Nyĩ othooththu lemnyiok õõgĩ buth
14
Elemit et cĩ ayak leminit cĩ athii cĩ tiir, ĩthõng nyĩ etedicu ĩnõõnõ thoothonniok cĩk ẽpẽkanonu. 2 Anyi leminiti et ĩmma kadak nẽ kaal vẽlẽk, ĩthõng thĩ, eeti ĩmma cĩ athii cĩ tiir leminiti cĩnnẽ, aduk diatĩn dõ. 3 Eeti cĩ adak kaal vẽlẽk, athii woccia cĩ aharneei et cĩ athii cĩ adak kaal vẽlẽk,a ĩthõng eeti cĩ athii cĩ adak gii vẽlẽk, athii woccia cĩ eteedi nẽ thõõth gõõnĩ cĩ adak kaal vẽlẽk, nyatarka ẽlẽm Nyekuci ĩnõõnõ. 4 Aniitia ngẽnẽ cĩ woccia eteedi ticciannioit cĩ et ĩmma thõõth wo? Makayyioit cĩnnĩ dõ cĩ katĩ aduwa, ngĩ atican nẽ thõõth cĩ edeemothi, kõdẽ thõõth cĩ gerthe, ĩthõng Makayyioit katĩ dõ cĩ anyi ĩnõõnõ kĩdĩman thõõth cĩ edeemothi.5 Ahad eeti ĩmma athĩ ne, dĩhĩm waathĩnĩ ĩmma ijiar waathĩn ĩmma, ĩthõng umuk ĩmma ĩĩ ne, aduwõy wathinniowa vẽlẽk thõng. Anycĩk eet codoi codoi kayait muwẽẽnĩt kĩcĩ adiim nẽẽgẽ thõõtha ĩcoo. 6 Arĩcana eeti ĩmma waathĩn codoi dõ kijiar wathinniok vẽlẽk, aticanni noko, kĩĩ katĩ kubuluth nẽ Makayyioit kõr nĩcẽ. Ĩthõng eeti ĩmma cĩ adak kiding adak nẽ kĩĩ kĩdĩhĩth Makayyioit, ethei Nyekuc ne, ibalallẽ, ĩthõng eeti ĩmma cĩ athii cĩ adak kiding adĩhĩth nẽ Makayyioit, ĩthõng ennek Nyekuc ne, ibalallẽ. 7 Nyatarka athii cĩ karũgĩ naaga, nyatarka eleeti cĩgaac dõ, kõdẽ kadaaĩ, nyatarka eleeti cĩgaac dõ. 8 Mĩ karũgĩ naaga karũgĩ, nyatarka Makayyioit, ĩthõng mĩ kadaaĩ kadaaĩ, nyatarka Makayyioit. Ĩthõng thĩ, kõdẽ woyyia ngĩ karũgĩ, kõdẽ ngĩ kadaaĩ, ngaanĩ keegin eet cĩk Makayyioktak noko.
9 Nyatarka thõõth coo, adaaĩ balna Kiristo, ĩthõng ũrũga daaĩtha, kĩĩ katĩ kĩĩ nẽ Makayyioit cĩ daakciawu kĩ cĩ eet cĩk arũgĩ. 10 Nyia teedĩk niia thõõth goonogu õõgĩ cĩk ẽẽn lemnyiok cĩk Makayyioktak wo? Nyia hareek goonogu wo? Aavĩ katĩ kõr cĩ aku cĩ etedĩcet Nyekuci ageeta vẽlẽk thoothonniok cĩgaac. 11 Eheeddi Nyaragawa ĩcĩ Nyekuco athĩ ne,
“Aduwa Makayyioiti athĩ ne,
‘Kabũtani rũgẽta cannĩ kathĩ ne,
akatĩ katĩ eeta vẽlẽk kuthungti nguuma cannĩ,
ĩthõng katĩ ĩdĩhĩthĩt ahaatuana vẽlẽk Nyekuc!’ ”b
12 Ĩthõng thĩ, kaduwai katĩ naaga vẽlẽk codoi codoi thõõth cĩ eleeti cĩgaac Nyekuc, nyatarka thoothonniok cĩk kadĩman naaga.
