1 Korinto 1

Nyaraga cĩ ẽẽn Codoi cĩ eheedi Paulo

Lemnyiok cĩk Kelethia cĩ Korinto

Thawinet kĩ lawinit cĩ Paulo

Aneeta Paulo balna cĩ ẽbẽrana Nyekuci kĩthĩ tionniait cĩ Kiristo Yesu dimẽnta cĩnnĩ, kõdõwẽ kĩ gotooniet Thõththẽnẽth.

2 Kẽhẽdacung na agiit Nyaraga coo, kelethia cĩ lemnyiok cĩk Nyekucak õlõõ ĩcĩ gaalawu cĩ Korinto. Ẽbẽrawung balna Kiristo Yesu agiit ĩĩtõ eet cĩgĩnĩk cĩk dĩhĩmĩk kir, ĩthõng alayyiowu kõdõwẽ kĩ eet õõgĩ vẽlẽk cĩk avvũ thar cĩk Makayyioit cĩnac Yesu Kiristo, cĩ ẽẽn Makayyioit cĩnĩng kĩ Makayyioit cĩnac buu.

3 Anycĩk niigia bũnnathĩt kĩ ganõn cĩ aku ĩcĩ Nyekuc Baangiet cĩnac kĩ Makayyioit Yesu Kiristo kaavu ĩcunung.

Ennek Paulo Nyekuc ne, ibalallẽ

4 Kennei na Nyekuc cannĩ dõõkĩthĩ ne, ibalallẽ, nyatarka bũnnathĩt cĩnnĩ cĩ anyung nẽ agiitia ĩcĩ Kiristo Yesu. 5 Nyatarka ĩnõõnõ, ivitiawu aballiowu niigia goolliowẽy vẽlẽk, gõõla cĩ othooththu kĩ gõõla cĩ gẽẽnyĩth cunung vẽlẽk, 6 nyatarka uduwawung thõõth cĩnang agiitia thõõth cĩ Kiristo, ĩthõng elemtu niigia thõõth cĩnnĩ ngatĩ ẽẽn dĩdĩ. 7 Ĩthõng thĩna, ayakcu niigia anyintiok vẽlẽk cĩk Ririwac cĩ Dĩhĩmĩ, nga ereyyu niigia õrrõt Makayyioit cĩnac Yesu Kiristo cĩ katĩ aku. 8 Anyung katĩ Nyekuci agiit ĩĩtõ tiirti kuumuc kõdõlan kõr cĩ katĩ õbõdanĩ Yesu, kĩĩ katĩ ĩmĩrĩt niigia kõrra cĩ Makayyioit cĩnac Yesu Kiristo. 9 Avvuyyung balna Nyekuci agiit ivitia ũrũmtẽ kĩ Ngẽrĩnĩ Yesu Kiristo Makayyioit cĩnac, ẽẽn nẽ Nyekuc cĩ athũnnĩ thoothonniok cĩgĩnĩk.

Ngẽrõnĩt kõrgẽna cĩ lemnyiowu kelethiawa

10 Kamanicung na agiit gõtõõnõga kĩ ngõõnõga, thaarĩy cĩk Makayyioit cĩnac Yesu Kiristo, ũrũmtẽ baai thẽk niigia vẽlẽk, kĩĩ katĩ kithii ngẽrõnĩtĩ kõrgẽna cunung tõ, kĩĩ katĩ ũrũmtẽ jurrung muwẽẽnta kĩ thinnetinẽy cuguk kõdõwẽ. 11 Gõtõõnõga kĩ ngõõnõga, aduwacca balna eeta gwuak cĩk avvu õlõõtõtõ cĩ Keloe etheca ne, egerenyonu da niigia nyaguana. 12 Thõõth cĩ kathĩ na wo athĩ ne, athĩ eeti ĩmma kõrgẽna cunung ne, “Kowobi na Paulo,” ĩthõng ĩĩ ĩmma ne, “Kowobi na Apoloth,” ĩthõng naboo ĩĩ ĩmma ne, “Kowobi na Pẽtũrũ,” ĩthõng naboo ngaanĩ athĩ ĩmma ne, “Kowobi na Kiristo.”

13 Engeryie wõnõ balna Kiristo thõng? Õdõddĩ da balna Paulo kurucea, nyatarka agiitia? Agamnyu da balna niigia batithimo thaarĩy cĩk Paulo? 14 Kennei na Nyekuc ne, ibalallẽ, nyatarka ngaanĩ balna kagamewung na agiit batithimo. Kirithpoth balna dõ kĩ Gauth, cĩk balna kagamei na batithimo, 15 kĩĩ katĩ, athii woccia eeti ĩmma cĩ õthõõth athĩ ne, agameca balna Paulo aneeta batithimo thaarĩy ĩcĩgĩnĩk dõ, kĩĩ katĩ kĩthĩ na et cĩnnĩ. 16 Dĩdĩ, kagamea balna na eet cĩk kõrõõk cĩ Ithtivanathĩ buu batithimo, kijiar thõõth nĩcẽ, athii cĩ kahada da balna ngĩ kagamea et ĩmma batithimo. 17 Nyatarka athii balna cĩ itionana aneeta Kiristo kikiyyia kagamek eet batithimo, etheca balna nẽ aneeta ne, limanek eet Nyemut cĩ Abũnna, athii cĩ ẽnnẽ gẽẽnyĩtha cĩ et cĩ olli, kõdẽ thoothonniowẽy ĩcĩk kõthõõthẽ jurrung, kĩĩ katĩ athii tiirthẽtĩ cĩ kuruce cĩ Kiristo cĩ athii.

