 Ĩthõng naboo ĩĩ ne,
“Niigia eeta cĩk athii cĩ eeginnu Yudei,
ebelbelit kĩ eet cĩgĩnĩk.”c
11 Ĩthõng naboo ĩĩ ne,
“Ubuluthit Makayyioit niigia vẽlẽk eeta
cĩk athii cĩ eeginnu Yudei.
Anycĩk eet vẽlẽk kĩdĩhĩthĩt ĩnõõnõ.”d
12 Aduwa balna Ĩthaia eeti cĩ õthõõth molook cĩ Nyekuco athĩ ne,
“Alĩnna katĩ Eeti ĩmma cĩ aku tatũga cĩ Jethe,
kikiyyia kĩĩ Alaan.
Agam katĩ nẽ loociok,
ĩthõng katĩ ayait eeta cĩk athii cĩ ẽẽn Yudei,
muwẽẽnĩt cĩ abũnna ĩcĩnnĩ.”e
13 Anycĩk woccia niigia Nyekuc cĩ anyi eet muwẽẽnĩt cĩ abũnna, kagatanung agiit ebelbelit aavut ganõna, nyatarka leminit cunung, kĩĩ katĩ kaanyung tiirthẽtĩ cĩ Ririwac cĩ Dĩhĩmĩ agiit muwẽẽnĩt cĩ abũnna cobbi õrrõt.
Ẽẽn Paulo ticciannioit cĩ eet cĩk athii cĩ ẽẽn Yudei
14 Kagawa na ẽla cannĩ vẽlẽk, niigia gõtõõnõga kĩ ngõõnõga ngĩ ayakcu niigia eletinẽy cuguk bũnnathĩt kĩ gẽẽnyĩth cobbi cĩ woccia alimanonu nyaguana jurrung. 15 Athii cĩ kongollie na ngatĩ kẽhẽdacung agiit thoothonniok õõgĩ, kaavu kĩcĩ kahadacung thoothonniok nĩĩkẽ naboo, nyatarka bũnnathĩt wũ balna anya Nyekuci aneeta, 16 kĩĩ katĩ kĩthĩ ticciannioit cĩ Yesu Kiristo cĩ katicanothi eet cĩk athii cĩ ẽẽn Yudei tiica cĩ paadĩro, cĩ kalimanẽ Nyemut cĩ Abũnna cĩ Nyekuco, kĩĩ katĩ kĩĩtõ eeta cĩk athii cĩ ẽẽn Yudei anyinit cĩ ẽlẽmĩ Nyekuci, cĩk ũtũũny Ririwacĩ cĩ Dĩhĩmĩ ĩnõõgõ kĩĩtõ eet cĩk dĩhĩmĩk.
17 Ĩthõng thĩna, kadihithi na Kiristo Yesu, nyatarka tiic cannĩ cĩ katicanothĩcẽ Nyekuc. 18 Athii katĩ na cĩ kothoothi thõõth cĩ rẽẽng, kothoothi katĩ na dõ tiic wũ balna aanya Kiristo kiticanũ, kĩĩ katĩ kaanyĩk eet cĩk athii cĩ ẽẽn Yudei kĩthĩraritõ Nyekuc thõõtha ĩcĩ balna kuduwa na, ĩthõng kĩdĩmana thoothonniok cĩk anaat eeta, 19 tiirthẽta cĩ Ririwac cĩ Dĩhĩmĩ. Kiriona balna na Nyemut cĩ Abũnna cĩ Kiristo, kithiananẽ Yeruthalẽma kuumuc kõdõlan looc cĩ Illirikomĩ. 20 Ẽẽn balna gõõ diimẽnẽt cannĩ cĩ kirioni Nyemut cĩ Abũnna õrrõt, nginiwa cĩ balna ngaanĩ kagawõõĩ Kiristo, kĩĩ katĩ kithii cĩ kithiananẽ tiic nginiwa wũ balna ithianaĩ eeti ĩmma vẽlẽk. 21 Aavĩ thẽk kĩcĩ aduwa Nyaraga cĩ Nyekuco athĩ ne,