Nyĩ anyiccu lemnyiok kẽgẽrẽthantõy
13 Ĩthõng thĩna, kibilli thẽk ngatĩ kẽtẽdĩcẽ lemnyiok thõõth. Ĩthõng thĩ, kẽnnẽ ĩdĩmantek niigia muwẽẽnĩt cunung, kĩĩ katĩ kithii cĩ adĩmanecu niigia gotoonogu, kõdẽ ngoonogu gimma cĩ ayahai ĩnõõgõ pĩrnanẽt. 14 Keeni na et cĩ karũmẽna kĩ Makayyioit Yesu, kagga na õrrõt ngĩ athii dainti cĩ ẽẽn riiriny mĩn tõ. Ĩthõng thĩ, mĩ ahad eeti ĩmma ngĩ athĩ ne, ẽẽn dainti riiriny, ẽẽn bõng yoko ĩcĩnnĩ riiriny. 15 Mĩ athii cĩ ẽbẽlbẽl lemnyioiti, nyatarka gii cĩ adai niinia, ĩthĩnga niia ayahi mĩnan. Nyĩ anyi gii cĩ adai niia kẽgẽrẽthan lemnyioit wũ balna adaaknĩ Kiristo, nyatarka ĩnõõnõ. 16 Ĩthõng thĩ, nyĩ anyiccu thõõth cĩ agayyu niigia athĩ ne, abũnna, kõthõõthẽ kĩthĩ ne, gẽrtha. 17 Nyatarka athii cĩ ẽẽn alaanthẽt cĩ Nyekuco cĩ duwẽnto, kõdẽ cĩ wũdẽnto, ĩthõng thĩ, ẽẽn alaanthẽt cĩnnẽ cĩ thõõth cĩ abũnna cĩ edeemothi, ĩthõng ĩthĩ cĩ kaatẽ ganõna kĩ cĩ kaatẽ talintia dĩdĩ cĩ aku Ririwaca cĩ Dĩhĩmĩ, 18 nyatarka eeti cĩ aticanothi Kiristo gõõla ĩcoo, anyi katĩ Nyekuc kẽbẽlbẽl, ĩthõng otongollie eeta ĩnõõnõ.
19 Ĩthõng thĩ, thẽk kĩtĩmanit ngatĩ kaatẽ ganõna, ĩthõng keelitõ eleeti cĩgaac, kayait leminit cĩ tiiri. 20 Nyĩ ẽgẽrẽthannu tiic cĩ Nyekuco, nyatarka dainit. Abũnna dainti vẽlẽk, ĩthõng thĩ, gẽrtha ngatĩ adaĩ eeti dainit cĩ anyi et ĩmma kẽgẽrẽthanõy. 21 Abũnna woccia ngatĩ athii cĩ kadaĩ kiding, kõdẽ kawũdĩ mẽrtẽ, kõdẽ kadĩmanĩ thoothonniok õõgĩ cĩk anyi lemnyioit kẽgẽrẽthanõy.
22 Ĩthõng thĩ, kaala vẽlẽk cĩk elemu niia, nyatarka thoothonniok cĩkkõ, anyĩk kaavu kõrgẽna cunni kĩ Nyekuc. Anyĩk Nyekuc kagatan et cĩ athii cĩ eteedi ẽlẽ cĩnnĩ mĩn thõõth, nyatarka thõõth cĩ adĩman nẽ cĩ edeemothi. 23 Ĩthõng thĩ, eeti cĩ akidan, etedothi katĩ thõõth ngĩ adak dainit nĩcẽ, nyatarka duwẽnĩt cĩnnĩ wo, athii cĩ aku lemintia, ĩthõng kaala vẽlẽk cĩk athii cĩ avvu lemintia, ẽẽn gerthetin.