Ẽẽn Kiristo tiirthẽt kĩ gẽẽnyĩth cĩ Nyekuco

18 Nyatarka ẽẽn nyemut cĩ kurucewo giithakthẽt ĩcĩ eet cĩk katĩ adaaĩ, ĩthõng thĩ, ĩcĩnac cĩk keelliay wo, ẽẽn nyemut coo tiirthẽt cĩ Nyekuco. 19 Nyatarka athĩ Nyekuci Nyaragawa cĩnnĩ ne,

“Kathaani katĩ na gẽẽnyĩth cĩ eet cĩk athĩ ne,

kẽgẽẽnyca, ĩthõng kẽgẽrẽthana eet cĩk athĩ ne,

kagayya thõõth, ĩthõng kẽgẽẽnyca õrrõt.”

20 Aavĩ eeti cĩ ẽgẽẽnyĩ wo nga? Aavĩ eeti cĩ aga thõõth õrrõt nga? Aavĩ eeti cĩ aga thõõth cĩ atukwuan wo nga? Ngaanĩ wõnõ balna kaanyĩk Nyekuci gẽẽnyĩth cĩ loocu kigiithe? 21 Ẽgẽẽnyĩ balna Nyekuci ngatĩ athii cĩ anyĩcẽ eet cĩk looc coo kiticantõĩ gẽẽnyĩth cĩnĩng kagayyi ĩnõõnõ. Ĩthõng thĩ, kẽnnẽ balna ẽbẽra Nyekuci ngatĩ ẽẽlĩ eet cĩk ẽlẽmĩ nyemut cĩ agiithi cĩ balna irionni wo dõ. 22 Adiim eeta cĩk Yudei thoothonniok cĩk anaat eeta, ĩthõng idiimitõ eeta cĩk Girihi gẽẽnyĩth, 23 ĩthõng thĩ, ĩcĩnang kalimanna naaga thõõth cĩ ododdinie Kiristo kurucea, kĩĩ katĩ kũdũman gerthetin cĩ eetu. Abũrĩ eeta cĩk meelĩk cĩk ẽẽn Yudei nyemut coo. Ĩthõng ahad eeta cĩk meelĩk cĩk athii cĩ ẽẽn Yudei nyemut cĩnang wo athĩ ne, ẽẽn giithakthẽt, 24 ĩthõng thĩ, ĩcĩ eet cĩk balna avvũ Nyekuci cĩk ẽẽn Yudei kĩ Girik vẽlẽk, ẽẽn Kiristo tiirthẽt cĩ Nyekuco, ĩthõng ĩthĩ gẽẽnyĩth cĩ Nyekuco. 25 Nyatarka giithakthẽt cĩ Nyekuco, ẽgẽẽnyĩ nẽ ijiar gẽẽnyĩth cĩ eet vẽlẽk, ĩthõng kõdẽ woyyia ngĩ aavĩ Nyekuci kĩcĩ athii cĩ tiir, monogo nẽnnẽ tiir nẽ ijiar eet vẽlẽk.

26 Gõtõõnõga kĩ ngõõnõga, ahaddia da nõõnõ, attiyyu balna niigia kuu, balna ngĩ ẽbẽranung agiitia Nyekuci, dĩcẽ balna eeta cĩk ẽgẽẽnyĩ kõrgẽna cunung gõõla cĩ muwẽẽnĩt cĩ eetu, ĩthõng dĩcẽ balna kõrgẽna cunung eeta cĩk ayak makathĩt thõõtha cĩ õthõõthĩ, ĩthõng balna dĩcẽ kõrgẽna cunung eeta cĩk avvu korookjiowẽy ĩcĩk aballie. 27 Ĩthõng thĩ, ẽbẽra balna Nyekuci thoothonniok cĩk giithakthẽt cĩ looc coo, kĩĩ katĩ kaanyĩk ngawani eet cĩk ẽgẽẽnyĩ, ĩthõng ẽbẽra thoothonniok cĩk athii cĩ tiirti cĩk loocu, kĩĩ katĩ kaanyĩk eet cĩk tiirtik ngawani. 28 Ẽbẽra balna Nyekuci kaal cĩk aharneei eeta cĩk looc coo kĩ kaal cĩk athii cĩ addi, ĩthõng adĩmanini nẽ kaal cĩkkõ kathaanĩ thoothonniok cĩgĩk cĩk addi, 29 kĩĩ katĩ kithii eeti cĩ ẽngẽrẽn nguuma cĩnnĩ tõ. 30 Nyatarka itiona balna Nyekuci Yesu Kiristo kikiyyia keelung agiitia. Ĩnõõnõ thĩ cĩ ellet Kiristo ageeta, ĩthõng anyet kĩĩtõ eet cĩgĩnĩk cĩk elemnyet nẽ cĩk callĩk. 31 Ĩthõng thĩna, kĩcĩ eheeddi Nyaragawa ĩcĩ Nyekuco athĩ ne, “Anycĩk niigia et cĩ irian, kirianĩ Makayyioit.”