“Eeta cĩk balna ngaanĩ kuduwak thõõth cĩnnẽ,
avvu katĩna acĩn ĩnõõnõ,
ĩthõng eeta cĩk ngaanĩ kĩthĩraritõ ĩnõõnõ,
avvu katĩ aga ĩnõõnõ.”f
22 Alaamnya aneeta tiici cannie cĩ kirionĩcẽ eet kithii cĩ kakuni kacinnung agiitia.
Umuk Paulo gõõl cĩ õkõyyĩ Rũmatẽy
23 Ĩthõng thĩ, yoko ithii ngĩtĩ ngaanĩ katicaninie na loociowẽy ĩcĩkkõ tõ, ĩthõng balna erkinya cĩk meelĩk kadiimi ngĩ kakuni kacinnunga, 24 kamui woccia kadĩmani noko, katĩ ngĩ kũwa looca cĩ Thĩpania. Kayai muwẽẽnĩt cĩ katĩ kẽhẽrõnacung agiitia õõwa cĩ ngaanĩ kikiyyiaĩ natẽ, kĩĩ katĩ vurtia cĩ kivitia kaavutti kĩ agiit kĩdĩĩc, ĩthõng ivitiawu niigia elliangũ aneeta hẽẽrõna cannĩ natẽ. 25 Ĩthõng thĩ yoko, kaavẽ na gõõla kõkkõ Yeruthalẽma, kayawothĩk lemnyiok cĩk callĩk cĩk Makayyioktak anyinit natẽ. 26 Nyatarka ẽbẽlbẽl balna lemnyiowa cĩk looc cĩ Makedonia kĩ cĩk looc cĩ Akeyyia, ngatĩ õwanẽ nyarobinya õõgĩ, kĩĩ katĩ keelli nẽẽgẽ lemnyiok cĩk callĩk cĩk apĩrna cĩk Makayyioktak Yeruthalẽma. 27 Thõõth balna cĩ adiim ngĩ adĩman nẽẽgẽ coo. Nyatarka balna ma ngĩ õthõl Yudei kĩ eet cĩk athii cĩ ẽẽn Yudei gatan cĩ Nyekuco, adĩma woccia thẽk eeta cĩk athii cĩ ẽẽn Yudei nyarobinya cĩgĩk keelli lemnyiok cĩk Yudei. 28 Ĩthõng mĩ kẽdẽcaha tiic coo, ĩthõng kagawa ngatĩ umuddiaĩ nẽẽgẽ elinit coo dĩdĩ, ĩthõng thĩ, kikiyyia katĩ na keheronothiwung agiitia, ĩthõng thĩ, katĩ kũwa looca cĩ Thĩpania. 29 Kagga na kathĩ ne, ma ngĩ kikiyyia ĩcunung, kayaha katĩ gatan cobbi õrrõt cĩ Kiristo.
30 Gõtõõnõga kĩ ngõõnõga, kalayyung na agiit thaarĩy cĩk Makayyioit cĩnac Yesu Kiristo, kĩ mĩnana cĩ Ririwac cĩ Dĩhĩmĩ, otholliehangũ thõõth cĩ kadiimi ngĩ kakuni natẽ, ngatĩ alaweciangũ aneeta Nyekuc. 31 Alayyiõy, kĩĩ katĩ keeliay na athĩnẽy cĩk eet cĩk athii cĩ ẽẽn lemnyiok, looca cĩ Yudea, kĩĩ katĩ koccia kẽlẽmẽ tiici cannie natẽ lemnyiowĩy ĩcĩk callĩk cĩk Yesu Yeruthalẽma, 32 kĩĩ katĩ dimẽnta ĩcĩ Nyekuco, kakuni katĩ na ĩcunung talia, ĩthõng kivitia kebelbelit kĩ agiit kõdõwẽ, ĩthõng ketheryioy naaga vẽlẽk codoi codoi. 33 Anycĩk Nyekuc cĩ anyet ganõn kaavu kĩ agiit vẽlẽk kũdũt. Amẽn.