Thõõth cĩ Kiristo kĩ cĩ kuruce cĩnnĩ
2
Gõtõõnõga kĩ ngõõnõga, kõr wũ balna kawũnnẽ na ĩcunung, athii balna cĩ kakuni na kĩĩ kõthõõth thoothonniowẽy ĩcĩk kõthõõthẽ jurrung, kõdẽ kĩ eeti cĩ kegeenyi õrrõt thõng, kakuni balna na kuduwawung thõõth cĩ Nyekuco. 2 Ĩthõng dĩdĩ, balna ngaanĩ karũmẽ naaga kĩ agiitia, kẽbẽra balna na ngĩ kothoothi thõõth wũ balna ododdinie Yesu Kiristo kurucea dõ. 3 Kakuni balna na ĩcunung athii cĩ keeni tiir, ĩthõng kongollie looc, ĩthõng kabarrita õrrõt. 4 Athii balna cĩ ayak nyemut cannie kĩ liman cannĩ thoothonniok cĩk ẽgẽẽnyĩ kĩ thoothonniok cĩk nũmnũmmanintiak, ĩthõng thĩ, balna kalimani na tiirthẽta cĩ Ririwac cĩ Dĩhĩmĩ, 5 kĩĩ katĩ kithii leminiti cunung cĩ aavĩ gẽẽnyĩtha cĩ eetu, ĩthõng thĩ, aavu tiirthẽta cĩ Nyekuco.Gẽẽnyĩth cĩ Ririwac cĩ Dĩhĩmĩ
6 Ĩthõng thĩna, kõthõõththa naaga nyemut cĩ gẽẽnyĩtho meelitina cĩ eet cĩk okomit lemintia, ĩthõng thĩ, kẽnnẽ athii cĩ kõthõõththa gẽẽnyĩtha cĩ looc coo, kõdẽ gaala cĩk looc coo, cĩk katĩ athii kaganoko. 7 Athii tõ, ĩthõng thĩ, kõthõõththa naaga gẽẽnyĩth cĩ Nyekuco cĩ balna alugunyi, wũ balna ẽbẽra Nyekuci kĩĩ cĩ bulẽnĩt cĩnac balna ngaanĩ ketengenyiay tammutiddin kĩ looc. 8 Athii balna cĩ aga makayyiowa cĩk looc coo gẽẽnyĩth coo kũdũt. Ma baalia kagaacõ, athii woyyia baalia nẽẽgẽ cĩ õdõddĩcẽ Makayyioit cĩ abulie kurucea. 9 Ĩthõng thĩ, kĩcĩ eheeddi Nyaragawa ĩcĩ Nyekuco athĩ ne,
“Ẽẽn kaala cĩk ngaanĩ kĩcĩn keberecĩ,
kõdẽ ngaanĩ kĩthĩrar kĩtatĩ,
ngaanĩ kagga õõ kũdũt,
ẽẽn kaal cĩk balna ĩdĩmanek Nyekuci eet
cĩk amĩnan ĩnõõnõ.”a
10 Ĩthõng thĩ, balna eyelehet Nyekuci ageeta kaal cĩkkõ Ririwaca cĩnnĩ. Ẽrẽpan Ririwacĩ thoothonniok vẽlẽk, kõdẽ woyyia thoothonniok cĩk addi cĩk Nyekucak. 11 Nyatarka ngẽnẽ kõrgẽna cĩ eetu cĩ aga muwẽẽnĩt cĩ eeto kijiar ririwac cĩ aavĩ eta nĩcẽ? Ĩthõng gõõla cĩ aduwõy thõng, athii eeti cĩ aga muwẽẽnĩt cĩ Nyekuco tõ, ĩthõng thĩ, Ririwac cĩ Nyekuco dõ cĩ aga. 12 Athii balna naaga cĩ kamũdana ririwac cĩ looc coo, ĩthõng thĩ, kamũdana naaga Ririwac cĩ Nyekuco, kĩĩ katĩ woccia kivitia kagaac naaga kaal cĩk abũnna õrrõt cĩk anyet Nyekuci kaganoko. 13 Thõõth cĩ kõthõõththa naaga wo coo, athii cĩ kõthõõththa gẽẽnyĩtha cĩ alimannecet eeti ĩmma, ĩthõng thĩ, kõthõõththa gẽẽnyĩtha cĩ alimannecet Ririwacĩ cĩ Dĩhĩmĩ, limana cĩ ẽyẽla thoothonniok cĩk Nyekucak cĩk ẽẽn dĩdĩ. 14 Eeti cĩ athii cĩ ayak Ririwac cĩ Nyekuco, athii cĩ ẽlẽmĩ thoothonniok cĩk avvu Ririwaca cĩ Nyekuco, nyatarka ẽẽn thoothiowa neekie giithakthẽt ĩcĩnnĩ, ĩthõng athii woccia cĩ athĩrar nẽ thoothonniok nĩĩkẽ, nyatarka agayyi nẽẽgẽ Ririwaca cĩ Nyekuco dõ. 15 Eeti cĩ aga liman cĩ Ririwac cĩ Nyekuco, aga ngatĩ ẽtẽẽdĩ thoothonniok vẽlẽk, ĩthõng thĩ, kolli et cĩ woccia eteedi ĩnõõnõ thõõth. 16 Eheeddi thõõth cĩ ajinie Nyaragawa ĩcĩ Nyekuco athĩ ne,
“Nyatarka, ngẽnẽ balna cĩ aga muwẽẽnĩt cĩ Makayyiokto?
Kõdẽ ngẽnẽ woccia cĩ aliman ĩnõõnõ?”b
Ĩthõng thĩ, kagga naaga muwẽẽnĩt cĩ Kiristo.